2008 il fevralın 24-də Stokholm şəhərində Xocalı soyqırımına həsr olunmuş mitinqin

                            QƏTNAMƏSİ

  Bu gün "Xocalı faciəsi"nin törədilməsindən 16 il keçir. Bildiyimiz kimi, XX əsrin əvvəllərindən başlamış, 1988 ildən yenidən gündəmə gətirilmiş ermənilərin Azərbaycana qarşı torpaq iddiaları və bu iddiaların ərazilərimizi işğal etməklə həyata keçirilməsi nəticəsində vətənimizin qədim insan məskənlərindən olan Xocalı şəhərində dövrümüzün ən müdhiş, tarixdə analoqu olmayan soyqırım hadisəsi törədilmişdir.

1992 il fevralın 25-dən 26-a keçən gecə erməni silahlı dəstələri Xankəndi şəhərində yerləşmiş keçmiş SSRİ-nin 366-cı motoatıcı hərbi alayının köməyi ilə Xocalı şəhərinə hücum etmişlər. Şəhər əvvəlcə rus-erməni qoşunları tərəfindən mühasirəyə alınmış, Xocalıya artilleriya və ağır hərbi texnikalardan atəş açılmış, şəhərdə güclü yanğınlar törədilmişdir. Köməksiz qalan şəhər bir gecənin içərisində tamamilə yerlə yeksan edilmişdir. Rus-erməni hərbi birləşmələrinin bu cinayəti nəticəsində Xocalı əhalisindən 613 nəfər xüsusi qəddarlıqla öldürülmüş, 487 nəfər şikəst edilmiş, 1275 nəfər dinc sakinlərdən, qocalar, uşaqlar, qadınlar əsir götürülərək ağlasığmaz erməni zülmünə, təhqir və işgəncələrə məruz qalmışlar. Xocalıda öldürülənlərdən 106 nəfəri qadın, 63 nəfəri uşaq, 70 nəfəri qocalar olmuşdur. 150 nəfər Xocalı sakininin taleyi isə bugünədək hələ də məlum deyildir. 

Ötən əsrin sonlarında millətimizə qarşı törədilmiş soyqırım təkcə bununla bitmir.
1988 ildən 1993 ilə qədər Ermənistanın hərbi birləşmələri Xankəndində yerləşən 366-cı alayın şəxsi heyətinin və texnikasının köməyi ilə onlarla azərbaycanlı kəndində dəhşətli soyqırım törətmişlər. 1992 il fevralın 17-də Xocavənd rayonunun Qaradağlı, həmin il aprelin 7-də isə Kəlbəcər rayonunun Ağdaban kəndlərində erməni cinayətkarları tərəfindən kütləvi qırğınlar törədilib, hər iki kənddə əhalinin 70 faizi qətlə yetirilmişdir. Analoji soyqırım aktı Qazax rayonunun 7 kəndində də baş vermişdir. Bundan başqa, ermənilər Dağlıq Qarabağın azərbaycanlılar yaşayan 52 kəndində kütləvi qırğınlar törətmişlər. Bu baxımdan biz ermənilərin Xocalının timsalında hərəkətlərini dünyaya təqdim edərkən  millətimizə qarşı törədilmiş digər soyqırım faktlarını da qətiyən unutmamalıyıq. 

Bu soyqırım faktlarının hamısı araşdırılmalı, qeyd olunmalı öncə Azərbaycan ictimaiyyətinə açıqlanmalı, sonra isə diplomatik korpuslarımız və diaspora təşkilatlarımız vasitəsi ilə dünyaya yayılmalıdır. Çünki, təssüflə, bu olaylar barədə nəinki dünya ictimaiyətində, hətta bir çox Azərbaycan vətəndaşında belə çox az bilgi vardır.
Beləliklə də, ermənilərin məqsədyönlü və davamlı şəkildə azərbaycanlılara qarşı soyqırım törətdikləri hamıya bəlli olmalıdır.
Etiraf etmək lazımdır ki, bu məsələdə Azərbaycan diaspor təşkilatlarının fəaliyyəti qənaətbəxş deyildir. Dünyaya səpələnən azərbaycanlılar arasında istədiyimiz birlik hələ də yoxdur. Onların bəziləri, ümumiyyətlə, bu proseslərə qoşulmur, bəziləri siyasi qüvvələrin alətinə çevrilmiş, bəziləri isə Azərbaycandakı siyasi fikir ayrılığını özləri ilə məskunlaşdıqları ölkələrə daşımışlar. Нəticədə, milli problemlərimizin təbliğatı məqsədi ilə təşkilatlanmamız iflic vəziyətə düşmüşdür. Diasporumuzun təşkilatlanmasına yardım məqsədi ilə yaradılmış dövlət qurumları isə öz işiylə məşğul deyil, siyasi oyunbazlıq, bəzi diaspor fəallarını pulla ələ alıb ləkələmə, xaricdə yaranmış təşkilatlarımız daxilində intriqalar yaratma bu qurumların xobbisinə çevirilmişdir. Elə bunun nəticəsidir ki, belə bir vəziyətdə Azərbaycan öz həqiqətlərini sistemli şəkildə dünyaya çatdıra bilmir.

Ona görə də "Xocalı faciəsinin" törədildiyi tarixdən 16 il ötməsinə baxmayaraq, dünya ölkələrinin və beynəlxalq qurumların Azərbaycanın başına gətirilən bütün cinayətlərə qarşı biganəliyi hələ də davam edir. Faciələrin dünyanın gözü qarşısında baş verməsinə və soyqırımı əks etdirən fotoların, vidolentlərin eləcə də digər tutarlı sənədlərin mövcud olmasına baxmayaraq bu hadisələrə hələ də siyasi qiymət verilməyib. Əksinə, millətimizə qarşı cinayət törədənlər dünyanın hegomom dövlətləri tərəfindən hər cür dəstək almaqdadırlar.

Milli faciələrimizin və xalqımızın haqq  səsini dünyaya çatdırmaq üçün keçirilən tədbirlərin əlaqəli şəkildə təşkil olunmaması, ermənilər tərəfindən törədilən soyqırım faktlarının hər birinin ayrı-ayrılıqda Milli Məclisdə müzakirəsinə ehtiyac olduğu halda Azərbaycan parlamentinin hələ də bu faciələrə siyasi qıymət verməməsi işlərimizi bir qədər də çətinləşdirir.

Bütün bu deyilənləri nəzərə alaraq bu gün burada düzənlənən mitinq iştirakçıları qərara alır. 

1. Səsimizin dünyaya çatdırılması və başımıza gətirilən bütün faciələrə ayrı ayrılıqda siaysi qiymət verilməsi məqsədi ilə Azərbaycan parlamentində dinləməklər keçirilməsi üçün Milli Məclis rəhbərliyinə müraciət olunsun.

 2. İsveç dövlətinin dünya ölkələri arasında böyük nüfuzu olduğunu nəzərə alıb, Xocalı faciəsiylə bağlı faktları İsvec parlamentinə bir daha təqdim etməklə, məsələnin parlamentdə müzakirəsinə nail olunsun.

3. Xocalı faciəsinin törədilməsində birbaşa və bilavasitə rolu olanların mühakimə edilməsi üçün lazımi sənədlər hazırlanıb beynəlxalq məhkəmələrə müraciət olunsun.

4. Azərbaycan xalqının baçına gətirilən faciələri özündə əks etdirən bir abidə kompleksinin İsveçdə yaradılmasına nail olunsun.

5. Azərbaycanımızın istər quzeyi, istərsə də güneyi ilə bağlı birgə tədbirlər keçirilməsi üçün digər qurumlarımız və qardaş millətlərimizin yaratmış olduqları təşkilatlarla işbirliyinə nail olmaq məqsədi ilə onlarla danışıqlar aparılsın.

Mitinq iştirakçıları adından tədbirin təşkilatçıları :

1."Azadtribun", 2. "Odlar Yurdu", 3."Bütöv Azərbaycan", 4."Ulduz", 5."İsveç azərbaycanlılarıbirliyi", 6."Haray", 7."Qarabağ", 8."Vətən" , 9."Tribun" , 10."22 May-Təbriz" cəmiyətləri