Jurnalistlərin aclıq aksiyası iki gündür ki, davam edir. "Gündəlik Azərbaycan" və "Realnıy Azerbaydjan" qəzetlərinin həbsdə olan baş redaktoru Eynulla Fətullayevin başladığı aksiyaya srağagündən etibarən həmin qəzetin şef redaktoru Şahvələd Çobanoğlu və qəzetimizin redaktoru Zahid Səfəroğlu da qoşulub. Dünəndənsə aksiyanın sıralarına qəzetimizin əməkdaşı Elşən Balaxanlı da qatıldı.

Müsavat Partiyasının qərargahında baş tutan aksiyada hələlik 3 nəfər iştirak etsə də, onların sıralarının genişlənəcəyi gözlənilir. Bu barədə Ş.Çobanoğlu məlumat verdi. Onun sözlərinə görə, aksiya üçün müraciət edənlər arasında keçmiş "Gündəlik Azərbaycan"çılardan Üzeyir Cəfərov, Qabil Zimistanoğlu, Natiq Cavadlı və Aynur Elgünəş də var: "Sabahdan (bu gündən) bəzi mətbuat orqanlarının iş günü başlayır. Bu səbəbdən aksiyanın daha da böyüyəcəyi gözlənilir. Bundan başqa, həmkarlarımızın dəstəyi ilə beynəlxalq təşkilatların da məsələyə diqqətinin artacağını düşünürük".
Dünən aclıq edən jurnalistlərə E.Fətullayevin atası Emin Fətullayev, habelə müxtəlif xarici və yerli KİV nümayəndələri baş çəkib. Günün ortalarında isə Müsavat başqanı İsa Qəmbər, millət vəkilləri Pənah Hüseyn, Arzu Səmədbəyli, habelə Müsavat Partiyası Mərkəzi İcra Aparatının rəhbəri Arif Hacılı da onları ziyarət edib.
Ş.Çobanoğlunun sözlərinə görə, Müsavat başqanı və millət vəkilləri jurnalistlərin aksiyasını dəstəklədiklərini bildiriblər. Onlar jurnalistlərin öz tələblərini bu şəkildə qoymalarına razı olduqlarını deyiblər: "Ümid edirlər ki, heç olmasa beynəlxalq təşkitlatlar bu tələblərə cavab verəcəklər. Müsavat başqanı İsa Qəmbər bildirdi ki, aksiya özünün minimum hədəflərinə çata biləcək. Pənah Hüseyn isə söylədi ki, bu aksiyanın hədəflərinə çatması üçün müəyyən təbliğat işləri görəcək. Bu, sözügedən məsələnin parlamentdə qaldırılması, habelə beynəlxalq təşkilatlara bununla bağlı müraciətin olacağı ilə bağlıdır. Pənah bəy lazım gələrsə, özü də aksiyaya qoşula biləcəyini dedi".
İ.Qəmbər aksiya iştirakçılarına xalqımızın özünə inanıb, öz haqları uğrunda mübarizəsinin vacib olduğunu söyləyib. İndiki ağır durumun keçici olduğunu bildirən başqan hakimiyyətin gec-tez geri çəkilməli olacağını vurğulayıb: "Eynulla Fətullayevin aclıq aksiyasına başlamasını çox böyük fədakarlıq kimi qiymətləndirirəm. O, tələblərində tamamilə haqlıdır. Bu qədər haqsızlığın qarşısında, əslində o çox təvazökar tələblər irəli sürür. Jurnalist həmkarlarının da ona dəstək verməsini yüksək qiymətləndirirəm. Müsavat Partiyası aksiyaya hər cür dəstək verir. Siyasi cəhətdən tam dəstəkləyirik, texniki cəhətdən kömək etməyə çalışırıq".

Həbsdəki siyasi məhbuslar da aksiyaya qoşuldu

Bu arada E.Fətullayevin aclıq aksiyasına diqqət artmaqdadır. Siyasi məhbuslardan Yeni Fikir Gənclər Hərəkatının sədri Ruslan Bəşirli, Milli Qəhrəman Rasim Əkbərov və sabiq polis rəisi Müşfiq Mədətov da baş redaktoru dəstək verək qərarına gəliblər. Onlar da dünəndən jurnalistlərin və bütün siyasi məhbusların azadlığa buraxılması tələbilə aclığa başlayıblar.
Xatırladaq ki, aprelin 5-də bütün siyasi məhbuslar eyni tələblərlə aclığa başlayacaqlar.
Bundan başqa, Azərbaycan Demokratik Gənclər Hərəkatı(ADGH) da həbs olunmuş bütün siyasi məhbusların, habelə jurnalistlərin dərhal azadlığa buraxılmasını və onlara bəraət verilməsini tələb edir. Hərəkat adından yayıan press-relizdə bildirilir ki, bu gündən etibarən ADGH sədri Ağasif Şakiroğlu da jurnalistlərlə həmrəylik nümayiş etdirərək aclıq aksiyasına qoşulur.

İsveçli həmvətənlərimiz jurnalistlərə dəstək verir

"Realnıy Azerbaydjan" qəzetinin əməkdaşı, tanınmış jurnalist Çingiz Sultansoy isə bizimlə söhbətində bildirdi ki, İsveçdə yaşayan azərbaycanlılar ona göndərdikləri elektron məktubda aksiyaya qoşulmaq istədiklərini yazıblar. Bəyanatda bildirilib ki, Azərbaycanda azad sözə, azad mətbuata qarşı Elmar Hüseynovun xaincəsinə qətli ilə başlayan dövlət terroru gün-gündən daha da şiddətlənməkdədir: "Biz, İsveçdə yaşayan müsavatçılar eyni tələblərlə bu aksiyaya qoşulduğumuzu və 28 mart tarixindən etibarən aclığa başlayacağımızı elan edirik. Aksiya barədə İsveçin müvafiq təşkilatlarına və İsveç mediasına məlumat veriləcək".
Ç.Sultansoya bu məlumatı İsveçdə yaşayan həmkarımız Babək Azəri verib. Onun bildirdiyinə görə, aksiyada həmvətənlərimiz Mübariz S. Əzimli, Əli Məmmədov və Nicad Verdizadə iştirak edəcək. Həmvətənlərimiz bu aclıqdan başqa digər ictimai aksiyaları da nəzərdə tutublar.
Bundan başqa Moskvada yaşayan yazıçımız Çingiz Hüseynov Ç.Sultansoya göndərdiyi məktubda E.Fətullayevi dəstəklədiyini bildirib: "Məktubda deyilir ki, "Eynullaya çatdırın ki, mən tamamilə onun tərəfindəyəm, onu və başqa jurnalistləri həbsdə saxlayan hakimiyyət kobud səhv edir. Təəssüf ki, bu, yalnız bizdə baş vermir. Amma bunun bizdə olması xüsusi acınacaqlıdır".

ATƏT və Avropa Şurasından reaksiya gəldi

Məlum olduğu kimi, E.Fətullayevin aclıq aksiyasının tələbləri sırasında həbsdəki siyasi məhbus və jurnalistlərin qeyd-şərtsiz azadlığa buraxılması, habelə ATƏT və Avropa Şurasının ölkədə siyasi məhbus probleminin həll mexanizmini cəmiyyətə təqdim etmələri idi. Adıçəkilən qurumların bu aksiyaya və tələblərə münasibətini öyrənmək istədik.
Avropa Şurasının Azərbaycandakı nümayəndəliyindən bizə bildirildi ki, bu məsələyə mövqe bildirmək AŞ baş katibinin xüsusi nümayəndəsi Denis Briborsianın səlahiyyətləri çərçivəsinə daxildir. Cənab Briborsianın bazar ertəsi ölkədə olacağını bildirən AŞ nümayəndəliyinin əməkdaşları suallarımıza da həmin vaxt cavab ala biləcəyimizi dedilər.
ATƏT-in Bakı ofisinin mətbuat və informasiya idarəsinin rəhbəri Rəşad Hüseynov isə jurnalistlərin aksiyasından xəbərləri olduğunu və bu prosesi diqqətlə izlədiklərini bildirdi. Onun sözlərinə görə, jurnalistlərin ikinci tələbinin hədəfi ATƏT deyil: "Bu işlə Avropa Şurası məşğul olur. Onlar Azərbaycan hökuməti, burdakı qeyri-hökumət təşkilatları ilə görüşərək müəyyən mexanizmlər hazırlayıblar. ATƏT bu prosesdə iştirak etmir".
R.Hüseynov bildirdi ki, istənilən halda peşəkar mətbuatın azadlığını müdafiə edirlər və mətbuat nümayəndələrinin yazılarına görə həbsini yolverilməz sayırlar. Müsahibimiz aclıq edən jurnalistlərə baş çəkəcəklərini də istisna etmədi.

SEVİNC