Hollandiyada da soydaşlarımız  "21 Azər" Güney Azərbaycan Milli Hərəkatının 62 ildönümünü qeyd etdi

Dekabr ayının 15-də Hollandiyanın paytaxtı Amsterdam şəhərində Demokratik Dünya Azərbaycanlıları Konqresi(DDAK) və Dünya Azərbaycanlıları Konqresi(DAK) birgə "21 Azər" Güney Azərbaycan Milli Hərəkatının 62-ci ildönümüylə bağlı növbəti həmrəylik tədbiri keçirildi. Tədbirdə Demokratik DAKı təşkilatın məsullarından başkanın müavini Amerikada yaşayan soydaşımız Əhməd Obalı, təşkilatın  İdarə Heyətinin üzvləri Hollandiyada yaşayan soydaşlarımız doktor Nasir Malikli və Araz Muğanlı  təmsil edib. DAK ın təmsilciləri isə İngiltərədən başkan Qulamrza Səbri Təbrizi, Azərbaycan Respublikasından başkanın birinci müavini, millət vəkili Sabir Rüstəmxanlı, Rusiyadan İdarə Heyətinin digər üzvləri Abuzər Bağırov və Mirəşrəf Fətiyev, eləcə də Almaniyadan Fəraməz bəy olub.

Tədbirdə həmcinin Azərbaycanın Belcikadakı səfirliyinin nümayəndəsi  Fuad Hümbətov iştirak edib. Burada demək olar ki, Beniluks ölkələrində fəaliyyət  göstərən Azərbaycan cəmiyyətlərinin əksəriyyəti iştirak edib.

Tədbirin əsas məruzəcisi millət vəkili Cəmil Həsənli 21 Azər hərəkatının əhəmiyəti barədə soydaşlarımıza və qonaqlara geniş bilgi verib. Bundan başqa Əhməd Obal, Səbri Təbrizi, Sabir Rüstəmxanlı, Abuzər Bağırov və başqaları da 21 azər hərəkatının millətimizin həyatında oynadığı rolun önəmindən danışmış həmçinin DDAK və DAK ın birləşməsi ilə baqlı soydaşlarımızı narahat edən suallara cavab vermişlər. Saat 15.00 dan 21.00 dək davam edən tədbirdən sonra DDAK  qonaqların şərəfinə ziyafət verib, İqdırdan olan Azərbaycan rəqs qrupu konsert proqramı ilə çıxış edib. 

Onu da qeyd edək ki, tədbirə nəzərdə tutulduğundan daha artıq soydaşımız qatıldığı üçün bəzi həmvətənlərimiz yer çatmazlığındantoplantı keçirilən zala daxil ola bilməyiblər və bu səbəbdən DDAK və DAK rəhbərliyi narahatçılığa görə soydaşlarımızdan üzr istəyir.

Xatırladaq ki, xaricdə Azərbaycan diasporunu təmsil edən DDAK və DAK dekabr ayında imzaladıqları əməkdaşlıq sazişinə əsasən gələn ilin may ayında baş tutacaq birləşmə qurultayınadək birgə tədbirlər keçirilməsinə davam edəcəklər. Qarşıdan gələn Dünya Azərbaycanlıların Həmrəylik Gününün birgə bayram edilməsi də bu sazişə əsasən hazırlanmış tədbirlər planına daxildir.

Bu təşkilatların əməkdaşlığı sayəsində 31 Dekabr Dünya Azərbaycanlılarının Həmrəylik Günü ilə bağlı dünyanın bir sıra ölkələrində, o cümlədən, İsveçin paytaxtı Stokholm şəhərində bayram şənlikləri təşkil edilib.