TƏRCÜMEYİ-HAL

(BİOQRAFİ)

MUNİS ŞƏRİFOV

Tiklayin və dinləyin  

Munis Şərifov, kamança və çəqanə ifaçısı:

Mən 24 aprel 1962-ci ildə Azərbaycanın Ağdaş rayonunun Ərəbocağı kəndində muəllim ailəsində anadan olmuşam. Mənim Ağdaş musiqi məktəbində ilk kamança müəllimlərim Şahid Abdullayev və Şahin İbrahimov olmuşdur. Ağdaş musiqi məktəbini bitirdikdən sonra Asəf Zeynallı adına Musiqi Texnikomuna daxil olmuş və həmin təhsil ocağında professor Şəfiqə Eyvazova və professor Rafiq İmraninin sinfində oxumuşam. Asəf Zeynallı adına musiqi texnikomunu bitirdikdən sonra Üzeyir Hacıbəyov adina Azərbaycan Dövlət Konservatoriyasina (indiki Baki Musiqi Akademiyası) daxil olmuşam.

Mən 1982-ci ilde,  görkəmli xanəndə, Azərbaycan Respublikasının Xalq Artisti İslam Rzayevin rəhbərlik etdiyi instrumental ansamblda solist və müşayətçi, birinci kamança ifaçısı kimi peşəkar karyerama başlamışam. O vaxtdan bəri Azərbaycanın bütün televiziya və radio kanalları ilə sıx əməkdaşlıq edirəm. 1986-cı ildən 1990-cı ilə qədər Azərbaycan Dövlət Konsert Birliyində solist və müşayətçi kamança ifaçısı vəzifəsində çalışmışam. 1985-ci ildə Moskva şəhərində keçirilən Gənclərin və Tələbələrin 12-ci Beynəlxalq Festivalının dimlomçusu olmuşam. 1990-cı ildən bu günə qədər Bakı Musiqi Akademiyasında və Azərbaycan Milli Konservatoriyasında kamança tədrisi üzrə müəllim vəzifəsində çalışır və həmçinin Azərbaycan Respublikasının Xalq Artisti, professor Arif Babayevin muğam sinfində müşayətçi konsertmeyster işləyirəm. Həmçinin, Bakı Musiqi Akademiyasında qədim milli musiqi alətlərinin bərpası və təkmilləşdirilməsi elmi laboratoriyasında elmi işçi kimi fəaliyyət göstərirəm.

1993-1995-ci illər ərzində İranın Tehran Musiqi və Mədəniyyət Mərkəzində kamança müəllimi kimi fəaliyyət göstərmiş, həmçinin həmin müddətdə Tehran Radio və Televiziyasının musiqi proqramları ilə əməkdaşlıq etmişəm. Bununla yanaşı İranın bir çox şəhərlərində solo konsertlərlə çıxış etmiş və məhz Azərbaycan milli musiqisini və milli alətimiz olan kamançanı təbliğ etmişəm.  Həmin müddətdə Tehranda 2 solo albomum işıq üzü görmüşdür.

Qeyd edim ki, 1997, 2003 və 2004-cü illərdə Bakı şəhərində mənim solo ifamda audio kasset, CD və video kassetlər buraxılmışdır.

Sənətşünaslıq namizədi, dosent Məcnun Kərimov və mən 1996-cı ildə qədim milli musiqi alətlərindən ibarət ansambl yaratdıq. Sonra həmin ansambla Azərbaycan Musiqi Mədəniyyəti Dövlət Muzeyinin tərkibində “Qədim Milli Musiqi Alətləri Dövlət Ansamblı” statusu verildi. Mən hal-hazırda həmin ansamblın konsertmeystri, solisti, aranjimançısı və müşayətçisiyəm. Bu ansamblda mən, Azərbaycanın qədim milli musiqi aləti olan çaqanədə ifa edirəm. Mən çəqanə alətinin dünyada yeganə ifaçısıyam.

2000-ci ildə Şotlandiyanın Edinburq şəhərində keçirilən “Simli və Kamanlı Musiqi Alətləri” üzrə Beynəlxalq Simpoziumda kamançanın və çəqanənin ifa imkanlarını nümayiş etdirmişəm. 2002-ci ildə həmçinin Qazaxıstanın Alma-Atı şəhərində qazak xalqının böyük musiqiçisi Bolat Sarıbayevin şərəfinə təşkil olunan Müasir Etnoorqanologiya Üzrə Beynəlxalq Elmi Konfransda çəqanə alətini nümayiş və təbliğ etmişəm.

2002-ci ildə UNESCO-nun dəvəti ilə Fransada Qədim Milli Musiqi Alətləri Dövlət Ansamblı ilə festival və konsertlərdə çıxış etmişəm.

2004-cü ildə ABŞ-ın İndiana Universiteti və Azərbaycan Amerika Mədəniyyət və Təhsil Fondu tərəfindən təşkil olunmuş Beynəlxalq Simpoziumda iştirak etmiş və İndiana Universiteti, Viskonsin Universiteti və Ohayo Dövlət Universitetində usta-sinifləri (master-klass) dərsləri vermiş və solo konsertlərlə çıxış etmişəm. İndiana Universitetinin Fəxri Professoru adına layiq görülmüşəm. Həmçinin ABŞ-ın Bloominqton şəhərindəki, professor Şahyar Daneşgarın rəhbərlik etdiyi İpək Yolu Ansamblının tərkibində ABŞ-nın bir çox şəhərlərində çıxış edərək, Azərbaycanın milli musiqisini və milli alətimiz olan kamançanı yüksək səviyyədə nümayiş və təbliğ etmişəm.

2005-ci ildə Tacikistanın Düşənbə şəhərində təşkil edilmiş “Sedaye Delho” (Ürəklərin Səsi) Beynalxalq Festivalda iştirak etmişəm. Həmin ildə İslam Ölkələri Konfransı Təşkilatının Türkiyənin İstanbul şəhərində təşkil etdiyi Beynəlxalq Festivalda iştirak etmişəm.

Azərbaycan milli musiqisi, həmçinin Qərb və Şərq musiqilərini ifa edərək bir çox dünya ölkələrinə konsert səfərlərinə çıxmışam: ABŞ, Kanada, İngiltərə, İrlandiya, Şotlandiya, Almaniya, Fransa, İsveçrə, Çexiya, Rusiya, Ukrayna, Qazaxıstan, Özbəkistan, Tacikistan, Gürcüstan, Türkiyə, İran, Hindistan, Şri-Lanka, BƏƏ və s.

munissharifov@yahoo.com      Cell: 0099455 778 21 15