Əziz dostlar!
May ayının 19-da İsveçin
Stockholm şəhərində Güney Azərbaycanda may
hadisələrinin ildönümü münasibəti ilə bir seminar
təşkil olunmuşdu. Seminarda çıxış edən GAMOH
nümayəndəsi Mahmud Bilgin təqribən belə bir fikir
irəli sürdü ki, Azərbaycan Respublikası və Türkiyə
öz milli və dövlət maraqlarını üstün tutaraq, Güneydəki
hərəkata yardım göstərmirlər. Ona görə də
biz güneylilər öz milli maraqlarımızı ön plana çəkməliyik.
Misal olaraq da göstərdi ki, vaxtı ilə GAMOH lideri
Mahmudəli Çöhrəqanlı Azərbaycan Respublikası və
Türkiyədən çıxarılıb...
Onu da qeyd edim ki, belə fikirləri
səslədirən təkcə Mahmud bəy deyil. Əvvəllər
də bu kimi fikirlər səslənmişdir, özü də
təkcə GAMOH nümayəndələrinin dilindən deyil.
Seminarda bu fikirlərə münasibət
bildirmək imkanım olmadığına görə bu
qeydləri etmək məcburiyyətində qaldım.
Öncə qeyd edim ki, M.Çöhrəqanlının
adı çəkilən iki dövlətdən çıxarılmasını
səbəb göstərərək fikir yürütmək düzgün deyil.
M.Çöhrəqanlı Güney hərəkatının və Güney
xalqının timsalı deyil, Güneydəki çoxsaylı təşkilatlardan
birinin GAMOH-un lideridir.
Məsələnin ikinci
tərəfinə gəldikdə isə, doğrudur, nə Türkiyə,
nə də Azərbaycan Respublikası iqtidarı Güney
hərəkatına dəstək verməmişdir. Türkiyə
və bugünkü türk iqtidarı barədə danışmağı
Türkiyədən olan qardaşlarımızın öhtəsinə
buraxıram. Yəqin ki, cavab verən tapılar.
Azərbayan Respublikasına
gəldikdə isə, hörmətli Mahmud bəyin və onun kimi
düşünənlərin nəzərinə çatdırmaq
istəyirəm ki, bugünkü azərbaycan iqtidarı 1969-cu
ildən bu yana azərbaycan xalqına qənim kəsilmişdir.
Bu iqtidar nəinki xalqı təmsil etmir, hal-hazırda öz
vətəndaşları ilə müharibə
vəziyyətindədir. Bu rejim, ən yaxşı halda,
məxsus olduğu tayfanı təmsil edə bilər. Bu rejimin
hərəkətlərini bəhanə gətirərək
azərbaycan xalqını bölmək əsassız olduğu
qədər də qərəzlidir. Belə bölücü
fəaliyyətlər tarixən vaxtaşırı meydana çıxmış,
amma tarixin sınağından keçməmişdir. Indi də keçməyəcək.
Bu yolu tutan siyasətçilər də, təşkilatlar da iflasa
məhkumdur. Çünki, nə Güneydə, nə də Qüzeydə yaşayan
soydaşlarımız bu qərəzli konsepsiyanı qəbul
etməzlər.
Bu fikirlərimin təsdiqini
seminardan cəmi üç gün sonra, may ayının 22-də İsveç
parlamenti qarşısında AFİ-nin təşkil etdiyi, keçən
ilin may hadisələrinə həsr olunmuş mitinqdə gördük.
Belə ki, soydaşlarımız mitinqdə heç bir güneyli-qüzeyli
ayırımı yapmadan çiyin-çiyinə iştirak edirdilər
və Stockholmda yaşayan güneylilərin sayı qüzeylilərdən
qat-qat çox olmasına baxmayaraq, iştirakçıların mütləq
əksəriyyətini qüzeylilər təşkil edirdi. Bizi
belə utancverici statistikalar aparmağa məcbur edənlər
isə ümumiyyətlə ortada görünmürdülər.
Güney Azərbaycanda və İranın
digər bölgələrində yaşayan soydaşlarımıza
Qüzeydən daima dəstək gəlmişdir. Amma, hömətli
Mahmud bəy bu dəstəyi azərbaycan iqtidarından gözləyir
və ala bilmir. Bu da təbiidir. Azərbaycanın bugünkü
iqtidarı - əliyevlər rejimi Qüzey xalqına qənim
kəsildiyi kimi, Güney xalqına da dost ola bilməz. Güneydəki
soydaşlarımız adını nə qoyub bu rejimdən
dəstək gözləyirlər?
Hamımız şahidik ki, Qüzeydəki
milli-demokratik qüvvələr, xalqın əsl təmsilçiləri
həmişə Güneyli soydaşlarımızın yanında
olmuşlar. Yəni xalq həmişə Güneydəki xalqa
və hərəkata dəstək vermiş, bu hərəkatın
təsübünü çəkmişdir. Tarixən Güneydəki bütün
hərəkatlar mənəvi və ideoloji cəhətdən Qüzeydə
yetişmiş zəngin milli irsə arxalanmışlar. Mən
Qüzeydə yetişmiş ifadəsini səbəbsiz işlətmirəm.
Sadəcə, Qüzeydə daha uyğun bir şərait olmuş,
həm Güneyli, həm də Qüzeyli ziyalılar Bakıda
məskunlaşmışlar. Nəticədə türk millətçiliyi
və milli ideologiya Bakıda formalaşmışdır. Və
bu proses bu gün də davam etməkdədir. Bu gün Güney
Azərbaycan milli-azadlıq hərəkatının, Bütöv
Azəraycanın ictimai-siyasi əsasları yenə də Bakıda,
milli-demokratik qüvvələrin fəaliyyəti nəticəsində
formalaşmaqdadır. Güney Azərbaycan milləti adlanan
qondarma konsepsiyanı ortaya atanlar isə bu günə qədər
millətimizi, bütün türk dünyasını bir-birindən ayırıb
yadlaşdırmağa çalışan türk düşmənlərindən
fərqli deyillər.
Hörmətlə,
Mübariz S. Əzimli
Stockholm, İsveç
30 may, 2007-ci il