Demokratik Dünya Azərbaycanlıları Konqresinin Bəndərtürkmən şəhərində baş vermiş son olaylarla bağlı

                                    BƏYANATI                                                  

İran adlanan ölkədə yaşayan digər qeyri fars millətləri kimi buradakı türkmənlərin də ən adi insan haqları hər zaman pozulur, buna etiraz edən türkmən xalqı isə İran Islam Cümhuriyəti rejiminin dəhşətli basqısına məruz qalırlar. Xüsusilə, heç bir dolanışıq yeri olmayan, balıqçılıqla güzəran keçirən və əhalisi türkmənlərdən ibarət olan Bəndərtürkmən şəhəri yaxınlığında yerləşən Çapaqlı kəndi daim hökumət qüvvələri vasitəsi ilə basqı altında saxlanılır, öldürülür, həbslərə atılır, işgəncələrə məruz qalırlar. Bu cinayətləri törədənlər hər kəsə məlum olsa da, onlar cəzasız qalır, bilərəkdən məsuliyətə cəlb olunmurlar.

Bu kimi hadisələr kənd əhlini artıq cana doydurmuşdur. Bu olanlar azmış kimi ötən günlərdə balıqçılıqla məşğul olan 18 yaşlı bir kənd sakini hökumət qoruqçuları tərəfindən vəhşicəsinə öldürülmüş, buna etiraz edən yüzlərlə kəndli həbs edilərək İTTİLAAT idarələrinə aparılmışlar. İşgəncələrə məruz qaldıqdan sonra onların bir hissəsi azad edilsə də yüz nəfərdən çox kənd əhli hələ də günahsiz yerə həbsxanalarda saxlanılır.Bu kimi hadisələr hər zaman rejim tərəfindən İranda yaşayan bütün qeyri fars millətlərinin başına gətirilir.

İranda yaşayan bütün xalqlar və millətlər dünya ictimaiyyətinin bir hissəsi olduqlarından onları cinayətkar bir rejimlə başbaşa qoymaq ən azından insafsızlıqdır. Öz ölkəsinin vətəndaşlarına zülm edən İran rejimi hər zaman cəzasiz qaldığından indi də dünyaya meydan oxumaqdadır.Bu isə dünya ictimaiyyətini ciddi narahat etməlidir.

Demokratik Dünya Azərbaycanlıları Konqresi, insan haqlarının qorunması istiqamətində fəaliyət göstərən bir təkilat olaraq, İran İslam Cümhuriyəti rejiminin millətlərin başına gətirdikləri butun bu olanları qınayir, beynəlxalq insan haqları təşkilatlarını bu məsələyə münasibət bildirmələrini qətiyətlə istəyirik.

Xatırladırıq ki, İran rejiminin bu sayaq hərəkətlərinə göz yuman hər kəs onların bu cinayətinə laqeyd yanaşmaqla insanlığa xəyanət etmiş olurlar.

Bir daha beynəlxalq təşkilatlardan günahsız olaraq Bəndərtürkmən şəhəri yaxınlığındakı Çapaqlı kəndində vəhşicəsinə qətlə yetirilmiş gəncin qatillərinin cəzalandırılması və həbs olunmuş insanların tezliklə azad olunmasına çalışmalarını istəyirik.

Demokratik Dünya Azərbaycanlıları Konqresinin başqanı

Məhəmməd Riza Xişti

ABŞ, 10 yanvar 2008 il