Dünən hakimiyyətə yaxın dairələrdən maraqlı xəbər aldıq. Məlumatda bildirilir ki, yaxın vaxtlarda Xaricdə Yaşayan Azərbaycanlılarla Iş üzrə Dövlət Komitəsinin sədri Nazim Ibrahimov tutduğu postdan kənarlaşdırıla bilər.
Adının çəkilməsini istəməyən şəxs “Bununla bağlı xüsusi hazırlıq aparılır. Ibrahimovun bütün hərəkətləri nəzarətdədir və o, lazım olan anda həbsə atılacaq” söyləyərək bildirdi ki, komitə sədrinə yaxın bəzi şəxslər müxtəlif bəhanələrlə hüquq-mühafizə orqanlarına çağrılırlar.
Bu çağırışlar zamanı Ibrahimovun özəl biznesi, xüsusilə xarici ölkələrdəki obyektlərilə maraqlanırlar. Yəni, onun obyektlərinin siyahısını dəqiqləşdirməyə çalışırlar. Hətta Ibrahimovun həbsinə zəmin yaratmaq üçün bəzi şəxslərin düşdükləri vəziyyətdən yararlanıldığı da istisna olunmur. Bu məlumatı verən şəxsin sözlərinə görə, ötən həftənin beşinci günü həbs olunmuş Rövşən Novruzoğludan da müəyyən məlumatlar alına bilər. Həmin şəxs hətta Novruzoğlunun həbsinin dolayısı ilə Ibrahimova aid olduğunu vurğuladı. Qeyd etdi ki, Rövşən Novruzoğlu komitə sədrilə çox yaxın olub. Dəfələrlə XYAIDK-nin xəttilə xarici səfərlərdə olan Novruzoğlunun Ibrahimovla yaxın olduğunu bildirilir. Məhz buna görə də ondan komitə sədri barədə məlumatlar alınacağı istisna edilmir. Elə bu günlərdə Bakı ətrafında Nazim Ibrahimovun və onun qardaşı Hacı Ibrahimin villalarının nümayişkarənə şəkildə parladılması da bununla bağlıdır. Bütün bunlar Ibrahimovu və onun ətrafını zərərsizləşdirmək istəyilə əlaqəlidir. O da vurğulanır ki, yaxın vaxtlarda komitə sədrinin qardaşı Tağı Ibrahimovun rəhbərlik etdiyi ATV telekanalının fəaliyyəti araşdırılacaq. Olsun ki, bu kampaniya da qardaşların əlindən alınsın. Lakin hökumətə yaxın dairələrdən Nazim Ibrahimovun konkret olaraq hansı səbəbdən vurulması barədə heç bir məlumat ala bilmədik. Məlumatlar da o da vurğulanır ki, Borçalıda Azərbaycan məktəblərinin bağlanmasının vacibliyi barədə fikirlərin də komitə sədrinin dililə səsləndirilməsi buna xidmət edir. Yəni, bu addımla onu ictimaiyyət arasında nüfuzdan salırlar. Bu addımı ona görə atırlar ki, sabah Ibrahimov həbs olunsa, onu ictimaiyyət “qurban” sayıb müdafiə etməsin.
Qeyd edək ki, məlumat redaksiyamıza gec daxil olduğundan adıçəkilən şəxslərdən mövqe öyrənə bilmədik.
AZAD, «Azadlıq» qəzeti