دکتر نظمی جنابلاری:

استقلال اَن بؤیوک شرف دیر

فدرالیزم ،اینانج یوخسا عناد!؟

ایلک باشدا اوزاقدان قایقی گؤسترمنیزی،( اوزونوز دئمیشکن  آذربایجاندان و حرکتین جانیندان اوزاق اولاراق) ومیللی حرکت ایچینده ن حوپمایان بیر اینسانیمیز کیمی حورمتله قارشیلاییب، اؤزه ت و ساده اولاراق یازدیغینیز معروضه حاقدا (شمس تبريز سيته سينده يايينلانميش، سخنی با  مردم آذربایجان جنوبی،آدلي معروضه) بیر نئچه سطر اؤتری اولاراق جواب یوخ، بلکه بیرآز دوشوندوروجو ایضاح کیمی، یازیب سونماغی اؤزومه بورج بیلدیم. بونودا آرتیرمالییام کی فدرال مفکوره سین داشییان هر بیر اینسانا فیکری ایچین سایغیم وار و حورمتله یاناشماغی دوشونوره م. ایسه آرتیرمالییام کی، بو یازی منیم شخصی باخیشیمدیر.

حورمتلی قارداش، من سیزین کیمی دوشونن لری(فدرالچی دوستلاری) سیزین کیمی بؤلوب ایضاح لاماق  مجبوریتنینده دئیله م. بیریسن بو یولون سئودالیسی بیریسین  تاماحچیسی یا بیریسین سیز دئمیشکن مامور-معذور آدین وئره م. هم ایسه فدرالچی بیریسین فیکرینه گؤره تنقیدله قارشیلاماق ایسته میرم. چالیشاجاغام رئال اولاراق فدرالیزم و اونون الده ائدیش یوللارین سیزه آچیقلایام.

بیر میللتچینین اَن بلیرگین اؤزه للییی ندیر دییه سوران اولورسا، درحال وئره جه ییم اَن قیسا یانیت و آچیقلاما بو اولا بیلر: اینسان دییه بلیرلی بیر نئجه لیک(سوی،توپراق،مدنیت ، ...) و دوشوندوروجو بیر منفعتلرآرخاسیندا، میللی ائتنیک و میللی جغرافیا اؤزگورلویون سئویب- سئودیره ن هر بیر اینسان میللتچی آدین داشییا بیله ر منجه. اکونومیک و توپلومسال ایشیقلیغی، هامیسی بو یانیت ایچینده اؤزونه معین بیر یئر تاپیر کی، چاغ و زامان ویئرله فرقلشیب اؤزه  ل بؤلمه لرده اؤلچولور.

 سیزین یازینیزا وارد اولان اَن بؤیوک تنقید بو اولا بیلر کی، "سیز رئال باخمادان رئالیزم کیمی دوشونمه یی سرگییه چکمک ایسته ییرسیز".

 فدرالچی ویا هر تفکر اؤزونه عاید بیر پروسس طی ائده جک منجه. سیز استقلال و اونون زیانلاری حاقدا، فدرالیزم و اونون گؤزه لییی حاقدا گؤزه ل ترسیم لر فیکریزجه یاراتدیز. قارداشیم لطفا بیلمسل اولاراق دوشوندویوموز یولون اینجیکلرین و اینجه لیکلرین میللتیمیزله آیدین اورتایا قویالیم. من بیر شخص کیمی کی، ایچریده ن(اوزاقدان یوخ) حوپوپ-قوپان بیریسی کیمی، استقلالی اَن بؤیوک شرف بیلیره م و هر بیر اؤزگور و دامارلی میللت کیمی ، اؤزگورلویو  سئوه-سئوه دوشونوب-دوشوندورمه یی اینانیرام. اینانین کی بونو گؤزو یومولو و بیر دویغو کیمی دئمیره م. ایچریده جانلانان حرکت د ه ن دانیشیرام. قورتولوشچو حرکاتچیلاریمیزین اونده رلییی ایله دالغا یوخ بیر ده پرم کیمی شئونیزمین باغرینا چات سالان حرکتده ن دانیشیرام. رئال دوشونوب، رئال فیکری داشیرام. نیه کی سیزین یازینیزدان آچیقجا گوونسیزلیک بؤیوک میللتیمیزه یاغیر. ساده جه باشقالارا دایانیب و سؤیکنمک له آیاق اوسته دورماغیمیزی تصور ائدیسیز. ابن خلدونون مدینه فاضله سین فدرالیزم دییه  رَسساملیق ائدیسیز. آما سیزدن سورا بیله رم، آدین چکن فدرالیزمی کیم سیزه بخش ائده جک؟ تانری ملکلری؟

ده یرلی قارداش فدرالیزم دؤرد طریقله الده ائدیله بیلر. بئشینجی یول یوخ کسین. وارسا بیزه اؤیردین لطفاً:

1- یابانجی بیر اؤلکه یاردیمیله(اؤرنک اولاراق آمریکا یا یابانجی بیر اؤلکه نین ایران آدلانان یئره هجوم غایتینده)

2- فارس اپوزیسیون لار واسطه سیله(ایندیکی حاکیمیت دئوریلیب آردیجا فارس شئونیزمین باشقا قوللاری ایش اوستون گلمه سیله)

3- اسلامی حکومتین باغیش ایله(هله اؤز یازدیقلاری آنا یاسالاریندا 15-19-جو اصللری گئرچکلشدیرنده ن 150 ایل سونرا)

4- میللتیمیزین چاباسی،ساواشی، گنجلییمیزین قانی و دیرنیشیله

گؤردوغونوز و دوشوندوغونوز کیمی یوخاریدا سایلان هر اوچ بؤلمه(1،2،3)  تعریف اولونموش بیر فدرالیزم سیستمین سیزه باغیش ائده بیلر. اونوتمایین تعریف اولموش. یعنی دئمک جیزگیلانمیش بیر شروط کی، طبیعی اولاراق نفعین سنه عاید ائتمه یه جک!!!! بودا هله  البت اگر گئچمیشلره تای اوینانماساق!!!!

آما دؤردونجو یول کی، کسین اَن رئال یول بو اولا بیلر و بوتون الده ائدیشلر بو یولدان اولاجاق، تام هزینه لر بو آخیمدان آخیلاجاق:

میللتیمزین دیره نیش ایله بؤیوک بیر میللی مجادله فارس شئونیزم ایله ائیلمله شه جک. اولا بیلر بو یولدا مینلر و حتتی اون مینلر شهید وئره ک. یوزلر مین عائله دیدرگین دوشوب و پوزغون بیر دورومدا واملاشا و.... آما سونوج بیزیم قیرتلی میللتیمیزین ایستدیی کیمی اولاجاق کسین. ایندی نئچه یوز ایللیک آتدیم اؤنه آتیلیب. آما بیردن-بیره  فدرالیزم دییه رک آتدیملارین گئری آتیلماسی و....

 هانچی میلت سئون بیریسی، هانچی میللتچی یا دوزگون پولئتیکاجی میللتینه قارشی آزادلیق ساواشیندا قارشیلیق تؤره دن بیریسی ایله، یاخود میللتینین گنجلیینین قانین تؤکن بیریسیله تازادان اوتوروب "هن گل گؤره ک نه یاپمالییق دئیه ر"؟ ایران-ایران دییه رک، یاشاسین آذربایجان دییه ر؟ سنجه گله جک ده بو آداملار تاریخ مسلخینده حساب وئرمه یه جکلر؟ آدین پولئتیکاجی قویان هر بیر شخص هانچی معیارلار و اورتاملیقلار اوزرینده بو دورومودا فدرالیزمه اینانار؟ تاریخین بیلمه ین میللت محکوم دور فنایا. حورمتلی قارداش تاریخ ایله ایلگیله نین 21 آذر حرکاتی ایران ایچینده ایران و ایرانلی دییه رک بیر قالخینج میللی دیره نیش نه جور قورشونلا قارشیلاندی؟ سیز فیکر ائدیرسیز فدرالیزم چوخ راحات الده ائدیله جک؟ سیزه سؤز اولسون اؤزگورلوک و باغیمسیزلیقدان چوخ هزینه وئرمه سه آز اولمایاجاق. ایندی هانچی منطق دئییر کی میلتیمه قارشی اولان بیریسیله، میللی جغرافیاما تهلکه یارادان بیرسیله، بیر قرن دن چوخ میللی وارلیغیمیزی میللی کیملییمیزی محو ائدن بیریسیله، گنجلییمیزی تاریخ بویو قورشونلا  و یا قارانلیق توتساقلاریله وطنداشیم دئیه ن بیرایله، بیر یئرده گرک یاشاماق؟ بونون آدین نه قویماق اولار؟ سنجه همن بیزه تورک.... دئیه ن بیزه یاراشمازمی؟ دوغرودان بیزه نه اولوب؟ قافامیزی توز بوروموش یوخسا هؤرومجک هؤرموش؟ سیزی تانری اَن بؤیوک شرفین گؤزه لیکلریندن یاراقسیز اولساق، ایره نیب میللتیمیزه آزادلیق و باغیمسیزلیغین گؤزللیک و مسرورییتیندن، میللی جغرافیا و میللی ائتنیکیمیزی موتلولوغوندان، میللی اکونومی و هر تورلو باغیمسیزلیقدان صحبت ائتمکی ده اؤیره نک. یأس آیه لرین اوخویوب خولییایی تفسیرلر ائتمه یک. بیر قرن آجیلیقا باخمایاراق، آذربایجان زنگین بیر توپراق ومیللتیمیز اولو بیر اولوسون بالالاری اولاراق بؤیوک بیر مدنییتین وارثیدیر. بو اولو میللتین گله جک نفرین لرینده ن قورتولماق و تاریخین قارا سایفالاریندان آدلاریمیزی سیلمک امکانسیزمی سیزجه؟

ده رین حورمت و سایغی ایله

محمدرضا آقاپور