گؤزشت، يا ساواشدان اؤنجه ديپلوماسي؟ 

سونوندان روسيه دن حرکت باشلادي!! روسيه ده کي آذربايجانلي سفير ارمنيلرين الين اؤپماغا گئتدي، بيزيم تورپاغلاري ايکي اللي اونلارا تسليم ائتمک اوچون!! سيزجه بو دوغرو ياناشما مي دير؟ 

آذربايجانين روسيه ده کي سفيري، پولاد بولبولوغلو نئچه باشقا ضيالي ايله بيرليکده آذربايجانين ايشقال آلتيندا اولان تورپاغلارينا يابانجي اولاراق سفر ائديب و بو سفرده ارمني ايشقالچيلاري نين باشيندا گلن آرکادي گوکاسييان و اونو دستکله ين ارمنستان جومهور باشقاني روبرت کؤچاريانين آياغينا گئديب. بو يئتيرينجه اؤزوجو و قورخو وئريجيدير. 

اينانمالي اولان بير اولاي ده يير، ساواشدان، حربي هازيرليقدان و بيزيم تورپاغ دئين حاکيمييتين بو یو (U) دؤنوشو (180 " ) هامينی شاشيرتدي. آما بو اولايدا ميلتين اؤنملي رئاکسياسي ایله بير داها ايسپاتلاندي کی گؤزشت اولمایاجاق، حتی بیر قاریش. ميلت هيچ بير گؤزشتي قبول ائتميه جک. 

من بو اولايا باشقا بير دليکدن باخيرام، و آرزو ائديرم کي دوشوندوغوم دوغرو اولسون. 

بيلديگيز کيمين مودرن چاغدا بير دوشمانا سالديرمادان اونجه اونونلا سؤزو بيتيرمک گره کي ر. يعني ديپلوماسي ايله تام سون دوراغا، کي حربي سالديري آدلانير گئديلمه ليدير. اؤرنک اوچون عراقا سالديرمادان اؤنجه ياريم يامالاغ بير ديپلوماسي، آرديندان تحریم و سون اولاراق بومبالار ايشه آليندي. ايشيميز يوخ بونون آرخاسيندا نه لر واريدي، بيزي بوردا ماراخلانديرانسا يانليز ديپلوماسي دير. 

وطنده وئريلن رئاکسييالار هم حاکيمييته و همده دوست گؤرونن دوشمانا ياني روسيه يه بير مساژ گؤندردي: قاراباغين آيريلماسي يا ايجاره وئريلمه سي ايمکانسيزدير. اينديسه يا اليئو رئژيمي يا پوتين و يا ائرمنيلر اينانيرلار کي بو قونودا شوخلوق ائتمکله، ايشي بير آز داها قاريشديريرلار. قاراباغ ايشقالچيلاردان تميزله نيب، اوردا ياشايان ائرمنيلرسه آذربايجان وطنداشي اولاراق اؤز اينساني هاقلارينا صاحيب اولماليديلار. باشقا يول يوخدور. 

سئوينرديم اگر حاکيمييتين سون آدديملاري منيم آنلاتديغيم ديپلوماسي اوچون آتيلميش اولسون، يوخسا سرت بير جاوابلا قارشيلاشا بيلير. اؤنجه يازيلاريمدا بيلديرديگيم کيمي، ايندي آذربايجان سوروملاريني يالقيز قوزئي يوخ بلکي بوتؤو آذربايجانليلار چؤزمه ليديلر. 

پوتين و اروپانين باسقيلاري آلتيندا ضعف گؤسترن و بيزه ضیالي تانيتيلانلاري، دوشمن آياغينا گؤندرمک، بئله ساده مسئله ديير کي بير آووج تورپاق گتيرديک ديه اونوتولسون. ميلتيميزين احساساتلاري او قدر ده ساده و گئري قالميش ديير، يا قاراباغ گله جک يا حاکيمييت دوشمان جبهه سينده ميلت ايله ساواشاجاق. 

يالنيز بير سورون وار او دا زاماندير. زامان بيزدن يانا يؤرؤمور. قاراباغي آلاجاييق دييه حاکيمييتي منيمسه يه نلرين غيب ائتديکلري زامان گئري گلميه جک، ديقتلي اولاليم کي بيز ميلت اولاراق زامان قايبينا باخاباخا، ايشيميزي بوشا بوراخمایاق. زامان گئچيب گئدير، قاراباغ ائرمني له شير، دونيا کامويو ماراغيني ايتيرير، بيزسه سسسيز اوتوروب حاکيمييتين يانليشلاري و گؤزشتلريني ايزله ييريک!!! حيرت دير اگر آنا وطني بئله قوروياق. 

يا قاراباغ، يا اؤلوم. ايشته بودور بيزيم سيياستيميز.

تبريزلي باي بک (مسعود انتظار) 

گلاسگو 

30/06/2007

Güzəşt، ya savaşdan öncə diplomasi?

Sonundan rusyiadan hərəkət başladi!! Rusyiadaki Azərbaycanli səfir Ərmənilərin əlin öpmağa getdi, bizim torpağlari iki əlli onlara təslim etmək uçun!! Sizcə bu doğru yanaşma mi dir?

Azərbaycanin Rusyiadaki səfiri Polad Bülbüloğlu neçə başqa ziali ilə birlikdə Azərbaycanin işqal altinda olan torpağlarina YABANCİ olaraq səfər edib və bu səfədə Ərməni işqalçilarinin başinda gələn Arkadi Gukasyian və onu dəstəkləyən Ərmənistan cumhur başqani Robert Köçarianin ayağina gedib. Bu yetırincə üzücü və qorxu vericidir.

İnanmali olan bir olay dəyir, savaşdan, hərbi hazirliqdan və BİZİM TORPAĞ deyən hakimyiətin bu U dönuşu (180”) hamini şaşirtdi. Ama bu olayda millətin önəmli reaksyasi ilə bir daha ispatlandi ki güzəşt olmayacaq, hatta bir qariş. Millət hiç bir guzəşti qəbul etməyəcək.

Mən bu olaya başqa bir dəlikdən baxiram, və arzu edirəm ki duşunduğum doğru olsun.

Bildigiz kimin modern çağda bir duşmana saldirmadan oncə onunla sözu bitirmək gərəkir. Yani diplomasi ilə tam son durağa, ki hərbi saldiri adlanir gedilməlidir. Örnək uçun İraqa saldirmadan öncə yarim yamalağ bir diplomasi, ardindan sanksyia və son olaraq bombalar işə alindi. İşimiz yox bunun arxasinda nələr varidi, bizi burda maraxlandiransa yanliz diplomasi dir.

Vətəndə verilən reaksyialar həm HAKİMYİƏTə və həmdə dost görünən DUŞMANA yani Rusyiaia bir məsaj göndərdi: Qarabağin ayrilmasi ya icarə verilməsi imkansizdir. İndisə ya Əliev rejimi ya Putin və ya Ermənilər inanirlar ki bu qonuda şuxluq etməklə, işi bir az daha qarişdirirlar. Qarabağ işqalçilardan təmizlənib, orda yaşayan ermənilərsə Azərbaycan vatandaşi olaraq öz insani haqlarina sahib olmalidilar. Başqa yol yoxdur.

Sevinərdim əgər hakimyiətin son addimlari mənim anlatdiğim diplomasi uçun atilmiş olsun, yoxsa sərt bir cavabla qarşilaşa bilir. Öncə yazilarimda bildirdigim kimi, indi Azərbaycan sorumlarini yalqiz Qüzey yox bəlki butöv Azərbaycanlilar çözməlidilər.

Putin və Avrupanin basqilari altinda zef göstərən və bizə ziali tanitilanlari, duşmən ayağina göndərmək, belə sadə məsələ dəyir ki bir avuc torpaq gətirdik diə unutulsun. Millətimizin ehsasatlari o qədərdə sadə və geri qalmiş dəyir, ya Qarabağ gələcək ya Hakimyiət duşman cəbhəsində millət ilə savaşacaq.

Yalniz bir sorun var o da zamandir. Zaman bizdən yana yurumur. Qarabaği alacayiq dyiə hakimyiəti mənimsəyinlərin qayib etdikləri zaman geri gəlməyəcək, diqqatli olalim ki biz millət olaraq zaman qaibina baxabaxa, işimizi genə boşa buraxmayaq. Zaman geçib gedir, Qarabağ erməniləşir, dünya kamoyu marağini itirir, bizsə səssiz oturub hakimyiətin yanlişlari və guzəştlərini izləyirik!!! Hayrət dir əgər Ana Vətəni belə qoruyaq.

Ya Qarabağ, ya Ölüm. İştə budur bizim syiasətimiz.

Təbrizli Baybək (Məsud İntizar)

Qlazqo

30/06/2007