Müsavat Partiyası Stokholmda mitinq keçirdi.

Azərbaycanda KİV-lərə, azad sözə qarşı repressiyalara cavab olaraq iyun aynın 12-də İsveçin paytaxtı Stokholm şəhərində etiraz mitinqi keçirilmişdir. Mitinqin təşkilatçısı Müsavat Partiyası İsveç özəkləri olmuşdur. İsveç parlamenti qarşısnda keçirilən mitinqdə İsveçın müxtəlif şəhərlərində yaşayan müsavatçılar və digər azadlıqsevər insanlar iştirak etmişlər. Mitinqin aparıcısı, Müsavat Partiyası Stokholm özəyinin sədri Əli Ağayev mitinq iştirakçılarını salamlayaraq Azərbaycandakı son vəziyyət barədə ümumi məlumat vermiş, iqtidarın mətbuata qarşı terror taktikası seçdiyini vurğulamşdır. Sonra söz alan Upsala özəyinin sədri Sərdar Ağayev, Linşöpinq özəyinin üzvü Zərrabi Kərimov, Azadtribun sitesinin və Vahid Azərbaycan TV-nin sahibi Babək Azəri, Əli Mollazadə, Teymur Eminbəyli, Mübariz Əzimli və başqaları çıxış edərək, azad sözün, azad medianın demokratiyanın təminatçısı olduğunu, müstəqil mətbuatsız inkişafın mümkün olmadığını vurğulamışlar. Mitinqin sonunda İsveç parlamentinə və digər təşkilatların Stokholm nümayəndəliklərinə müraciət qəbul olunmuşdur (müraciətin mətni əlavə olunur).

Müsavat Partiyası İsveç özəklərinin Azərbaycan Respublikasında KİV-nə qarşı repressiyalara etiraz mitinqinin müraciəti

İsveç Parlamentinə,

İsveç Jurnalistlər Federasiyasına,

BMT-nin Stockholm nümayəndəliyinə,

AŞPA-nın Stockholm nümayəndəliyinə,

Sərhədsiz Reportörlər Təşkilatının Stockholm nümayəndəliyinə,

Amnesty İnternational Təşkilatının Stockholm nümayəndəliyinə.

       Hörmətli cənablar,

       Avropanın əksər demokratik qurumlarının üzvü olan, bu qurumlar qarşısında demokratiya və insan haqlarının təmini üzrə bir sıra öhtəçiliklər götürmüş Azərbaycan Respublikasının hazırki iqtidarı öz vətəndaşlarına, cəmiyyətin güzgüsü olan mediaya qarşı əsl müharibə elan etmişdir. “Monitor” jurnalının baş redaktoru Elmar Hüseynovu vəhşicəsinə qətlə yetirən rejim indi də yerdə qalan jurnalistlərə divan tutmağa başlamışdır. Hal-hazırda 7 tanınmış jurnalist həbsdədir, bir neçəsi barədə qondarma məhkəmə işləri açılmışdır, yüzlərlə jurnalist isə Azərbaycandan mühacirət etməyə məcbur olmuşdur.

       Biz, bu mürtəce rejimin əlindən İsveçdə sığınacaq tapmış müsavatçılar və digər azadlıqsevər insanlar doğma vətənimiz Azərbaycan Respublikasında vətəndaş cəmiyyətinin qurulması, insan haqq və azadlıqlarının təmin olunması, azərbaycan xalqının layiq olduğu azad, müstəqil, firavan gələcək qurmaq yolunda birinci şərt olan söz azadlığının təmin olunması, azərbaycan jurnalistlərinə  azad və təhlükəsiz şəraitdə faliyyət göstərmək üçün şərait yaradılmasını tələb edirik.

      Mitinq iştirakçıları adından Sizi, hal-hazırda həbsdə olan jurnalistlərin dərhal azad olunması, yeni məhkəmə işlərinin, KİV-nə qarşı repressiyaların dayandırılması üçün Azərbaycan Respublikası iqtidarına təsir göstərməyə çağırırıq.

Mitinq iştirakçıları

Stockholm, İsveç

2007.06.12