Müsavat Partiyası Avropa özəklərinin

BƏYANATI

Son günlər Azərbaycan siyasi hakimiyyətinin azad mətbuata qarşı tutduğu mövqe daha da sərt və dözülməz olmuşdur. Belə demək olar ki, mətbuat nümayəndələrinin təqib edilməsi, fiziki zorakılığa məruz qalması, saxta ittihamlarla həbsə atılması, hakimiyyətin kursunu mudafiə etməyən mətbuatın müxtəlif sanksiyalarla sıradan çıxarılması halları yenidən vüsət almışdır. İlham Əliyevin hakimiyyətinin ilk illərində, ölkədə mətbuatın azadlığına heç olmasa öncəki illərdən fərqli şərait yaradacaği, tənqid və fikir müxtəlifliyinə dözümlülük nümayiş etdirəcəyilə bağlı gümanlar ozünü doğrultmadı. Əksinə, bu basqılar daha da kəskin və amansız oldu.

Vətəndaş cəmiyyətinin qurulmasında azad mətbuatın, söz və vicdan azadlığının, plüralizmin önəmini birmənalı qarşılamayan Azərbaycan iqtidarı bütün beynəlxalq təşkilatların irad və tənqidlərinə məhəl qoymadan hakimiyyətin bütün strukturlarından istifadə edərək, azad mətbuatı susdurmağa yönəlik addımlar atmaqda davam edir. Müasir dünyada azad mətbuat azad cəmiyyətin ayrılmaz tərkib hissəsidir. Nüfuzlu dünya təşkilatlarına uzv olarkən uzərinə mətbuat azadlığını təmin edəcəyilə bağlı öhdəliklər götürmüş Azərbaycan hakimiyyətinin bu öhdəliklərə sayğısızlıq nümayiş etdirərək, ölkəni üzləşdirəcəyi aqibəti nəzərə almadan, azad mətbuat üzərinə yeni repressiya dalğasına start verməsi təəssüf doğurur. Gülünc və əsassız ittihamlarla həbslərə atılan juralistlərin say göstəricisinə görə Azərbaycan ATƏT üzvü olan ölkələr arasında ilk yeri tutur. Bu tip göstəricilər üzrə Azərbaycan ABŞ Dövlət Departamentinin eləcə də digər beynəlxalq təşkilatların hesbatlarında “öncüllərdən”dir. Sanki qəsdən belə bir görüntü yaradılır ki, Azərbaycanda hakimiyyəti tənqid edən jurnalistlər narkomanlar, xuliqanlar və terroristlərdir, yalnız hakimiyyətin siyasi kursunu mudafiə edən mətbuat və onun nümayəndələri bu əməllərin fovqündə dayanırlar. Hakim Partiya nümayəndələrinin “ganun garşısında hami bərabərdir” fikri ilk növbədə onların özünə və onların yaratdiqları mətbuat vasitələrinə aid olmalıdır. Cünki, Azərbaycanda ganunları ən çox pozanlar hakimiyyət nümayəndələri, jurnalist etikasına sığışmayan hərəkətlərə, təhgirə yol verənlər də əsasən iqtidaryönlü mətbuat vasitələridir.

Ölkəmizin nüfuzuna xələl gətirən bu kimi hallar ancaq düşmənlərimizin əlində bizə qarşi təbliğat aparmaları üçün ciddi əsasa çevrilmiş olur. Azad mətbuata basqılardan qazanan iqtidar, itirən isə dövlətçiliyimizdir. Hakimiyyətin qazandığı ölkədə şəksiz nüfuza sahib olduğu görüntüsü formalaşdırmaq, müxalif mətbuatı susdurmaqla 2008-ci ildə keçiriləcək prezident seçkiləri ərəfəsində özünü bütün tənqidlərə qapalı tutmaqdırsa, itirdiyimiz beynəlxalq aləmdəki imicimiz, demokratiya və azad cəmiyyətin formalaşdırılması yolunda ardıcıl və ciddi olmamağımiz təəssüratıdır. 

Avropada yaşayan Müsavatçılar olaraq “Azadlıq” qəzetinin baş redaktoru Qənimət Zahidin gülünc və o qədər də əsassız ittihamla həbs edilməsini bu vaxtadək “Azadlıq” qəzetinə, habelə digər müxalifyönlü mətbuata qarşı aparılan çirkin oyunun tərkib hissəsi hesab edir, bu basqılara son qoyulmasını, Q. Zahidin və həbsdə saxlanılan digər jurnalistlərin – Sakit Zahidov, Eynulla Fətullayev, Rafiq Tağı, Samir Sədaqətoğlu, Rövşən Kəbirli, Yaşar Ağazadə, Fərəməz Allahverdiyev və digərlərinin dərhal azadlığa buraxılmasını tələb edirik.

Azərbaycan ziyalılarının böyük bir gisminin baş verənlərə etinasızlığı, susqunluğu bizlərdə dərin təəssüf hissi oyadır. Millətimizin üzləşdiyi problemlərə göz yummaq haqqı olmayan ziyalılarımızı baş verən ədalətsizliklərə  biganə qalmamağa, öz etiraz səslərini ucaltmağa çağırırıq.

Bəyanat Müvasat Partiyası Avropa özəkləri tərəfindən qəbul edilmişdir

21.11.2007