گوناز تی وی نین فارس دیلینده یاییلان پروگراملارینا بیر باخیش

 

من اول گونلردن کی گوناز تی وی ایشه باشلادی دفعه لرله بو اونری نی وئردیم کی گوناز تی وی گرک فارس دیلینده بیزیم ایستک لریمیزی بوتون ایرانلیلارا و اوندان اونملی، آسمیله اولموش آذربایجانلیلارا یئتیرسین و بونا گوره بو حرکتی آلقیشلاییرام آما بو پروگراملار باره یه نئچه اونملی تنقیدیم وار

 

بیریسی بو کی بیز گرک سیاست ایله حرکتیمیزی قاباغا آپاراق و مخاطبیمیزی تانیاراق دانیشاق. فارس دیلینده پروگراملارین مخاطبی بیرینجی یئرده آسمیله اولونموش آذربایجانلیلاردیلار بللی دیر کی اونلاری اویاتماق اوچون گرک چوخ ملایم دیلده بیزیم چوخ مدنی و سیویل ایستکلریمیزی اورتایا قویمالییق. تاسفوله بعضی برنامه لرده بعضی دوستلاریمیز نفرت احساس لارینی فارس شوونیزمینه ان آچیق شکیلده اورتایا قویورلار کی بو آسمیله اولموش آذربایجانلیلاری داها آرتیق بیزیم حق حرکتیمیزین قارشی سیندا قویاجاق! اوبیری طرفدن بیزیم مخاطب لریمیزین ایکینجی سی فارس میللتی دیر. بیز گرک چوخ مدنی و باریش یویلو ایله اونلارا دانیشاق تا شوونیست لرین سیاست لرینه کی آرزی ائدیرلر کی فارس میللتینین حمایتین آذربایجانلیلاری شدت لی شکیلده سرکوب ائتمه سیندن اله گتیرسینلر خنثی ائله یک.

 

 بیز گرک نفرت عقده لریمیزی بوشالتماق ایله بیر جدی سیاسی حرکت ده حساب اولونموش آددیم آتماقین آراسیندا فرق قویاق. بو کی بعضی دوستلار گلیرلر و فارسی بولومونده سلاح لانماق دان دانیشیللار و عملا فارس لارا ساواش اعلان ائدیرلر آیا هئچ فیکر ائدیرلر کی بیزیم بیر نفر مسلح قوه میز اولمویان یئرده بو ساواش اعلان ائتمک بیزیم حرکتین اولوموینن برابردی؟! آیا بو سوزلر بیر آسمیله اولونموش آذربایجانلی نی کی هله ملی شعورا مالک اولویوب و آنا دیلین اوره نیلمه سینین ضرورتین بیلمیر بیزیم حرکتی بیر عصبی و ساواش چی حرکت کی منطقین توضیح وئرمه دن ساواشا و اولدورمه یه چاغیران بیر حرکت کیمی تانیتدیر میر؟ آیا فارس میللتینی کی بوتون نظامی گوج اونلارین الینده دیر بیزی اولدورمه یه قانع ائله میر نیه کی بیزیم گوناز تی وی ده دانیشانیمیز فارس لاری اولوم ایله تهدید ائدیر؟

 

نه قدر کی دکتر ضیا صدر کیمی علمی، منطقی و باریشچی دانیشانلار بیزیم حرکتی گوجلندیریر و شوونیست لری خلع سلاح ائلییر، بو جور عصبی و ساواشچی دانیشانلار شوونیست لرین الینده بیر حربه یارادیرلار کی بو حرکتی منطق سیز و باریشا قارشی اولان معرفی ائله سینلر. من آذربایجان میللتین سلاح لانماسی ایله یوز ده یوز موافقم آما بو عقلدن اوزاخ دیر کی بو سوز لری دوشمنین قاباغینا چیخارداق او او زامان کی بیر نفر سلاحلی قوه میز یوخدو! اگر الیمیزدن گلیرسه اوزوموزو گوجلندیرمه لییک آما گوجوموز اولمادان ساواش اعلان ائتمک یعنی اولومه ساری گئتمک! باخین آمریکا 4 ده نه بویوگ ساواش گمیسین گتیریب خلیج فارسا آما هر گون دئیر کی بولاری باریش اوچون بورا گتیرمیشم؟! آما بیزیم بیر تفنگیمیز یوخدو فارسجا دوشمنین قاباغیندا اعلان ائدیریک کی بیز ساواشا گلمیشیک؟

 

احساس ایله سیاست قاباغا گئتمز حتی اگر او گوجوموز واردی کی نظامی شکیلده آذربایجانی آزاد ائده ک گئنه عقل حکم ائدیر کی باریش یولو ایله و رفراندوم کیمی دموکراتیک یوللار ایله آذربایجانین استقلالین ایستیه ک و او نظامی گوجوموزو کی فرض ائده ک واردیر آخیر مرحله یه ساخلیاق. من گوناز تی وی نین مسئوللاریندان خواهش ائله ییرم هر سوزو و هر احساسی تلویزایادان یاییلماقا امکان وئرمه یین بوردا بیر میللتین طالعی آرادادیر و بو یولدا هئچ کیمسه نین حقی یوخدور بو بویوک لوکده یانلیش لار ائله سین.

 

بیر سیاسی مبارزه ده گرک احساس دان اوزاخ و عقله دایانان یوللارلا آددیم آتاق فارسجا پروگراملار گرک داها منطقی و داها باریش ایسته ین اولا. اگر  بیز استقلالیمیزی ایسته ییریک ساواشا احتیاجی یوخدو اودا بیر زامان دا کی بو ساواشین اودوزانی قطعیا بیزیک! اگر بیز ایستقلال ایسته ییریک بونو انسان حقوقلارینین حق حاکمیت بر سرنوشت اصلینه و رفراندوم شکلینده آذربایجان میللتینین سسینه و رایینه بوراخمالییق. منجه سیاسی باخیمدان بو بیزیم منفعتیمیزه دیر کی گوناز تی وی گرک استقلال یا فدرال ایسته یینی یالنیز میللتینه سیسینه بوراخا و اصلا مشخص هدفین اعلان ائتمه یه خصوصی ایله فارس دیلینده اولان پروگراملاریندا.

 

بیز آذربایجان لیلار تاریخ بویو حد دن آرتیق صادق اولماغیمیزین و سیاستین یولونو بیلمه دیغیمیزین کوته یین یئمیشیک بیر ئیرده کی بیزیم دوشمن لریمیز تولکودن حیله کار و شیاد دیلار یاخشی اولار کی بیزده بیر آز سیاست ایله دانیشماغین یولون تانیاق. من دئمیرم یالان دئیه ک یا اوزوموزو یا باشقاسینی آلداداق من دئییرم کی دانیشدیغیمیز سوزلری اوز منافعیمیز ایله دیرلندیرک و هر سوزو کی اونون عمومی اعلان ائتمه سی بیزیم ضرریمیزه دیر بیر سیاسی شکیلده مبهم و اوستو اورتولو اونون باره سینده دانیشاق بو سیاستین الفباسی دیر باخین دونیادا ان دئموکرات اولکه لرده هر سوزو آچیق آشکار اورتایا قویمورلار و اوز ایستک لرین حساب اولونموش ادبیات ایله و چوخ احتیاط ایله دئیرلر. جرج بوشون چیخیش لارینی اونلار مشاور بررسی ائدیرلر کی اونون بیر جومله سیندن بیر ضرر آمریکانین منافعینه چاتماسین. بیز بیر مدرن میللت اولماق یولوندا مدرن سیاست ادبیاتینی اوره نمه لییک و دیپلماتیک دانیشمانی تمرین ائتمه لییک.

 

آیدین تبریزی