Unudulmuş Qarabağ savaşı

      Artıq on səkkiz ildir ki, Qarabağda Azərbaycan və Ermənistan arasında savaş gedir. Yaxlaşıq iyirmi faiz Azərbaycan torpaqlarının ermənilər tərəfindən işğal edilməsi çox dağıntılar törətmişdir. Bir milyondan artıq Azərbaycanlı öz ev-eşiyindən didərgin düşmüş, otuz mindən çox insansa həyatını itirmişdir. Erməni işğalı səbəbinə bu gün Azərbaycan dünyanın ən çox qaçqını olan ölkə durumuna düşmüşdür. Savaşın başlamasından on səkkiz il keçsə də, hələ də bu insanlar dözülməz qaçqın düşərgələrində yaşayırlar. Qaçqın düşərgələrində sanitariya durumu yetərsizdir, tibbi yardım və maarif isə az qala yox dərəcəsindədir. Bu düşərgələrdə evə qayıtmağı gözləyən bütöv bir nəslin ömrü hədər olub.

       Qafqazın bu ən dağıdıcı savaşına və Azərbaycan qaçqınlarının faciəli taleyinə dünya göz yumur ki, bu da adamın ürəyini sızladır və adamı sinirləndirir. Az qala iki onillikdir ki, savaş gedir və hələ də çözüm yoxdur. Halbuki Qarabağ savaşı ilə ortaya çıxan bu bəşəri fəlakət yalnız Azərbaycanlılara yox, bütövlükdə, insan haqlarını müdafiə edənlərin hamısına aid bir sorundur.

       İsveç xalqı və İsveç höküməti öz təsanüdçü gələnəyi və humanist dünyabaxışı səbəbinə həmişə başqa ölkələrdəki savaş qurbanları ilə həmrəy olmuşdur. Arzum budur ki, İsveç Azərbaycan qaçqınlarını da müdafiə edib uluslararası ilişgilər alanında bu unudulmuş Qarabağ sorununu yenidən gündəliyə gətirsin və qaçqınların öz evlərinə qayıtmaq uğrundakı haqlı mübarizələrini dəstəkləməklə  toqquşmanın sağlam çözümünə çalışsın.

Nərgiz Nedai

Azərbaycan Gənclər Federasyonu İsveç