Mediaforum.az :: Xəbərlər

POLAD BÜLBÜLOĞLU XANKƏNDİNDƏ ÜNSİYYƏTDƏN və GÜZƏŞT AXTARMAQDAN DANIŞIB
2007-06-28, 20:19:00

«Qarabağ münaqişəsində tərəflər arasında körpü qurmaq yaşlı nəsil üçün asandır». Bu sözləri bu gün Xankəndinə getmiş Azərbaycanın Rusiyadakı səfiri Polad Bülbüloğlu deyib.

«Turan» İnformasiya Agentliyi xəbər verir ki, P.Bülbüloğlu səfər zamanı qarşılıqlı dialoqdan danışıb: «Bizim nəsil bir-birini tanıyır, ona görə nə qədər ki, biz varıq, dialoq, əlaqələr qurmaq, öz nöqteyi-nəzərimizi açıq söyləmək, çıxış yolları, güzəştlər axtarmaq lazımdır».

Bu gün Azərbaycan nümayəndə heyəti Ağdərə-Tərtər yolunda cəbhənin minalardan təmizlənmiş sahəsini keçərək Xankəndinə gedib. Xankəndinə Ermənistanın Rusiyadakı səfirinin başçılığı ilə Ermənistan ziyalılarından ibarət nümayəndə heyəti də gəlib.

Səfər hər iki səfirin təşəbbüsü ilə təşkil olunub. Jurnalistlərlə söhbətdə P.Bülbüloğlu media işçilərinin, deputatların və digər nümayəndələrin iştirakı ilə gələcəkdə də görüşlər keçirilməsinin zəruriliyini vurğulayıb. «Bir-biri ilə tolerantlıqla ünsiyyət qura, fikrini bildirə bilən insanları seçmək, bizi birləşdirən nöqtələri, böhranın həllinə xidmət edən imkanları axtarmaq lazımdır» deyə Azərbaycanın səfiri bildirib.

POLAD BÜLBÜLOĞLU QUKASYANDAN SONRA KÖÇƏRYANIN DA QƏBULUNDA OLUB (Materiala fotoşəkil əlavə edilib)
2007-06-28 - 20:59:00

Azərbaycanın Rusiyadakı səfiri Polad Bülbüloğlunun və Ermənistanın Rusiyadakı səfiri Armen Smbatyanın rəhbərliyi ilə Dağlıq Qarabağa səfər edən Azərbaycan və erməni nümayəndə heyətləri bu gün Xankəndindən Yerevana yollanaraq Ermənistan prezidenti Robert Köçəryanla da görüşüb.

«Media forum» «Novosti-Armeniya»ya istinadla xəbər verir ki, Köçəryan nümayəndə heyətlərini qəbul edərkən səfəri müsbət təşəbbüs kimi dəyərləndirib. R.Köçəryan deyib ki, Azərbaycanla Ermənistan əməkdaşlıq yollarını axtarmalı, iki ölkənin cəmiyyətləri arasında təmas yaradılmalıdır.

Azərbaycan nümayəndə heyətinin üzvləri bildiriblər ki, iki xalq arasında dostluq, tərəfdaşlıq və əməkdaşlıq münasibətlərini bərpa etmək üçün Ermənistanın və Azərbaycanın yaşlı nəsli arasında əlaqələri güncləndirmək və məsələyə gənc nəsli də qoşmaq lazımdır.

«Media forum»

ERMƏNİSTANIN SƏFİRİ BAKIYA GƏLİR
2007-06-28 - 21:10:00

Ermənistanın Rusiyadakı fövqəladə və səlahiyyətli səfiri Armen Smbatyanın rəhbərlik etdiyi nümayəndə heyəti bu gün Azərbaycanın Rusiyadakı fövqəladə və səlahiyyətli səfiri Polad Bülbüloğlunun rəhbərlik etdiyi nümayəndə heyti ilə birgə Bakıya yola düşüb. Bu barədə «Media forum» saytı «Novosti-Armeniya»ya istinadla xəbər verir.

Hər iki nümayəndə heyəti bu gün əvvəlcə Dağlıq Qarabağda, sonra isə Ermənistanda olub. Xankəndində onlar Qarabağ separatçılarının lideri Arkadi Qukasyanın, Yerevanda isə Ermənistan prezidenti Robert Köçəryanın qəbulunda olub.

Bakıda nümayəndə heyətlərini Azərbaycan prezidenti İlham Əliyevin qəbul edəcəyi bildirilir.

«Media forum»

AZƏRBAYCAN SƏFİRİNİN DAĞLIQ QARABAĞA SƏFƏRİNƏ İLK REAKSİYALAR
2007-06-28 - 20:45:00

«Qarabağa səfər - iki səfirin, Azərbaycan və Ermənistanın sabiq mədəniyyət nazirlərinin şəxsi təşəbbüsüdür». Bu sözləri «Turan»a açıqlamasında Azərbaycanın Xarici İşlər Nazirliyinin mətbuat xidmətinin rəhbəri Xəzər İbrahim Azərbaycanın Rusiyadakı səfiri Polad Bülbüloğlunun Dağlıq Qarabağa səfərini şərh edərkən deyib.

X.İbrahimin sözlərinə görə, Xankəndində «Dağlıq Qarabağ icmasının nümayəndələri ilə» görüş olub. Bu görüş «Dağlıq Qarabağın münaqişə tərəfi olaraq tanınması kimi qiymətləndirilə bilməz, çünki səfirin şəxsi təşəbbüsü ilə həyata keçirilib».

Lakin ictimaiyyət nümayəndələri bununla razı deyillər.

«Bu, rüsvayçılıq və biabırçılıqdır» deyə Qarabağ Azadlıq Təşkilatının lideri Akif Nağı P.Bülbüloğlunun Dağlıq Qarabağa səfərini münasibət bildirərkən deyib: «Səfir buna görə cavab verməlidir. Bu məsələ bizim 3 iyul tarixli iclasımızda xüsusilə müzakirə olunacaq. Lakin artıq aydındır ki, biz səfirin geri çağırılması məsələsini qaldıracağıq».

Xarici siyasət üzrə sabiq dövlət müşaviri Vəfa Quluzadə P.Bülbüloğlunun səfərini yolverilməz addım kimi qiymətləndirib: «Bu, münaqişə həll olunana qədər Azərbaycan nümayəndələrinin Ermənistana və Qarabağa səfərlərinin yolverilməz olduğu haqda Azərbaycan hakimiyyətinin çağırışlarına ziddir. Amma tamamilə aydındır ki, Polad Bülbüloğlu öz istəyi ilə Qarabağa gedə bilməzdi».

Müsavat Partiyasının başqanı İsa Qəmbər səfirin səfərindən təəccübləndiyini deyib: «Kifayət qədər informasiya olmadan vəziyyəti qiymətləndirmək olmaz. Amma rəsmi qurumlar bu müəmmalı səfərə aydınlıq gətirməlidirlər».

Demokrat Partiyasının sədri Sərdar Calaloğlu bildirib: «Polad Bülbüloğlu səlahiyyət sahibi olmadığı üçün dövlət adından danışa bilmir. Burada qorxulu olan Dağlıq Qarabağı tərəf kimi tanıtdırmaq istəyidir. O biri y andan Dağlıq Qarabağ erməniləri də Azərbaycan vətəndaşlarıdır və buna görə bu səfərə siyasi çalar vermək düzgün deyil. Bu məsələ əvvəl-axır həllini tapmalıdır».

Xalq Cəbhəsi Partiyasının sədri Əli Kərimliin münasibəti isə belə olub: «Əvvəla, hesab edirəm ki, hökumət bu məsələyə təcili aydınlıq gətirərək səfirin hansı niyyətlə bu prosesdə iştirakçı olduğunu izah etməlidir. Digər tərəfdən, rəsmi Bakının nə deməsindən asılı olmayaraq rəsmi şəxsin separatçı qüvvələrlə görüşərək danışıqlar aparması tədricən də olsa separatçı qüvvələri danışıqlarda tərəfə çevirmək cəhdidir. Erməni diplomatiyası bu məsələ ətrafında uzun illərdir çalışır, amma nəticə əldə edə bilmirdi. Bu Azərbaycan diplomatiyasının yeganə üsütnlüyü idi ki, onu da əldən verir. Heç bir halda Dağlıq Qarabağ tərəf olmamalı və danışıqlar Ermənistan-Azərbaycan müstəvisində aparılmalıdır».

Hüquq müdafiəçisi Murad Sadəddinov qeyd edib ki, səfirin Qarabağa səfəri hakimiyyətin ikiüzlülüyünün təzahürüdür: «Bunu hüquq müdafiəçiləri edəndə onlara yumurta atırlar, televiziyada pərt edirlər və təhqir edirlər. Mənə indi bizim saxta patriotlarımızın necə hərəkət edəcəyi maraqlıdır».

SENSASİYA! AZƏRBAYCANIN SƏFİRİ QARABAĞ SEPARATÇILARININ QƏBULUNA GEDİB (Materialdakı foto təzələnib)
2007-06-28 - 20:08:00

Bu gün Azərbaycanın Rusiyadakı fövqəladə və səlahiyyətli səfiri Polad Bülbüloğlu Ermənistanın Rusiyadakı fövqəladə və səlahiyyətli səfiri Armen Smbatyanla birlikdə Dağlıq Qarabağa gedib və Qarabağ separatçılarının lideri Arkadi Qukasyanın qəbulunda olub. Bu sensasiyalı xəbər günün ikinci yarısında yayılıb.

«Turan» İnformasiya Agentliyinin məlumatına görə, Azərbaycanın Xarici İşlər Nazirliyinin mətbuat xidmətində bu xəbəri kifayət qədər sakit qarşılayıblar və bildiriblər ki, hələlik onlara heç nə bəlli deyil, məsələ ilə bağlı şərhlər sabah olacaq. Azərbaycanın Moskvadakı səfirliyindən isə «Turan»a bildiriblər ki, səfir Moskvada deyil, harada olduğu da məlum deyil.

Bununla belə, «Arminfo» agentliyi bildirir ki, «Dağlıq Qarabağ Respublikasının prezidenti Arkadi Qukasyan Armen Smbatyan və Polad Bülbüloğlunun başçılığı ilə erməni və Azərbaycan ziyalılarını qəbul edib».

«Arminfo»nun xəbərində deyilir: «DQR ziyalılarının iştirakı ilə keçirilən söhbət zamanı münaqişə tərəflərinin xalqları və cəmiyyətləri arasında dialoq qurulması və onlar arasında qarşılıqlı etibarın bərqərar edilməsi problemi müzakirə olunub. İştirakçılara müraciət edən Arkadi Qukasyan səfirlərin təşəbbüslərinin əhəmiyyətini qeyd edib və bildirib ki, bu, Dağlıq Qarabağ münaqişəsinin tənzimlənməsi prosesi ətrafında sağlam və konstruktiv atmosfer yarada bilər. DQR prezidenti Qarabağ tərəfinin tərəflər arasında olan səbirsizliyin və müharibəyə çağırışların yalnız münaqişənin həllinə mane olacağı haqda mövqeyini təsdiqləyib. Görüş iştirakçıları iki ölkə ziyalılarının dialoqunun gələcəkdə də davam etdiriləcəyinə və daha da genişlənəcəyinə ümid ifadə ediblər».

«Turan» İnformasiya Agentliyinin məsələ ilə bağlı qısa şərhində bildirilir ki, Azərbaycan prezidenti İlham Əliyevin hərbi revanşa və işğal edilmiş torpaqlarımızın azad olunmasına çağırışlarını, gündəlik bəyanatlarını nəzərə aldıqda, yəni rəsmi Bakının bəyan olunan mövqeyindən yanaşdıqda bu hadisəni izah etmək kifayət qədər çətindir. «Baş verənlər gəncləri qan tökmək və Vətəni işğalçılardan azad etmək çağırışı ilə bir yerə sığmır. Belə şəraitdə səfirin Qarabağa səfəri və separatçıların lideri ilə görüşü hökumətin nüfuzuna əhəmiyyətli zərbə vuracaq və hakimiyyətin vətənpərvər ritorikasına inamı sarsıdacaq» deyə «Turan»ın şərhində vurğulanır.

http://mediaforum.az/