|
|
"Ayna"nın son saylarından birində Tehranda çıxan
"İran" qəzetinin uşaqlar üçün
həftəliyində Azərbaycan türklərini təhqir
edən yazı və bununla bağlı etiraz aksiyaları
haqda məlumat vermişik.
"İran" çap etdiyi yazıya görə Azərbaycan türklərindən
iki dəfə üzr istəsə də, etirazçılar bu
qəzeti qeydiyyata almış uyğun rəsmi qurumların,
o cümlədən Mədəniyyət və İslami İrşad
Nazirliyi, eləcə də prezident aparatının da eyni
addımı atmasını tələb edirlər.
Bu arada son hadisələrlə bağlı başqa
millətlərin İrandakı rejimə müxalif təşkilatları
da etiraz bəyanatları veriblər.
Azərbaycan Demokrat Firqəsi İnformasiya və
Mətbuat Mərkəzinin yaydığı xəbərə
görə, iranlı ərəblərin Ərəb Xalqının
Demokratik Cəbhəsinin sözçüsü Rafiq Əbu Şərif
məsələyə münasibət bildirərək deyib:
"Biz son hadisələri pisləyərək ərəb
millətinin Cənubi Azərbaycan türklərini (ifadə
onlara məxsusdur - S.) müdafiə etdiyini bəyan edirik".
Həmin bəyanatda vurğulanır ki, ərəb xalqı
və onların siyasi nümayəndələri milli hüquqların
əldə olunması və milli müqəddəratın
təyin edilməsinə nail olmaq üçün İranda milli zülmə
məruz qalmış xalqlar, özəlliklə Cənubi
Azərbaycan türkləri ilə birgə mübarizəyə
hazırdır.
Ərəblərin cəbhəsi onu da bəyan edib ki, baş
vermiş son hadisə insan haqlarına və beynəlxalq hüquq
normalarına ziddir.
 Yeri
gəlmişkən qeyd edək ki, Ərəb Xalqının
Demokratik Cəbhəsinin mərkəzi qərargahı
Londonda yerləşir. Onun ərəb dövlətlərində
də nümayəndəlikləri fəaliyyət göstərir.
Hətta tanınmış "əl-Cəzirə"
televiziya kanalında da bu qurumun məlumatları yayımlanır,
təmsilçiləri çıxış edirlər.
İran parlamentində təmsil olunan bəzi azərbaycanlı
deputatlar da aksiya iştirakçılarının addımlarının
doğru olduğunu bildiriblər. Şərqi Azərbaycan
əyalətindən olan deputatlar Rza Rəhmani, Əkbər
Ələmi və İşrət Şaiq ölkə
parlamentində çıxış edərək qəzetdə
çap olunmuş yazıya etiraz etdiklərini söyləyiblər.
Onlar prezident aparatı və Mədəniyyət və
İslami İrşad Nazirliyinin məsuliyyət daşıdığını
deyərək vurğulayıblar ki, həmin qurumlar bu
məsələnin haradan qaynaqlandığını araşdırmalıdır.
"Belə bir yazı və şəkilin çap olunması
məqsədyönlüdür. Qəzet bunu özbaşına edə
bilməz", - deyə Rza Rəhmani söyləyib.
Bu üç millət vəkili məsələnin tezliklə araşdırılmasının
vacib olduğunu belə bildiriblər: "Əks halda mövcud
vəziyyət nəzarətdən çıxacaq".
Həmin çıxışları ilə onlar hakimiyyəti
xəbərdar ediblər.
Tələbə və gənclər məsələ
ilə bağlı etiraz aksiyalarını davam
etdirməklə yanaşı, baş vermiş olayla əlaqədar
bəyanat da yayıblar. Buna dair Güney Azərbaycan ərazisindəki
azərbaycanlı tələbələr, "Azbiltop"
tələbə qurumu və ümumiran universitetlərinin türk
tələbələri ayrı-ayrılıqda bəyanat
veriblər. Həmin etiraz bildirişlərinin məzmunu oxşardır.
"Azbiltop" bəyanatında "İran"ın
hərəkətlərini pisləyərək bunları
bildirib: "Karikatura 80 il yaşı olan farsçılığın
davamıdır. Həmin ideologiya indi İslam Respublikası
hakimiyyətində də özünü göstərməkdədir.
Bu sayaq yazıları çap edənlər və düşünənlər
İrana Ana Yasanın Azərbaycan türkləri
tərəfindən gətirildiyini yaddan çıxarmamalıdır...
İran - İraq savaşında ölkənin ərazi bütövlüyü
uğrunda ən çox həlak olanların da azərbaycanlılar
olduğunu unutmaq ən azı dar düşüncəlilikdir.
Mərkəzdə oturanlar unutmasınlar ki, biz Şah
İsmayıl Xətai, Səttarxan, Şeyx
Məhəmməd Xiyabani, Bakiri (İran - İraq müharibəsinin
əfsanəvi qəhrəmanı - S.) və başqa bu
kimi Azərbaycan türklərinin davamçılarıyıq. Biz
icazə vermərik ki, tarix boyu saxlayıb qoruduğumuz dövlət
yenə də Azərbaycana qarşı mübarizə aparsın.
Daxildəki və xaricdəki paniranistlər,
panfarsistlər unutmasınlar ki, şahı qovduğumuz
kimi, bizə qarşı olan başqa qüvvələrə
də cavab verə bilərik".
Heç kimə sirr deyil ki, İran əhalisinin çoxunu
Azərbaycan türkləri təşkil edir.
 Amma
təəssüf ki, hakimiyyətdə təmsil olunan
azərbaycanlılar millətimizin çətin anlarında ona
arxa dura bilmir. Bəyanatda tələbələr bu
məsələni belə vurğulayıblar: "İran
hakimiyyətindəki məsul şəxslər, o cümlədən
güc strukturlarındakılar, habelə islam inqilab keşikçiləri
qvardiyasındakıların yarısından çoxu
Azərbaycan türküdür. Biz üzümüzü onlara tutaraq deyirik:
"Ey hakimiyyətdəkilər, bu, sizlərin də açıq-aşkar
təhqir olunması deməkdir. Buna nə vaxtadək dözəcəksiniz?".
İranın futbol üzrə yığma komandasının
əsas heyətində də Azərbaycan türkləri çoxluq
təşkil edir. Tələbələr bu komandada İran
bayrağını yüksəltmək uğrunda mübarizə
aparan azərbaycanlılara müraciətlərində bunları
deyiblər: "Sizi "tarakan" adlandırırlar.
Ancaq şərəfini qoruduğunuz futbol komandasının
geyiminin yaxasında "Fars ulduzları" ifadəsi yazılmış
ideoloji şüarı daşıyırsınız. Əgər
"İran" qəzetində şəkil və yazı
ilə bağlı dövlət rəsmiləri üzrxahlıq
etməzlərsə, o zaman siz də komandanı tərk
edin...".
İyul ayında Babək qalasına ənənəvi yürüşün
keçiriləcəyi gözlənilir. Hakimiyyətin
Azərbaycanda baş vermiş etiraz aksiyalarından istifadə
edərək bu tədbiri də əngəlləyə
biləcəyi ehtimalı var. Tələbələr
həmin təhlükəni dəf etmək üçün aksiya iştirakçılarını
daha ayıq-sayıq olmağa və Azərbaycan milli
hərəkatına ziyan vura biləcək addımlar
atmaqdan çəkinməyə çağırıblar.
Xatırladaq ki, "İran" qəzeti hakimiyyətin
"İRNA" adlı xəbər agentliyinin orqanıdır.
Dünyanın bir çox ölkələrində olduğu kimi, onun
Bakıda da nümayəndəliyi rəsmi olaraq
fəaliyyət göstərir.
Yeri gəlmişkən, vurğulamaq istərdik ki, "İran"ın
təhqiri təkcə Cənubdakı soydaşlarımıza
şamil edilməməlidir. Bu təhqir bizə də aid
edilə bilər. Ona görə də "İRNA"-nın
törəməsinə rəsmi şəkildə layiqli bir
cavab verilməlidir. "İran"ı qeydiyyata alanlar
rəsmi üzrxahlıq məktubunu rəsmi Bakıya da ünvanlamalıdırlar...
|
|
