Öz gözündə tiri görməyənlər

İsvec parlamentinin qarşısında kecirilən həbs edilmiş jurnalistlərə dəstək aksiyası Azərbaycan hakimiyyətinin kürkünə birə salıb. Yenə yap-cılar başlayıblar camaatın ünvanına ağızdolusu qara yaxmağa.

Hakimiyyətin bir-iki qəpik hesabına özü ücün düzəltdiyi cib müxalifətinin qəzetində YAP-ın deputatı Aydın Mirzəzadə İsvec və Hollandiya  parlamentinin qarşısında kecirilən aksiyalara münasibət bildirib. Aydın məllimin fikrinin ana cümləsi belədir "xaricdə Azərbaycan dövlətinə qarşı mübarizə aparan erməni diasporu ilə yanaşı durmağı onlar özləri üçün qəbahət saymırlar.Neynəyək, görünür ki, Azərbaycan xalqı belə oğullarının olmasına da dözməlidir və belələrinin də Azərbaycan dövlətinə, hökumətinə qarşı mübarizə apardığını artıq bir reallıq kimi qəbul etməliyik". Lənət şeytana deyib kecəsən, amma olmur. Görəsən Aydın müəllim bu araşdırmasına necə nail olub. Necə nail olubsa bilmirəm, amma bircə onu deyə bilərəm ki, YAP-cıların xəbər aparan göyərcinləri onlara səhv məlumat ötürür. Cünki burda yaşayan azərbaycanlılar həmin mitinqi Azərbaycan dövlətinə qarşı yox, Azərbaycan dövlətciliyini, azərbaycan millətini bütün dünyada biabır edən YAP hakimiyyətinin yaramaz əməllərindən birinə- demokratik mətbuata basqılara etiraz olaraq kecirib. Bu basqıları isə Kandaliza Raysdan tutmuş Teri Devisə kimi hamı bilir.  Bu hakimiyyətin bütün əməlləri bütün dünyaya məlum olduğu halda siz niyə günahı kənarda axtarırsız. Cürətiniz varsa iradlarınızı ünvanına söyləyin.

Digər tərəfdən, mən nə qədər yaddaşımı qurcalayıramsa hələ hansısa müxalifət partiyasının sayılıb secilən şəxslərinin hansısa erməni ilə bir süfrə başında oturmasını xatırlaya bilmirəm. Amma bir necə il bundan əvvəl Sədərəkdə Ermənistanla sərhəddə Ermənistan və Azərbaycan prezidentlərinin qəşş edərək Qarabağ probleminin həlliylə bağlı kabab yeyərək apardıqları danışığı əks etdirən foto gözümdən getmir. Üzvü olduğu komanda 16 ildir ermənilərlə əməkdaşlıq etdiyini bilən bir adamın kimisə belə bir ittiham irəli sürməsi nə qədər məntiqə uyğundur. Bu sualı elə onların özünə verirəm. Cox uzaga getməyək ele may ayında baş verən ikicə hadisəni xatırlatmaq istərdim. Ermənistan Olimpiya Komitəsinin katibi və üzvlərini gizli  Bakiya dəvət edib bütün təhlükəsizliklərini təmin edib, lüks otelde saxlayıb gizlicə yola salan kimdir? Onudamı xaricdəki azərbaycanlılar edib. Ya da ki, erməni casusların sərhəddən kecirib ölkədə bildiklərini etməyə şərait yaradandamı xaricdə yaşayan təxribatcı azərbaycanlılardır. Hələ David Qareci  alban məbədinin Gürcüstana verilməsini demirəm. Bütün bunlar kimin erməniylə əməkdaşlığını sübut edir? Hakimiyyətdə oturan məmurların da kimliyini sadalamq olar, amma bu, başqa yazının mövzusudur. Və sizin bu barədə dediklərinizə cavab olaraq sual edirəm ki 7 milyon insanın günahı nədir ki, bu cür iqtidarın boyunduruğunda yaşamalıdır?

Bəli, gülərüzlü millət vəkili. Dil ətdəndi, etibar yoxdu. Birdən isdi, diliniz caşıb nəsə desə və dilinizin bəlasına düşüb gülər cöhrəniz kədər cökərsə o zaman sizi yenə də ittiham etdiyiniz bu jurnalistlər müdafiə edəcək. Bu hakimiyyətə hec etibar yoxdu, en yaxin adamını belə şəxsi maraqlarına görə güdaza verər. Elə siz də ən adi "ehtiyatsızlığınıza"görə güdaza gedə bilərsiz. Ona görə elə edin edin ki, sizin də nə vaxtsa kimdənsə üzr istəməyə üzünüz olsun.

ALTAY OĞUZ

-----------------------------------------------------------------------------------------------------------------------------

http://www.xalqcebhesi.az/

İsveç və Hollandiyada siyasi maraq güdənlər

Aydın Mirzəzadə: "Onlar xaricdə Azərbaycan dövlətinə qarşı mübarizə aparan erməni diasporuyla yanaşı durmağı özləri üçün qəbahət saymırlar"

Ramiz Mikayıloğlu

Ötən gün Müsavat Partiyasının İsveç özəklərinin təşəbbüsüylə Stokholmda aksiya keçirilib. İsveç parlamenti qarşısında keçirilən aksiyada bu ölkənin müxtəlif şəhərlərində yaşayan müsavatçılar, siyasi mühacirlər, diaspor təmsilçiləri qatılıblar. Çıxış edənlər Azərbaycanda müstəqil mətbuata qarşı təzyiqlərin açıq və zorakı müstəviyə keçdiyini, jurnalistlərin təzyiqlərə, sui-qəsdlərə məruz qaldığını, qanunsuz həbs edildiklərini söyləyiblər.

Qeyd edək ki, az öncə Hollandiyada Azərbaycan səfirliyinin qarşısında da anoloji şüarlarla bir qrup piket keçirmişdi.

Məsələyə münasibət bildirən YAP Siyasi Şurasının üzvü Aydın Mirzəzadə deyir ki, xaricdə Azərbaycan icması formalaşmağa başlayıb. Bu icma müxtəlif səbəblərdən xaricdə yaşamağa üstünlük verən insanlardan ibarətdir. Onların içərisində azərbaycanlı olmayanlar da var: "Ona görə də onların hansı formada öz fəaliyyətlərini davam etdirəcəyi Azərbaycan ictimaiyyəti üçün maraqlıdır". Aydın Mirzəzadə vurğulayır ki, xaricdəki icma nümayəndələri vaxtaşırı Azərbaycanın tale yüklü məsələləri barədə həmin ölkələrdə hökumət və parlament binaları, beynəlxalq təşkilatların ofisləri qarşısında piketlər keçirir, informasiyalar, bülletenlər yayırlar: "Ancaq təəssüf ki, həmin icma arasında öz siyasi simpatiyasını önə çəkənlər də var. Bu gün onları Azərbaycanın tale yüklü məsələləri, ümumilli problemləri deyil, təmsil etdikləri, simpatiyası olduqları partiyanın maraqları daha çox cəlb edir. Ona görə də ara-sıra xaricdəki Azərbaycan nümayəndəlikləri qarşısında piket keçirən azərbaycanlılara da rast gəlmək olur. Bunlara beynəlxalq təşkilatların ofisləri, yaxud ölkələrin parlamentləri qarşısında milli problemlərimizlə bağlı piket keçirənlərin arasında rast gəlmək olmur. Onların səsləri böyük forumlardan gəlmir, həmin ölkələrin qəzetlərində Azərbaycanla bağlı materiallar vermirlər. Belələrini, ancaq simpatiya bəslədikləri partiyanın maraqları daha çox düşündürür. Çox maraqlıdır ki, xaricdə Azərbaycan dövlətinə qarşı mübarizə aparan erməni diasporu ilə yanaşı durmağı onlar özləri üçün qəbahət saymırlar. Heynəyək, görünür ki, Azərbaycan xalqı belə oğullarının olmasına da dözməlidir və belələrinin də Azərbaycan dövlətinə, hökumətinə qarşı mübarizə apardığını artıq bir reallıq kimi qəbul etməliyik".

YAP Siyasi Şurasının üzvü hesab edir ki, xaricdəki həmin azərbaycanlıları hərəkətə gətirənlər həm Azərbaycanda, həm də xaricdədir: "Ona görə də onların hansı siyasət apardıqlarını ciddi araşdırmağa ehtiyac var".