Ali Komitəni yaratmaqla, Ali Təşkilatın yaranmasına zəmin yaradaq

Babək Azəri   hüquqşünas

  ( Mülahizələrim, təklifim və reallaşması vacib olan məsələ )

 Biz yaşadığımız dünyada müxtəlif millətlərin taleyi ilə bağlı çoxlu pis - yaxşı misallar çəkmək olar.Dünyanın bəzi yerlərində,  misal üçün İsveçrədə və ya Kanadada müxtəlif millətlər müvəffəq olublar bərabər hüquqluluq şəraitində  bir - biri ilə yaşayalar və qeyd etdiyim ölkələr dünyanın ən sərvətli  və tərəqqi tapmış ölkələrindən sayılır. Amma dünyanın başqa  yerlərində bəzi vaxtlar baş vermiş  unudulmaz faciələrə şahidik.Məsələn, 1994 - cü ildə Afrikanın Ruanda ölkəsində hutu millətinə aid olan ekstrimist qüvvələr ancaq 3 ay ərzində tütsi millətindən təqribən bir milyon öldürüblər. Əlbəttə, bu faciə Afrikada baş verdi. II dünya müharibəsindən sonra belə bir fikir var idi ki,  almanların yəhudilərə etdiyi cinayətlər heç vaxt Avropada təkrar olunmayacaq. Amma Yuqoslaviyada serblərin  Bosna, Hersoqoviyada elədikləri dəhşətli cinayətlər nişan verdi ki, bir millətə qarşı genosid ancaq Afrikada, Asiyada yox,  Avropada da təkrar oluna bilər.

   Azərbaycan türkləri də təcavüzkar millətlərin genosid vəhşiliyindən kənarda qalmamışdırlar. Onun nümunələri Güney Azərbaycanda Milli Hökumətimiz yıxılandan sonra  50 mindən artıq günahsız insanın qətlini fars şovenistlərinin həyata keçirmələrini misal göstərmək olar. Və ya başqa bir misalda Quzey Azərbaycanda, Xocalıda   ermənilərin millətimizə qarşı etdiyi genosidi misal çəkə bilərik.

 Əgər bir məmləkətdə bir neçə millət və ya etnik qruplar  yaşayırsa, o zaman bu millətlər müvəffəq olmalıdırlar  bərabər hüquqlu  yaşamağa. Əlbəttə, əgər burda bütün millətlər bunu istəyirsə. Demokratik siyasi sistem çoxmillətli məmləkətdə müxtəlif  millətlərin bir  müştərək siyasi qərarının nəticəsidir. İran adlanan məmləkətdə, xüsusən hakim millət siyasi, iqtisadi, mədəni gücə malikdir. Bu hakim millət, yəni farsların bir demokratik sistemə marağı olması həddən artıq əhəmiyyət daşıyır.  Çünki İranda əgər qərardı bir demokratik siyasi sistem yarana və əgər onun bir tərəfi  Azərbaycan milləti olsa, digər tərəfi də  fars milləti olmalıdır. Əks halda, əgər hakim millətdə demokratik rabitəyə maraq olmaya, bu təhlükə var ki, ixtilafların şiddəti çoxala  başqa millətin genosidi ilə nəticələnə. Təcrübə kimi bu yerdə keçmiş Yuqoslaviyanı göstərə bilərik. Təbiidi, Güney Azərbaycanda  biz çağdaş mədəni formada problemlərimizin həll edilməsinin tərəfdarıyıq. Amma ata - baba sözüdür deyirlər :  "Şər deməsən, xeyir gəlməz! "   Çətin müharibə şəraitində  əgər düşmən bizə qarşı genosid etmək istəsə,  bizim bu şəraitə hazırlığımız varmı ?  Bu cür müharibə  şəraitində zaman və millətlərin aktiv qüvvələri həddən artıq rol oynayır. Ruandada ancaq 3 ayın ərzində bir milyon tütsi milləti qətlə yetirildi. Əgər hazırlığımız olmasa bir neçə gün ərzində  Güney Azərbaycanda  yüz minlərlə adam amansızlıqla qətlə yetirilib və ərazimiz işğal oluna bilər. Yuxarıda qeyd etdiyimiz kimi, millətlərin aktiv  qüvvələridir ki, mübarizənin nəticəsin təyin edirlər. Əgər İranda sayımız təqribən 35 milyon olsa da, bu sayımızın çoxluğu deyil ki kömək edə mübarizə bizim xeyrimizə qurtara. Bu zaman sözsüz, o aktivlərdir ki,  mübarizənin gedişatına təsir qoyacaqlar. Əgər müharibə şəraitində fars şovenizmi müvəffəq ola kürd millətinin ekstrimist qrupları ilə birlikdə bizdən artıq qüvvələri bizə qarşı aktiv edə bu təhlükə var Güney Azərbaycanda dəhşətli genosid baş verə. Mövcud hadisələrin təhlili göstərir ki, bu gün Güney Azərbaycan bir milli böhranla üzbəüzdür və bu milli böhranı da ancaq milli birliklə həll edə bilərik.

  Milli böhran nədir ?

  Bəzi vaxt müəyyən səbəblər bais olur ki,  bir millət milli  böhranla üz - üzə olsun. Məsələn, bir millətin ərazisi  xarici qüvvələr vasitəsi ilə  işğal olunur, ya bir məmləkətdə bir totalitar sistem uzun zaman hakim olur və elə bu totalitar sistem o məmləkətin milli mənfətlərin  ciddi şəkildə təhlükəyə salır. Ya da zəlzələ və ya sel kimi bəzi təbii hadisələr milləti milli böhranla üz - üzə edə bilər. Hətta bu gün Afrikanın bəzi ölkələrində spid xəstəliyi o şəkildə geniş yayılıb ki, deyirlər burda yaşayanlar  milli böhranla üz - üzədi.

Milli böhranın mənası budur ki, mövcud olan böhranı heç bir fərd və heç bir təşkilat ayrı - ayrılıqda həll edə bilməz. Ancaq bu böhran milli birliklə həll oluna bilər.

   Güney Azərbaycanda 61 il bundan qabaq onun qanuni milli hökuməti  başqa millətin hərbi təcavüzü nəticəsində yıxılıb.  Güney Azərbaycana qarşı İranın fars rejimi  çox şiddətlə assimliasiya, yəni onu içində əridib  kimliyini məhv etmək siyasəti yeridir.Əgər bəzi istisnaları bir kənara qoysaq,    ümumi halda demək olar fars millətinin iqtidarı və onun müxalifi Güney Azərbaycanın dirəniş hərəkatın sındırıb təslim etmək fikrini gizlətmir. Prosesin bu formada davamı ixtilafın çoxalması ilə milli demokratik qüvvələrin Güney Azərbaycanın bəzi şəhərlərin İranın fars rejiminin hakimiyyətindən azad etməsi ilə nəticələnə. Və bu da öz yerində müharibə şəraitinə gətirib çıxara bilər.  Bundan sonra isə  Güney Azərbaycanın  milli demokratik qüvvələri ilə fars şovenizmi, üstəgəl Güney Azərbaycanın ərazisində torpaq iddiası olan bəzi kürd ekstrimis qüvvələri arasında toqquşma baş verə bilər. Burda hər bir vətənsevər Azərbaycanlıya  bu sual verilməlidir : "Əgər bu cür şərait baş versə, hər hansı bir təhlükəni aradan götürməyə bizim hazırlığımız varmı ?" Bu vəziyyətdə hazırlıq ancaq milli birlikdə ola bilər. Çünki bir yerdə ki, milli böhran var, milli böhrandan ancaq  milli birliklə çıxa bilərik.

  Əlbəttə, milli birlikdən danışanda  bizim nəzərdə tutduğumuz yaranmasına çalışdığımız demokratik formada milli birlikdir. Bu milli birliksə, Ali təşkilat  formasında , yəni təşkilatların  təşkilatı şəklində  özünü göstərə.

   Bir demokratik rabitədə müxtəlif təşkilatlar  müştərək üsulun üstündə qərara gəlib və nəhayət bir ali orqan yarana. Yəni əvvəl təşkilatın bədəni, sonra onun başı vücuda gələ. Çox təssüflə qeyd etməliyəm ki, indi bəzi təşkilatlar var özlərin ali təşkilat kimi təqdim edirlər. Əslində bunlar bədənsiz başlardır. Ali təşkilatda məqsəd odur ki,  milyonlarla soydaşımızın üstündə  siyasi, əxlaqi, mənəvi  nüfuzu ola və elmi mübarizə metodları ilə millətimizi bu ağır vəziyyətdən çıxarda. Əgər bu gün millətimizin  M. Ə. Rəsulzadəyə, S.C. Pişəvəriyə, Ə. Elçibəyə böyük sayqısı varsa, əslində buna səbəb  odur ki, bunlar bir demokratik rabitədə ali təşkilatın yaranmasında çox önəmli rol oynayıblar. Əməldə görürük ki,  adı çəkilən hər üç milli liderimiz bu gün bizə hava, su kimi lazım olan ali təşkilatı öz mübarizə apardıqları zamanda yarada biliblər və soydaşlarımızın üzərində siyasi, əxlaqi  və mənəvi nüfuzları olub.

    Müxtəlif səbəbə görə bu gün müxtəlif fərdlərin və təşkilatalrın  çabaları ali təşkilatı yaratmağa  əməldə uğur qazanmayıb. Və yuxarıda qeyd etdiyimiz kimi xüsusən müharibə şəraitində ali təşkilatın olmamağı milli faciə səbəb ola bilər. Nəinki faciə, hətta millətimiz genosid kimi dəhşətli hadisəni yaşaya da bilər. Özümüzə açıq - aydın məlum olan, lakin aradan götürə bilmədiyimiz məsələləri bizdən kənarda durub müşahidə edənlər də düzgün şərh etdikləri üçün bu yerdə xatırlatmaq istəyirəm. Belə ki, Qərb mətbuatı Güney Azərbaycanın indiki vəziyyətini araşdırıb iki nəticəni əsl problem şəklində bizim qarşımızda qaldığını öz  mətbuat orqanlarında yazmışdırlar.  Bir tərəfdən İran fars rejiminin milli aktivlərə hədsiz təzyiqidir, digər tərəfdən  hərəkatı istiqamətləndirən  təşkilatın olmamasıdır. Əslində qərb mətbuatının göstərdiyi iki əsl səbəb bizim üçün heç də təzə deyil. Bu ağrıları biz hər birimiz bilir və hər anda yaşayırıq. Kənardakılar  bizim hərəkatı müşahidə edib düzgün nəticə çıxartsalar da, amma həqiqətdə bizim canımızın ağrısını olduğu kimi yaşaya bilməzlər. Bu səbəbdən də öz ağrımıza özümüz məlhəm tapmalıyıq. Əgər bu vəziyyət davam tapa  milli hərəkatımıza  öz içindən çoxlu xəsarət vurula bilər.  Əlbəttə, indiyə kimi müəyyən xəsarətlər də vurulub. Məsələn, son illər Babək Xürrəmdin doğum  günü ilə bağlı Babək qalasında keçirilən mərasimə müxtəlif tarixlərin təklif verilməsi, İranda Mehr ayının 1 - də mədrəsələrdə dərslərin başlanması ilə bağlı  bəzilərin baykot etmə və bəzi təşkilatların küçə - bazarda etiraz aksiyası təklifi vermişdirlər. Bu cür bir - birinə zidd təkliflər  milli hərəkatda ciddi problemə dönə bilər. Digər tərəfdən ali təşkilatın olmaması səbəb olub ki,milli hərəkatın adına diplomatik danışıqlar aparmaq və xarici amillərdən milli hərəkatın nəfinə istifadə etmək mümükün olmayıb. Çünki indi milli hərəkatın bütövlükdə siyasi təmsilçisi müəyyən deyil. Əlbəttə, burdan belə bir sualda ortaya çıxa bilər :  Bu çətin şəraitdə nə üçün milli birlik adına güclü bir təşkilat  yaranmaya ?  Aydındır ki, milli birliyin qarşısında olan maniələri araşdırıb öyrənmək, onları tanımaq, bilmək ümümi işimizdə əsas olduğu kimi, arzusunda olduğumuz birlik məsələsində də dadımıza çatacaq. Elə bu da milli hərəkatımızın qələbəsini istəyən hər kəsin düşüncəsinə hakim olduğu üçün indi mənim qələmimin mövzusu olduğu kimi, əminəm ki, sabah başqa soydaşlarımızın da yazacağı yazının əsas mövzusu olacaq. Hər halda həqiqət budur ki, tamam çabalar  bu günə kimi bu mövzu ilə əlaqədar nə qədər deyilsə də, çox təssüf ki, istədiyimiz nəticəni verməyib. Bu ağır vəziyyətdən çıxmaq üçün mənim müəyyən təklifim var. Üstəlik qeyd etdiyim  kimi, zaman tez gedir  və bizlər bir demokratik prosesin  əsasında əgər bir ali təşkilat yaratmağa müvəffəq olmasaq, onun yerinə ali komitə yarada bilərik. Amma bu ali komitə keçid dövrü və ya ali təşkilatın yaranması üçün formalaşma mərhələsi rolunu da oynaya bilər. 

    Mən öz şəxsi təcrübəmə əsaslanaraq ali komitənin iş pirinsipini və daxili quruluşunu belə müəyyənləşdirmişəm. Bəri başdan qeyd edim ki, burda xüsusi başqan olmur və eyni zamanda  başqa təşkilatlardan, cəmiyyət, qurum, partiya və bu kimi ictimai, siyasi birliklərdən fərqli olaraq təmtəraqlı əsasnamə, nizamnamə yazılmır və eyni zamanda lazım da deyil ki, bu komitənin adına qurultay keçirilsin. Yalnız burda əlaqələndirici, gedişatı nizamlayan şəxs olur. Ayrı - ayrı təşkilatların üzvü burda öz təmsil olunduğu təşkilatdan nümayəndə kimi iştirak edə bilər, Güneyin mediya nümayəndələrinin üzv kimi iştirakı əsasdır. Bu komitə ancaq və ancaq bu gün Güney Azərbaycanda aktual olan və zamanında həyata keçirilməsi əsas olan, vaxtın və mövqeyin düzgün müəyyənləşdirilməməsi uduzmağa bərabər olan hadisələrin gerçəkləşməsini öz iş prinsipində birinci növbədə etməlidir.  Bura daxildir tarixi, ictimai, siyasi, mədəni hadisələr və eyni zamanda elə hadisələr ki, onlar ötəri deyil,  MİLLİ BİRLİK İNAMIMIZIN  ana xəttidi! Məsələn,  Babək qalasındakı mərasim,  21 Azəri Günü --  Milli Hökumətimizin ildönümü,  1 Mehr İranda məktəblərin açıldığı gün, Xordat hadisələri və s. Bu ali komitə aktual mövzularla əlaqədar münasibət bildirib və bu münasibət milli hərəkata son qərar kimi qəbul olunmalıdır. Və bu ali komitənin bir başqa vəzifəsi də Güney Azərbaycanın milli hərəkatının təmsilçisi kimi xarici ölkələrlə diplomatik əlaqələrə girməlidir.

   Yeri gəlmişkən iki məsələyə toxunmaq istəyirəm :  Bunlardan biri yuxarıda qeyd etdiyim mənim şəxsi təcrübəm kimi işarə etdiyim məsələdir ki, onun haqqında açıq yazmağı və bu uğurlu iş pirinsipinin ali komitənin yaranmasında və bu gün Güney Azərbaycan hadisələrinin gedişatına müsbət təsir göstərəcəyinə tam əminəm.  Soydaşlarımıza yaxşı məlumdur ki, biz bir qrup Azərbaycanlı "İnam" layihəsi ilə internet Tv -nin yayılmasına müvəffəq olduq. Bu layihədə aşağıdakı qruplar iştirak edirdilər:

 1. Vahid Azərbaycan TV adından www. azadtribun.net sitəsi

 2.DDAK  TV adından Dünya Demokratik Azərbaycanlıları Komitəsi

 3. Müsavat TV adından Müsavat Partiyası

 4.FDH TV adından Federal Demokratik Hərəkatı

 Gördüyünüz kimi 4 təşkilat və hər birinin də özünə görə müəyyən qədər üzvü var. Amma iş üsulu elə qurulmuşdu ki, heç bir qarşı durma, söz - söhbətə yer olmadı. Çünki işin idarəçiliyi məsələsində daxili nizamnamə əsas idi və  işin irəli uğurla aparılması hər kəsin şəxsi keyfiyyətindən aslı idi. Həm də burda iştirak edənlər dərk etmişdilər ki, maddi qazanacaqları heç nə olmayacaq, əksinə xalqa, millətə, öz tamaşaçılarına mənəvi dəstək olacaqlar.  Millətinin  siyasi və ictimai mübarizədə qələbə çalmasında onun hazırladığı verilişlər  maariflənmə rolunu oynayacaq. Bir də o zaman hər hansı bir ideya həyata uğurla keçmir ki, orada vəzifə, başqan, kreslo davası olur, maddi mənafe milli mənafedən qabağa keçir, heç nə itirmədən daha çox maddi qazanc əldə etmək, millətdən şəxsi mənafeyi üçün faydalanmaq, yəni milli məsələ ilə alver etmək, ideyada "xalq" deyib amma stol qamarlamaq və s. və ilaxır mənfi hallar beynə hakim olanda milli məsələ müsbət həll olunmur.

  Sonda yalnız bunu demək istəyirəm : ali komitəyə təmənnasız, şəxsi fayda güdməyən, milli mənafeyi şəxsi mənafeyindən üstün tutan, ədalətli, mənəviyyatlı adamlar hər hansı bir təşkilatdan nümayyəndə kimi iştirak edə bilər. Bu komitə  MİLLƏTİN XİLASINDAN başqa heç kəsə heç nə vəd etmir!

  Bu gün biz Azərbaycanlıların öhdəsində vacib bir milli vəzifə var, o da düşmənin qabağında  bir səs və bir yumruq olmaq. Əgər bu gün bu vəzifəyə şübhə ilə baxsaq,  sabah təhlükə var Güney Azərbaycanda kütləvi qırğına və ərazimizin əldən getməsinə şahid olaq.