اوتانجاق پان ايرانيسم (نئو پان ايرانيسم)

ويا

هر "آزربايجانلي آيدين"، "آزربايجان آيديني" دئييلدير

مئهران باهارلي

سٶزوموز

ليبئرال پان ايرانيسم و گيزلي گونجه سي (آجئنداسي)

فارس پان ايرانيستلر كيمي، تورك و آزربايجان پان ايرانيستلريني ده ايكي "كيلاسيك (كٶكله شيك) پان ايرانيست" و "ليبئرال (اٶزدن) پان ايرانيست" باشليغي آلتيندا اينجه له مك مومكوندور. كيلاسيك و يا آشيري پان ايرانيستلر، گنه لده اٶزلريني آچيقجا پان ايرانيست آدلانديران، گينه ده گنه لده آشيري فارس ناسيوناليسميني منيمسه ميش شخص، توپار (قوروه) و آخيملاردير. بونلارين سٶيله ملري بليرگين آرييا عيرقچيليغي ايحه ريكلي اولوب، شيددتلي عرب و تورك ياغيليغي (دوشمنلييي) ايله يوكلودور. آشيري پان ايرانيستلرين ايران`ي، بوگونكو ايران اراضيسي ايله قونشو و بٶلگه دٶولتلردن بير نئچه سينين تورپاقلاريني ايچينه آلير، دولاييسي ايله ديش ياييلماجيليغي اولان سالديرقان بير دوشونگه (ايدئولوژي)دير. كيلاسيك پان ايرانيستلر ايران ايچينده ياشايان ميللتلرين دوغرودان و دٶولت الي ايله و گره كدييينده گوجه باش ووراراق فارسلاشديريلماسيني ايسته مكده ديرلر.

ليبئرال (اٶزدن) پان ايرانيستلر ايسه، اٶزلريني پان ايرانيست آدلانديرمايان حتتا بئله آدلانديريلمالارينا قيزان، يوموشاق آنتي عرب و آنتي تورك دويقولار داشيسالار دا آچيق آرييا عيرقچيسي اولمايان، حتتا آشيري فارس ناسيوناليستي ساييلمايان؛ آنجاق كيلاسيك پان ايرانيسمين تمل ايلكه و گٶروشلريني منيمسه ميش شخص، قوروه و توپارلاردير. ليبئرال پان ايرانيستلرين ايران`ي بوگونكو ايران اراضييسينه محدوددور. اونلار بو اراضيده ياشايان بوتون اينسانلارين تك بير ميللي كيملييه (هويت ملي ايراني) صاحيب و تك بير ميللت (ملت ايران) اولدوقلارينا اينانيرلار (بونلارين پان ايرانيست آدلانديريلمالارينين اساس ندني ده بودور). ليبئرال پان ايرانيستلر، ايراندا ميللتلر و ميللي بٶلگه لرين وارليغينا اينانميرلار. اونلارين اٶنه رديكلري سيياستلرين سونوجو، اوزون وعده ده ايراندا ياشايان ميللتلرين دولايلي يوللاردان و گوجه باش وورمادان فارسلاشديريلماسيدير. ليبئرال (اٶزدن) پان ايرانيسمين باشقا آدلاريندان "يئني پان ايرانيسم" (نئو پان ايرانيسم)، "اوتانجاق (خجالتي) پان ايرانيسم"، "گيزلين پان ايرانيسم"، "يونگول (لايت) پان ايرانيسم"، "يوموشاق (ملايم) پان ايرانيسم"، "ايليملي (ميانه رو) پان ايرانيسم"، "ياشماقلي (نقابدار) پان ايرانيسم"دير. ليبئرال پان ايرانيستلر، يوردامدا (تاكتيكده) آشيري پان ايرانيستلردن فرقله نسه لر ده، كيلاسيك پان ايرانيستلر كيمي ايرانچي و ايران اٶزه كلي (مركزلي) اولوب، بير چوخ تمل قونودا آشيري اولانلارلا اورتاق ايلكه (پيرينسيب) و تئرمينولوژي-كودلارا (ايرانزمين، هويت ملي ايراني، ايرانيت، ملت ايران، خليج فارس، دولت-ملت، تماميت ارضي، تجزيه طلبي، كورش، فارسي مشترك، شهروند، اقوام ايراني، ....) صاحيبديرلر. بو ايسه اونلارين اٶزو و گئرچه ييدير.

تورك و آزربايجانليلار آراسيندا وار اولان كيلاسيك پان ايرانيستلري تانيماق چتين بير ايش دئييلدير. نئجه كي هامي، پئيمان پاكمئهر`ين "تبريز نييوز"و و يئني اورتايا آتيلان "جنبش آذربايجان براي یکپارچگی و دمکراسی ایران"ين، كيلاسيك فارس پان ايرانيستلرين آزربايجانلي وئرسييونو اولدوقلاريني آنيندا باشدا دوشدو. آنجاق دوروم سون دٶنه مده اولدوقجا چاليشقانلاشان (آكتيوله شه ن) ليبئرال پان ايرانيستلر اوچون بير آز فرقليدير. ليبئرال پان ايرانيستلر بير سيرا يئنيجيل (مودئرن) و ائل اركيل (دئموكراتيك) سٶيله ملره صاحيب اولدوقلاريندان دولايي، اوزون سوره اٶز ايچ اوزلريني (ماهييتلريني)، اٶزه لليكله پان ايرانيسم حاققيندا آزبيلگيلي و يا دئنه ييمسيز (تجروبه سيز) اولان شخصلردن گيزله ده بيله رلر.

ليبئرال پان ايرانيستلر يٶنه تگيل (سيياسي) اولاراق فارس - باشدانباشاچي (سراسري) آخيم اولان "اتحاد جمهوريخواهان" چيزگيسينده ديرلر. اونلار "فردي اينسان حاقلاري" و "ايران وطنداشليغي" (شهروندي) پيرينسيبلري اساسيندا و اوستانلار تملينده "عدم-ي تمركوز (عدم تمركز)"، "اينسانلارين اٶز ديللريني اٶيره نه بيلمه" كيمي بير سيرا دئموكراتيك آچيليملاري ساوونورلار (مودافيعه ائديرلر). بو اونلارين ايله ريجي و اولوملو يٶنودور. آنجاق ليبئرال پان ايرانيستلرين فرد و اوستان اساسيندا گٶرونوشده (ظاهيرن) دئموكراتيك حاقلاري اٶنه سورمه لرينين آرخاسيندا گيزلي بير نئچه گونجه سي (آجئنداسي) واردير. بو گونجه لرين بير نئچه سي بئله دير:

الف: "فرد-شهروند" قاورامي ايله تورك خالقينين "ميللت"له شمه، "اوستان" قاورامي ايله ده گونئي آزربايجانين "اٶلكه-وطن"له شمه سوره جينين اٶنونو تيخاماق؛ "تورك ميللتي" و "آزربايجان وطني" قاوراملارينين اولوشماسيني اٶنله مك؛

ب: پان ايرانيسم و ايرانچيليقدان اينساني و دئموكراتيك بير گٶرونتو (ايماژ) ياراداراق، آزربايجان ميللي دئموكراتيك حركتي جرگه لرينده كي (صفلرينده كي) يئته رينجه بيلگي و دئنه ييم صاحيبي اولمايان، سورونلو كيشيليكلي شخصلري اٶزلرينه دوغرو چكمك، حركتده ايكي تيره ليك سالماق، اونو ايچه ريدن بٶلمك؛

پ: آزربايجانلي اولان ليبئرال پان ايرانيستلري آزربايجان ميللي حركتي آيدينلاري و ليدئرلري آراسينا سوخماق، اونلارين آراجيليغي ايله حركت اوزره رينده ائتگي ساغلاماق، اونو يٶنله نديرمه گوجونو الده ائتمك، اوزون وعده ده  حركتينين يٶنه تيميني (موديرييتيني) اله گئچيرمك؛

ت: ان سوندا، يالنيز توركلوك و آزربايجانچيليق تمللري اوزره رينده ديكه لميش و بوتونويله ايرانين فارس- سراسري و ايرانچي سيياسي آنلاييش و يٶنه تيميندن (موديرييتيندن) باغيلسيز (موستقيل) اولان يئني آزربايجان ميللي دئموكراتيك حركتيني، مشروطه حركتي كيمي، آزربايجانلي و تورك آنجاق ايرانچي اولان آيدين و ليدئرلرين باشچيليغيندا تكرار فارس-سراسري-ايرانچي و ايران اٶزه كلي، آزربايجان و توركلره قارشي بير جريانا چئويرمك.

ليبئرال پان ايرانيستلرين تمل ايلكه و گٶروشلري

ليبئرال پان ايرانيستلرله كيلاسيك پان ايرانيستلرين اينانديقلاري اورتاق ايلكه لردن (پيرينسيبلردن) آشاغيداكيلاري سايابيله ريك. (بونلار مرتضي نگاهي`نين يازيلاريندان آلينميشدير):

"ميللت، دٶولت اساسيندا تانيملانار.

ايران تك ميللتلي بير اٶلكه دير، بو ميللتين آدي ايران ميللتيدير

بوتون ايرانليلارين تك بير ميللي كيملييي واردير، او دا "ايرانيت" و يا "هويت ملي ايراني"دير

ايراندا تورك و يا آزربايجان ميللتي آديندا بير ميللت يوخدور.

آزربايجانين، ايرانليليقدان باشقا هر هانسي بير ميللي كيملييي يوخدور

ايراندا ميللتلر يوخ، قووملار واردير.

ايران قووملارينين اٶزلرينه خاص ميللي منافئعي و ميللي حاقلاري يوخدور.

قووملارين اٶز گله جه ييني بليرله مه حاققي (حق تعيين سرنوشت) اولابيلمه ز

ايران دٶولتي و اونون يئريتدييي سيياستلر حاققيندا ايستئعمار، راسيسم، ايشغال و ..... كيمي قاوراملار ايشله ديله بيلمه ز.

ايستيقلال تكجه ايشغال و ايستئعمار آلتيندا ايكن آنلامليدير.

ايراندان آيريلماق ايسته يه نلر، ايستيقلال طلب دئييل، تجزييه طلبديرلر.

ايراندا قووملارين جيددي بير سورونلاري يوخدور.

قووملارين تك مساله سي فرهنگ-ديل مساله سيدير و بونون دا سيياسي-ايقتيصادي ايچه رييي يوخدور.

بوگون آزربايجاندا اولان حركت، تكجه ديل-فرهنگي بير حركتدير

قووملارين ديل مسله سي محللي ديللرين مدرسه لرده اٶيره نيلمه سيندن عيبارتدير،

ايراندا محللي ديللرده تحصيل آلماق و بو ديللرين رسمي و دٶولت ديلي ائديلمه سي سٶز قونوسو دئييلدير.

فارسجا ايران`ين موشترك-اورتاق (و نه رابيط-آراجي) ديليدير و بئله جه ده قالماليدير، حتتا منطقه نين اورتاق ديلينه چئوريلمه ليدير.

ايران توركلري فارسجاني قوروماليديرلار (پاس داشتن)

ايراندا ميللي بٶلگه لر دئييه بير شئي يوخدور

آزربايجان تكجه شرقي و غربي آزربايجان اوستانلاريندان اولوشور.

ايران`ين قوزئي باتيسيندا توركلر مسكون اولان اٶته كي اوستانلار اٶرنه يين همدان، قزوين و مركزي اوستاني آزربايجانا داخيل دئييلديرلر

ايرانين گونئيينده، قوزئي دوغوسوندا و باشقا بٶلگه لرينده ياشايان توركلر، ايران بيره ر آيري قوومدورلار.

آزربايجان جومهوريتي اهاليسي ايله ايران آزربايجانيندا ياشايانلار ايكي آيري ميللتديرلر

آزربايجان جومهوريسي ايله توركييه و اورالاردا ياشايان خالق و سورونلاري، ايراندا ياشان توركلري ايلگيله نديرمه ز.

ايراندا تورك تاريخي، تورك دٶولتلري تاريخيندن دانيشماق اولماز.

تورك تاريخي، تورك موسيقيسي، تورك فلسفه سي كيمي قاوراملار، ايران ميللتيني بٶله ن و آييريشديران قوندارما قاوراملاردير.

ريضاخان ايران`ي مودئرنيته يه داشييان كيمسه، و آتاتورك سوييه سينده بٶيوك بير دٶولت خاديميدير.

پيشه وري خايين، ان آزيندان بير سوويئت اويونجاغي ايدي.

آزربايجان`ين اصيل ديلي ايراني بير ديل اولان آزريجه دير.

تورك-عرب اليفباسي، فارس اليفباسيدير.

ايراندا توركلرين اكثرييت اولدوغونو سٶيله مك حتتا اونلارين ساييلاري و داغيليملاريني تارتيشماق، تفرقه سالماقدير

......"

ايراندا توركجه ياراتما، تورك ميللتيني ياراتما و ياشاتما دئمكدير

فارس ديلينين تورك خالقي و مدنييتينين يوخ ائديلمه سي و ايران دٶولتينين سٶمورگه چي (ايستئعماري) و راسيست سيياستلرينده مركزي يئري واردير. ايران دٶولتينين فارسجاني ايرانليلارين تك يازي، گٶركول (ادبي)، بيليمسه ل (عئلمي)، ايله تيشيم و اورنات (جانيشين) ديل حالينا گتيرمه يه چاليشماسي دا بيلينه ن باشقا بير گئرچه كدير. بو سيياستلر و تورك – آزربايجانلي آيدين و سئچگينلرينين سون يوز ايلده ايچينده بولوندوقلاري آيمازليق (غفلت) و آلديرمازليق (لاقئيدليك) سونوجوندا، گونوموز ايرانيندا تورك ديلي نه تك اكينج (كولتور)، بيليم (عئلم)، توپلوم (ايجتيماع)، مئدييا، يٶنه تگي (سيياست)، توزه (حوقوق) و ايقتيصاد ديلي اولما اٶزه لليييني ايتيرميشدير، بلكه بودون (خالق) آراسيندا دا تركجه (سورعتله) يوزلاشما (فاسيد اولما)، اونوتولما و يوخ اولمايا اوز توتموشدور. ييرمينجي يوز ايلده ايراندا تورك ديلينين يوخ اولمايا اوز توتماسي ايله، بو اٶلكه ده تورك ديللي قوروپلارين اولوسلاشما (ميللتله شمه) سوره جي ده دوراقساميش، داها سونرا بوتونويله دورموش و ان سوندا تورك ديللي قوروپلار يوخ اولما سوره جينه گيرميشديرلر.

بيزيم بوگون ايچيميزده بولوندوغوموز قوشوللار، ييرمينجي يوز ايلده فيرانسيز حاكيمييتي آلتيندا ايكن الجزاييرده عربجه يازيب و ياراداراق سٶمورگه ياشامييندان قورتولما ساواشيمي وئره ن عرب خالقي و آيدينلارينين قوشوللارينا بنزه يير. بيزيم دوروم حتتا اونلاردان داها چوخ، دونيا اوزه رينه سپه له نميش جوووت (يهودي) خالقينين اون دوققوزونجو يوز ايلده عيبريجه اطرافيندا ميللتله شمه سينه بنزه رليك گٶسته رير. جوووت (يهود) آيدينلاري اون دوققوزونجو و ييرمينجي يوز ايللرده، تاريخدن و يئر اوزوندن سيلينمه مه لرينين تك يولونون بوته م (دين) اساسلي اولوشموش موسوي-كليمي قوومو آنلاييشيني بيراخاراق عيبري ديلي تملينده مودئرن بير ميللت ياراتمالاري اولدوغونو فرق ائتميشديرلر. اونلار بو قونونو انينه- بويونا و درينله مه سينه تارتيشمايا آچميش و چيخارديقلاري سونوجلارين گره كلريني ده قيسسا سوره ده يئرينه گتيره ره ك، صيفيردن يئني بير ديل، يئني بير ميللت و يئني بير دٶولت ياراتماني باشارابيلميشديرلر. بوگون ايران توركونون ده ميللتله شمه و فارس سٶمورگه چيلييي، يوخ ائديلمه و سيليمله نمه يه (حذف ائديلمه يه) قارشي صاحيب اولدوغو ان اٶنه ملي ياراق (سيلاح)، توركجه يازيب ياراتماسيدير. ايشته بونون اوچوندور كي ايراندا توركجه يازما و ياراتمايا آشيري پان ايرانيستلر آچيقجا قارشي چيخير و ليبئرال پان ايرانيستلر ده سسسيزجه ديره نيرلر، چونكو ايران و گونئي آزربايجاندا توركجه يازيب ياراتما، بورادا تورك ميللتيني ياراتما و ياشاتما دئمكدير.

گيزلي پان ايرانيستلري تانيمانين كسديرمه يولو: كٶنوللو فارسجا يازماق

توركجه يازيب ياراتمانين گره كديييندن دانيشاندا، آماج آزربايجانلي و تورك آيدينلاري، قلم صاحيبلري، بيليم آداملاري، يازار و قوشارلارين اٶز اينتئلئكت ياپيتلاري، گٶركول (ادبي) و بيليمسه ل (عئلمي) اثرلري، آراشديرمالاري و قاليجي اولان بديعي ياراديجيليقلاريني يوخ اولمايا اوز توتموش كندي ميللي ديللري اولان توركجه ده ياراتمالاري گره ييدير. بو ايسته ك، آشيريليق يا دا فارسلارا ياغيليق (دوشمنليك) دويقولارينين اورتايا چيخارديغي دويقوسال بير تپگي دئييلدير، فاسجادان نيفرتله ايلگيسي يوخدور. بو، ميللتله شمه سوره جينده ايله رله يه ن ائتنيك قوروپلارين، سٶمورو آلتيندا ياشايان ميللتلرين و ده ديللري يوخ اولمايا اوز توتموش اينسان توپلولوقلارينين هاميسينين ار-گئج اونا وارديغي و اوندان گئچدييي بير اولقونلاشما آشاماسينين (مرحله سينين) اورتايا چيخارديغي ايسته كدير.

بيز آرتيق قطران، خاقاني، اوحدي و نيظامي حتتا پروين، شهرييار، ساعيدي و براهني`ني يارادان قوشوللار و اورتاملاردا ياشاماديغيميزي باشا دوشمه ليييك. گونوموزده كٶنوللو و تكجه فارسجا يازان و يارادان تورك و آزربايجانلي يازار و قوشارلاري، فارس يازار و قوشاري اولاراق ده يه رله نديرمه ليييك، چونكو ايچينده اولدوغوموز قوشوللار، يازار و قوشارلارين كيمليييني قوللانديقلاري ديله گٶره تانيملايير. باشقا بير دئييشله، كٶنوللو و يالنيز فارسجا يازيب يارادان آيدينلار، ان آزي ادبي آچيدان فارسلاشميش اولان توركلردير. اٶته ياندان سيياسي اولاراق آزربايجانلي قلم صاحيبلرينين هله ده اٶز ائنتئلئكتوئل ياراديجيليق و اثرلريني كٶنوللو اولاراق و تكجه فارسجا يازيب ياراتماسي، اونلارين -بيله ره ك يا دا بيلمه يه ره ك- پان ايرانيست سيياسي گٶروشلره باغليليقلاري، اٶزلريني پان ايرانيسم ائتگيسيندن قورتارانماديقلاري آنلامينا گلير.

من بير آدديم ايله ري آتيب، كٶنوللو و تكجه فارسجا ياراتما و بونا قوشوت (موازي) اولاراق كٶنوللو توركجه ياراتمامانين، توركلر آراسيندا گيزلي پان ايرانيستلري تانيما و آييرت ائتمه نين ان كسين و ساغلام ايپ اوجلاريندان بيري اولدوغونو ساولاييرام (ايدديعا ائديره م). بو قورال، اٶزه لليكله دئموكراتيك باتي (غرب) اٶلكه لرينده هر چئشيت قيسيتلامادان اوزاقدا ياشايان، گٶركول (ادبي) و يازيلي توركجه ني اٶيره نمك اوچون سونسوز اولاناقلارا (ايمكانلارا) يييه اولان، آنجاق بونا قارشين (رغمن) هله ده فارسجا يازيب يارادان آزربايجانلي قلم صاحيبلري اوچون گئچه رليدير.

"كٶنوللو فارسجا اثر ياراتماق"لا "مجبورن فارسجا تبليغ ائتمك" آراسينداكي اوچوروم

اورتادوغودا كوردجه نين گٶسته ردييي گليشمه و سيچرامايا قوشوت اولاراق، سون دٶنه ملرده كورد خالقي و اٶزه لليكله عراق و توركييه لي كورد آيدينلاري آراسيندا بديعي، بيليمسه ل و ائنتئلئكتوئل يازيلاريني كوردجه نين ديشيندا توركجه، فارسجا و عربجه يازيب يارادان كوردلره قارشي قيناما (ائعتيراض) و پروتئست سسلري يوكسه لمكده دير. بو دوروم، ميللتله شمه و ميللت ياراتما سوره جينين گره يي اولاراق، كورد آيدينلارينين كورد ديلينين قونومونو گٶزدن گئچيرمه يه باشلامالارينين دوغال سونوجودور. من بو ائعتيراض و پروتئستلري اولدوقجا يئرينده و دوغرو بولورام و بيزيم ده عئيني ميللتله شمه و ميللت ياراتما سوره ج و آشامالاريندان گئچديييميز اوچون، ايراندا ائنتئلئكتوئل (ادبي، آراشديرما، بيليمسه ل،.....) ياراديجيليقلاريني كٶنوللو اولاراق فارسجا يارادان توركلره ائعتيراض سسيميزي يوكسه لتمه ميز گره كدييينه اينانيرام. بونون ديشلاييجي اولوسچولوقلا هيچ بير ايليشگيسي يوخدور، فارس-فارسيستان آيندينلاري، فارس ديلينه صاحيب چيخمالي، تورك-آزربايجان آيدينلاري تورك ديلينه.

تورك و آزربايجانلي آيدينلارين توركجه ياراتما گره كدييي قونوسونون حياتي اٶنه م و تاريخي آنلاميني باشا دوشمه يه نلر؛ ديلين تكجه ايله تيشيم آراجي اولدوغونو سانان كيمسه لردير. بئله شخصلر چاغيميزين گره كلري، ديليميزين هانسي سوره جدن گئچدييي، ايچينده بولوندوغو تاريخي قوشوللار و گره كسينيملرينين (ائحتيياجلارينين) نه اولدوغو و بونلارين هاميسينين دا خالقيميزين اولوسلاشما (ميللتله شمه)، اويقارلاشما و ائلده مله شمه (لاييكله شمه) سوره جي و اينسان حاقلاري داعواميزداكي مركزي و بليرله ييجي يئر و اويناميني (رولونو) باشادوشمه يه ن كيمسه لردير.

آنجاق و بونا قارشين (رغمن)، من داخيل كيمسه باشدا فارسجا اولماق اوزره چئشيتلي ديللرده خالقيميزين سسينين و ايسته كلرينين دونيايا ياييلماسي و اولاشديريلماسينا قارشي دئييلدير. كيمسه خالقلارين دوستلوغونو بركيشديرمك آماجييلا يا دا صيرف ائنتئلئكتوئل ايلگي و ماراغي دويومساتماق (تطمين ائتمك) اوچون بو ديللردن يارارلانمايا دا قارشي دئييلدير. (گرچي فارس-فارسيستان حاكيمييتي آلتيندا بولونان گونئي آزربايجانلي آيدينين ائنتئلئكتوئل ماراقلا فارسجا يازماسينين، اونون عئيني ماراقلا اٶرنه يين اسيپانيولجا يازماسيندان چوخ فرقلي آنلام و سونوجلاري واردير). سٶزسوز ايته كله ندييينده (مجبور اولدوغوندا)، يايماجا (تبليغات) آراجي، يا دا ائنتئلئكتوئل دئنه ييم اولاراق هر زامان فارسجا و يا هر هانسي باشقا يابانجي بير ديلدن يارارلانماق مومكون و گره كليدير، بو بوتونويله آيري بير قونودور. اساسن سٶزوموزده و ديشيندا چيخان يازيلارين دا اٶنه ملي بٶلومو–عئيني ندنلر و گره كسينيمدن (ائحتيياجدان) دن دولايي- فارسجادير.

سوموت بير اٶرنه ك: مرتضي نگاهي

پان ايرانيسم ايلكه لري دييه يوخاريدا سيرالانان پيرينسيبلرين هاميسي، آمئريكادا ياشايان بير آزربايجانلي مرتضي نگاهي`نين يازيلاريندان آلينميشدير. مرتضي نگاهي`نين گٶروشلرينين اٶرنه كله مه اوچون سئچيلمه سينين ندني، سون دٶنه مده اونون فارس ايرانچي- باشدانباشاچي (سراسري)- پان ايرانيستلرين دئنه تيمي (كونترولو) آلتيندا بولونان سايت و مئدييالاري (براي يك ايران، ايران گلوبال، ايران امروز، راديو فردا، صداي آمريكا، .... ) – آزربايجان ميللي دئموكراتيك حركتينين هئچ بير سئچگينينه يئر وئرمه ديكلري حالدا - و تورك آزربايجان سايتلاريندان بايقوش سايتيندا تبليغ و شيشيرديلمه سيدير. اونلار اٶز يايماجالاريندا (تبليغاتلاريندا) بيردن بيره مرتضي نگاهي`ني "آيدين"، "آراشديرماجي"، "اينسان حاقلاري چاباماني (آكتيويستي)"، "ايران توركلري اوزماني" (موتخصصيصي)، "آزربايجان آيديني"، "آزربايجان اٶنده ر (ليدئر) و سئچگينلريندن بيري"،... دييه گٶسته رمه يه و لانسئ ائتمه يه باشلاميشلاردير. بيليندييي كيمي ياخين گئچميشده آكتيوله شه ن ليبئرال پان ايرانيستلرين آجئنداسي، آزربايجان ميللي حركتينه سيزماق؛ جرگه لرينده ايكي تيره ليك سالماقلا اونو بٶلمك؛ يٶنله نديرمك، موديرييتيني اله گئچيرمك، داها سونرا دا هر زامان اولدوغو كيمي اونا ايرانچي بير ايچه ريك وئريب، و نهايتده سراسري-فارس بير چيزگيييه ساپديراراق (مونحريف ائده ره ك) يوخ ائتمكدير. مرتضي نگاهي`نين بايقوش سايتي و آمئريكانين سسي رادييوسونون آزربايجان سئرويسينده يئر آلابيلمه سي بو گئرچه يين ان ياخشي اٶرنه ييدير. بو اوزدن مرتضي نگاهي اولايينين ايرده له نمه سينين؛ ليبئرال پان ايرانيسم، يورداملاري (تاكتيكلري)، گونجه لري (آجئندالاري) و الده ائتدييي باشاريلار حاققيندا سوموت (عئيني) بيلگي ائدينمه يه يارديمچي اولاجاقدير.

مرتضي نگاهي`نين يازيلاري، دانيشيقلاري، گنه ل (عومومي) سككي (پيلاتفورم) و اٶزه ل (خوصوصي) قوروپلارداكي يازيشمالاري و بير سيرا پهلوي رئژيمي باشچيلاري- سلطنت طلب- پان ايرانيست و فارس ميللييتچيلري ايله صاحيب اولدوغو باغلاري ايريمله (ديققتله) اينجه له نيرسه، راحاتليقلا اونون ايرانزمين اٶزه كلي (مركزلي) تيپيك ليبئرال بير پان ايرانيست اولدوغو آنلاشيلاجاقدير. اٶز دئدييينه گٶره چاخير آلوئرچيسي اولان مرتضي نگاهي، قورون (تئكنيك) آنلامدا "آيدين"، "آراشديرماجي" و "اينسان حاقلاري چاباماني" دئييلدير. آيدين و آراشديرماجي اولماماق، كيچيلتيجي بير دوروم اولماديغي كيمي، مرتضي نگاهي`يه ده خاص اولماييب، گونوموزده تورك و آزربايجانلي سراسريچي-ايرانزمينچيلرين گنه ل اٶزه لليييدير. اون دوققوزونجو و ييرمينجي يوز ايلين باشيندا آخوندزاده، ايرانشهر، كسروي، اراني،..... كيمي تورك و آزربايجانلي پان ايرانيستلر، چوخو دٶنه ملرينده كي اورتامين ائتگيسي ايله راسيست و عيرقچي اولسالار بيله، بير قورال اولاراق سٶزون قورون (تئكنيك) آنلاميندا آراشديرماجي و آيدين تانيملانان اينسانلار ايديلر. آنجاق مرتضي نگاهي كيمي گونوموزده گٶردويوموز تورك و آزربايجانلي سراسريچي – ايرانچي - ايرانزمينچيلرين موطلق چوخونلوغو، كسينليكله آيدين، آراشديرماجي و اينسان حاقلاري چاباماني (آكتيويستي) دئييلدير. مرتضي نگاهي`ني گونئي آزربايجان آيديني، ايران توركلري اوزماني (موتخصصيصي)، تورك-آزربايجان ميللي دئموكراتيك حركتي سٶزچوسو و اٶنده رلري (ليدئرلري) آراسيندا گٶسته رمك ايسه، قوجامان بير يالان و آلداتماجادير و بيلگيسيزليك يا دا بللي آجئندالاردان قايناقلانير.

مرتضي نگاهي حاققيندا يوخاريدا سٶيله نه نلردن آماج، بير اٶرنه ك اولاراق اونون سيماسيندا اوتانجاق پان ايرانيسمين سيياسي دوروش و اخلاقيني؛ هابئله اونو آزربايجان ميللي دئموكراتيك حركتي آيدينلاري و اٶنده رلري آراسيندا گٶسته ره نلرين گئرچه ك نييت و وارسا گيزلي-گيزسيز آجئندالاريني اورتايا چيخارتماق و آدلانديرماقدير. يوخسا مساله ني شخصيله شديرمك؛ اينسانلارا، كيشيليك (شخصييت)، دوشونجه و گٶروشلرينه؛ حتتا سيياسي بير دوشونجه و دوشونگه (ايدئولوژي) اولاراق پان ايرانيسمه– ايليملي يا دا كيلاسيك- حقارت، تووهين ائتمك و يا ايفتيرا آتماق سٶز قونوسو دئييلدير. باشدا بونا گٶره كي آزربايجان ميللي دئموكراتيك حركتي و اٶزونو اونا باغلي حيسس ائده ن هر كسين، بوتون سيياسي گٶروشلره- يانليش بيلديكلري و دوغرو بيلديكلرينين هر ايكيسينه و بو آرادا پان ايرانيسمه- و بونلاري منيمسه يه ن هامييا، فارسلارا و توركلره عئيني درجه ده سايقيسي واردير. هابئله بورادا آماج، ليبئرال پان ايرانيسمين يا دا بير سيرا باشقا ايرانچي-سراسريچي آخيملارين اولوملو و ائل اركيل (دئموكراتيك) يٶنلريني دانماق، بونلارين آزربايجان ميللي دئموكراتيك حركتي جرگه لرينه قوشولانماياجاقلاريني، حركته كٶمه كلري اولماياجاغيني ايدديعا ائتمك ده دئييلدير. خالقيميز و ميللي دئموكراتيك حاقلارينين الده ائتمه سي اوغروندا آتيلان هر آدديم، كيمين طرفيندن گليرسه گلسين اٶنه ملي و ده يه رليدير. آنجاق بو گئرچه ك، بئله آدديملاري آتانلارين ماهيييتيني ده ييشيديريب، اونلاري بير گونده آزربايجان آيديني و ليدئري قونوما گتيرمه يه گئچيت و گره كچه اولابيلمه ز. اٶته ياندان، آشيري پان ايرانيستلرين، ليبئرال پان ايرانيستلردن آزربايجان ميللي دئموكراتيك حركتيني چاشديرماق و بٶلمك دوغرولتوسوندا يارارلانديقلاري كيمي، بيز ده ليبئرال پان ايرانيستلردن، بنزه ر آماجلار دوغرولتوسوندا يارارلانماني دوشونه بيله ريك، بو قونودا هئچ بير سيياسي بليرسيزليك و اخلاقي سورون يوخدور.