"خوجالی سوی قیریمی"، جزاسیز قالا بیلمز!

فرزاد صمدلی

15 قیش کئچدی. چوخ حسرتلی ایللر کیمی. آنجاق گؤزوموز قاراباغدا قالیب. هئچ کیپلیک وورمادان ایشغال اولونموش جنتیمیزه باخیریق. 

شاختالی، قارلی، قانلی، بورانلی گونلری آرخادا بوراخدیق. آما حسرت ان بویوک ایشکنجه دیر. هر قیش بو زامانلار جانیمیز سیخیلیر. گؤزلریمیزین ایچی گوینویور. بوغازیمیز آجییر. اوره گیمیزده آغیر بیر درد دالغالانیر. ویجدانیمیزین اؤنونده اوتانیریق. غیرتیمیز وجودوموزو یاندیریر یاخیر. میسکین میسکین آغلاماق ایسته ییریک. آنجاق کیشی آغلاماز دیه، هونکورتولریمیزی اود کیمی جییریمیزه توکوروق. قهر بیزی بوغور. هر بیر وارلیقا، هر بیر اینسانا، هر بیر تورکه و هر بیر آذربایجانلی یا  سویله مک ایسته ییریک:

15 ایل اؤنجه بیزیم قیزیل توپراقلاردا، بیزیم جنت یوردوموزدا، بیزیم جان آذربایجاندا، بیزیم قارا باختلی قاراباغدا، بیزیم قانا باتمیش خوجالیدا، وطنداشلاریمیزا، قادین لاریمیزا و الله الله کورپه لریمیزه  دهشت ظولوملر اولدو!

بیر سورو قانیق کافتار، داشناک آدیندا، بیزیم اینسانلاری اینسان کیمی داوراندیقلاری ایچین، ایسلاما ایناندیقلاری ایچین، تورک سویوندان اولدوقلاری ایچین، آذربایجانی جانان بیلدیکلری ایچین، نه بیلیم بلکه ده قاراباغدا ساده جه موتلو یاشادیقلاری ایچین، دوغرام دوغرام دوغرادیلار، دیلیم دیلیم کسدیلر، بولوم بولوم بولدولر. گوز دئشدیلر، قارین ییرتدیلار، باش قوپارتدیلارو بئله لیکله؛ آغدامی، خان کندینی، لاچینی، شوشانی، کلبجری، عسکرانی، زنگیلانی، قوبادلی نی، جبرائیلی، فیزولونی و خوجالی نی قان گولونه چئویردیلر.

گئچن ایکی یوز ایلده، روسیستان، ائرمنیستان، کوردیستان و فارسیستاندان گلن قودوز آیی لار، کافتارلار، چاققال لار و کوپکلر یوردوموزا و وجودوموزا دیشلرینی باسدیلار. بو گون کوکسولریمیزده سوی قیریم لارین آجیناجاقلی خاطیره لرینی دورلو مزارلیقلار کیمی داشیماقداییق. قاتیل لرینده آدلارینی اونوتماییاجاییق. پاسکوویچ، آندرانیک، مارشیمون، سیمیتقو، یپرم، ریضاشاه، قوام السلطنه، محمدریضا شاه، غوکاسیان، کوچاریان، اوجالان...   

آتشدن وجودوما بیر کوینک گییه جه یم. گوزومون ببکلرینه کوز قویاجاغام. قوی سیرتیمدان قورقوشوم آخیتسینلار، قافاما قورشون سیخسینلار، قوی آیاقلاریمی تندیره ساللاسینلار. بو چکدیگیم ایشکنجه هله ده 26 شوباتدا، یازیق خالقیمن باشینا گلمیش بلالارا اوخشاماز قارداش...

... خوجالی دا، او شاختالی گونلرده، او قارانلیق و قورخونج گئجه لرده آتالارین چکدیگی آغری لارا، آنالارین سویله دیگی آغی لارا قوربان اولوم و اؤلوم. آخی غیرتینه قوربان، آنالاریمیزین سوتونده، آتالاریمیزین سوزونده ان چوخ دالغالانان معنالار بیر آذربایجان ایگیدی ایچین غیرتدیر، شرفدیر، ناموسدور... چوخ اوتانیرام، اوتاندیغیمدان اوسانیرام.

اللهیم، یاربیم، وطن یولوندا شهادتی بیزه ارمغان ائت. وطنی ایشغال اولان تورک ایگیدینه، یاتاقدا اولمک یاراشماز. بیرلیکده آذربایجانا یمین ائدیریک کی:

سندن اوترو جان وئرمه یه جومله حاضیریز     سندن اوترو قان توکمه یه جومله قادیریز

نئجه قان آغلاماسین داش بو گون!

خوجالی؛ 20 جی عصرین ان دهشت جینایت لریندندیر

1992 جی ایل فئورال آیی نین 25 دن 26 سینا کئچن گئجه، آذربایجان میللتی نین تاریخینده قارا حرفلرله یازیلمیشدیر. همین گئجه ائرمنی سیلاحلی دسته لری، شوروی ،زامانیندا خانکندی شهرینده یئرلشمیش، کوماندا وشخصی هیاتین بیر چوخو ائرمنی لردن عیبارت اولان 366 نجی موتوآتیجی آلایی نین زیرئهلی تکنیکاسی و ساواشچی لارین کومه یی ایله خوجالی شهرینی یئرله بیر ائتمیشلر.

خاتین، لیدیستا و اوردور سوی قیریملاری کیمی خوجالی فاجیعه سیده اینسانلیق تاریخینده دوشموش قانلی بیر اولای دیر. ائرمنی موتجاویزلری نین آذربایجان میللتینه قارشی توره تدیکلری بو نووبتی کوتلوی قیرغین، 613 نفرین، او جومله دن 106 قادینین، 63 اوشاقین، 70 قوجانین حایاتینا سون قویدو. 1275 دینج ساکین اسیر گوتورولدو، 150 نفرین طالعی ایسه هله ده معلوم ده ییلدیر.

روسیانین مئموریال حقوق مودافیعه مرکزی نین معلوماتینا گوره،4 گون عرضینده آغدامدا و خوجالیدا قتله یئتیریلمیش 200 آذربایجانلی نین میتی (130 کیشی و 51 قادین و هابئله 13 اوشاق) طیبی محکمه نین نظریندن کئچیریلمیشدیر. بورادا جسدلرین موعایینه زمانی بیلینمیشدیرکی 151 نفرین اولومونه گولله یارالاری، 20 نفرین اولومونه قلپه یارالاری سبب اولموش، 10 نفر کوت آلتله وورولاراق اولدورولموشدور. حقوق مودافیعه مرکزی، بئش دیری آدامین دری سی نین سویولماسی فاکتینیدا قئیده آلمیشدیر. بو سوی قیریملار نتیجه سینده بعضی عائیله لر بوتونلوکده محو ائدیلمیش، اهالی گورونمه میش غدارلیقلا قتله یئتیریلمیش، اسیر گوتورولنلره آمانسیز ایشکنجه لر وئریلمیشدیر. همین عمللرین قاباقجادان دوشونولموش قایدادا، میللی علامتینه گوره، اینسانلارین تامامیله و یا قیسمن محو ائدیلمه سی نیتی ایله توره دیلمه سی بین الخالق حقوق و دئولت داخیلی حقوق، اساسن محض سوی قیریمی اولدوغونو ثبوت ائدیر.

ائرمنی جلادلاری نین توره تدیکلری بو وحشیلیک و وندالیزم بوتون بشریتین اصیل سوی قیریم کیمی تانیدیغی و یوخاریدا آدی چکیلن فاجیعه لرله عینی سویه ده قیمتلندیریمه لیدیر. دونیانین صولح سئور اینسانلاری، سیویل دئولتلری، نوفوذلو بین الخالق تشیکلاتلاری، بین الخالق ایجتیماعیاتی بو آجی حقیقتی بیلمه لی، اینسالیغا قارشی توره دیلن بو جینایت، او حقوقی قیمتلرینی آلمالیدیر. بین الخالق حقوقا گوره سوی قیریم صولح و بشریت علیهینه یونه لن عملدیر و ان آغیر بین الخالق جینایت ساییلیر. بیرلشمیش میللتلر تشکیلاتی باش مجلیسی نین 9 دئکابر 1948 جی ایل تاریخلی 260 (III) ساییلی قعطنامه سی ایله قبول ائدیلمیش و 1961 جی ایلده قووه یه مینن سوی قیریمی جینایتی نین قارشی سی نین آلینماسی و تقصیرکارلارین جزالاندیریلماسی حاققیندا کونواسیوندا سوی قیریمی جینایتلری نین حقوقی اساسی تثبیت اولونموشدور. ائرمنیستانین آذربایجانا قارشی تجاووزو زامانی همین کونوانسیون دا تثبیت ائدیلمیش سوی قیریمی جینایتلری تشکیل ائدن بوتون عمللر تطبیق اولونموشدور.

 بو ایشغالچی اؤلکه نین یوروتدویو ترورچولوق سیاستی اوزون ایللردیر کی دونیا ایجتیماعیاتی نین گوزو قارشیسیندا باش وئریر. حالبوکی بین الخالق حقوق نورملاری بیرلشمیش میللتلر تشکیلاتی نین و ATƏT ین پرینسیپلرینه گوره دئولتلرین سرحدلری نین توخونولمازلیغی نا حورمت ائدیلمه لیدیر، اراضی بوتونلویونون پوزولماسینا یول وئریلمه لیدیر. بیرلشمیش میللتلرین امنیت شوراسی، آذربایجانین ایشغال اولونموش توپراقلاری نین شرط سیز آزاد ائدیلمه سی باره ده دورد قعطنامه قبول ائتسه، ایشغالچی ائرمنیستان بونلاری هله ده یئرینه یئتیرمیر.

خوجالی فاجیعه سی ایکی یوز ایله یاخین بیر مدت عرضینده، ائرمنی میللتچیلیی نین و اونلارین هاوادارلاری نین آذربایجان میللتینه قارشی ائتنیک تمیزله مه و سوی قیریمی سیاستی نین داوامی و قانلی صحیفه سی ایدی. بو منفور سیاست، خالقیمیزا سایسیز- حسابسیز موصیبتلر و عذاب – اذیتلر گتیرمیشدیر. خوجالی سوی قیریمینی توره تمکله ائرمنی میللیتچی لییی مکرلی مقصدلر گودوردو:

« خالقیمیزی قورخوتماق، واهیمه یاراتماق، اونون موباریزه عزمینی قیرماق، توپراقلارین ایشغال فاکتی ایله باریشماغا مجبور ائتمک.»

لاکین حیله گر و آمانسیز دوشمان مقصدینه چاتا بیلمه دی. خوجالی مودافعه چی لری غدار دوشمنله موباریزیده قهرمانلیقلا ووروشاراق وطنه صداقت نومونه سی گوستردیلر.

مقصد خوجالی فاجیعه سینه بین الخالق حقوقی – سیاسی قیمت وئریلمه سینه، اونون تشکیلاتچی لاری نین، ایدئولوقلاری نین و ایجراچی لاری نین دونیا ایجتماعیاتی نین گوزونده ایفشاسینا و جزالاندیرلماسینا نائیل اولماقدیر. بو بیر طرفدن خوجالی مودافیعه چی لری نین و شهیدلری نین روحو قارشیسیندا بیزیم اینسانلیق و وطنداشلیق بورجوموزدور. دیگر طرفدن ایسه، اینسانلیقا قارشی یونه لمیش بوجور غدار جینایتلرین گلجکده تکرار اولونماماسی اوچون موهیم بیر شرطدیر.

خوجالی فاجیعه سی حاقیندا خاریجی مطبوعاتین یازدیقلاریندان:

“Krua l’Eveneman” jurnalı ( Paris ), fevral 1992-ci il:

 ائرمنی لر خوجالی یا هوجوم ائتمیشلر. بوتون دونیا دوغرانمیش میتلرین شاهیدی اولدو.

 “Sandi Tayms” qəzeti ( London ), 1 mart 1992-ci il:

ائرمنی عسکرلری مینلرجه عائیله نی محو ائتمیشلر. لیوانلی کینو اوپراتور، تصدیق ائتمیشدیر کی اونون اولکه سی نین وارلی داشناک ایجماسی قاراباغا سیلاح و آدام گونده ریر.

“Tayms” qəzeti ( London ), 4 mart 1992-ci il:

بیر چوخ اینسان ایبه جر حاله سالینمیشدیر. کورپه قیزین آنجاق باشی قالمیشدیر.

“İzvestiya” (Moskva), 4 mart 1992-ci il:

ویدئو کامئرا، قولاقلاری کسیلمیش اوشاقلاری گوستردی. بیر قادینین اوزونون یاریسی کسیلمیشدیر. کیشی لرین ایسکالپلاری(وجودلارینین دریسی) گوتورولموشدور.

“Le Mond” qəzeti ( Paris ), 14 mart 1992-ci il:

آغدامدا اولان خاریجی ژورنالیستلر اولدورولموش قادین و اوشاقلار آراسیندا ایسکالپلاری گوتورولموش، دیرناقلاری چیخاریلمیش 3 نفری گورموشلر. بو آذربایجانلی لارین تبلیغاتی ده ییل، بو بیر حقیقت دیر.

“İzvestiya” (Moskva), 13 mart 1992-ci il:

مایور لئونید کراوتس دئییر کی؛ تپه ده یوزه یاخن مییت گوردوم. بیر اوغلانین باشی یوخ ایدی. هر طرفده خوصوصی غدارلیقلا اولدورولموش، قادین، اوشاق، قوجالار گورونوردو.

“Valer aktuel” jurnalı ( Paris ), 14 mart 1992-ci il:

بو موختار بولگه ده ائرمنی سیلاحلی دسته لری یاخین شرقدن چیخمیشلارا بیرلیکده، موعاصیر تکنیکایا، او جومله دن وئرتول یوتلارا مالیکدیرلر. "آسالا"نین سوریه و لیواندا حربی دوشرقه لری و سیلاح آنبارلاری واردیر. ائرمنیلر یوزدن آرتیق موسلمان کندلرینده قیرغینلار توره درک قاراباغداکی آذربایجانلی لاری محو ائتمیشلر...

آذربایجان میللی مجلیسی هر ایل فئوئرالین 26سینی "خوجالی سوی قیریمی" گونو اعلان اتمیشدیر. همین گون بوتون آذربایجان خوجالی سوی قیریمی قوربانلاری نین خاطیره سینی یاد ائدیر. دوغما یوردلاریندان دیدرگین دوشموش و آذربایجانین 48 رایونونا سه په له نمیش خوجالی ساکینلری بو گون داغلیق قاراباغ موناقیشه سی نین عدالتی حلی، ائرمنیستانین آذربایجانا قارشی تجاووزونون دفع ائدیلمه سی، اولکه نین اراضی بوتوولویونون برپا ائدیلمه سی اومودو ایله یاشاییرلار. اونلار دونیا خالقلارینا، دوولتلرینه، بین الخالق تشکیلاتلارا حاق- عدالتی و حقیقتی مودافیعه ائتمک، خوجالیدا توره دیلمیش سوی قیریمی نی پیسله مک و هابئله قبول ائتمک ایچین موراجیعتلر ائدیرلر. خوجالی سوی قیریمی نین گوناهکارلاری، تشکیلاتچی لاری و ایجراچی لاری لاییق جزالارینا چاتمالی دیرلار.

چونکوجینایت جزاسیز قالا بیلمز...

AzərTac 27/02/2006 10:22

قاراباغ جینایتلرینده، معلوم قاتیل لرین آرخاسیندا مجهول فاعیل لر واردیر !

"خوجالی سوی قیریمی" بوتون قاراباغین آجی لاری ده ییل. بو آجی لار ساده جه بیر گئجه نین دردلری و آغری لاریدیر. قاراباغدا ائرمنی لرین آذربایجانلی لارا قارشی توره تدیکلری جینایتلر، 1988 دن باشلایب و هله ده سورمکده دیر.

آنجاق 5/2 میلیونلوق بولگه نین، 9 میلیونلوق آذربایجان اولکه سی نین قارشیسیندا نه قدر مادی و معنوی گوجو اولا بیلر؟! بو سورو هر زمان سورولور. کسین بیلیرم کی بو سورونو جاوابلاماق ایچین اوزوموزده چوخ چالیشمیشیق. شوبهه سیز قوزئی آذربایجانین تاریخی اراضی سی نین ایشغال اولونماسی، اون مینلرجه اینسانین شهید ائدیلمه سی و بیر میلیون یاریم وطنداشیمیزین گوچکون و دیدرگین دوشمه سی سادجه ائرمنی لرین و داشناکلارین گوستردیگی وحشیتلردن آسیلی ده ییل.

روسیا، فیرانسا، آمئریکا، یونانیستان و باشقا خیریستین اولکه لر عیسوی دیرلر. اونلار ایستر ایستمز ائرمنیستانا یاردیم ائده جکدیرلر. آنجاق بو یاردیملار داها چوخ دیپلماتیک یاردیملاردیر. البته بو اولکه لرده و حتی باشقا آوروپا اولکه لرینده اولان ائرمنی لوببی لریده ایروانین داغیلماماسی ایچین هر بیر یاردیما حاضیردیرلر. اونلارین دئدیگینه گوره ایروان و ایران، توران اونونده قالان سون مانعلردیرلر. بئله لیکله ائرمنیستانین سیاسال حیاتی ایچین بو کوچوک اولکه نین توره تدییی هر بیر جینایتینه گوز یومورلار و ایرانین کثیرالملله اولدوغونا رغما، سادجه فارس اقلیتیندن دانشیرلار و فارسچی لاردان ساوونورلار.

موسکو، آتن و پاریس دئولتلری تاریخسل اولاراق تورکلر ایله ساواشمیش وعینی زاماندا ائرمنی لره یاردیم ائتمیشلر. ایندی ده بو دستکلر جیددی بیر شکیلده ایروان دئولتینه وئریلیر. آنجاق بونلارین یاردیم لاری نه قدر ده چوخ اولسا اولسون، بیر اولکه نی آیاقی اوسته ساخلایاماز. چونکو بو گون آدینی چکدیگیمیز اولکه لرین هئچ بیریسی ائرمنیستانلا سینیرداش و قونشو ده ییل. ائرمنیستانیندا سرحدلری، ایران سینیرلاریندان سونرا، بوتون تورکلر و یا گورجی لر کیمی تورکه سمپات اولکه لر واسیطه سیله موحاصیره ده دیر. بورادا سادجه ایران و ائرمنیستانین داریسقال سرحدی تعیین ائدیجی بیر دورمودا دیر.

هئچ اونوتمارام کی ریسالت غزئتینده سیاسی مفسیر اولدوغوم زامان، گغام غریب جانیان ائرمنیستانین طهرانداکی سفیریندن ایران- ائرمنیستان موناسیبتلرینه گوره بیر موصاحیبه آلدیم. غریبجانیان دئدی کی ایران ائرمنیستانین حایاتینی بیر شاه دامار کیمی قورودو و قورویور!

بو عجاییب رابیطه نئجه قورولموش؟!

تاریخسل اولاراق ایران و ائرمنیستانین آراسیندا ساواشدان، هوجومدان و قاندان سونرا بیر شیء یوخدور. بیلدیگیمیز کیمی قاجار – تزار ساواشلاریندا ائرمنی لرین خیانتی، قافقازین روسلارین الینه کئچمه سینی سورعتلندیردی. سونرا دا بیرینجی دونیا ساواشیندا ائرمنی لرین، جیلولارین و آسوری لرین توره تدیکلری دهشت سوی قیریمی آذربایجانین باتیسیندا اونوتماق مومکون مو؟! هله قفاقازدا و آنادولو دا سوی قیریما گئتمیش باشقا موسلمانلاردان وتورکلردن سوز آچمیریق. میلیونلار تورک و موسلمان کئچن ایکی یوز ایلده ائرمنی لرین یاراتدیقلاری دهشت سوی قیریملارا قوربان گئدیبدیرلر. قاراباغین سادجه بو سون سوی قیرملاری هر بیر اینسانین داشناکلاردان نفرت ائتمه سینه یئتر. آنجاق سوزده بو شیعه دئولتینه، حتی مسجیدلرین ییخیلماسی و جامیلرین طووله اولماسی دا ائتکیسیز اولدو. لائیک تورکلر بیله آغدام مسجیدینده دونوزلاری گورونجک قان آغلادیلار آنجاق طهران بیر کیپلیک ده وورمادی.

باشقا بیر مسئله ائرمنی لرین عیسوی، اورتودوکس و گریگوری اولماقلاریدیر. بیلدیگینیز کیمی اورتودوکسلار عیسویلر آراسیندا ان آشیری و گریگوریلرده اورتودوکسلار آراسیندا بلکی ان رادیکال مذهبه صاحیبدیرلر. بئله لیکله شیعه دئولتی نین گریگوری ایروانلا نه آلیش وئریشی اولا بیلیر؟!

سونرا بوکی بو آج ائرمنیستانین ساتماقا و یا آلماقا نه یی واردیر کی او زنگین آذربایجانین یوخودور؟! داها دوغروسو ائرمنیستان ژئو پلوتیک، ژئو اکونومیک و ژئو استراتژیک آچیلاردان آذربایجانلا اولچولن زامان فقط توز توپراق دیر. هئچ بیر شئی ده ییل. آنجاق طهران ایچین بو هئچ بیر زاد هر بیر شئی اولموش!

طهران دئولتی بو قدر جینایت و حیوانیت گوسترن ائرمنی لری نه اوچون سئویر؟! اولمایا طهران دئولتی نینده سادجه بیر قورخوسو واردیر و اودا تورکلر دیر لر!

طهران دئولتی نین و داها دوغروسو فارس حاکیمیتی نین داورانیشلارینا گئچن ایللرده بیر گوز آتاق:

-          35 مین ائرمنی یه هر بیر فرهنگی و ایجتیماعی حق وئریلمیشدیر. اونلارین سادجه طهراندا اونلارجا کیلیسالاری، خسته خانالاری، مدرسه لری و باشگاهلاری واردیر. ایستیثناسیز بوتون بو سویله دیگیمیز مکانلارین یونتمن لری داشناکلاردیرلار.

-          مجلیسده ائرمنی آدینا وکیللری واردیر. بو وکیللر آیدینجاسینا ایرانی یوخ بلکه ایروانی مودافیعه ائدیرلر.

-          هر ایل میللتین بودجه سیندن میلیاردلار تومن ائرمنی لره و باشقا اقلیتلره رسمی یاردیم  وئریلیر!

-          اونملی اونیورسیته ده لرده دیللری دوکتورلوقه  قدر تدریس اولونور.

-          هر ایل 24 آوریل ده، رسمی موسلح گوجلرین حیمایه سینده، آذربایجان و تورکیه اولکه لری نین علیهینه چیخیب و چوخ اوتانج وئریجی و تهدید ائدیجی شوعارلار سویله ییرلر.

-          داغ باشیندا دا اولورسا اولسون، میراث فرهنگی بیر کوهنه کلیسانی بولورسا،  سورعتله اوناراجاق.

-          بول بول مشروب اوره تیب، حتی غیری سالیم مشروبلاری بوتون اوتوردوقلاری شهرلرده یاییرلار...

آنجاق ایندی بیز 35 میلیون تورک رسمی اولاراق نئجه بیر دورومداییق:

-          آدیمیز ده ییشیلیر، یوردوموز پارچالانیر، دیلیمیز اینکار اولونور، کولتوروموز آلچاقلانیر، تاریخیمیز یالانلانیر، شانیمیزه حقارت اولونور، ایگیدلریمیز اولدورولور و دالبادال دوستاقلارا گونده ریلیر.

-          حتی بیر دفعه ده اولورسا اولسون ائرمنی لر کیمی بیزه خوجالی و یا اورمو فاجیعه لری نین ایل دونومونده تظاهورات ایجازه سی وئریلمه ییبدیر. اعتیراضا چیخیان تورکلریده گئچن ایللرده گوردونوز کی نئجه  طهراندا، تبریزده، قومدا، اهرده، باسدیردیلار و حبسلره وئردیلر. اردبیلده قاراباغ مسجیدینده، 3 ایل اول گوردونوز کی نئجه تحصون ائدنلری و اوزه للیکله میللی قهریمانیمیز عابباس خان لئیسانلی نی اولوملرینه قدر دوودولر. یا طهراندا ائرمنی لرین هوجومندان یارالانان موسلمانلاری 4 ایل اونجه خسته خانا یئرینه حبس خانایا گوتوردولر!

بو آیدین سوزلری قیسالتماغیمیز گره ک. هر کیسمه بونو بیلیر. سادجه بونو دئمک ایسته ییرم کی قاراباغدا معلوم قاتیللرین آرخاسیندا مجهول فاعیللرده واردیرلار.

دوغروسو اونلار کیملر دیرلر؟! لوطفا منه ده سویله یین!

ایندی ایسه قاراباغدان قاچان قاچقین لار و ائرمنیستاندان گوچن گوچکونلر حاققیندا بیر کیتابی بوتون صحیفه لری ایله حورمتلی اوخوجولارین حوضورونا سونورام. بو مصور کیتابا باخدیقجا بیر گوزوم آغلادی، بیر گوزوم گولدو.

آغلادیم چونکو جان جییرلریمیزی بویوک عذابلاردا گوردوم و گولدوم چونکو اونلارین باخیشلاریندا جیددی بیر موقاویمت حیس ائتددیم.

بو رسیملری اکلنمیش ساری گلین موسیقی سی ایله دینله یین. سیزی تام شوشانین کوچه لرینده دولاندیراجاقدیر.

ساغ اولون...اسن قالین...فرزاد صمدلی...14 فوریه 2007