İranda azərbaycanlıları karikatura vasitəsilə taxtabiti adlandırmış "İran" qəzeti ilə bağlı bu ölkədəki soydaşlarımızın etiraz aksiyaları səngimək bilmir. Təbriz, Tehran və Urmiyə şəhərlərindəki universitetlərin tələbələrinin genişmiqyaslı çıxışlarına dünən Zəncan, Xoy, Miyana, Maku, Marağa, Ərdəbil və Urmu şəhərlərindəki gənclər də qoşulub.
Tam əksəriyyəti universitet tələbələri olan gənclər oxuduqları ali təhsil müəssisələrinin qarşısında aksiyalar keçirməklə kifayətlənməyərək şəhər küçələrinə çıxaraq mitinqlər düzənləyiblər.
Onlar "İran" qəzetində təhqiredici karikaturanın müəllifi olan şəxsin cəzalandırılmasını, qəzetin bütün azərbaycanlılardan "yetərli səviyyədə və qaydasında" üzr istəməsini tələb ediblər.
"İran" qəzeti üzrxahlıq yazısı dərc etsə də, gənclər bunu "bəs edəcək iş" saymırlar.
Bu arada Təbrizdə "Güney Azərbaycan Fədailəri" adlı təşkilatın təmsilçisi Sabir Sultani həbs olunaraq ağır işgəncələrə məruz qalıb. GAF-dan qəzetimizə verilən məlumata görə, təşkilatın koordinatoru Təbrizin Ertəş xiyabanında yerləşən İran Ordu Hərbi Əks-Kəşfiyyatı İdarəsinin əməkdaşları tərəfindən tutulub, sonra da "Səhənd Fotoqrafçılıq" adlı şirkətin ofisinə aparılaraq orada saxlanılıb.
Gözübağlı S.Sultaniyə saatlarla işgəncə verildiyi deyilir. "Musəvi adlı şəxs dindirmə zamanı Sabir Sultaninin ayaqlarına qaynar su tökərək ondan "Güney Azərbaycan Fədailəri" təşkilatı barədə bildiyi bütün məlumatları verməsini tələb edib", - GAF-ın bilgisində vurğulanır.
S.Sultani indiyədək dəfələrlə saxlanılıb və dindirilib.
Azərbaycan Demokratik Firqəsindən verilən məlumatda isə vurğulanır ki, "İran" qəzetində karikatura ilə bağlı şəxslər layiqli cəzalarını almayınca etiraz aksiyaları davam edəcək.
Xatırladaq ki, qəzetin dərc etdiyi karikaturada bir yekə taxtabiti masanın arxasında, kətildə oturub. Onunla üzbəüz dayanmış uşaq taxtabitidən soruşur: "Axı niyə belə çirkin şəraitdə yaşayırsınız?" Taxtabiti cavabında deyir: "Nəmənə?"
Uşaq da taxtabitiyə söyləyir: "Axı sizə necə başa salım? Siz heç öz dilinizi bilmirsiniz. Sonra da söyləyirsiniz ki, bəs niyə biz başqa dillərin təsiri altındayıq. Onsuz da sizin həyatınız ayaqyolunda keçir. Yediyiniz isə nəcisdir. Taxtabiti yaşayışı bundan artıq ola bilməz".
Azərbayanlıları da hiddətləndirib çilədən çıxaran xalqımızın nəcis yeyən taxtabitiyə bənzədilməsidir.
Təbrizdəki Şərif Cəma adına Politexnik Universitetində başlayıb sonradan Səhənd Universitetində davam edən aksiyalar Əllamə Təbatai, Rəcai, Əl-Zəhra, Behişti, İmam Sadiq, İslam İnqilabı, Əmir Kəbir, Elm və Texnologiya, Pedaqoжi və Tibb Universitetlərində də təkrarlanıb.
Gənclər 19 mayda qutlanan "Azərbaycan Tələbə Günü" və "İran" qəzetindəki iyrənc karikatura ilə bağlı bir sıra qərarlar qəbul ediblər.
Dünən Səhənd, Təbriz, Azad Təbriz, Azad Merga universitetlərində keçirilən mitinqlərdə altına minlərlə imza atılan qərarlarda bildirilir ki, "İran" qəzeti üzvr istəməli, suçlular cəzalanmalı, bütün azərbaycanlı siyasi məhbuslar azad edilməlidir.
"İranda söz azadlığına sərt senzura tətbiq edildiyindən durumumuzu İnternet saytları və başqa vasitələrlə dünyaya çatdırmaq zorundayıq. Eyni zamanda İrandan kənarda, ələlxüsus da Azərbaycanda yaşayan tələbələrdən və ümümiyyətlə, bütün gənclərdən qardaş təvəqqemiz budur ki, mübarizəmizə qatılsınlar, millətimizi təhqir edənlərə qarşı etiraz aksiyaları keçirsinlər. İrandakı bütün milli azlıqlar, qaşqay, türkmən və xorasan türklərinə uz tutaraq bizimlə birləşməyə çağırırıq", - qərarlardan biri olan "Gənclərə və xalqlara müraciət"də deyilir.
Dünya Azərbaycanlılarının Haqlarının Müdafiə Komitəsinin "Beynəlxalq Amnistiya" təşkilatına yolladığı məktubda isə bildirilir ki, Maku şəhərindəki etiraz aksiyaları zamanı Bəhmən Nəsirzadə, Möhsün Dönməz, Əli Hüseyninecad (Savalan) və Ərdəbildən olan Sabir adlı gənc həbs olunub.
Dünən günorta saatlarında Təbriz Universitetinin 6 min, Urmu Universitetinsə 2 min tələbəsi etiraz aksiyaları keçiriblər. Bu zaman "Fars şovinizminə ölüm", "Qızıl ols ada qəfəsim, var azadlığa həvəsim!", "Ya Qarabağ, ya ölüm!", "Bizləri təhqir edənlər payını almalı!! şüarları səslənib.
Qüzey Azərbaycandakı soydaşlarımız arasında böyük nüfuza malik heykəltaraş Rəhmi Tuna da gəncləri qətiyyətlə dəstəklədiyini söyləyib.
İrandakı 35 milyon soydaşımız arasında çox böyük nüfuza sahib cənab Tuna indi Türkiyədə yaşayır. Pir Sultan Abdaldan tutmuş Mustafa Kamal Atatürk və Nazim Hikmətədək müxtəlif şəxslərin yüzlərlə heykəlini hazırlamış Tunanın dediklərinə görə, "İran" qəzetindəki çirkin provokasiyanın cavabı verilməzsə, nəticələr daha ağır ola bilər.

Hüseyn BAKUVİ