تورك خالقي و گونئي آزه ربايجان، ولايت فقيه رئژيمينين چؤكمه سينه حاضير اولماليدير

اونونجو جومهورباشخانليغي سئچيمله رينده ن سونرا، ايران ايسلام جومهورييه تي ايلك كز، چؤكمه و داغيلما سوره جينه گيرميشدير. بو سوره ج گئري دؤنولمه زدير و اونون سونوجلانماسي، تكجه زامان مساله سيدير.

تورك آزه ربايجان ميللي دئموكراتيك حره كه تي اؤزونو يالنيز سئچيمين سونوجلارينا ائعتيراضا قيسيتلاماماليدير، بو ائعتيراضلاري خامنه اي`يه يؤنه لتمه لي، اونون عزليني ايسته مه لي و اولايلار گليشديكجه، ويلايه ت-ي فقيه و فارس ايران ايسلام جومهورييه تينين بوتونونو هده ف آلماليدير.

سؤزوموز

سئچيمين اوچونجو آشاماسي

تورك خالقينين ايراندا ياپيلان اونونجو جومهورباشخاني سئچگيله ري ايله ايلگيلي توتومونو ايكي آچيدان اله آلماق اولاسيدير:

١-سئچگي سوره جي ايله ايلگيلي

٢-آدايلارلا ايلگيلي

سئچگي سورجه جي ايله ايلگيلي توتوموموز:

تورك آزه ربايجان ميللي دئموكراتيك حره كه تينين سئچيمله ايلگيلي اولان موناسيبه تي حاققيندا، بوندان اؤنجه سؤزوموزده اوچ يازي يازيلميشدير. بو يازيلاردا اؤزه تله ايله ري سوروله ن دوشونجه بوندان عيباره تدير:

تورك خالقي جومهورباشخانليغي سئچگيله ري ايله – ايراندا گرچه كله شه ن باشقا هر هانسي يئكه (كلان) سيياسي اولاي تكين – آكتيو اولاراق ايلگيله نمه ليدير. بو ايلگيله نمه ده ن باشليجا آماج، سئچيم سوره جيني آشاغيدا سيرالانان يؤنته مله ري اويقولاياراق فورصه ته چئويريب، تورك خالقينين ميللي چيخارلاري دوغرولتوسوندا قوللانماقدير. بو يؤنته مله رين بير نئچه سي بئله دير:

-تورك آكتيويست و آيدينلاري آراسيندا دييالوق روحو و ديلينين ياراديلماسينا كؤمه ك ائتمه، ميللي سيياسه ت و ميللي كيمليك تمه لينده تشكيلاتلانما، سيياسيله شمه يولوندا ايله رله مه،

-تورك خالقينين ميللي ايسته كله ريني فورموليزه و راديكاليزه ائتمه، بو ايسته كله ري تورك خالقي، ايران خالقلاري، ايران دئوله تي و دونيا قامو اويونا چاتديرما،

-ايراندا سپه له نميش تورك خالقينين ياشاديغي بؤلگه له ر و داغينيق آلت قوروپلاري آراسيندا سيياسي ائيله م بيرلييي و يؤنده شليك ياراتما،

-سئچيم سوره جي و ايران`ين سراسه ري سؤيله مله ريني ائتگيله مه، بونلارا يؤن وئرمه و حتتا اؤز كونترولونا گئچيرمه، ميللي مساله يه آكتوالليق قازانديرما،

-چئشيتلي تاكتيكله ر منيمسه يه ره ك ميللي يؤنده ن تورك خالقينين فارس خالقيندان آيريشماسينا يارديم ائتمه، تورك خالقيني ايران ايسلام جومهورييه تي ايله اوز اوزه گتيرمه،

-بوتون بونلارلا دا تورك خالقينين ميلله تله شمه سيني يئيينله شديرمه، .....

آدايلارلا ايلگيلي توتوموموز:

آدايلارلا ايلگيلي تورك آزه ربايجان ميللي دئموكراتيك حره كه تينين توتومو اوچ آشامادا اينجه له نه بيله ر:

١-بيرينجي آشاما: آدايلارين اؤز آدايليقلاريني بيلديرديكله رينده ن صلاحييه تله رين ردد ائديلمه سينه ده ك

٢-ايكينجي آشاما: صلاحييه تله رين ردد ائديلمه سينده ن سس وئرمه گونونه ده ك

٣-اوچونجو آشاما: سس وئرمه گونونده ن سونرا و آياقلانما-گؤسته ريله ر دؤنه مي

بيرينجي آشاما:

١-بيرينجي آشامادا يعني صلاحييه تله رين ردد ائديلمه سينه ده ك گئچه ن سوره ده، اكبر اعلمي`ده ن حيمايه ت ائتمه ك تورك خالقي و آزه ربايجان`ين ميللي چيخارلارينا ان اويقون اولان تاكتيك ايدي. اعلمي`ده ن حيمايه ت ائتمه نين آماج و يارارلاري باشليجا بونلاردان عيباره ت ايدي:

-تورك خالقي و تورك آزه ربايجان ميللي دئموكراتيك حره كه تينين ايسته ك و سؤيله مله ريني اعلمي`نين سؤيله مله رينه داخيل ائتمه ك و بو يوللا اونلاري سئچيم و باشقا آدايلارين سؤيله مله ري آراسينا سوخماق، ميللي مساله نين آكتواللاشماسينا كؤمه ك ائتمه ك؛

-اعلمى`نين سؤيله مله ريني راديكاليزه ائتمه ك و بو يوللا ايراندا وار اولان قيرميزي چيزگيله ري آشماق، سيياسي و ميللي تابولاري ييخماق؛

-اعلمي`ده ن حيمايه ت ائتمه كله تورك خالقي و آزه ربايجان`ين فارس خالقي و فارسيستان`دان آيري بير سيياسي داورانيش گؤسته رمه سيني ساغلاماق و بونونلا دا تورك خالقي و آزه ربايجان`ين سيياسي كيمليك آچيسيندان فارس خالقي و فارسيستان`دان آيريشما و قوپماسينا نده ن اولماق؛

-اعلمي`نين صلاحييه تي ردد ائديله نده ن سونرا بو اولايي ايران ايسلام جومهورييه تينين تورك خالقينا قارشي ياپديغي بير حره كه ت و تضييق كيمي گؤسته رمه ك؛

-اعلمي`نين ردد ائديلمه سيني تورك خالقي و آزه ربايجان`ين فارس خالقي و فارسيستان ايله ايران ايسلام جومهورييه تينده ن قوپماسي دوغرولتوسوندا قوللانماق؛

-ايران ايسلام جومهورييه تي بونيه سينده يئر آلان تورك كؤكه نلي يوكسه ك روتبه لي دئوله ت آداملارينا بو مئساژي وئرمه ك: اعلمي كيمي تورك خالقينا گئري دؤنه نله ره تورك خالقي دا آرخا چيخاجاقدير؛

-....

ايكينجي آشاما:

٢-ايكينجي آشاما يعني اعلمي`نين صلاحييه تينين ردد ائديلمه سينده ن سس وئرمه گونونه ده ك، تورك خالقي و آزه ربايجان`ين ميللي چيخارلارينا ان اويقون اولان تاكتيك، سئچيمي تحريم ائتمه ك و سس وئرمه يه قاتيلماماق، هئچ بير آدايا اوي وئرمه مه ك؛ سس وئرمه يه قاتيلماق ايسته يه ن و يا بونو ياپمايا مجبور اولانلارينسا، كروبي`يه سس وئرمه له ريني ساغلاماق ايدي. بو تاكتييي منيمسه مه نين باشليجا آماجلاري بئله ايدي:

-تورك خالقينين ايسته كله ريني اؤز سؤيله مله رينده يانسيتان اعلمي`نين "شوراي نگهبان" طره فينده ن ردد ائديلمه سينه و گنه ل اولاراق هر يؤنو ايله آنتي دئموكراتيك اولان بو سئچگييه ائعتيراض ائتمه ك؛

-تورك خالقينين ميللي ايسته كله رينه لاقيئد قالان حتتا بير سيرا پان ايرانيسم ايلكه و سؤيله مله ريني منيمسه ميش اولان موسوي و اونو حمايه ت ائده ن خاتمي و رفسنجاني كيميله ري ايفشا ائتمه ك؛

-تورك خالقينين وارليغي و ميللي حاقلاريني دانان، ايران مركه زلي و فارسچي باشقا بير تورك`ون ايران ايسلام جومهورييه تينين تپه سينده يئر آلماسينا انگه ل اولماق؛

-دين دئوله تي و ويلايه ت-ي فقيه`ه اينانان و آچيق ايرانچي و اوتانجاق بير پان ايرانيست اولان موسوي`يه تورك خالقينين تكجه تورك اولدوغو اوچون راي وئرمه سينين قاباغيني آلماق؛

-ايران دئوله تينين تورك خالقي و گونئي آزه ربايجان`ا اويقولاديغي آيريمجي و باسقيجي-سؤمورگه چي سيياسته تله ره ينه ائعتيراض ائتمه ك،

-آزه ربايجان`ين سئچيمي تحريم ائتمه كله، سئچيمه قاتيلماق ايسته يه ن ايران`ين باشقا بؤلگه له ري و اؤزه لليكله فارسيستاندان آيري بير سيياسي داورانيش گؤسته رمه سيني ساغلاماق؛

-ايران ايسلام جومهورييه تي بونيه سينده يئر آلان تورك كؤكه نلي يوكسه ك روتبه لي دئوله ت آداملارينا بو مئساژي وئرمه ك: موسوي كيمي تورك خالقينا آرخاسيني چئويره نله ره، تورك خالقي دا آرخاسيني چئويره جه كدير،

-....

اوچونجو آشاما:

٣-اوچونجو آشاما ويا سس وئرمه بيته نده ن سونرا اورتايا چيخان دوروملا ايلگيلي موناسيبه ت، آشاغيدا آيرينتيلي بير بيچيمده آچيقلانميشدير.

تمه ل قاوراملار:

سس وئرمه گونونده ن سونرا پاتلاق وئره ن خالق آياقلانمالا و گؤسته ريله ري و موسوي-خامنه اي چكيشمه سينده تورك آزه ربايجان ميللي دئموكراتيك حره كه تينين ان دوغرو و يارارلي تاكتييينين نه اولدوغونو بليرله مه ك اوچون، بير نئچه تمه ل قاورامي گؤزده ن گئچيرمه كده يارار واردير. بو ايلكه له ر تكجه اونونجو جومهورباشخانليغي سئچيمي دئييل، ايراندا بوندان سونرا سيخجا باش وئره جه ك اولان بوتون يئكه (كلان) اولايلار اينجه له نديكده گؤز اؤنونده بولوندورولماليدير:

ايران دئوله تي بير فارس دئوله تيدير،

گونئي آزه ربايجان فارسيستان`ين سؤمورگه سيدير

ايران چوخ ميلله تلي بير اؤلكه دير، آنجاق ايران ايسلام جومهورييه تي بو اؤلكه ده ياشايان بوتون ميلله تله ر دئييل، تكجه فارس خالقينين ميللي چيخارلاريني گؤزه ته ن بير دئوله تدير. داها دوغروسو ايران دئوله تي فارس خالقينين دئوله تله شمه سيدير. گونئي آزه ربايجان ايسه، فارسيستان`ين سيياسي، ايقتيصادي و فرهه نگي سؤمورگه سيدير. بو دوروم ييرمينجي يوز ايلده اورتايا چيخان بير دورومدور و ١٩٢١ ده ياپيلان بير كودئتا و داها سونرا ١٩٢٥ ايلينده مشروطه آناياساسينين آياقلار آلتينا قويولماسي، مشروع و ياسال اولان تورك آزره بايجان قاجار دئولته تينه ياساديشي يوللارلا سون وئريلمه سي و تورك خالقينين ايران حاكيمييه تي و ايقتيداريندان اوزاقلاشديريلماسي ايله اورتايا چيخميشدير.

تورك خالقي و گونئي آزه ربايجان آچيسيندان، ١٩٢٥ ينجي ايلده پهلوي ديكتاسينين قورولماسي گونونده ن باشلاياراق ايران دئوله تي نامشروع بير دئوله تدير. فارس دينچيله رين حاكيم اولدوغو ايران ايسلام جومهورييه تي ده، اؤزونده ن قاباقكي پهلوي ديكتاسي كيمي، تورك خالقيني تمثيل ائتمير و تورك خالقي گؤزونده مشروع بير دئوله ت ساييلمير. ١٩٤٥ ده آزه ربايجان ميللي حؤكومه تي و ١٩٨٠ ده آزه ربايجاندا قوپان "خلق مسلمان" حره كه تينين سيراسي ايله پهلوي و ايسلام جومهورييه تي طره فينده ن ازيلمه سي، ايران دئولته تينين تورك خالقي و گونئي آزه ربايجان گؤزونده مشروع اولماما گرچه ييني بير داها آچيغا وورموش، حتتا بو دئوله تي ايشغالچي بير دئوله ت قونومونا سوخموشدور.

ايران دئوله تله رينين مشروعييه ت سورونو، تورك خالقينين سورونو دئييلدير

تورك خالقينين جومهورباشخانليغي سئچگيله ري و يا باشقا سئچيمله ره قاتيلماسي ايله، ايران ايسلام جومهورييه تينين مشروعييه تينين آرتماسي آراسيندا هئچ بير باغ يوخدور. چونكو ١٩٢٥ روحونون محصولو اولان، تورك خالقينين اولوشوم و ايقتيداريندان ديشلانديغي هئچ بير دئوله ت، تورك خالقي آچيسيندان مشروع بير دئوله ت دئييلدير. بونا ايران ايسلام جومهورييه تي ده داخيلدير.

دولاييسي ايله سيياسي داورانيشلارلا ايران ايسلام جومهورييه تينه مشروعييه ت وئريب وئرمه مه سورونو، تورك خالقينين دئييل، فارس خالقي و سراسه ري فارس اوپوزيسييون قوروپلارينين ايلگيله نمه سي گره كه ن بير سوروندور. زيرا ايران ايسلام جومهورييه تي او ميلله تين دئوله تيدير.

ايكي پارالئل آنجاق آيري موجاديله:

"ميللي حاقلاري الده ائتمه" و "ايران`ين دئموكراتيكله شمه سي"

ايران ايسلام جومهورييه تي، فارس بير دئوله ت اولمايا اك اولاراق، دين دئوله تي و توتاليتئر بير رئژيمدير. بو اوزده ن ده ايراندا عئيني آندا وار اولان و يورودوله ن ايكي آيري ساواشيمدان سؤز ائتمه ك اولاسيدير:

الف-دئموكراتيكله شمه: ايلك موجاديله ايراندا ياشايان بوتون اينسانلار و بوتون ايران ميلله تله رينين لاييك، دئموكراتيك، چاغداش و حوقوقا دايالي بير سيستئمي اؤزله رينه حاكيم قيلما يولونداكي ساواشيملاريدير. بو آماج اوغروندا موجاديله وئره ن شخص و قورولوشلار، "دئموكرات اولماق" اؤزه للييينه صاحيبديرله ر.

ب-ميلله تله شمه: ايكينجي موجاديله، ايراندا ياشايان فارس اولمايان ميلله تله رين اؤز ميللي حاقلاري و اؤز گله جه كله ريني بليرله مه حاققيني الده ائتمه اوغروندا وئرديكله ري ساواشيمدير. بو آماج اوغروندا موجاديله وئره ن شخص و قورولوشلار، "ميللي اولماق" اؤزه للييينه صاحيبديرله ر.

ايرانداكي هر هانسي اولاي و شخصييه تله سيياسي قوروپو اينجه له ركه ن، و يا اونلاري دسته كله ييب دسته كله مه مه ميزه قرار وئره ركه ن، هر بيريني بو ايكي اؤزه لليك آچيسيندان (دئموكرات اولماق، ميللي اولماق) آيريجا اله آلماميز گره كير. چونكو بير سيرا دوروملاردا بللي بير اولاي، قوروپ و شخصييه ت دئموكرات اولدوغو حالدا، ميللي اولمايابيله ر.

"دئموكرات اولماق"، "ميللي اولماق" گؤره جه (نيسبي) قاوراملاردير

بورادا ديققه ت ائديلمه سي گره كه ن بير قونو، دئموكرات و ميللي اولما اؤزه لليكله رينين موطله ق اولماييب، گؤره جه (نيسبي) اولمالاريدير. بير حره كه ت بللي بير حره كه ته گؤره داها ميللي، و يا داها دئموكراتيك اولدوغو حالدا، باشقا بير حره كه تله قارشيلاشديراندا داها آز دئموكراتيك و يا داها آز ميللي اولابيله ر.

اؤرنه يين مشروطه حره كه تي داها سونرا اينحيرافا چكيلسه ده، باشلانقيجدا دئموكراتيك بير حره كه ت ايدي، آنجاق بو حره كه ت ايلك باشدان فارسچي بير حره كه ت اولوب و دولاييسي ايله تورك ميلله تي آچيسيندان هئچ بير شكيلده ميللي بير حره كه ت ساييلابيلمه ز (مشروطه حره كه تي فارس خالقي آچيسيندان هم دئموكراتيك، هم ده ميللي بير حره كه تدير). گينه ده ٢٩ بهمن اينقيلابينين دئموكراتيك بير حره كه ت اولماسينا رغمه ن، بو حره كه ت تورك خالقي آچيسيندان ميللي بير حره كه ت دئييلدي. بو ايكي حره كه ت، ايران چاپيندا و دئموكراتيك اولما يؤنونده ن اولوملو و ايله ريجي اولسالار دا، تورك خالقي آچيسيندان و ميلليليك يؤنونده ن اولومسوز و گئريجي حره كه تله ر ايديله ر.

عئيني دوروم شخصييه ت و قوروپلار اوچون ده گئچه رليدير. اؤرنه يين خاتمي ايله خامنه اي قارشيلاشديريليرسا، خاتمي داها دئموكرات اولماسينا رغمه ن، داها آنتي ميللي، داها فارسچي و داها پان ايرانيست بير شخصييه تلدير.

"دئموكرات اولماق" مي اؤنه ملي، يوخسا "ميللي اولماق" مي؟

بو ايكي اؤزه لليك يعني دئموكرات اولماق و ميللي اولماق`دان هانسيسي بيزيم اوچون اؤنجه ليكليدير؟ بو سورونون كسين و ده ييشمه ز يانيتي يوخدور، اويقون و دوغرو يانيتي قوشوللار و قارشيلاشديرمانين زميني تعيين ائده ر. بعضي زامانلاردا بير شخصين دئموكرات اولماسي، باشقا بير زاماندا ايسه ميللي اولماسي بيزيم اوچون اؤنه ملي حالا گله بيله ر. بونون ترسي ده دوغرودور.

اؤرنه يين "جومهورباشخانليغي مقامي" سؤز قونوسو ايكه ن، موسوي`نين احمدي نژاد`ا گؤره داها دئموكرات اولماسي تورك خالقي آچيسيندان چوخ دا اؤنه م عرض ائتمير، بورادا بيزيم اوچون اؤنه ملي اولانين، ايران جومهورباشخانليغي مقامينا بير فارسچي تورك`ون اوتورماماسي گره كدييي، و موسوي`نين آنتي ميللي اولما اؤزه لليييدير. بو اوزده ن ده تورك آزه ربايجان ميللي دئموكراتيك حره كه تينين موسوي`نين جومهورباشخاني مقامينا اوتورماسيني ايسته مه مه سي چوخ دوغالدير. سئچگينين ايكينجي آشاماسيندا تورك آزه ربايجان ميللي دئموكراتيك حره كه تينين موسوي`يه قارشي آپارديغي تبليغاتين فلسه فه سي بو ايدي.

آنجاق "موسوي- خامنه اي چكيشمه سي" و موسوي سيماسيندا "ايران ايسلام جومهورييه تينين ايچينده چيخان چاتلاما و پارچالانما سوره جي" سؤز قونوسو ايكه ن، بيزيم اوچون اؤنه چيخان و بليرله ييجي اولان اؤزه لليك، موسوي`نين، ميللي اولماماسي دئييل، بلكه داها دئموكراتيك بير خالق حره كه تيني-ايسته مه سه ده- تمثيل ائتمه سيدير. دولاييسي ايله ايران ايسلام جومهورييه تينين تمه ليني سارسان "خامنه اي-موسوي چكيشمه سي"نده، تورك آزه ربايجان ميللي دئموكراتيك حره كه تينين موسوي`نين تمثيل ائتدييي داها دئموكراتيك اولان طره فين يانيندا يئر آلماسي دوغالدير. سئچگينين اوچونجو آشاماسيندا تورك آزه ربايجان ميللي دئموكراتيك حره كه تينين موسوي`نين تمثيل ائتدييي دئموكراتيك خالق آياقلانماسي يانيندا يئر آلماسينين نده ني، ايشته بو يالين گرچه كدير.

كركوك`ن آجي عاقيبه تي بيزه درس اولماليدير:

ايراندا باش وئره ن دئموكراتيك سوره جله ره آكتيو اولاراق قاتيلماليييق

بير سيرا شخصله ر ايران توركله ري و گونئي آزه ربايجان`ين "ايران آدلانان اؤلكه"نين اولايلارينا قاريشمامالاري گره كديييني اؤيوتله ييرله ر. بو دوشونجه بللي بير قوشوللار اوچون، اؤرنه يين گئچميشده دوغرو ايسه ده، بوگون دوغرو ساييلماز:

تورك خالقي ايران سينيرلاري ايچه ريسينده ياشاديغي، و گونئي آزه ربايجان`ين "ايران آدلي اؤلكه" نين بير پارچاسي اولدوغو مودده تجه، باشقا بير سؤزله ايران ائتنيك سينيرلار تمه لينده بؤلونوب داغيلماديقجا، بو اؤلكه ده اولان بيته ن اولايلار، كسينليكله گونئي آزه ربايجان و تورك خالقيني دا ايلگيله نديرير، چونكو بيزي – ايسته سه ك ده، ايسته مه سه ك ده- ائتگيله يير. حتتا ايران`ين بؤلونه جه ييني وارسايساق بيله، چوخلو نده نله رده ن دولايي، فئدئرال و يا موسته قيل فارسيستان، هميشه تورك خالقي و گونئي آزه ربايجان`ين ماراق داييره سي ايچينده قالاجاقدير.

آيريجا بوگون اولايلارا پاسيو و چكينگه ن ياخلاشماق، يارين دينچي فارس رئژيمين چؤكمه سينده ن سونرا بيزيم ميللي حاقلاريميزي الده ائتمه و قارانتي آلتينا آلماميزا انگله ل اولار. بورادا عراقدا ياشايان توركمان ديياسپوراميزين آجي تجروبه سي اونودولماماليدير. ياخين تاريخده توركمان ديياسپوراميز عراقدا اولوب بيته ني يانليش ده يه رله نديرميش، اؤز ميللي چيخارلاريني دوشونمه ك يئرينه توركييه نين بوتونويله يانليش اولان عراق سيياسه تينه اوياراق، بو اؤلكه نين فئدئرال سيستئمه گئچيشينه قارشي چيخميش، وار اولان فاشيست بعث رئژيمي و آنتي دئموكراتيك دورومون داوامينا چاليشميش، عراقدا باش وئره ن سيياسي چالخانتيلار و اولوب بيته نه قاتيلماميش، و عراق`ين ائحتيياجي اولان ده ييشيمي گتيره ن، اوتاجاغي و غاليب اولاجاغي بللي اولان آمئريكانين يانيندا دئييل، داغيلماسي كسين اولدوغو صددام رئژيمينين يانيندا يئر آلميشدير. ياپديقلاري بو اؤلومجول يانليشليقلار و ايزله ديكله ري گئريجي سيياسه تله رين سونوجوندا ايسه، توركمانلار صددام رئژيمي ييخيلاندان سونرا- كوردله رين ترسينه- يئني اولوشان داها دئموكراتيك سيياسي سيستئمده ن جزالانديريلاراق ديشلانميش و بوتون ميللي حاقلاريندان محروم بيراخيلميشديرلار. 

٢٩ بهمن يانليشليغي تكرار ائديلمه مه ليدير:

سراسه ري اولايلارا، فارسلاردان آيري ميللي تشكيلاتلار، سراسه ري-فارس قوروپلاردان باغيمسيز اولان موديرييه ت (يؤنه تيم) و ميللي شوعارلارلا قاتيلمالي

گئچميشده تورك خالقي و آيدين-سيياسيله رينين ايراندا باش وئره ن سراسه ري اولاي و آخيملارا قاتيلماما و اونلاردان اوزاق دورمالاري، بللي بير قوشوللاردا اويقون بير داورانيش ساييليردي. تورك خالقي و آيدينلارينين تورك ميللي بيلينجينه صاحيب اولماديقلاري، اورتادا ميللي دوشونجه لي و تورك ميلله تينين ميللي چيخارلاريني گؤزه ته ن، تورك خالقينين ميللي حاقلاريني الده ائتمه اوغروندا ساواشيم وئره ن ميللي سيياسي تشكيلات و درنه كله رين اولماديغي بير يئرده، ايراندا ياشايان توركله رين سراسه ري آنجاق اصلينده فارس اولان هؤرگوت و آخيملارا قوشولمالاري، تورك خالقينين، فارس خالقيندا و ايران كيملييينده اريمه سي ايله سونوجلانميشدير.

بوتونويله يانليش اولان بو توتوم و داورانيشا بيز هم مشروطه دئوريمينده و هم ٢٩ بهمن اينقيلابيندا تانيق اولماقداييق. تورك خالقي بو اولايلارا، ميلللي بيلينجده ن يوخسون بير دورومدا ايكه ن و اورتادا تورك آزه ربايجان ميللي حاققلاري اوغروندا ساواشيم وئره ن آيدينلار، ميللي تشكيلاتلار و ميللي پيلان-شوعارلار اولمازكه ن قاريشميشدير. بونون ايسه تك سونوجو، تورك خالقينين فارسلار طرفه فينده ن ماشا كيمي قوللانيلماسي، تورك ميللي كيملييينين فارس ميللي كيملييينده اريييب سيسقالاشماسي و تورك خالقينين داها دا فارسلاشماسي اولموشدور. تورك خالقينين فارسلاردان آيري و باغيمسيز بير ميلله ت دئييل، ايران ميلله تينين بير پارچاسي اولاراق قاتيلديغي بو ايكي خالق حره كه تينده ن سونرا، دوغال اولاراق يئني اولوشان دوزه ن، دئوله ت و آناياسالاردا، تورك خالقينين ميللي وارليغي و ميللي حاقلاري گؤرمه زده ن گلينميش و تورك خالقي بوتون ميللي حاقلاريندان محروم بيراخيلميشدير.

آنجاق بوگون دوروم ده ييشمه يه باشلاميشدير. آرتيق تورك خالقينين اؤنه ملي بير كسيمي اؤز ميللي كيمليك و حاقلارينين فرقينه وارميش و آيدينلارلا سيياسي آكتيويستله رينين بليرله ييجي بير بؤلومو ميللي بيلينجه صاحيبدير. اورتادا اؤلكه ايچينده و ديشيندا تورك خالقينين ميللي چيخارلاري و گونئي آزه ربايجان`ين گله جه يي اوغروندا ساواشيم وئره ن اونلارجا درنه ك و قوروم واردير. بو دورومدا ايران`ين سراسه ري اولايلاري ايله ايلگيله نمه ك و اونلاري ائتگيله مه و يؤنله نديرمه يه چاليشماق، نه تك يانليش و ضره رلي بير سيياسي تاكتيك و توتوم دئييل، بلكه يارارلي و گره كليدير.

سراسه ري-فارس تشكيلاتلارلا، ايران ايچينده و ديشيندا تماسا گئچمه ك گره كير

عئيني دوروم سراسه ري تشكيلاتلارلا ايليشگيله رده ده گئچه رليدير. ميللي ايسته كله ريميز ديلله نديريلمه ده ن و ميللي تشكيلاتلانمايا گئتمه ك يئرينه، سراسه ري تشكيلاتلارا فردي اولاراق قاتيلماق، اؤزوده فارس شخصييه ت و قوروپلارين يؤنه تيمي (موديرييه تي) آلتيندا، تورك خالقي اوچون اينتيحار ائتمه ك دئمه كدير. بيز بو يانليشليغي ياخين تاريخده "عدالت، حزب كمونيست ايران، توده، فدائي، مجاهد، پيكار، راه كارگر، نهضت آزادي، خلق مسلمان، ..." كيمي اونلارجا هؤرگوتله ري ياراداراق و يا اونلارا قاتيلاراق دفعه له رله تكرار ائتميشيك.

آنجاق بونون ترسي ده دوغروردور: ميللي تشكيلاتلار اورتايا چيخاندان و ميللي ايسته كله ر بليرله نه نده ن سونرا، ايران`ين ايچي و ديشيندا وار اولان سراسه ري-فارس سيياسي قوروپلارلا ايليشگيييه گئچمه مه ك ده، تورك خالقي اوچون اينتيحار دئمه كدير. بو توتوم بيزي عراقدا ياشايان توركمان ديياسپوراميزين عاقيبه تينه دوچار ائده ر.

بوگون بيزيم ساييلاري آرتماقدا اولان سيياسي تشكيلاتلاريميز، اينسان حاقلاري درنه كله ريميز، قادين حاقلاريني ساوونان توپلولوقلاريميز، مئديياميز، ... واردير. بونلارين اؤز باغيمسيز ميللي تورك كيمليكله ري و فارس تشكيلاتلاريندان كسينليكله آيري اولان يؤنه تيمله ريني قوروياراق، بنزه ر فارس-سراسه ري سيياسي قوروپلار، اينسان حاقلاري و قادين درنه كله ري و مئدييالاري ايله تماسا گئچمه له ري گره كير. چونكو بو، فارس-سراسه ري تشكيلاتلاري تورك خالقينين فارسلاردان آيري و باغيمسيز اولان ميللي و سيياسي كيمليك و يؤنه تيميني قبول ائتمه يه مجبور ائده جه كدير.

مشروطه حره كه تينين بيزه اؤيره تدييي درس:

حاكيمييه تده و فارسلار آراسيندا اورتايا چيخان پارچالانما و بؤلونمه له ر تشديد ائديلمه ليدير

مشروطه حره كه تي بير چوخ آچيدان آزه ربايجان و تورك خالقي اوچون درسله رله دولودور. بونلارين باشيندا گونئي آزه ربايجان`ين نئجه سؤمورگه بير اؤلكه يه و تورك خالقينين هانسي يوللارلا سيياسي ايقتيداري و اؤز حاكيمييه تيني فارسلارا قاپديراراق اسير بير خالقا دؤنوشمه سيني بيزه اؤيره تمه سيدير.

آزه ربايجان`ين سؤمورگه و تورك خالقينين كؤله له شمه سوره جي، ايلك اؤنجه قاجار تورك-آزه ربايجانلي آريستوكراسي و يؤنه تيجيله رينين ايكييه بؤلونمه سي ايله باشلاميشدير. آرديندان بير سيرا تورك و آزه ربايجانلي سئچگين و آيدين، گينه ده تورك و آزه ربايجانلي اولان قاجار دئوله تينه سالديرييا گئچميشدير. ميللي بيلينجده ن يوخسون اولان تورك سئچگين و آيدينلارين قيشقيرتمالاري، قاجار دئوله تينين باجاريسيزليغي و بؤلگه و دونيا قوشوللاري ايله بيرله شينجه، تورك خالقي و گونئي آزه ربايجان دا تورك آزه ربايجان قاجار دئوله تينه قارشي عوصيان ائتمه يه سوروكله نميشدير. بوتون بونلار ايسه، چوخ قيسسا سوره ده توركله رين اؤز ال.له ري ايله كندي تورك دئوله تله ريني سارسيب داغيتمالاري و اؤز حاكيمييه تله ريني قاجار تورك دئوله تينين باشكندي اولان تئهران ايله بيرليكده، ايكي اللي رقيب ميلله ت اولان فارسلارا تسليم ائتمه كله سونوجلانميشدير. او آنا قده ر پوسودا بكله يه ن فارسلار ايسه، تورك دئوله تي و تورك خالقينين ايييجه ضعيفله دييينده ن آرخايين اولدوقدان سونرا، و الده ائتديكله ري يابانجي دسته كده ن يارارلاناراق (اينگيليز)، كيچيك بير چابا ايله تورك آزه ربايجان قاجار دئوله تينه سون وئرميش و گونئي آزه ربايجان`ي هئچ بير ديره نجله قارشيلاشمادان اؤز سؤمورگه له ري و تورك خالقيني دا اؤز اسيرله ري حالينا گتيري وئرميشله ردير.

تورك حاكيمييه تي و تورك توپلوموندا اورتايا چيخان بو بؤلونمه و پارچالانما اولماقسيزين، ييرمينجي يوز ايلين باشلارينداكي ايراندا – كي تورك خالقي نوفوسون چوخونلوغونو اولوشدوروردو، اؤلكه يه بير تورك دئوله ت حاكيم ايدي و اوردو دا توركله رين الينده ايدي- فارسلارين ايران`ين مين ايلليك حاكيمييه تيني بو آسانليقلا توركله رين الينده ن چيخارماسينا ايمكان يوخ ايدي. اونلار بو ايشي، ايلك اؤنجه تورك حاكيمييه تيني ايكييه بؤله ره ك، داها سونرا تورك آيدين و سئچگينله ريني و ان سون دا تورك خالقيني تورك دئوله تينين جانينا سالاراق باشارميشلاردير. باشقا بير دئييشله فارسلارين ايرانا حاكيم اولماسي، اونلارين بؤل و يؤنه ت سيياسه تيني باشاري ايله اويقولامالاري و توركو توركه قيرديرابيلمه له رينين سونوجودور.

فارس ايران ايسلام جومهورييه تي تپه سينده اوچ جيناح:

"ويلايه تچي" (ولايتمداران)، "مصله حه تچي" (مصلحتگرايان)، "ايصلاحاتچي" (اصلاح طلبان)

بوگون فارس ايران ايسلام جومهورييه تي و حاكيمييه تده اولان فارس شيعي كؤكده ن دينچيله ر اوچ جيناحدان اولوشماقدادير: ويلايه تچي، مصله حه تچي، ايصلاحاتچي.

الف-"ويلايه تچي" (ولايتمداران): "اصولگرا" دا آدلانديريلان بو جيناح خامنه اي، جنتي، خزعلي، مصباح يزدي، جوادي آملي كيمي فارس يوكسه ك دين آداملاريندان (آيت الله) و موتلفه، حجيتيه، مدرسين حوزه هاي علميه، جامعه اسلامي مهندسان، .... كيمي اولترا گئريجي فارس قوروپلاريندان اولوشماقدادير. احمدي نژاد`ين دا باغلي اولدوغو بو جيناحين، ايسلامدان ايلكه ل بير يورومو واردير و فارس ايمامي شيعيزمينين قوندارتيسي (بدعتي) اولان "ولايت مطلقه فقيه"ه اينانير. بو اوزده ن ده بونلارين اصولگرا دئييل، "ويلايه تچي" (ولايتمدار) آدلانديريلماسي داها دوزگوندور. ويلايه تچيله ر ويا ولايتمدارلار، "ايران`ين طاليبانلاري" و يا "فارس-شيعي طاليبله ر" ساييليرلار. بو جيناح بوگون ايران ايسلام جومهورييه تينده اوستون قونومدادير و "رهبر، شوراي نگهبان، صدا و سيما، سپاه پاسداران، بسيج، قوه قضائيه، قوه مقننه و قوه مجريه، كميته امدام، بنياد مستضعفان، حوزه هاي علميه، ائمه جمعه، ..." ني اؤز كونتروللاري آلتيندا توتور. ويلايه تچيله ر، فارس قوومييه تچيسي (قوميتگراي فارس) اولوب، دولاييسي ايله آنتي تورك و آنتي آزه ربايجان بير آخيمديرلار. آنجاق بونلارين آشيري پان ايرانيست سؤيله مله ري يوخدور. بو جيناحين توپلومسال تاباني يوخسول، آزگليرلي شهه رلي و كندليله رده ن اولوشور.

ب-"مصله ح تچيله ر" (مصلحتگرايان): رفسنجاني، خاتمي، رضائي، موسوي و .... كيمي شخصله رده ن اولوشان بو جيناح مجمع تشخيص مصلحت نظام`دا توپلانميشدير. بو جنياح دا، دين دئوله تي و ويلايه ت-ي فقيه`ه اينانير، آنجاق ايران ايسلام جومهورييه تينين آياقدا قالابيلمه سي اوچون، ايچ و ديش سيياسه تله رينده بير سيرا داورانيشلاريني تعديل ائديب يوموشاتماسيني و "ولايت فقيه"ين گوجو و يئتگيله رينين آزالديلماسيني ايسته يير. بونلاري مجمع تشخيص مصلحت نظامدا اوداقلانديقلاري و گرچه ك ايصلاحاتين طره فداري اولماديقلاريندان دولايي، "ايصلاحاتچي" دئييل، بلكه "مصله حه تچي"  (مصلحتگرا) آدلانديرماق داها دوزگوندور. فارس قوومييه تچيسي اولان بو جيناحين آچيق پان ايرانيست ائييليم و سؤيله مله ري واردير.

ج-"ايصلاحاتچيلار" (اصلاح طلبان): بو جيناح، كؤكده ن دينچي فارس ايسلام جومهورييه تي و ولايت فقيه`ه اينانماسينا رغمه ن، اونون داورانيش و ياپيسيندا گرچه ك ايصلاحات و رئفورملارين ياپيلماسي گره كدييينه اينانير. كروبي`نين ده داخيل اولدوغو بو جيناح، حاكمييه تده وار اولان گرچه ك ايصلاحاتچي كسيمي اولوشدورور. بونلار حاكيمييه ت ايچينده ايراندا ياشايان ميلله تله ره ان ياخين دوروشا صاحيب اولان جيناحديرلار. بو كسيمين توپلومسال تابانيني، اورتا صينيف اولوشدورور.

حاكيمييه تده يئر آلان بو اوچ جيناحدان باشقا، حاكيمييه ت ديشيندا اولان باشقا فارس دينچي قوروپلار دا واردير (نهضت آزادي، مجاهدين انقلاب اسلامي، جنبش مسلمانان مبارز، جاما، ...). حاكيمييه ت ديشيندا اولان بو فارس دينچي قوروپلارلا "ايصلاحاتچيلار"، "ويلايه تچيله ر"ه قارشي موسوي چئوره سينده توپلاشان "مصله حه تچيله ر"له ايتتيفاق حالينداديرلار. بوگون فارس حاكيمييه تده جره يان ائده ن داعوا "ويلايه تچيله ر"له "مصله حه تچي-ايصلاحاتچي"لارين داعواسيدير.

خامنه اي ايله رفسنجاني قارشي دورماسي، تورك خالقي و گونئي آزه ربايجان`ين خئيرينه دير

بوگونكو قوشوللاردا، تورك خالقي و تورك آزه ربايجان ميللي دئموكرات حره كه تينين گوجو، فارس حاكيمييه تيني تك باشينا آشاغييا چكمه يه، حتتا اونو جيددي شكيلده ضعيفله تمه يه يئتمه ز. آنجاق چكيشمه حاليندان اولان ايكي جيناحين باشچيلاري يعني خامنه اي و رفسنجاني، بير بيري ايله ايران ايسلام جومهورييه تينين بوتونونو ايييجه ضعيفله تمه و يا يوخ ائتمه گوج و حيرصينه صاحيبديرله ره ر. بو اوزده ن ده بيزيم بوگون اويقولاماميز گره كه ن تاكتيك، بير ياندان فارس ايسلام جومهورييه تي جيناحلاريني بير بيرينين الي ايله تضعيف و يا حذف ائتمه ك، اؤته ياندان فارس آيدين و سئچگينله ري ايله اوپوزيسييونونو دينچي فارس حاكيمييه تينين جانينا سالماقدير.

بورادا يانيتلانماسي گره كه ن تك سورو، تورك خالقي و تورك آزه ربايجان ميللي دئموكراتيك حره كه تينين هانسي جيناحا ياخين دورماسي گره كدييي سوروسودور.

-رفسنجاني`نين رهبه رليك ائتدييي "مصله حه تچيله ر" بير آز داها پان ايرانيست اولسالار دا، ميللي آچيدان ايران ايسلام جومهورييه تيني اولوشدوران ايكي "ويلايه تچي" و "مصله حه تچي" قانات آراسيندا اؤنه ملي بير فرق يوخدور. چونكو ايكيسي ده آنتي تورك و آنتي آزه ربايجانديرلار. دولاييسي ايله بونلاردان هر هانسي بيري وار اولان گوج چكيشمه سي سونوجوندا حذف ائديليرسه، تورك خالقي و گونئي آزه ربايجان`ين خئيرينه دير.

-بوگون ايران ايسلام جومهورييه تينين كونترولو خامنه اي باشيچيليغيندا اولان "ويلايه تچي" قاناتين الينده دير. "ويلايه تچيله ر"ين و ايران ايسلام جومهورييه تينين اساس سمبول و باشي ايسه، خامنه اي`دير.

خامنه اي`نين عزل ائديلمه سي، تكجه خامنه اي`نين اؤزو ايله قيسيتلي قالماييب، رهبه رليك، ويلايه ت-ي فقيه و بوتون ايران ايسلام جومهورييه تينين تمه ل.له ريني سورقولامايا، موللا كاستيندا درين آيريشمالار و قارشي دورمالارا يول آچيب، كؤكده ن دينچي فارس ايسلام جومهورييه تيني اوچوروما يووارلاداجاقدير. بو اوزده ن ده تورك آزه ربايجان ميللي دئموكراتيك حره كه تي خامنه اي`نين رهبرليكده ن عزل ائديلمه سيني ايسته مه ليدير. بو ايسته يين گره كچه سي خامنه اي`نين اؤز آناياساسيندا (١٠٩ نجو باشلاق) "رهبر"ين اؤزه لليكله ري ساييلان "عدالت، بينش صحيح اجتماعي و سياسي، تدبير و مديريت كافي" كيمي وصيفله ره صاحيب اولماماسيدير. خامنه اي سئچگي ساختاكارليغينين دا اساس سوروملوسودور.

تمه ل ايستئراتئژيميز:

هميشه داها ليبئرال اولانين يانيندا يئر آلماق

-"ويلايه تچي" قانات فاشيست و توتاليتئر بير بئيين ياپيسينا صاحب اولماقلا بيرليكده داها آشيري و ايلكه ل بير كؤكده ن دينچيلييي تمثيل ائتمه كده دير. اويسا ايراندا فارسلار حاكيم اولدوغو مودده تجه بيزيم اوچون ان اويقون اولاني ليبئرال فارسلارين حاكيمييه تيدير. چونكو حاكيمييه تين ليبئرال اولماسي، بيزه ديرچه لمه ايمكاني و ياشاما فورصه تي وئره ر.

-"ويلايه تچي" قانات، گونئي آزه ربايجاندا ١٣٨٥ خورداد آياقلانماسي و بو آياقلانمانين آجيماسيزجا باسديريلماسيندان دا سوروملودور. بونون حئسابي ار گئج آلينماليدير.

-"ويلايه تچي" جيناحين باشيندا تورك كؤكه نلي اولاراق بيلنه ن خامنه اي نين بولونماسي، بو جيناحين تصفييه ائديلمه سينه، تورك خالقي آچيسيندان اؤنجه ليك قازانديران باشقا بير نده ندير. 

-دئموكراسي اورتا صينيفينا دايانير، اورتا صينيف يوخسا، دئموكراسي ده يوخدور. حاكيمييه ت جيناحلاري آراسيندا ايسه، اورتا صينيفي تمثيل ائده ن "ايصلاحاتچي" و داها آز اولماق اوزه ره "مصله حه تچي" قاناتدير.

-مئوجود چاتيشمادا، هئچ بير شوبهه اولمادان، اوتوزاجاق اولان طره ف، خامنه اي باشچيليغيندا "ويلايه تچي" قاناتدير. سيياسي پيراقماتيسم، تورك خالقينين اوتوزان دئييل، اوتان طره ف اولان ايصلاحاتذچيلارين يانيندا يئر آلماسيني حؤكم ائتمه كده دير.

-بيز بو حره كه ته قاتيلساق دا، قاتيلماساق دا، رئژيم بو فورصه تي بيزه سالديرماق اوچون قوللاناجاقدير. دولاييسي ايله ان ياخشي تاكتيك، اوتوروب بيزه سالديرمالاريني بكله مه ك دئييل، اؤنله ييجي سالديرييا گئچمه كدير.

يوخاريدا سؤيله نه نله رين ايشيغيندا بوگون تورك خالقي و تورك آزه ربايجان ميللي دئموكراتيك حره كه تينين، "ويلايه تچيله ر"ه قارشي "مصله حه تچيله ر" و "ايصلاحاتچيلاري" تحريك ائديب قيشقيرتماسي، و بونلارين اوچونده ن اولوشان فارس ايران ايسلام جومهورييه تينين بوتونونه قارشي دا باشلاديلان خالق آياقلانماسيني دسته كله مه سي گره كير.

بعضه ن آز، چوخدور:

تورك خالقي بو اولايلارا سؤزده دسته ك وئرمه لي، ائيله مده دئييل

بوگون ايراندا حاكيمييه ت ايچه ريسينده جره يان ائده ن "ويلايه تچي" (خامنه اي-احمدي نژاد)، "مصله حه تچي" (رفسنجاني-موسوي) و "ايصلاحاتچي" (كروبي) چاتيشماسي و بو چاتيشمانين باشلاتديغي ايله ريجي و دئموكراتيك خالق آياقلانماسينا، تورك آزه ربايجان ميللي دئموكراتيك حره كه تي اؤز ميللي كيملييي، ميللي هؤرگوتله نمه سي، فارسلاردان و سراسه ري آخيملاردان باغيمسيز اولان موديرييه تي و ميللي شوعارلاري ايله و آشاغيدا سؤيله نه جه ك ايلكه له ره باغلي قالاراق دسته ك وئرمه ليدير.

-تورك خالقي سون ايكي يوز ايلده ايران اوچون، گره كدييينده ن قات قات آرتيق هزينه وئرميش و اؤزوئريده بولونموشدور. بو بيلينجسيز اؤزوئري و ايتگيله ر ايسه، تورك خالقينين گوجسوزله شمه سي و كؤله له شمه سي بير يانا، ايران`ين دا –گؤروندويو كيمي- خئيرينه اولماميشدير و بو اؤلكه گونده ن گونه داها دا گئريله ميشدير. آرتيق تورك خالقي و گونئي آزه ربايجان، يالنيز و يالنيز اونو دوغرودان ايلگيله نديره ن ساواشيمدا يعني اؤزونون ميللي حاقلاري اوغروندا اؤزوئريده بولونمالي و هزينه وئرمه ليدير. بوندان سونرا ايران`نين گنه ل دئموكراتيكله شمه موجاديله سي اوغروندا هزينه وئرمه سي سيراسي ايسه، حاكيمييه تي الينده بولوندوران فارس خالقيندادير.

-ذاته ن سون اولايلارين، آزه ربايجاندا سويوق قارشيلانديغي و داها چوخ فارس بؤلگه له رينه محدود اولدوغو، بو گرچه يين خالقيميز طره فينده ن ده آنلاشيلديغيني گؤسته رير. بوندا موسوي`ني دسته كله يه ن رفسنجاني و خاتمي`نين تورك خالقي و آزه ربايجانليلار طره فينده ن سئويلمه يه ن شخصله ر اولدوغونون دا اؤنه ملي پايي واردير. فارس بؤلگه له رينده ن فرقلي اولان بو سيياسي داورانيش، آيريجا تورك خالقينين ميلله تله شمه سينين ده بير گؤسته رگه سيدير.

-دولاييسي ايله تورك آزه ربايجان ميللي دئموكراتيك حره كه تي سئچيم سونراسي فارس بؤلگه له رينده اورتايا چيخان آياقلانمالارا ائيله مده دئييل، سؤزده دسته ك وئرمه ليدير. دوغال اولاراق وئريله ن بو گئچيجي دسته ك، ان كيچيك بير هزينه و ايتگي وئرمه ده ن اولماليدير.

-بير سيرا آزه ربايجانلي شخصييه ت و قوروپلارين (حس شريعتمداري، فرقه دمكرات آذربايجان،...) تورك خالقي و گونئي آزه ربايجاني ايران ميلله تينين بير پارچاسي و ايران`ين باشي اولاراق، گره كسيز يئره و بوش شوعارلارلا گينه ده ايران`ين سراسه ري اولايلارينا بولاشديرما و قوربان ائتمه چابالاري، بونلارين هله ده مشروطه دؤنه مي ايران مركه زلي دوشونجه يه تاخيليب قالديقلاريني گؤسته رير.

خامنه اي`نين رهبرليكده قالماسي، بيزيم ايستيراتئژيك چيخارلاريميزا ترسدير

تورك خالقي و آزه ربايجان ميللي دئموكراتيك حره كه تينين خامنه اي`نين رهبرليكده ن عزل ائديلمه سيني ايسته مه سينين اؤنه ملي آيري بير نده ني داها واردير، او دا خامنه اي`نين ايچ و ديش قامو اويوندا تورك اولاراق بيلينمه سيدير. تورك كؤكه نليله رين فارس ميلله تينين دئوله تله شمه سي اولان ايران ايسلام جومهورييه تينين باشيندا و يا ان اوست مقاملاري آراسيندا يئر آلماسي، تورك خالقينين ميللي چيخارلارينا ترسدير:

الف-بئله بير دوروم، ايران توركله رينين ايران دئوله تي و توپلومو ايله بيرله شدييي گؤروشونو گوجله نديرير، ايراندا توركله ره قارشي دئوله ت دوزئيينده آيريمجيليق وار دييه نله رين ايدديعاسيني چورودور، ايراندا ياشايان توركله ري ايران دئوله تينده ن قوپارما و اونونلا قارشي قارشييا گتيرمه ني ايسه اولدوقجا چتينله شديرير. بيز ايراندا حاكيمييه تين باشيندا فارسلاشميش توركله ر دئييل، فارس مقاملارين بولونماسيني يئيله ييريك. بو دوروم، تورك خالقينين ايران دئوله تينده ن آيريشماسينا كؤمه ك ائده ر و تورك خالقي ايله دونيا قامو اويونو ايران دئوله تينين بير فارس دئوله تي اولدوغونا اينانديرماني دا آسانلاشديرار.

سئچيمين ايكينجي آشاماسيندا موسوي`نين جومهورباشخانليغينا سئچيلمه سينه قارشي آپاريلان كامپانيانين اصيل نده ني ده، بو ايدي. جومهورباشخانليغي ايله ايلگيلي بيزيم تمه ل ايستئراتيژيميز، فارسلاشميش بير توركون بو مقاما اوتورماماسي ايدي. عئيني نده نه گؤره، ايران ايسلام جومهورييه تينين باشيندا تورك اولاراق بيلينه ن خامنه اي`نين بولونماسي دا ايسته نيلمه ز بير دورومدور. فارس ايران ايسلام جومهورييه تينين ان تپه سينده كي مقاملار سؤز قونوسو اولونجا، هميشه فارسي توركه، و ليبئرالي آوتوريتارا ترجيح ائتمه ليييك. خامنه اي بو اؤزه لليكله رين هر ايكيسينده ن يوخسوندور. دولايييسي ايله سون آياقلانمالاردا خالق طره فينده ن ايله ري سوروله ن خامنه اي`نين رهبرليكده ن عزل ائديلمه ايسته يي، تورك خالقينين ميللي چيخارلارينا يوزده يوز اويقوندور.

ب-اينديكي حاكييميه ت ايچي چاتيشمادا، ان گئريجي، ان آنتي دئموكراتيك، ان فاشيست قانات خامنه اي`نين رهبه رليك ائتدييي قاناتدير. بو ايسه تورك خالقي و آزه ربايجانا قارشي اولان، پيسيكولوژيك اولاراق سون دره جه اولومسوز بير دورومدور. بيليندييي كيمي تورك شخصييه تله ر و گونئي آزه ربايجان اون دوققوزونجو يوز ايل و ييريمينجي يوز ايلين باشلاريندا ايران`ين دئموكرات، آيدين، لاييك و مودئرن اوزو ايدي. آنجاق ييرمينجي يوز ايلين ايكينجي ياريسيندان دوروم ده ييشميشدير و گونئي آزه ربايجان و تورك خالقي، ايران`ين سيياسي صحنه سينده كؤكده ن دينچي شخصييه تله ري وئره ن بير خالق و اؤلكه يه چئوريلميشدير (بازرگان، غفاري، حنيف نژاد، خلخالي، چمران، رجائي، بني صدر، موسوي، موسوي اردبيلي، محصولي و ....). بيزجه بو دوروم تورك خالقي و آزه ربايجان`ين دين آچيسيندان دا آغير بير بيچيمده فارسلاشماسينين (ايمامي شيعه له شمه سينين) بير سونوجودور. خامنه اي و باشقا بير مانقورت تورك اولان صادق محصولي (وزير كشور و رئيس شوراي امنيت ملي) بو فارسلاشميش تورك دينچي زنجيرينين ان سون و ان گئريجي حلقه سيني اولوشدورورلار.

خاريجي موداخيله هميشه پيس بير شئي دئييلدير

اسير دورومونا دوشموش تورك خالقينين، تك باشينا فارس حاكيمييه تينه سون وئره جه ك و فارس ايران ايسلام رئژيمينين يئرينه دئموكراتيك بير دوزه ن قوراجاق گوجو يوخدور. بيزجه حتتا بوتون ايران ميلله تله رينين بيرگه اولماسي و ايراندا ياشايان بوتون خالقلارين آياغا قالخماسي دوروموندا دا بونا ايمكان يوخدور. چونكو ايران بير موسه لمان و اورتا دوغو اؤلكه سيدير. موسله لمان و اورتادوغو اؤلكه له رينده دئموكراتيك ده ييشيم و سوردوره بيلير سيياسي و ايجتيماعي گليشيمي ساغلايابيله جه ك دئموكراتيك گله نه ك و قوروملار يوخدور. بونلار وار اولماديغيندان دولايي دا، اورتادوغودا خاريجي گوج و ديش ائتگي اولمازسا، ايله رييه دوغرو هئچ بير دئموكراتيك گليشمه گرچه كله شمه ز، گرچه كله شسه بيله، مشروطه حره كه تي و ٢٩ بهمن اينقيلابيندا قانيتلانديغي كيمي، اوزون عؤمورلو اولابيلمه ز.

اساسه ن چاغداش (موعاصير) و يئنيجيل (مودئرن) دونيادان تجريد ائديلميش موسه لمان دونياسي و اؤزه لليكله اورتادوغودا اؤز باشينا و ايچ ديناميزمي ايله دئموكراتيك، لاييك و حوقوقا دايالي سيستئمه گئچميش تك بير اؤلكه اؤرنه يي مئوجود دئييلدير، اولابيلمه ز ده.

ميللي ايستيقلال ساواشلارينا گلينجه، بؤلگه ميزده هئچ بير ميللي قوروپون خاريجي گوجله رين دوغرودان موداخيله سي اولمادان اؤز گله جه ييني بليرله مه و اؤزونو يؤنه تمه حاققيني الده ائتمه دييي اورتادادير. قيبريس توركله ري، عراق كوردله ري، گورجوستان اوسئتينله ري، آزره ربايجان ائرمه نيله ري، .... و هاميسي اؤز ميللي دئوله تله ريني، تكجه و تكجه خاريجي گوج و دئوله تله رين ديرئكت موداخيله سينده ن سونرا الده ائده بيلميشله ردير. ايراندا دا دوروم عئينيدير. آزه ربايجان ميللي حؤكومه تينين بيله، بؤلگه سوويئت اوردوسونون ايشغالي آلتيندا اولاركه ن قورولماسي، بو قورالا اويقونلوق گؤسته رير. عراق توركمانلاري، روسييا چئچه نله ري و ... ده عئيني نده نله يعني ديش گوج موداخيله سي و خاريجي دئوله ت دسته يينه صاحيب اولماديقلاري اوچون، ميللي حاقلاري و دئوله تله رينه قاووشابيلمه ميشله ردير.

تورك خالقي ديش دونيانين بوتون ايران اولايلارينا قاريشماسيني ايسته مه ليدير

ايشته بو نده نله دير كي تورك آزه ربايجان ميللي دئموكراتيك حره كه تينين ايستيراتئژيك هده فله رينده ن بيري، ايراندا ياشايان ميلله تله ر سورونونو، اولوسلارآراسي پيلاتفورما داشيماقدير. بيز گونئي آزه ربايجان سورونونو ان باشدا آزه ربايجان جومهورييه تي و توركييه نين ده سورونو ائتمه يه چابا گؤسته مه ليييك. اؤرنه يين ايراندا ياشايان قيزيلباش (اهل حق) توركله ريني توركييه علويله رينه باغلاياراق، آزره ربايجان جومهورييه تينين ناتويا اويه لييينه آرخا چيخاراق، ... ايراندا ياشايان تورك خالقي و گونئي آزه ربايجان سورونونو، توركييه، آزه ربايجان جومهورييه تي، آوروپا پارلامئنتي و ناتونون دا سورونو حالينا گتيرمه يه چاليشماليييق. كوردله ر، توركمه نله ر، بلوچلار و عره بله ر ده حاقلي اولاراق، قونشو دئوله تله ر و سينير اؤته سي سويداشلاريني اؤز ميللي مساله له رينه بولاشديرمايا چاليشيرلار.

آْيريجا، چاغداش دونيادا اينسان حاقلاري، دئموكراسي، كؤكده ن دينچيليك، اؤزگور سئچگيله ر، عيرقچيليق و آيريمجيليق، قادين حاقلاريني يوخ سايما، ديلله ر و كولتورله رين يوخ ائديلمه سي و ... كيمي قونولار، هئچ بير اؤلكه نين ايچ ايشله ري دئييلدير. بونلار آرتيق ايران`ين دا ايچ ايشي دئييلدير. بيز بو آلانلاردا اليميزده ن گلدييي قده ر اولوسلارآراسي قوروملارلا قونشو و باتي اؤلكه له رين موداخيله ائتمه سيني ساغلامايا چاليشماليييق. بو دوغرولتودا بوندان سونرا ايراندا ياپيلان بوتون سئچيمله رده، اولوسلارآراسي قوروملار و ديش اؤلكه له رده ن گؤزله مجيله رين (ناظيرله رين) بولونماسي، تورك آزه ربايجان ميللي دئموكراتيك حره كه تينين اساس ايسته كله رينده ن بيري اولماليدير. بو ايسته ك، عئيني زاماندا بيزيم ايران دئوله تيني مشروع و گووه نيلير سايماديغيميزين بير گؤسته رگه سيدير.

ايسته كله ر سوموت و آچيق اولاراق بيلديريلمه ليدير

گونئي آزه ربايجان و اؤته كي تورك بؤلگه له رينده حاضيردا ياپيلماقدا اولان و يا گله جه كده ياپيلاجاق اولان گؤسته ري، ائيله م و آياقلانمالاردا و بونلار حاققيندا تورك آزه ربايجان مئدييا و قوروملارين يايديغي راپورلاردا، تورك خالقينين سئچيمله ايلگيلي، تمه ل دئموكراتيك و ميللي ايسته كله رينه يئر وئريلمه ليدير.

١-تورك خالقينين سئچيمله ايلگيلي ايسته كله ري:

-احمدي نژاد باشچيليغيندا يئني ايران حؤكومه تي رسمييه ته تانينماماسي

-سون دؤنه مده توتوقلانانلارين آزاد ائديلمه سي،

-نظارت استصوابي`نين قالديريلماسي،

-سيياسي قوروپلارين اؤزگورجه چاليشابيلمه له رينين تضمين ائديلمه سي،

-آدايلارين مئدييا و رادييو تئلئويزييوندان يارارلانمالارينا شراييط ياراديلماسي،

-سئچگيله رين يئنيده ن ياپيلماسي،

-اولوسلارآراسي گؤزله مجيله رين (ناظيرله رين) سئچيمله ره نظاره ت ائتمه سي،

-صادق محصولي`نين ايچ ايشله رباخانليغيندان عزل ائديلمه سي

-...

٢-تورك خالقينين تمه ل دئموكراتيك حاقلارلا ايلگيلي ايسته كله ري: بونلارين چوخو گؤسته ريله رده و يا آدايلار طره فينده ن ايله ري سوروله ن ايسته كله ردير. او جومله ده ن:

-خامنه اي`نين رهبرليكده ن عزل ائديلمه سي،

-ايجباري حيجابين قالديريلماسي،

-ائعدامين لغو ائديلمه سي،

-آناياسانين دئموكراتيك يؤنده ده ييشديريلمه سي،

-رادييو و تئلئويزييونون اوزه رينده دئوله ت تكه لي و اينحيصارينا سون وئريلمه سي،

-ايفاده اؤزرگولويونون تامين ائديلمه سي (مطبوعات، اينتئرنئت، موبايل، گؤسته ريله ر، اويدو، يابانجي ژورناليستله ر، ....)،

-ديشاريدا اولانلار آچيقجا لاييك سيستئمه گئچيش و ... ايسته ييني ديله گتيرمه ليديرله ر.

٣-تورك خالقينين ميللي حاقلاري ايله ايلگيلي ايسته كله ري:

-آناياسا باشدا اولماق اوزره ايران ياسالاريندا تورك ميلله تينين وارليغي و كيملييينين رسمييه ته تانينماسي،

-تورك ديلينين رسمي و دئوله ت ديلي ائعلان ائديلمه سي،

-ايران`ين شومال غربينده بوتون تورك بؤلگه له ريني ايچينه آلان بؤلگه سه ل پارلامئنتينين (آزه ربايجان مجليسينين) قورولماسي،

-توركجه اؤزه ل و دئوله ت سراسه ري رادييو، تئلئويزييون و قزئتله رين يايينلانماسي،

-تورك فرهه نگيستانينين آچيلماسي،

-ديشاريدا اولانلار اؤز گله جه ييني بليرله مه حاققي و باغيمسيزليق ايسته ييني ديله گتيرمه ليديرله ر.

يوكسه لمه كده اولان فارس ميللييه تچيلييي دالقاسينا ديققه ت ائتمه ليييك

حاكيمييه ت ايچي چاتيشمالار هانسي طره فده سئير ائده رسه ائتسين، اولايلارين سونوجو تورك خالقي و گونئي آزه ربايجان`ين خئيرينه اولاجاقدير. آنجاق بورادا ريسكله ر ده واردير.

-تورك آزه ربايجان ميللي دئموكراتيك حره كه تي مصله حه تچي-ايصلاحاتچي قاناتينا دسته ك وئرمه كله بؤيوك ريسك ياپماقدادير، آنجاق بوندان باشقا بير چاره سي ده يوخدور. بيليندييي كيمي مصله حه تچي قانات، قويو فارس ميللييه تچيسي اولوب حتتا بير سيرا پان ايرانيست سؤيله مله ري منيمسه ميشدير. بوگون جره ياندا اولان چاتيشمادا دا، مصله حه تچي-ايصلاحاتچيلارين ان اؤنه ملي دسته كچيله ري آراسيندا فارس ميللييه تچيله ري و پان ايرانيستله رله اوتانجاق تورك پان ايرانيستله ر (نگاهي، ارسي، فرقه دمكرات آذربايجان يانداشلاري، ايران امروز سايتي، ....) يئر آلماقدادير.

-اونوتولماماليدير: آزه ربايجاندا ايران ايسلام جومهورييه تينه قارشي ياپيلان ائعتيراضلارا ايران`ين باشقا يئرله رينده ن، و اؤزه لليكله فارسلاردان هئچ واخت يارديم و حيمايه ت اولماميشدير. ترسينه ايران سراسه ري-فارس مئديياسي (ايصلاحاتچيلار دا داخيل) بيزيم سسيميزي سانسور ائتمه کده مرکه زي دئوله ت و ايقتيدارچيلارلا ايش بيرلييي آپارميشلاردير. دئمه لي بيز ايصلاحاتچيلارين ايقتيدارا يوكسه لمه سينه كؤمه ك ائتمه كله – كي بونو ياپمايا مجبوروق- اوزه ريميزه باشقا بير آنتي تورك و آنتي آزه ربايجان گوجونو حاكيم قيليريق.

-مصله حه تچي-ايصلاحاتچيلارين غله به چالماسي ايله، ايران دئوله تينين داها دا فارسچي بير ياپي آلاجاغي كسيندير. هله هئچ بير شئي اولماميشكه ن، مخملباف كيميله ري، آنتي آزه ربايجان دورتوله رله، خزه ر (خزر) دنيزينين ايرانا عاييد اولدوغونو سؤيله ميشدير.

-ايصلاحاتچيلارين حاكيمييه تي آلتيندا، باتي دونياسي ايله ايران دئوله تينين ايليشگيله ري يوموشاياجاق و دوزه لمه يه اوز توتاجاقدير. بونونلا دا ديش دونيادا و باتيدا ايران توركله رينه ذاته ن چوخ آز اولان دسته ك و سمپاتي، داها دا آزالاجاقدير. بو اوزده ن ده تورك آزه ربايجان ميللي دئموكراتيك حره كه تي بو دوروما اينديده ن اؤزونو حاضير ائتمه ليدير. عئيني زاماندا فورصه ت وار ايكه ن، چوخ دا اوزون سورمه يه جه ك اولان ويلايه تچيله رين حاكيمييه تي دؤنه مينده، ايران ايسلام جومهورييه تينه قارشي، ميللي حاقلاري اوغروندا ان گنيش بير بيچيمده پيسيكولوژيك ساواشا گيرمه ليدير. چونكو باتي دونياسي و دونيا قامو اويو، ويلايه تچيله ره قارشي ياپيلان هر ائيله م و باش قالديرييا، سمپاتي ايله باخاجاقدير. بو فورصه ت بير داها اله گئچمه يه بيلير.

گونئي آزه ربايجاندا ياپيلان ائيله مله رين، فارس-سراسه ري قوروپلارين كونترولونا گئچمه سي انگه ل.له نمه ليدير

گرچه ك بودور كي تورك خالقي و گونئي آزه ربايجان`ين قامو اويو اوزه رينده كي تورك آزه ربايجان ميللي دئموكراتيك حره كه تينين ائتگيسي، هله ده ايدئالدان چوخ اوزاقدير. بو اوزده ن ده گونئي آزه ربايجاندا سيياسي اورتامين يؤنله نديريلمه سي و يؤنه تيمي هله ده بؤيوك اولچوده حاكيمييه ت ايچي و ديشي سراسه ريچي-ايرانچي حتتا آچيق و يا گيزلي پان ايرانيست قوروپ و آخيملارين الينده دير. فارسيستاندا باش وئره ن سئچم سونراسي آياقلانمالار سيراسيندا، اورمو و تبريزده قوپان اولايلار دا بو ايدديعاني دوغرولايير.

بو دورومدا تورك آزه ربايجان ميللي دئموكراتيك حره كه تي، گونئي آزه ربايجان توپراقلاريندا ايسته يي ديشيندا و باشقالاري طره فينده ن باشلاديلان ائيله م و آياقلانمالارين رهبرلييي، يؤنله نديريلمه سي و شوعارلاريني اؤز الي و اؤز كونترولونا گئچيرمه ليدير.

بو مومكون دئييلسه ده، اونلاري تبليغات آچيسيندان تورك خالقينين ميللي چيخارلاري دوغرولتوسوندا قوللانماني باشارماليدير.

اونوتولماماليدير: بيزيم بوش قويدوغوموز يئرله ري، فارسلار و كوردله ر دولدوراجاقدير.

گؤسته ري و ائيله مله رله ايلگيلي بير نئچه اؤنه ري

بو اؤنه ريله ر، گونئي آزه ربايجاندا گرچه كله شه ن بوتون ائيله م و گؤسته ريله ر اوچون گئچه رليدير:

-گونئي آزه ربايجاندا ايصلاحاتچيلار طره فينده ن باشلاديلان ائيله م و گؤسته ريله ره، تورك آزه ربايجان ميللي دئموكراتيك حره كه تينه باغلي آز ساييلي آنجاق ائتگيلي كيچيك قوروپلار قاتيلمالي و اونلاري تورك خالقينين ميللي  حاقلاريني باغیراجاق تيریبونلارا چئویرمه يه چاليشماليدير. 

-ائعتيراضلار سيراسيندا هئچ بير ايتگي و هزينه وئرمه مه يه ديققه ت ائديلمه ليدير.

-ائيله مله رده هزينه ني آزالتماق اوچون خوشونه ت و شيدده تده ن اوزاق دورلمالي، اونلارين دينج گئچيريلمه سينه چابا گؤسته ريلمه ليدير.

-آكتيويستله رين گووه نلييي اؤنه مسه نمه لي، گره كيرسه اوزله ره ياشماق (نيقاب) تاخيلماليدير.

-گؤسته ريله رده كسينليكله توركجه شوعارلار دا سؤيله نمه لي، توركجه پيلاكارتلار دا قالديريلماليدير.

-"آزه ربايجاندا ياپيلان گؤسته ريله رده، كربلا و عاشورا بنزه تمه له ري، "الله اكبر"، "نصر من الله و فتح قريب"، "ياحسين"، "لا اله الا الله" كيمي دينچيله رين شوعارلاري ايشله ديلمه مه ليدير.

-توركله ر فارس ميللييه تچيلييين سمبولو اولان "اي ايران" و "يار دبستاني" كيمي فارسجا سورودلاري ايشله تمه كده ن كسينليكله قاچينماليديرلار. بونلارين يئرينه قولاغا ياتان، ازبه رله مه سي آسان اولان توركجه سورودلار حاضيرلانماليدير.

-آزه ربايجان و تورك شهه رله رينين خبه رله ري، بورالاردا باش وئره ن اولايلار، آزه ربايجان و تورك مئدييا، درنه ك و قوروملاري طره فينده ن، توپلوجا و فارس شهه رله رينده ن آيري اولاراق، گونلوك راپورلاردا قامو اويونا بيليديريلمه ليدير.

-تورك شهه رله ري خبه رله رينين، فارس و كورد مئديياسي طره فينده ن وئريلمه سينين قاباغينا گئچيلمه ليدير.

-تورك شهه رله رينده ياپيلان گؤسته ريله رده اوچ رنگلي آزه ربايجان بايراغي ويا بو اوچ رنگي ايچه ره ن سمبوللار-پالتارلار.... قوللانيلماليدير.

-ايران`ين قوزئي باتيسيندا توركله رله مسكون بؤلگه له رده باش وئره ن و گله جه كده داها دا سيخ باش وئرمه سي بكله نه ن چاتيشمالار، باسقيلار و آياقلانمالارا، كيمين طره فينده ن ياپيلديقلارينا باخماقسيزين، آزه ربايجان اينسان حاقلاري درنه كله ري صاحيب چيخمالي و بونلاري آزه ربايجانليلارين ايران دئوله تي طره فينده ن باسقييا معروض قالديغي كيمي ايلگيلي مركه زله ره بيلديرمه سي گره كير.

موسوي`نين تورك اولماسي، خاريجي مئدييادا فارس شووئنيسمينه قارشي قوللانيلماليدير

موسوي دين دئوله تي و ويلايه ت-ي فقيه`ه اينانان، و فارسچي- پان ايرانيست ائييليمله ري اولان بير شخصييه تدير. آرتي، او گرچه ك بير ايصلاح طله ب ده دئييلدير. بوتون وئريله ر، اونون آزه ربايجان و تورك خالقينا اوز گتيرمه سينين –اعلمي`نين ترسينه- بير سئچيم تاكتييي اولدوغونو گؤسته رير. دئمه لي او تورك خالقي گؤزونده "ميللي" بير شخصييه ت دئييلدير. بونا رغمه ن، ايليملي و ارده ملي موسوي ايله آشيري و ايلكه ل احمدي نژاد آراسيندا، دين دئوله تي و ويلايه ت-ي فقيه`ده ن نه آنلاديقلاري آراسيندا اولدوغو كيمي، يؤنته م و اوسلوب آچيسيندان دا جيددي فرقله ر واردير. موسوي-احمدي نژاد" و حتتا "موسوي-خامنه اي" چاتيشما و چكيشمه سينه گلينجه، بو چكيشمه له رده موسوي، داها ايليملي و دئموكراتراق اولان طره فدير. بو اوزده ن ده موسوي، باتي دونياسي و ديش مئدييادا رغبه ت و به يه ني ايله قارشيلانير.

فارس شووئنيسمينين منيمه سه دييي بير يؤنته م واردير: اونلار اولوملو يؤنله ري اولان تورك شخصييه تله رين (اؤرنه يين مصدق)، تورك اولدوغونو قامو اويوندان گيزله ده رله ر. آنجاق اولومسوز و منفي يؤنو بولونان بير تورك وارسا (اؤرنه يين خلخالي)، دؤنه دؤنه و اوستونه باسا باسا بو شخصين تورك اولدوغونو وورقولارلار. بونو ياپماقدان آماجلاري ايسه، تورك كيمليييني آشاغيلاماق و تورك گنجليييني اؤز ميللي كيملييينده ن اوتانديرماقدير. فارسلارين اولوملو يؤنو بولونان بير توركون (اؤرنه يين شيرين عبادي`نين) توركلويونو ذيكر ائده نده ده آماجلاري، بو شخصين اؤزونو ايرانلي بيلديييني، دولاييسي ايله ايران توركله رينين ايران ميلله تينده ن اولدوغونو و باغيمسيز ميللي كيمليكله رينين اولماديغيني گؤسته رمه كدير.

عئيني دوغرولتودا سون اولايلار سيراسيندا موسوي`نين تورك و آزه ربايجانلي اولماسي گرچه يي بير سيرا فارس ديللي ايرانچي-سراسه ريچي مئدييا (اؤرنه يين مانقورت توركله ره عاييد اولان ايران امروز سايتي، ...) طره فينده ن سيخ سيخ گونده مه گتيريلير. ايرانچي-سراسه ريچيله رين بو تبليغاتلاردان آماجي، ايران توركله رينين باغيمسيز بير ميللي وارليق اولاراق حره كه ت ائتمه سيني انگه ل.له مه ك و اونلاري موسوي اؤرنه يينده اولدوغو كيمي ايران، ايران اولايلاري و ايران ميلله تينه ياماماقدير. آنجاق موسوي-احمدي نژاد`ين قارشي قارشييا گلمه سي، حتتا موسوي-خامنه اي چاتيشماسي، ايران توركله رينه فارس شووئنيسمينين بو سينسي پيلانلاريني بوشا چيخارتمايا ايمكان يارادير.

سئچيم سوره جينده ديش مئدييادا، ايران ايسلام جومهورييه تينين ايچه ريده ن چاتلاماسينا نده ن اولان ايليملي و دئموكرات موسوي`نين تورك و آزه ربايجانلي اولدوغو گرچه يي وورقولانميشدير. بيز ايسته سه ك ده، ايسته مه سه ك ده، موسوي بوگون ايران ايسلام جومهورييه تينين تمه ل.له ريني سارسان بير شخصييه ته چئوريلميشدير. بو، خاريجي تبليغاتدا بيزيم فارس شووئنيسمينه قارشي قوللانماميز گره كه ن بير نوكته دير. اؤزه لليكله ديش مئدييايا خطابه ن ياپيلان يايينلار و تبليغاتلاردا، موسوي`نين تورك اولوشونو چكينمه ده ن قوللانماليييق. بيز تورك موسوي`نين باش قالديريسيني دونيايا، تورك خالقينين فارس ايران ايسلام جومهورييه تيني قبول ائتمه دييي و فارسلاردان آيري ياپي و داورانيشلارا ماليك اولدوغو دييه سونمالي و موسوي كيمي تورك كؤكه نلي دينچيله رين بيله، فارس مودئللي شيعي ايسلام و ايران ايسلام جومهورييه تي ايله سورونلو اولدوقلارينا وورقو ياپماليييق. ايران ايسلام جومهورييه تينين تپه سينده اورتايا چيخان بو چاتيشماني تورك كؤكه نلي-آزه ربايجانلي ايليملي دينچي موسوي`نين، فارس كؤكه نلي-فارسيستانلي آشيري دينچي احمدي نژاد و حتتا فارسلاشميش ياري تورك اولان خامنه اي ايله چاتيشماسي اولاراق گؤسته ريلمه سينده ده يارار واردير. بوتون بو تبليغاتدان آماجيميز ايسه، ديش دونيايا ايراندا ياشايان تورك خالقينين، بو اؤلكه نين اويقار، چاغداش و اينسانجيل اوزو اولدوغو و ايران`ين گله جه يي سؤز قونوسو اولاندا باتي دونياسي طره فينده ن موخاطه ب آلينماسي گره كدييي فيكريني آشيلاماقدير.

گرچه يه هو!!!