”20 Yanvar” faciəsinin 18-ci ildönümü münasibəti ilə

Stokholmda fəaliyət göstərən dispor təşkilatları tərəfindən keçirilən tədbirin

QƏTNAMƏSİ

Dəyərli həmvətənlər!

Bu gün hamımızın yaddaşında ”Qanlı Yanvar” kimi qalmış "20 Yanvar" faciəsinin 18-ci ildönümünü qeyd edirik. Bildiyiniz kimi, bu olay insanlıq tarixində bir dövlətin öz vətəndaşlarına qarşı törətmiş olduğu ən şərəfsiz və misli görünməmiş hadisələrdən biridir. Son nəfəsini yaşayan Sovetlər Birliyi adlanan millətlər həbsxanasının dağılaraq tarixə qovuşma ərəfəsində, müstəqilliyimiz uğrunda mübarizəyə qalxmış qəhrəman millətimiz məhz özgürlük əldə etmək istədiyi ücün, o zaman, bu faciəni yaşamalı olmuşdur.

Belə ki, 1990-cı il yanvarın 19-dan 20-ə keçən gecə, tərkibində müzdlu cinayətkarların da olduğu işğalçı sovet ordusu ağır hərbi texnika ilə ölkəmizin bir çox bölgələrinə, o cümlədən, paytaxtımız Bakı şəhərinə sudan və qurudan hücum edərək qanlı hadisələr törətmişdir. Əslində, bu, XX əsrdə millətimizə qarşı dünya ictimaiyyətinin gözü qarşısında baş verən cinayətlərin növbəti mərhələsi idi. Bu qətliam zamanı Sovet rejiminin cinayətkar ordusu millətimizin mübarizə iradəsini sarsıtmaq üçün beynəlxalq təşkilatlar tərəfindən istifadəsi qadağan olunmuş sursat və silahlardan istifadə edərək yüzdən artıq günahsız və əliyalın insanı, o cümlədən, qocaları, uşaqları və qadınları qətlə yetirmişdir.Həmin vaxt neçə-neçə vətəndaşımız yaralanmış, itkin düşmüş, işgəncələrə məruz qalmış və həbslərə atılmışlar.Əlimizdə olan rəsmi rəqəmlər təkcə Bakı şəhərimdə qətlə yetirilənlərin sayının 133 nəfər olduğunu göstərir. İtkin düşmüş 400 nəfərdən çox faciə qurbanının bugünə qədər də tapılmaması bu rəqəmin qat-qat yüksək olmasına dəlalət edir. Bu Azərbaycanın quzeyində millətimizin başına gətirilmiş dəhşətli hadisələrin qısa bir xronikasıdır.

Lakin, qanlı ”20 Yanvar” millətimizin yaddaşına faciə olaraq həkk olunsa da, bu gün, həm də qəhrəmanlıq rəmzi kimi şanlı tariximizə yazılmış şərəfli bir səhifədir.Cünki, məhz ”20 Yanvar” olayı qeyrətli xalqımızın davamlı mücadiləsi nəticəsində vətənimiz Azərbaycanın müstəqilliyə qovuşmasına gedən yolda bir dönüş nöqtəsi olmuşdur. Azərbaycanımızın güneyində gedən milli mübarizə isə bu şərəfli yolun davamıdır.

Əziz soydaşlar!

"20 Yanvar" faciəsinin törədildiyi tarixdən 18 il ötməsinə baxmayaraq, millətimizin iradəsini sındırmağa hesablanmış bu faciə dünya ölkələri və beynəlxalq qurumlar tərəfindən hələ də lazımi siyasi qiymətini almamışdır. Əksinə, həmin gün millətimizə qarşı XX əsrin qanlı faciələrdən birinin törədilməsinə fərman vermiş kecmiş SSRİ-nin o vaxtkı kommunist rəhbərləri məhkəmə qarşısına çıxarılaraq cəzalandırılmaq əvəzinə, bir sira beynəlxalq təşkilatlar və dövlətlər tərəfindən müxtəlif dərəcələrdə mukafatlandırılmışlar.

Hesab edirik ki, beynəlxalq ictimaiyətin 20 Yanvar faciəsinə və eləcə də, Azərbaycanımızın başına gətirilmiş digər hadisələrə bu cür münasibəti onların bu barədə düzgün və yetərli qədər məlumatlarının olmamasından irəli gəlir.

Bunun üçün də ana vətənimizdən kənarda, İsveç kimi demokratik bir ölkədə fəaliyət göstərən və bu tədbirin təşkilatçıları olan diaspor təşkilatları kimi aşağıda göstərilən müddəaların həyata keçirilməsini özümüzə vəzifə hesab edirik.

Azərbaycanımız istər quzeyi, istərsə də güneyi ilə bağlı bütün məsələlərdə birgə tədbirlər keçirilməsi üçün hər zaman birlik nümayiş etdirmək və digər təşkilatlarımızın da bu işlərə qoşulmaları üçün onlarla danışıqlar aparmaq.
20 Yanvar faciəsinin İsveç ictimaiyətinə və dövlətinə çatdırılması üçün birgə tədbirlər planı işlınib hazırlanmasına çalışmaq.
Bu məqsədlə insan haqları ilə məşğul olan beynəlxalq təşkilatlarla işbirliyi qurulmasına çalışmaq.
20 Yanvar faciəsinin günahkarlarının aşkarlanıb mühakimə edilməsinə nail olmaq.
İsveçdə 20 Yanvar faciəsinə abidə ucaldılmasına nail olmaq.

Tədbirin təşkilatçıları :

1.”Azadtribun” saytının yaradıcı heyəti, 2. ”Odlar Yurdu” dərnəyi, 3.”Bütöv Azərbaycan” dərnəyi,

4.”Ulduz” dərnəyi, 5.”İsveç azərbaycanlıları” birliyi, 6.”Haray” dərnəyi, 7.”Qarabağ” dərnəyi,

8.”Prometey” dərnəyi, 9.”Tribun” jurnalının yaradıcı heyəti,10.”Haray” radiosunun yaradıcı heyəti ,11.”22 May Təbriz” dərnəyi