اوزان
قيز
آديني
چکمه دن
سنينله
دانيشاجاغام،
يازيشاجاغام
اوزان قيز!
روحونون
درينليگيندن
قايناقلانان
بير گوج سنی
صنعته
باغلاميشدي.
بير چوخ
موسيقي آلتي
چالا
بيليردين.
آنجاق
جمعيتله
ايرتيباط
قورماق،
اونلارا خوش
دويغولار
ياشاتماق
اوچون ساز
صنعتيني
سئچميشدين. "ساز
هاوالاري نين
کؤکو میللتين
حياتيندا
و تاريخي
خاطيره
لرينده دير،
اونا گؤره ده
ساز هاواسيني
میللت شعورآلتيندان
گلن بير
ايستکله
قارشيلايير." -
دئييردين. ساز
چالماقلا
يئتينمه ميش،
هم ده دونيا
موسيقيسي نين
تاريخي و
فلسفه سي ايله
ده
ماراقلانيب و
عموم دونيا
موسيقي نين
بيلگيسي
ايشيغيندا
ساز صنعتيني دَيَرلنديرمه
يه
چاليشيردين.
ايچينده
سونسوز بير
صنعت روحو
وارکن،
اؤنونده 1400
ايلليک قتل
تجروبه سي
اولان،
اؤزلليکله
قيزلارين
بوتون صنعت
ايستعداديني
زنجيرله ميش
بير مذهب،
قادينا
ايکينجي درجه
لي اينسان
کيمي باخان
بير کولتور
وار ايدي.
بونلار سني
اوموتسوز
ائتميردي. "
غربده ده بير
نئچه
موباريز
قادين چيخيب و
فئمينيست
حرکته تکان
وئرديلر.
بو گونکو غرب
قادينلاري
نين آزادليغي
بير نئچه
فداکار
قادينين
نايلييتيدير"-
دئييردين.
اؤزونو
قورتولوشچو
سانيردين.
چونکو ساز
صنعتي نين ده اساسيندا
بير
قورتولوشچولوق
فلسفه سي وار.
آيريجا ساز
صنعتيني
مودئرنلشديرمک
ايسته ييردين.
سازين
قورولوشوندا
سس دَييشيمي
ياراداجاق دَييشيکليک
اولماسيني
ايسته ييردين.
بو قدر
دولموشدون
صنعت عشقي
ايله. ائحتيياج
و يوخسوللوق
جانيني
سيخديغيندا
تويلارا
گئديب پول
قازانماق
فيکرينده
ايدين. سسين ده
چوخ گؤزل ايدي.
اؤزَلليکله
دينله يَن
قادينلار
سسينه
و جسارتينه حئيران
قاليرديلار.
قادينلار سنين
اؤزگور
داورانيشيني
گؤردوکلرينده
کؤله کيمي
ياشاديقلاريني
آنلاييرديلار.
بعضن
کؤله لر اؤز
کؤله ليکلري
نين فرقينده
اولمور،
سادجه
هانسيسا بير
حاديثه اونلارين
کؤله
اولدوقلاريني
ايفشا ائدير.
سنین
وارليغين،
سنين
سسين،
سنين صيفت
قورولوشون،
گؤزل گئييمين
و گؤزلليگين
ايفشا
ائديردي
قادينلارين
کؤله ليگيني.
سنه ائديلن غيبطه
لر، اصلینده
اؤزگورلويه
اولان رغبتين
تظاهورو ايدي.
سازي باغرينا
باسيب،
يالنيز
قادينلاردان
اولوشان
شنليک
مجليسينده
اوخودوغون
زامان ياشلي
قادينلارين
باياتي
دئمه
دويغولاري
جوشوردو. گنج
قيزلارين صیفتلرینه
سئوگي
دولو
گولوجوکلر
قونوردو.
کيچيک بير
ائوده بير
دونيا
معنوييات
هايقيريردين.
ياواش-ياواش
تانيندان
بوتون شهرده.
چوخلاري سني
گيزلينجه
تويلارا
چاغيرديلار.
ايشين
بؤيودوکجه
سئوينيردين. "حياتدا
بعضي
ايستکلره
چاتماق اوچون
پول دا
لازيمدير.
اينسانين
امگينين
نتيجه سي
اولان پول
ماددي
اولماقدان
چيخير و
اينسانين
حالال زحمتي
نين محصولو
اولدوغو
اوچون معنوي
ستاتوس
قازانير.
اينسانين
يوخسوللوق
اوزوندن
اومودسوزلوغا،
اوچوروما
دوشمه سي ده
انگلله نير."
- دئييردين.
گون کئچديکجه
هم صنعتده، هم
ده ايجتيماعي
موناسيبتلر
بوتونونده
تجروبه
قازانيردين.
بو ايکي
پلانداکي
نايلييتلرين
سني داها دا
يئتيشديرير،
اولقونلاشديريردي.
فردي
حياتينداکي
يوکسليش
اينسان
نفسينده گووَن
و اعتيبار
يارادير.
اؤزونه گووَنين
اولماديغي
يئرده نه صنعت
اولور، نه حئيثييتلي
حيات. صنعت
سؤزونون لوغت
آنلامي
ياراديجيليق
دئمکدير.
ياراديجيليق
البتته کي،
اؤزونه گووَنين
نتيجه سيدير.
سن
گئتديگين
تويلاردا و
اوخودوغون
قادينلار
مجليسينده
هئچ بير زامان
سيياستدن
دانيشميردين. "سيياستدن
دانيشانلار
چوخدور،
صنعتچي نين
سيياستدن
دانيشماغا حاققي
يوخدور."
- دئييردين. حاقلي
ايدين.
مجليسلردن
سونراکي تاثراتینی
بؤيوک بير
لذتله
دانيشيردين.
هر بير توي
مجليسي
سنين
اينانجين،
عقيدَن
و ايدئآلين
اوچون بير
اوغور
آشاماسي ايدي. ذيروه
لر آشيردين.
اوخوياجاغين
ماهنيلارين،
هاوالارين
سؤزلرينه چوخ
ديققت
ائديردين.
سئوگي دولو،
هيجان دولو
شعرلری،
بيرليکده
ياشامانين
لذتيني
آنلادان
سؤزلري
دوزگون و
تاثيرلنديريجي
تلففوظله
دينله یيجيلرين
روحونا
يئرلشديريردين.
"اوزانين
سادجه ماهني
اوخوما سسي
نين گؤزل
اولماسي
يئترلي
دئييلدير.
دانيشيق طرزي
ده تاثيرلي
اولمالي و
سؤزلري
دوزگون تلففوظ
ائتمه ليدير.
اونا گؤره ده
هر اوزان دا
بير آز ديل
بيلگيسي
اولماليدير." -
دئييردين.
داها
سونرا
گؤزلليگين،
ائتکينليگين
گنج
اوغلانلاري
دا ائتکيله مه
يه باشلادي.
سئوگي
مکتوبلاري
گلدي سنين عنوانينا.
بو سئوگي
مکتوبلاريندا
سنين اوچون
يازيلميش
گؤزل شعرلر
ده وار ايدي.
بو شعرلرين
بير چوخونو دا
ماهنيلاردا
اوخويوردون.
اؤز شعري
نين
ماهنيلاشديغيني
دويان گنج
آداملار
سئوينيرديلر
و سئويرديلر.
من ده سني
سئويرديم.
منيم ده شعرلريمي
ساز
هاوالاريندا
اوخودون.
دويدوغومدا
سئوينجيمدن
نه ائده جه
یيمي
بيلمه ديم،
گؤزلريمين
دولدوغونو
خاطيرلاييرام.
بو، منيم
اوچون چوخ
بؤيوک دَيَر
ايدي. سنين بو
نجيب حرکتين
مني تلاطوملو
يوللارا سوروکله
دي. ايچيمده
مشعل ياخمیشدين،
کؤنلومو
آيدينلادار
اولموشدون.
بير
گون
ياخالانديغیني
ائشيتديک. سنی
ايططيلاعاتا
آپارميشدیلار.
"ندن ساز
چاليب
اوخودوغونو،
پيس-پيس غیری
شرعی ايشلرله
مشغول
اولدوغونو!"
سوروشموشدولار.
عايله
نيز
چتين دوروما
دوشموشدو. نه
ائده جکلريني
بيلميرديلر.
نئچه گون
کئچدي سندن
خبر چيخمادي.
داها سونرا
ائشيتديک کي،
سازيني آليب
بوراخميشلار
سني.
گؤزلليگين
سولموش،
اوزونده کي
سئوينچ
يئريني
قورخونج کدره
بوراخميشدي.
سني سئون گنجلر
گئجه لر آرتيق
فرقلي شعر
يازيرديلار. بعضن
ده يازماق
ايسته ديکلري
شعري
بيتيره
بيلميرديلر.
سادجه سحره
قدر گؤز
ياشلاري
داميردي بياض
کاغيذا. سونرا
دا ائله او
بياض کاغيذي
سنه
گؤندريرديلر.
بير
گون صيفتينده
کي سولغونلوغون
يئنه ده
گئتميش و
ياناقلاريندا
قيزيل گوللر
آچميشدي. سنه
يازيلان
سئوگي
مکتوبلارينا
جاواب
وئرميشدين.
بوتون
پرستئشکارلارينا
"صنعت يولو
ايله مومکون
اولماديسا او
زامان
سيياسته
قاتيلماليييق.
موباريزه
بايراغي ائنمه مه
ليدير.
سوسقونلوق،
دورغونلوق،
اومودسوزلوق
بيزيم
عاقيبتيميز
اولماماليدير."
- يازميشدين.
بو
مکتوبون بير
چاغريش ايدي.
قارانليغا،
جهالته قارشي ساواش چاغريش
ايدي. سونرا
دويدوق کي، ايططيلاعات
سني يئنه ده
ياخالاميش،
آپارميشلار.
بو دفعه
ده سنه "پانتورکيست"
آدي قويموش و
بؤلوجولوکله
مشغول
اولدوغونو خاطيرلاتميشدیلار.
سن ايسه "مؤوجود
ياسلارين
تانيديغي
و
تانيملاديغي
حاققيميزي
ايسته ييريک" -
دئميشدين.
ارتيق
سني سادجه
سئوميرم.
دوشونجه
مه
آچديغين
يولدا يولچو
اولموشام. بير
شئيي تام
آرخايينليقلا
و جسارتله
سؤيله ييرم:
"من ايچيمده
کشف
ائتديگيم،
کشف
ائتديرديگين
حقيقتين
دؤنمز
يولچوسويام
" .
گونآل آیقار