ZƏRDÜŞTÇÜLÜYÜMÜZ -- İŞIQÇILIĞIMIZ

Dünyanın ilk peyğəmbəri türk olub!

ASİF ATA

    Azərbaycanın böyük filosofu Asif Atanın "Azərbaycanımız -- Azərbaycanlılığımız" adlı "Fikir evi"nə başlayırıq.Bu silsilədən olan yazıları  www. azadtribun.net  sitəsindən izləyə bilərsiniz. Bununlada məqsədimiz "Azərbaycan nədir ?" -  sualına cavab tapmaqdır və özü də Asif Ata baxışları ilə.

   Hər bir xalq dünyaya verdiyi böyük şəxsiyyətləri ilə özünü ifadə və təsdiq edir.

    Asif Ata xalqın təməlini fərd hesab edir və göstərir ki, xalq fərd mahiyyətindən , mənasından yaranır, fərd özünəməxsusluğunda , bənzərsizliyində isə xəlqi mahiyyət yaşayır. Azərbaycanın dünyaya verdiyi qeyri - adi fərdlərə, həmin fərdlərin yaratmış olduğu, özümüzə və dünyaya gərəkli dəyərlərə Asif Ata ”fərəhlərimiz” adını verir. Bu ”fərəhləri ” bilmədən, duymadan,  bu ” fərəhləri” yaşamadan bir Azərbaycan türkü olaraq özünü nikbin, ruhlu, vüqarlı yurdçu kimi hiss etmək mümkün deyil.

    ” Azərbaycanımız -- Azərbaycanlığımız” silsiləsindən sizə təqdim etdiyimiz ”Fikir evi”ndə birinci növbədə nikbinliyimizə səbəb olan Fərəhlərimizi təqdim edəcəyik. Amma bunla yanaşı istər - istəməz Kədərlərimizi də ardıcıl, sistemli şəkildə verəcəyik. Asif Atanın fikri ilə ifadə etsək, o deyirdi : ” Hündür dağları İldırım tez vurur. Səadətimizə bərabər fəlakətimiz var. Səadətimiz fəlakətimizlə qoşadır. Fərəhlərimizə bərabər Kədərlərimiz var. Kədərlərimiz Dövlətsizlik Fəlakəti ilə bağlıdır. Azərbaycanın Dövlətsizlik fəlakəti onun özgələşməsindən doğur.”

   Amma biz bədbin deyilik, nikbinik. Nikbinliyimiz isə Ocağımızın varlığıdır və SABAHIMIZI -- ÇIXIŞ YOLUMUZU Ocaq ideyalarında görürük.

    Mütləqə İnam

    Kamil İnsan

    Ruhani Cəmiyyət

    Müstəqil Vətən

    Özümlü Şərq

    Ləyaqətli Bəşər

I. ZƏRDÜŞTÇÜLÜYÜMÜZ -- İŞIQÇILIĞIMIZ

                    (Izhar )        

                               1.

Ürəyinizdə Günəş olsun!

Azərbaycana zahiri gözlə baxanda, o, kiməsə balaca görünə bilər.

Ancaq Mənanı xarici gözlə görmək olmaz.

Mənanı Daxili gözlə -- İdrakın, ruhun gözüylə görmək olar.

Daxili gözlə baxanda Azərbaycan çox böyük görünür -- Şərq Mahiyyətinin Bütöv, Parlaq, Dərin ifadəsi kimi -- Ruhani Mərkəz səviyyəsində.

Fikir Evinin məqsədi -- hadisələrin zahiri şərhi deyil, Azərbaycan Ruhunun izharıdır, Azərbaycan İnamının Təsdiqidir.

Azərbaycanımızın -- Azərbaycançılığımızın Böyük Fərəhləri və böyük Kədərləri var.

Azərbaycanın Birinci Böyük Fərəhi -- Zərdüştçülükdür.

Azərbaycanın İkinci Böyük Fərəhi -- Xürrəmdinlik -- Babəklikdir.

Azərbaycanın Üçüncü Döyük Fərəhi -- Dədəqorqudluqdur -- Ağsaqqallıqdır.

Azərbaycanın Dördüncü Böyük Fərəhi – Hürufilik -- Nəimilik -- Nəsimilikdir.

Azərbaycanın Beşinci Böyük Fərəhi -- Füzulilikdir.

Azərbaycanın Altıncı Böyük Fərəhi -- Muğamdır.

Azərbaycanın Yeddinci Böyük Fərəhi -- Sazdır.

Azərbaycanın Birinci Böyük Kədəri -- Midiyanın Süqutudur.

Azərbaycanın İkinci Böyük Kədəri -- Babəkin Qətlidir.

Azərbaycanın Üçüncü Böyük Kədəri -- Çaldıran Fəlakətidir.

Azərbaycanın Dördüncü Böyük Kədəri --  Türkmənçay Yırtıcılığıdır.

Azərbaycanın Beşinci Böyük Kədəri -- Milli hökumətin devrilməsidir.

Azərbaycanın Altıncı Böyük Kədəri -- 20 Yanvardır.

Azərbaycanın Yeddinci Böyük Kədəri -- Xocalı Faciəsidir.

Azərbaycanımızın sabahını -- Ocaqda,Ocaqçılıqda görürük -- Atalıqda, Evladlıqda.

  Mütləqə İnamda görürük.

İnsanlaşmaqda görürük.

Ruhani Cəmiyyətdə görürük.

Müstəqil Vətəndə görürük.

Özümlü Şərqdə görürük.

Ləyaqətli Bəşərdə görürük.

Azərbaycan Ruhunun İzharını Zərdüştçülüyümüzdən başlayırıq.

                                            2

     Zərdüştçülükdə Peyğəmbərlik başlayır -- Vəcd, Vəhy, Eşq, Ehtizaz vasitəsiylə İnam yaratmaq, İnamı Ağıllara, Ürəklərə, Aqibətlərə  həkk etmək Əməli.

     Zərdüşt Peyğəmbərliyi yarananda Budda yox idi, Musa yox idi, İsa yox idi, Məhəmməd yox idi.

     Zərdüşt Peyğəmbərliyində Qismətçilik yox idi, Təskinlik yox idi, Cənnət - Cəhənnəm  Huri -Pəri miskinliyi yox idi.

                                              3                    

 Zərdüştçülükdə Hürmüzd İşığıyla Əhrimən qaranlığı arasında Döyüş var -- İşıq Allahı -- Əhrimənlə Yerdə, Göydə döyüşür, İnsanın  Daxilində --  Fikirdə, Duyğuda, İradədə, Əməldə döyüşür -- Hürmüzd İşığı gərəkdir Dünyaya --  Qaranlıqları Yaran -- İşıqlanmalıdır Dünya.

     Fəlakət Səadətlə İşıqlanmalıdır -- Həsəd Heyrətlə -- Qorxu Cəsarətlə -- Həqarət Ləyaqətlə -- Hərislik Səxavətlə -- Dönüklük  Sədaqətlə -- Zülm Ədalətlə -- Hərcayilik Müqəddəsliklə.

      İşıqla qaranlıq Təzadından Dünya ikiləşib.

      İkilik aradan qalxmalı -- Hürmüzd Əhrimən üzərində qələbə çalmalıdır --  çalacaq -- qaranlıq Dünyadan çəkiləcək -- Dünya İşığa qərq olacaq.               

                                                   4

      İşıqla Qaranlığın Döyüşü İnsanda baş verir ;

      İnam adlı Hürmüzd -- İnamsızlıq adlı Əhrimənlə döyüşür ;

      Xalislik Naqisliklə -- Müdriklik Naşılıqla -- Saflıq Günahla --  İnsanilik Heyvaniliklə döyüşür.

      Daxili Aləm İşığa qərq olur, Dünyanı İşığa qərq edir. İnsan İşıqlandıqca Dünya İşıqlanır.

      İnsan -- İşıq Yoluna düşür -- İşıq Yolu olur.

                                                5

      Dodaq Yalandan təmizlənir -- beyin Xurafatdan təmizlənir -- Əl Haramdan təmizlənir.

      Təmiz  Söz,  Təmiz Fikir,  Təmiz Əməl yaranır.

       Zərdüştə böhtan atıb onu  Zinalıq təbliğində günahlandırırlar -- Zinalıqla Təmiz Əməl Tələbi biri digərini inkar edir.

        Zərdüştdə Cənnət - Cəhənnəm, Allah xofu tapırlar -- Cənnət - Cəhənnəm  Hürmüzd Qələbəsinin labüdlüyüylə, Dünyanın özündə ( o Dünyada yox!  ) yaranacaq İşıq səltənəti İnamıyla bir araya sığmır -- Qorxu -- Hürmüzd hünərinin İnkarıdır.

         Zərdüştü sonrakılar bədnam eləməyə və özümləşdirməyə -- özünə bənzətməyə cəhd göstəriblər.

                                                 6

       Od -- Zərdüştdə İşıq Rəmzidir. Atəşpərəstlər, əslində İşıqpərəstlərdir.

       Zərdüşt Odu -- Qaranlıq yaran Oddur, Prometey Odu --  isidən.

        Od -- Yanmaq Rəmzidir.

         Yanmasan -- İşıqlanmazsan, Təmizlənməzsən -- Dünya İşıqlanmaz, Təmizlənməz.

         Od çirk götürmür, çirki yandırıb yox eləyir.

          Oda səcdə -- İşığa səcdədir.

         Od qorumaq -- əslində İşıq qorumaqdır.

         Azərbaycançılıq -- əslində İşıqçılıqdır.

                                             7

         Zərdüştdə Bədən Ruhdan asılıdır.

         Bədəni urvata mindirən Ruhdur.

         Ruhdan məhrum olan Bədən urvatsız olur.

         Amansız səslənir bu İdeya.

          Ruh Zərdüştdə cismani enerji deyil -- İdrakdır, Mənəviyyatdır -- İnsan öləndə Bədən İdraksızlaşır, Mənəviyyatsızlaşır.

          Zərdüştdə ölü bədənə hörmət yoxdur -- ölünün O dünya Yolu yoxdur -- o  ”Axirət Dünyasina” heç nə aparmır, ölü bədən heç olur.

           Misir xurafatına  (ölünün mumiyalanması ) qarşı çevrilmiş bu fikirdə gələcək xurafatların inkarı var.

                                              8

            Dinlərin hamısı Xeyir -- Şər Təzadı əsasında qurulub. Xeyir -- Şər Təzadı  Hürmüzd -- Əhrimən  İkiliyinin Təzahürüdür.

            Dini ikiliyin -- Dualizmin   canı Zərdüştçülükdür.

                                              9

          Dinlər Xilaskarlıq  -- messiyaçılıq İdeyası əsasında qurulub. Messiyalar -- Dini xilaskarlar -- Hürmüzd çeşidləridir.

           Ən məşhur Hürmüzd İsadır -- Əhrimənlə döyüşdə çarmıxa çəkilən, ancaq  ”ölməyən, dirilən,qayıdacağı gözlənilən.”

            Musa, Məhəmməd Timsalında da Hürmüzd canlandırılır -- şəxsiyyətlər əfsanələşir.

                                                 10

        Buddaçılığın Əsası --  Daxili Təmizlik İdeyasıdır -- İmtina vasitəsiylə Ruhu ram etməkdir.            

        Bu ideya Zərdüştün Təmizlik Yolunun davamıdır -- İfrat davamıdır, istəklərin inkarıdır -- ancaq Zərdüştlə qırılmaz tellərlə bağlıdır.

        Zərdüştdə İnsan naqis istəklərindən əl çəkirdi, Buddada bütün istəklərindən.

        Zərdüştün mədsədi -- Hürmüzd Dünyasıydı, Buddanınkı – Nirvana -- Mütləq Ruhani Sakitlik.

        Zərdüştdə Təmizlənmək -- Yanmaq idi, Buddada  -- sönmək.

        Zərdüşt Odundan Budda Külü törədi!..

                                                 11

      Platonçuluq – İdeyalar -- Əşyalar təzadına əsaslanır -- Platonda Həyat -- İdeyanın kölgəsidir.

      Bu fikirdə Hürmüzd -- Əhrimən, İşıq -- Qaranlıq ikiliyinin təzahürü görünür.

                                                    12

    Dialektika -- Heraklit, Hegel -- əksliklərin --  təzadların, ziddiyyətlərin döyüşü və vəhdəti ideyası əsasında qurulub.

     Bu ideyada Zərdüştçülük duyulur.

     ”Dünya -- təzadlar döyüşüdür!”-- dialektikanın dediyi bu fikri əvvəl Zərdüştlük deyib.

       Fərq ondadır ki, Zərdüştdə Əksliklər Vəhdəti yoxdur -- yalnız əksliklər Döyüşü var və həqiqət bizcə Zərdüştün tərəfindədir.

      Təzadlar bir yerdə olanda belə Bir olmurlar !

                                                         13

    Babək Fərəh dini yaratmışdı.

    Babək fərəhində Hürmüzd İşığı yanırdı.

    Babək özündə Şirvin gəzdirirdi, bu, Şirvin adlanan Hürmüzd idi.

    Babək Hürmüzdlük eləyirdi -- Əhrimənlə döyüşürdü.

                                                        14

    Sufilər Eşq Əhli idilər, İlahiliyə Atəşin  Eşq bəsləyirdilər.Odluydular, Eşq Odunda alışıb -yanırdılar. İşıqlıydılar.

   Aşiqlikdə --Təmizlənirdilər, Şəriətləşirdilər, Mərifətləşirdilər, Təriqətləşirdilər -- İşıqlı hallar keçirirdilər -- İşıqlanırdılar -- İlahiliyə qovuşurdular.

   Hürmüzd İşığıydı həmin Eşq -- Qaranlıqları Yaran Odlu Əməl.

                                                        15

    Kimdir Zərdüşt, kimindir  Zərdüşt ?

    Midiyalıdır,Midiyanındır -- Azərbaycanlıdır,  Azərbaycanındır.

    Yeni eradan əvvəl VI əsrdə indiki Cənubi Azərbaycanda həyata gəlmiş, yaşamışdır.

    Əsərlərinin çoxu Makedoniyalı İsgəndər tərəfindən yandırılmış, yandırılmayanlar -- Pəhləvi dilində tətcümə olunmuşdur.

    Midiyanın süqutundan sonra Axemenidlər dövründə  Zərdüştlük İranın dövlət dini oldu.

    Midiyadan -- Azərbaycandan Dünyaya İşıq saçıb Zərdüşt.

    Zərdüşt -- Azərbaycanındır, Şərqindir, Dünyanındır.

                                                    16

  Zərdüştlüyə qayıtmağa çağırmırıq.

  Hürmüzd İşığına  qovuşmağa şağırırıq.

  Əzəli Ocaqlığımıza çağırırıq.

   Yükümüzdən Böyük Fərəhimiz yoxdur!

                                                                                                                                 3 İşıq Ayı, 14 -cü il.

                                                                                                                                  3 May 1992. Bakı

                                                                    Təqdim edən Asif Ata Ocağının Evladı Eluca Atalıdır