حرکت ده دموکراسی دا لازیم دیر

 

بیرلیک اولمایان یئرده ، دیریلیک ده اولماز

 

هر نه دن اؤنجه دئمه لی یه م کی من بو یازیم دا چالیشاجاغام ، آذربایجان چالیشقانلارینین اراسیندا بیر پارا توققوشمالارین نده نین آراشدیریب و اونلارا گؤره اؤز باخیشیمی بیلدیره م. یئنه هر نه دن قاباغ بونو دا دئمه لی یه م کی ، من بو یازی لا ، یوزه یوز بیر سیرا آداملارا توخوناجاغام. کی آللاه بیلیر منیم قصد و نیتیم بو دئییل ، بلکه اگر بئله بیر ایش قاباغا گلسه ، بو او آداملارین باخیشلارینین دارلیغیندان دیر. من بونا امینم کی ، بو یازی نین یاییلماسین دان بیر نئچه گون سونرا ، فلان کس لر بیانیه چیخاردیب و دئسینلر کی من بو یازینین یازاری ، اینگیلیسین گیزلی سئرویسیندن پارا آلیب و ایندیسه ده آوروپانین ، ان یاخشی شهرلرینین بیرینده بیر ویلادا یاشاییرام. آما تاریخ سونرالار گؤستره جک کی کیملر پارا آلیب و کیملر آذربایجان یولوندا دوزگون چالیشیردیلار.

آذربایجانین میللی حرکاتی ندن بوگونکو وضعیته دوشوب؟ ندن هر یئریندن دوران آدام لیدرلیک ایددعاسی ائدیر؟ ندن بیر بئله توققوشمالار اؤز آرامیزدا اولور؟ ندن بیر آذربایجانلی چالیشقان اؤز یول بیر قارداشینا ، ساتقینلیق ایتتیهامی وورور؟ ندن بیر سیرا آداملار ایسته ییر لر ، هر نه چابانی اؤز آدلارینا قورتاریب ، اؤزلرینی بویوک آدام گؤسترسینلر؟ ندن ... ندن ... ندن ...

گئچنکی گونلرده ، «گاموح»ون لیدری ، تورکیه نین تئلویزیاسینین ت.گ.ر.ت کانالینا چیخاراق بیر سیرا دانیشیقلار آپاردی. یئنه هر نه دن آرتیق گؤزه ده یه ن بیر نوکته بو مسئله ایدی کی او برنامه ده ، دوکتور ماحمودعلی چهرگانلی دان ، گونئی آذربایجانین تورک لری نین لیدری عنوانیندا آد آپاریلدی.

منه بو بیر تعجب ائله مه لی مسئله ایدی. بیز آذربایجانلی لار ، نه زامان چهرگانلی بئیی اؤزوموزه لیدر سئچمیشیک؟ مینم کی خبریم یوخدور ، شاید دونیانین بیر پارا زورلی مملکت لرینین طرفیندن بو مسئله اولوب و بیزیم خبریمیز یوخدور. شاید ... . هر حالدا اورایا کیمین کی منیم خبریم وار ، گونئی آذربایجان دا ایندیه قدر ، هئچ جوره سس وئرمه اولماییب ، هئچ جوره اؤیه آلماق اولماییب ، و هئچ جوره لیدر ده سئچیلمی ییب. اگر بو گون هر کس ایستییه ، اؤزونو آذربایجان میللتینه لیدر عنوانیندا تحمیل ائتسین ، بو بیر ظولم دیر آذربایجان میللتینین حاققیندا و بو میللت ده اؤزونه ظولم ائده نلری اونوتمویاجاق.

آخی نه قدر گرک دئییلسین کی ، چهرگانلی بئی ! قارداشیم ! سن اؤزویون بیر پولیتیکال پارتیاسینین لیدری تانیتدیرگینان ، میللتین لیدری یوخ.

آخی اگر قرار اولسا ، بیزیم بو حرکتیمیزین سونوندا بیر سیرا زور دییه ن ، دموکراسی یا اینانی اولمایان و اؤز سؤزونو زورلا ، او بیری له ره تحمیل ائدن ایش اوسته گلیب و بیر توتالیتر حکومت یولا سالسین ، بیزیم بو یئره توکولن قانلارین نه فایداسی اولاجاق.

دوکتور چهرگانلی بئی ! سیزین گوناز تی وی یه چیخیشیز دا هله یادیمیزدان چیخماییب. او چیخیشدا دا گؤردوک کی سیز نه قیلیق دموکراسی یه اینانیز وار. او دموکراسی کی فقط سیزی تایید ائتسین. والسلام.

سیز او چیخیشدا ، ائیمیزین بیر قهرمان اوغلونو (آشیق جبرائیلی) ، تلویح ایله ایططیلاعات ماموری تانیتدیریب و اونو پیسله ییرسیز. نیه؟ چونکو او بئچارا ، گوناز تی وی پروگرامینا تلفون ائدیب و بیر سیرا سؤزلر سؤیله دی ، کی سیزین خوشوزا گلمه دی. آخی بو بئچارا ، دئدی : چهرگانلی به سن ایران دان چیخاندان دئمیشدین که من افقی یا عمودی ایرانا قاییداجاغام ، به نه اولدو ، نیه قاییتمادین؟

بلی ائله بو بیر سؤز باعیث الودو ، چهرگانلی بئی ، او بئچارانی کی آذربایجان یولوندا ، عمرونو فدا ائدن آدام ، بیر ساتقین و خائن آدام آدلانسین. ائله بو راحات لیقلا.

دوکتور چهرگانلی بئی سیزین بئله بیر یول توتمالارینیز منی ، اسلام جمهوریتی نین باشچی لارینین ایش لرینین یادینا سالیر ، کی هر کس بونلارین رهبرلری نین سؤزون دن آرتیق بیر کلمه دانیشسا ، اونا ضد اینقیلاب ، مورتد ، کافر و ... ایتتیهام وورولوب و بئچارانی وارلیقیندان سالارلار. منیم عزیز قارداشیم گلیب و بونلارین یانلیش یوللارینی ایزله مییه ک.

 

بو دانیشیق فقط ، چهرگانلی بئیه راجیع دئییل ، بلکه اونون طرفدارلارینا دا شامیل اولور. یئنه ده گئچن کی گونلرده ، ایکی دنه عزیز قارداشلاریمیزین توققوشماسی بیزی کدرلن دیردی.

«توران قاراپاپاق» و «مسعود انتظار» بئی لری بیربیرنه ، دوشمن سئویندیرن سؤزلر دییه رک ، آذربایجان یولوندا بیرلیکی اونوتوب بیر سیرا مسائلی بیان ائتدیلر ، کی من اؤزومه لازیم گؤردوم کی بو مسئله یه راجیع ده سؤز آچیب و اؤره ک سؤزومه بونلارا و بوتون آذربایجانلی لارا سؤیله یه م.

 

آخیر منیم قارداشلاریم ! بیز نه زامانا کیمین گرک اؤزوموز له چیرپیشیب و باشقا مسئله لری یادا سلمی ییب و اونلاردان خبرسیز قالمالی ییق؟

توران قاراپاپاق بئی ! من سیزه بو حاققی وئریره م کی ، گاموح پارتیاسی نین اؤیه سی اولاراق ، او پارتیانین گؤروشون و مرامیمن تبلیغ ائده سن. آما بو او معنایه دئییل کی سیز باشقا گؤروش صاحاب لارین ساتقین ، خائن ، دوشونمز و ... آد وریب و یالنیز اؤزونوزو دوز یولدا گؤره سینیز.

نئچه واقت بوندان اؤنجه ، «کمیته فانتاباغی» آدلی بیر ییغیناق ، بیر بیانیه چیخاردیب و «مسئود انتظار» بئی لرینه ، اللریندن گلن ایتتیهام لاری ووروب و حتتا بیر مبلغ پارا دا مشخصاً دئدیلر کی بو آدام یابانجی لاردان آلیب. بو کمیته نین گاموح پارتیاسیندان اولماقی هئچ کیمسه یه گیزلی دئییل. ایندی بو مسئله آرایا گلیر کی گاموح چیلار ندن بیر آذربایجان چالیشقانی نی ایسته ییرلر آرادان گؤتوروب و حذف ائتسینلر؟

شاید بو آدامین ، اونلارلا مختلف باخیشلارینا گؤره دیر. کی اگر بئله اولسا ، بیز گرک ایندی دن دموکراسی یه بیر فاتحه اوخویوب و اونون خئیریندن گئچه ک. نیه کی بونلار ایش اوستونه گلمه میش بئله لیک له اؤزلرینین موخالیفت لری نی دموکراسی له بللن دیردیلر. اگر بونلار ایش اوسته گلسه لر ، نه ائیلییه جکلر؟

منیم عزیز گاموح چی قارداشلاریم نه اوچون هله هئچ بیر زاد اله گتیرمه میش ؛ اونو بؤلمه فیکرینده سیز؟

من هله بونو یاخشی دوشونموره م کی گاموح چیلار ندن بیر بئله بایراق و الفبا باره سینده ایصرار ائدیب و هئچ کیمین سؤزونه قولاغ آسمیییب و اؤز سؤزلرینی قرآن آیه سی کیمین دئییشیلمز بیلیرلر؟

منیم عزیز قارداشلاریم الفبا مسئله سینه گؤره ، پروفسور هیئت دن یاخشی و اویغون بیر شخص تانیرسیز؟ ندن اونون نظرین بو مسئله دن سوروشمورسوز؟ ندن بیر الفبانی کی نئچه یوز ایل دیر اونلا یازیب ، اوخوموشوق ، گرک بیردن بیره دئییشیب و لاتین الفباسینه اوز گتیرمه لی ییک؟ اولمایا سیز قوزئی آذربایجان دا کی قارداشلاریمیزین و ها بئله تورکیه جمهوری تینین تجربه سین دن خبریز یوخدور؟ من ایسته میره م لاتین الفبا و عربجه الفبانین مقایسه سینه گیره م . نیه کی آرتیقراق واقت و فرصت ایسته ییر ، ها بئله بو مسئله ده ادبیات ساحه سینده چالیشان لیدرلریمیزین باخیش لاری و نظرلری بیر یئره توپلانیب و بیر مشخص سونوج آلینمالیدیر. تکجه بیر سؤز دئمه لی یم کی ندن پروفسور هیئت ، پروفسور نطقی ، پروفسور زهتابی و باشقا عزیزلریمیز بئله بیر ضرورت ایحساس ائتمه میش لر کی بیزیم دیلیمیزین الفباسی دئییشیلمه لیدیر ، آما سیز عزیزلر که بیر پولیتیکال پارتیادا چالیشاراق بئله بیر ایحساسا صاحاب اولموسوز؟

آما بایراق ، باشقا مسئله دیر کی گرک اونون دا باره سینده دانیشمالی یام. منیم عزیز قارداشلاریم کی گونئی آذربایجان اوچون بایراق یارالدیرسینیز (ایندیه قدر 10 دنه بایراقی من اؤزوم گؤرموشه م) ندن سیز هر نه دن اؤنجه بایراق چیخاردماق فیکرینده سینیز؟ آخی او زامان کی نئچه دنه بایراق چیخیب و بو اؤزو حرکتین نئچه پارچا اولماسینا سبب اولور ، ندن بو بایراق اوستونده ایصرار ائدیرسیز؟

سیزلرین وئردیغینیز بایراق لارین هانسی سس وئرمه ده ، سس آلیبلار؟ هانسی رفراندم دا میثال اوچون گاموح وئره ن بایراق ، رای آلیب و میللت طرفیندن تصویب اولونوب؟

اگر قرار دیر آذربایجان میللتی اؤزو اؤزونه تصمیم توتسون ، بیلمه لیسیز کی هله لیک میللت بایراق باره سینده اؤز تصمیمی نی توتماییب. آما اگر یوخ ، ائله سیز قراردیر ایسلامی جمهوریتی کیمین بو میللتته قیّـم اولوب و اؤز تصمیمیزی اونلارا تحمیل ائده سینیز ، بو بیر باشقا مسئه دیر. لوطف ائدین بو مسئله نی آیدینلیقلا میللتیمیزه دئیین. مییلت اؤزو سون تصمیمی توتاجاقدیر.

 

(بو یازی نین آردی اولاجاقدیر)

 

آذتورک

 

 

گلجک بیزیمدیر

 

اسامی چندین زندانی سیاسی در آذربایجان که خبری از آنها در دسترس نیست

 

به گزارش یکی از فعالین حرکت ملی و آذبیلتوپ از سرنوشت بازداشت شدگان زیر خبری در دسترس نیست"

 

1.     محمد بحری 25 ساله تبریز

2.     خسرو کنعانی 20 ساله تبریز

3.     جواد کنعانی 21 ساله تبریز

4.     محمد نجفی 30ساله تبریز

5.     محمد علیپور28 ساله تبریز

6.     حسین احمدیان 38 ساله تبریز