AZƏRBAYCAN HAKİMİYƏTİNİN GÜRCÜSTANDA AZƏRBAYCAN MƏKTƏBLƏRİNİN BAĞLANMASI ÇAĞIRIŞI İLƏ BAĞLI

DEMOKRATİK DÜNYA AZƏRBAYCANLILARI KONQRESİNİN

MÜRACİƏTİ

Hörmətli iqtidar mənsubları!

Belə bir məşhur ifadə var "bir milləti məhv etmək ücün öncə onun dilini əlindən almaq lazımdır". Elə buna görə də təşkilatımız Azərbaycan respublikasından kənarda yaşayan azərbaycanlıların öz ana dillərində  təhsil almaları və bu səbəbdən də assimilyasiyaya uğramalarının qarşısını almaq üçün bu istıqamətdə fəaliyyət göstərir.

Bu bir faktdır ki, assimilyasiya siyasəti nəticəsində ana dili məktəblərindən məhrum edilmiş Dərbənddə yaşayan soydaşlarımız yadlaşıb, İran adlanan yerdə yaşayan 35 milyonluq bir toplum isə farslaşmaq təhlükəsi qarşısındadır. Borcalıda yaşayan və ana dilində təhsil almağın mahiyyətini dərk edən soydaşlarımızın narahatcılığı da məhz  bu üzdəndir. Son illər Gürcüstanda yaşayan soydaşlarımız övladlarının ana dilində təhsil almaları ücün nə Gürcüstan, nə də Azərbaycan hakimiyyətindən lazımi dəstəyi ala biliblər.  

Lakin bu azmış kimi çox təəssüflə, bu günlərdə Xaricdə Yaşayan Azərbaycanlılarla İş Üzrə Dövlət Komissiyasının sədri Nazim İbrahimovun "Gürcüstandaki Azərbaycan məktəblərinin bağlanmasını biz istəmişik və bunu Gürcüstan rəhbərliyindən təkidlə tələb etmişik" kimi məsuliyyətsiz  açıqlamsı soydaşlarımızın bu yöndə bütün ümidlərini puç etməkdədir. Komitə sədri açıqlamasını əsaslandıraraq deyir ki, guya Azərbaycanlıların kompakt yaşadığı bölgə olan Borcalıda Azərbaycan məktəbləri bağlanarsa və azərbaycanlılar gürcü dilində təhsil alarlarsa onlar Gürcüstanın ali orqanlarında çalışa bilərlər. Halbuki, Gürcüstanda elə qəsəbə və kəndlər var ki, orda yaşayan soydaşlarımızın hamısı gürcü dilində təhsil alıb. Lakin buna baxmayaraq onlar da Gürcüstanın ali orqanlarında çalışmaq imkanından məhrumdular. Bu onu göstərir ki, Gürçüstanda yaşayan soydaşlarımızın işlə təmin olunma problemləri təhsillə bağlı deyil, sırf milli amillərə söykənən bir problemdir.  Heç bir sorğu, araşdırma və yaxud monitorinq aparmadan məktəblərin bağlanması tələbi cahillikdən başqa bir şey deyildir. Əslində bu cür acıqlama Nazim İbrahimovun diaspora səhəsində apardığı fəaliyyətin fəsadlarından biridir ki, özü də bilmədən tam çılpaqlığı ilə ortaya qoymuşdur.

Təmsil etdiyi vəzifəyə təyin olunandan bəri daim Azərbaycan hüdudlarından kənarda yaşayan soydaşlarımız arasına münaqişə salan, ayrımçılıq toxumu səpən Nazim İbrahimovun bu açıqlaması bir daha sübut edir ki, onun kompakt yaşayan soydaşlarımız və diaspora ilə heç bir müsbət fəaliyyəti yoxdur və onun bu sahədə fəaliyyəti sirf antimilli xarakter daşıyır. Onun bu açıqlaması haqlı olaraq bir çox ziyalılar, o cümlədən, Borçalı əhalisi tərəfindən kəskin etirazla qarşılanmışdır. 

Biz, Demokratik Dünya Azərbaycanlıları Konqresinin üzvləri hesab edirik ki, hakimiyyət bu cür fəaliyyətə son qoymalı, Gürcüstanda məktəblərin bağlanması ilə bağlı fəaliyət dayandırılmalı və əksinə bugünkü Gürcüstanın demokratik hakimiyyətindən məktəblərin təchizatı və təminatı tələb edilməli, burada yaşayan soydaşlarımız taleyin ümidinə buraxılmamalıdırlar.

 Bundan əlavə, Gürcüstanda yaşayan soydaşlarımızın gürcülərdən sonra ikinci böyük toplum olduqlarını nəzərə alaraq, azərbaycan dilinin ikinci dövlət dili kimi qəbul edilməsini bu hakimiyyətin qarşısında qaldırmaq üçün səylər göstərilməlidir. Beləliklə, Azəbaycan hakimiyyətinin fəaliyyəti Gürcüstanın yerli sakinləri olan və burada yaşayan soydaşlarımızın itirilməsinə deyil, bölgədə güclü bir topluma cevirilməsinə yönəlməlidir.

Demokratik Dünya Azərbaycanlıları Konqresinin İdarə Heyəti

18 iyul 2007