باش ساغلیغی و اولوم اوزه رینه قیسا بیر یازی

گیریش.

گچن هفته گوتنبرگ شهرینده یایین  دا اولان بیر رادیو چوخ آجی بیر خبرله بویوک بیر هیجان یارادی، خبر تزلیکله بوتون شهرده یاییلدی. مضطرب و اوزگون آذربایجان لیلار بیر بیربیرینه زنگ ادرک وضعیتی سوروشدولار و سونوندا اورگندیلر کی ساوالان درنگی نین صدری داداش بای این آتا سی تهران دا وفات اتمیش و دنیاسین دئیشمیشتیر. داداش بای  آذربایجان لیلارین بیرلشمه سینده و درنک چالیشمالاریندا چوخ امک ورمیش و فدراسیون یارانماسیندا بویوک رل اوینامیشدیر. داداش بای این آتاسی دا هر زمان ترک دوستی و آذربایجان عشقیله یاشامیشدیر، اوناگوره ده  هامیمیزین آتاسی ساییلان بو گوزل و یاخشی انسانین اولومو بویوک ازونتو و کدر یارادی. داداش بای و عائله سینه باش ساغلیغی دیلر، اوز غملی یاسیندا بیزی ده اورتاق بیلمسینی ایستریک. داداش بای ایله اوزون ایللر دیر دوستلوقوم وار، یونیورسیته ایللریندن، بیرآز دویغو، بیرآز ایده آل آمما هر زمان انسان سوگیسیله یاشامیشدیر، هدفی اوز یوردونده قالیب انسان لارا خدمت ایلمک دی، بیله اولمادی، بیر چوخلاری کیمی ئولکه سینی ترک ائتمک مجبوریتینده قالدی، گوچرلیک قیسا سورجکدی امما اوزادی و ایللر گجدی و بیر نیسگیله دو نوشدی. بو آرادا اوشاغلار بویودو، یاشلیلار قوجالدی و بیر چوخ عزیزیمیز دونیادان گتدی و بیز اونلاری گوره مدیک. بو نیسگیلی بویوک شاعریمیز شهریار گوزل دیله گتیریر.

بیر اوچئیدیم بو چیرپینان یئلینن،

باغلاشئیدیم داغدان آشان سئلینن

آغلاشئیدیم اوزاق دوشن ائلینن،

بیر گوره یدیم آیریلیغی کیم صالدی،

اولکه میزده کیم قیریلدی، کیم قالدی!

گوچرلیک انسان تاریخی قدر اسکی و بیز تورک سویلارنین بیر پارچاسی دیر. گوچر توپلوم داها گوزل و رفاه ایچینده یاشاماق ایچون آنا  یوردلارین بیراخیر باشقا یر و ئولکه لرده گیدرلر. گوک ترک لر تاریم و حایوانجیلیق لا اوغراشدیقلاری ایچون اروتا آسیادان باتیا دوغرو یول آلمیش هازار دنیزی و آنادولو بلگه سینه یرلشمیشلر. گوچرلیک بیر طرفدن کولتور و فرهنگی یایارکن، دیگر طرفدن انسان لاری آنا کولتوردن اوزاقلاشدیریر. ایکینجی و اوچونجو نسیللر یرلشدیغلاری ئولکه کولتورینه باغلانیر و یاواش یاواش اوز کولتوریندن اوزاقلاشیر. اونا گوره یاس مراسم و آنما گونلرینده بیر آرایا توپلانماک کولتوروموزون قورونماسیندا بویوک رل اوینییاجاکدیر.

اولوم حادثه سی انسان اوغلونون بو گونه قدر چوزمدیغی و سونوندا اونا تسلیم اولدوغو آجی بیر حقیقت دیر. انسان تاریخ بویونجا ابدی یاشام آرزولامیش و انون ایچون چالیشمیشدیر. آراشدیریجی الیزابت کوبلر راس اولوم حادثه سینی قان دولاشیمینین دورماسی و تنفس آلیب ورمنین سونا ارمسی ایله آچق لار و دییرچی اولوم حالینده اولان انسان دگیشیک حالت لر گوستریر. اونجه انکار، سونرا خشم، داها سونرا نذر و بخشش، غمگین و نهایت تسلیم اولور. دینی ایناجلار، هله سماوی دین لر معاد لا یاشامی بو دنیاده دگیل اوتکی دنیاده ابدی گوستریر، اونا گوره انسانلیغین سعادت و خوشبختلیغینی اوتکی دنیایه حواله الونور. فروید دینی ایناجلارین تاپیلماسیله اولوم حقیقتینین انسان لار ذهنینده  یوموشادیغینی و اوندان قورخمانین آزالدیغینی بیلدیرمیش اونا گوره ده دینلرین چوخو اولوم حادثه سیله یاخیندان مشغول اولموشدور و انسان لارا دین سایه سینده اولومدن قورخمیاجاغلاری بیلدیریلمیشدیر. بعضی شاعر و فیلسوف لار باشقا بیر دنیایه اینامیرلار و معاد دا تردید گوزو ایله باخیرلار. تورک شاعر و فیلسوفی حضرت مولانا بودیسم تأثیری آلتندا عرفان گوزیله یاشاما باخیر و  اوتکی دنیایه اینامینی تردید آلتینا آلیر و دییرکی .

مرغ باغ ملکوتم نیم از عالم خاک

چند روزی قفسی ساخته اند از بدنم،

ای خوش آن روز که پرواز کنم تا بر دوست

به هوای سرو کویش پرو بالی بزنم.

عمر خیام و دیگر عالم لر ده معاد لا آلای الیر و اوتکی  دنیانی جدیه آلمیر، شرق دین لری بودیسم، هندوئیسم و دیگر لری روح لا جسمین آیری اولدوغونو و روحون بدن ایچینده اسیر قالدیغینی سویلرلر، و اونا گوره ده اولوم وقتینده یاس توتمازلار، هندوئیسم اولوم له روحون باشقا وجود لاردا حلول اینه اینانیر و تورپاغین چیرلنممسی ایچون وجودون یاخیماسینی ایستر، تورک بویلارینین دا اسکی دین لری طبیعته یاخین و شرق دینلرینه بنزر بلجه ده چوخ تانریلی  دین لر  اولدوغو بیلینیر. تورک بویلارینین دینی  اونجه توتم له باشلامیش و قوتلی گوشلارا( کارتال، شاهین) اینانیلمیش و داها سونرا  حیوان سوروسینی تهدید الیین قورت دا اینانیلمیشدیر. توتم اینانجینا گوره روح لاراولمزلر. داها سونرا اسکی تورک بویلاری شامانیسم و طبیعت قوتلرینه اینانمیشلار. گوک تورک لر گوندوز گونشه، گجه آیا تعظیم ایلر قربان کسرلردیر. اولوم و اولن انسانا سایغی گوستریر بیر سوره جنازه چادر دا ساخلانیردی. بیر قیسیم تاریخچیلر تورک لرین آتشه تعظیم الدیغلاری و داها سونرا بو دینی اینانچلار زرتشت دینینین یارانماسینا سبب اولموشدور.

تورک سویلاری، هله گوک تورک لر اولن انسانا سایغی گوستریر، سلاحی، قیمتلی اشیاء و جواهر لری جنازه ایله بیرلیکته تورپاقا وریلیردی، بعضی مزار لاردا آت اسکلتینه راسلاندیغی ایچون اولابیلرکی آت دا صاحیبیله بیرلیکته تورپاقا وریلمیش ، امما بو  کسین دییله بیلیر کی تورک سویلاریندا هیچ بیر زمان انسان قربان اولمامیش حتی اونا قارشی چیخیلمیشدیر. دمک تورک لر اسلامیتی قبول المدن اول آتش، سو و تورپاقی مقدس ساییب، چوخ تانریلی اولموشلار و زمانلا سماوی دین لری قبول المیش داها سونرا اسلاما اینانمیشلار.

تک تانریلی و سماوی دین لرده معاد و اولومدن سونرا جهنم و بهشت اولدقونا اینانیلیر و بهشته یاشامین ابدیلیغی و همیشلیک اولدوغو ورغولانیر، اونا گوره ده اولوم ایله حسابلاشما گونو ساییلیر. بو دینلرین هامیسینده بله اینانیلیر کی گونون بیرینده ینیدن بیر قورتاریجی گلجک و انسان لاری ظلم و ستمدن قورتاراجاق، دیگر طرفدن بو دینلرده انسان اوغلو همیشه قورخیدیلیر و تانریا یالوارماسی استنیر، چونکه انسان اوغلو باشدا گویا شیطانا قانیب، جنتدن چیخارتیلیب، گرک یالوارا و تانریدان ایستیه کی تکرار جنته قاییدا!!! . بلکه اوناگوره دیر سماوی دین لرانسانی گناهکار گورور و باغیشلانماسی ایچون راز و نیاز المسینی امر ادر و انسان دان ایستر.هر حال دا اولوم یاشامین سونا ارمسی و بیتیمیدیر و او بیر حقیقت دیر، بلکه ده یاشامین عدالتی و انسان لارین اوندان قاشماسی ممکن دگیلدیر، ذاتأ اولوم یاشاما آنلام و معنی وریر.

اولوم اوزرینه یوزلرجه کتاب و مقاله یازیلمیشدیر، بو قیسا یازیدا گنیش معلومات ورمک ممکن دگیلدیر، قالدی کی فلسفی آچیدان باخماق و یا اینجلمک هم چتین و هم ده گنیش معلومات طلب الییر و من اوزومو اوندان یوخسون گورورم...

سوئد. دکتر محمد حسین یحیایی