Stokholmda
Babəkin doğum günü qeyd olundu.
Bu gün Müsavat Partiyası İsveç özəklərinin
təşkilatçılığı ilə Stokholm şəhərində
Haga yüksəkliyinə qalxmaqla böyük Babəkin doğum gününə
və Güneydəki soydaşlarımızın Babək qalasına
yürüşü ilə həmrəylik olaraq yürüş-mitinq keçirildi.
Yürüş-mitinqin təşkilatçısı Müsavat Partiyası
İsveç özəkləri olsa da yürüşdə İsveçdə
fəaliyyət göstərən digər təşkilatların
da nümayəndələri iştirak edirdi. Havanın son
dərəcə əlverişsiz olmasına baxmayaraq yürüş
iştirakçıları fədakarlıq göstərərək yağışın
altında mitinq keçirdilər.
Mitinqi Müsavat Partiyası Stokholm özəyinin sədri
Əli Ağayev açaraq, günün önəmini vurğuladı. Sonra
çıxış edən Müsavat Partiyası Uppsala özəyinin
sədri Sərdar Ağayev, Demokratik DAK başqan yardımçısı
Teymur Eminbəyli, yazıçı-filosof Eluca Atalı,
azadtribun.net sitəsinin və Vahid Azərbaycan TV-nin sahibi
Babək Azəri, musavatisvec.com sitəsinin redaktoru, Stokholmdan
internet vasitəsiylə yayınlanan Müsavat TV-nin baş
redaktoru Mübariz Əzimli, jurnalist Könül Həsənli, Baycan
Azəroğlu, Əsəd
Təbrizli və başqaları çıxış edərək,
bu gün Güneydə Babək qalasına yürüş edənlərlə
həmrəy olduqlarını, insanların azadlığının
qarşısını kimsənin alamayacağını qeyd
etdilər. Qeyd olundu ki, İranın mürtəce rejimi Güneydəki
soydaşlarımızın ən elementar huquqlarını uzun
müddət inkar edə bilməyəcək. Bunu hər il bu gün
gerçəkləşən xalq qurultayı sübut edir. Yürüş-mitinq
yaşasın Vahid Azərbaycan! nidaları ilə başa
çatdı.
Bu yürüş-mitinqin özəlliklərindən biri də
odur ki, Müsavat Partiyası İsveç özəklərinin təşkil
etdiyi son aksiyalarda olduğu kimi, bu tədbirdə də İsveçdə
fəaliyyət göstərən müxtəlif təşkilat
və dərnəklərin nümayəndələri də iştirak
edirdilər. Bu da azad ölkədə yaşayan azad insanlar arasında
müsavat məfkurəsinin nə qədər cəlbedici olduğunu,
azad insanların müsavatçıların ətrafında birləşdiklərinin
göstəricisidir.
Yürüş-mitinq haqqında video-reportaja musavatisvec.com və
azadtribun.net sitələrində baxa bilərsiniz.
Mitinq təşkilat komitəsi
Haga Park, Stokholm, İsveç
30.06.2007