آمريکا نين دموکراسي گؤجو: ليبي تسليم اولدو عراقا سالديرديلار. قوزئي کره تسليم اولور٫ ايرانا ...

ياخين ايللرده دونيانين تروريست يارديمجيلاري تانينان اؤلکه لرين ساييسي ده ييشير. آزالير يا دا چوخالير. سيزجه ترور نه دير؟ تروريست کيمدير؟ تروريسمي دونيايا يايانلارين آماجي نه دير؟

بو سورولاري بير يانا بوراخيبدا٫ بلکي باشقا بير يؤندن ترور مسئله سينه باخاق٫ نه دييرسيز؟

آرتيق روسيه نين سسي چيخدي. پوتين اينانيلماز لحن ايله آمريکايا سالديردي و آمريکانين سياستلرينين دونيايا تهلوکه اولدوقونو (تهلوکه لي يوخ٫ بلکي تهلوکه نين تام اؤزو) اورتاليقا سالدي. بللي دير کي اودا اؤز قازانجلارينا باخاراق بو سونوجا واريبدير. آمريکا يواش يواش روسيه سئنيرلارينا ياخينلاشير. دونيادا يالقيز سوپرگؤج اولماقا نيتلي اولان آمريکا٫ اورتا دوغو و روسيه دن آيريلان اؤلکه لري دموکراسي باتاقينا سالير. بو روسيه اؤچون بويوک تهلوکه دير. پوتين عرب يولداشلارينا!! باش وورماقا باشلاييب آنجاق خانيم رايس اونون داليسي بو يولداشلارين آغزينين داديني آلماقا قرارليدير. هله بوش وئرين.

سؤزون باشلانقيجي بير تورلو آچيلمير. بيلميرم ندن دؤشونجه داغينليقينا راستلاميشام. بير ياندان باخيرام آمريکا ايله ايران ساواشينا (ساواش اولا بيلمز دوغروسو٫ آمريکا هارا ايران هارا؟) آما بير ياندان باخيرام ياخين گئچميشه. خاطيريزده اولسا عراقا سالديرمادان اؤنجه ليبي و اؤنون ديکتاتور ليدري قذافي نين آدي خبرلردن چيخميردي.

ليبي ده اؤزگورلوق و انسان حاقلاري يوخدور. گئچميشدن بري بوجوردور٫ هله ايندي ده بوجوردور. آما ندن ليبي سوپرگؤجون يولداشي شکلينه چوندو آما عراق ساواش آلانينا چئوريلدي؟

يانيت قولايدير. ليبي اتمي بيلگي قاچاقينا باشلاميش ايدي. عراق ايسه بير ايش ياپا بيلميردي آنجاق تارتان پارتان دانيشيردي. ليبي عرب اؤلکه لرين سؤزصاحيبي اولان ايدي و اصلينده بالاجا بير عرب اؤرنکي ايدي. عراق ايسه عربلرين غضبينه اوغراميش ايدي٫ باتيدان قاچيردي و اورتادوغو ايله ايليشکيلري ياخجي ده ييردي.

ليبي و عراقا سلاح و بيلگي وئرنلري آرتيق بير قورباغالار بيلمير (هر حالده اونلاردا بيلير چونکو تکنولوژي دئورينده ياشاييريق). بو ايکي اؤلکه نين نه وار و نه يوخلاري سندلي اولاراق آمريکا و بريتانيادا ساخلانيردي. آما دانيشيق باشقا٫ آماج باشقا دير.

دئديلر ليبي تروريستلري دستکلير٫ عراقدا. دئديلر ليبي اتم بمب!! ياپماقا چاليشير٫ عراق ايسه شيميايي و گياهي بمبالار. دئديلر ليبني-نين ليدري ديکتاتوردور٫ عراق-اينکيدا.

ايکي اؤلکه ايله دانيشيقلار باشلادي. ليبي ايله آنلاشمالار و عراق ايله توققوشمالار. ليبي دئدي آنلاماميشام٫ سيز نه دييرسيز او اولسون. آنجاق عراق کيمسه ني تاپا بيلمه دي بو سؤزو سويله سين.

ليبي بير دموکرات اؤلکه اولاراق باغيشلاندي٫ آمريکانين منفعتلري عربلر آراسيندا قوروندو و ايش بيتدي. ايندي کيمسه نين اموروندا بيله ده يير کي ليبي ده کيم ياشايير و کيم اؤلور. يئتر کي سوپرگؤجون قازانجلاري قورونسون.

عراق نئچه ايل تحريم و ساواشدان سورا٫ تماما داغيلدي و بير خرابه يه چئوريلدي. ايندي ايسه دوروم گؤن به گؤن کوتوله شير. سورون يوخ٫ پيشيک اولوب آما گؤز قورخوب يا يوخ؟ سورو بوردادير.

قوزئي کره يا ايران

همان اويون ايران ايله کره آراسيندا اوينانير. آما بوردا بير سيرا ده ييشيکليکلر وار. بيراينجي سي بودور کي ايران اؤز باشينا بير اؤلکه اولوب و آچيقجاسينا دولتي تروريسمي ياينلايير. اوندان علاوه ايرانين آرخاسيندا دايانان باشقا گؤچلر وار. اروپالي يولداشلاري٫ عرب يولداشلاري٫ کورد يولداشلاري٫ ارمني يولداشلاري و حتي آمريکالي يولداشلاري اونا يارديم ائديرلر.

کره اتم بمب صاحيبي اولوب. اوزاق مسافه لي فوزه لري وار٫ رسمي بير گؤج اولاراق يئريني گارانتيه آليب. ايندي ايسه انرژي بهانه سي ايله دونيا اجتماعيتينه گئري گلمه شانسي تاپيب و اون ده يرله نديرير. يعني من اتمي چاليشمالاريمي دايانديراجاغام٫ آنجاق منه انرژي وئرين دئين قوزئي کره٫ اصلينده ايشيني بيتيري و اوتوروب.

ايران آما ايشين ياريسيندادير. حاضير اولان اتمي بمبي اولسا بيله (حدس) هله اونو ياراتماقا حاضيرلانا بيلمه ييب. بو دالدان او دالا آتيلماق ايله چاليشير زمان قازانسين تا بلکي بير شئي لر الده ائتسين. آما بيلميرم گؤنلر ندن عراقا سالديرمادان اؤنجه کي گؤنلري منيم ياديما سالير.

کره نين باريشماسيندان اؤنجه هيچ اينانمازديم کي ايرانا نظامي سالديري ياپيلا بيلير. يعني سياسي٫ نظامي و اقتصادي باخيمدا بو ايش محال ايدي. آما بو نئچه گؤنده هر شئي ده ييشيب.

بسيجيلره اتم بمبي خبري وئرمه دن ۲۲ بهمن تؤرنلريني بيتيرن محمود احمدي نژاد هله اؤزدن گئتمير. لاريجاني چابالير. خامنه اي سويوش سويله يير و رفسنجاني پوللاريني سايير. منجه اورتاليق هر آن قاريشا بيلير. آرخا قاپيدان قاچان قوزئي کره٫ شطرنج اويونونو تام آمريکانين ايسته ديگي حاله گتيريب. ايرانين ايکي اويونو قالير. يا باغيشلايين دئييب اوتورسون٫ يادا ايلري گئتسين و ساواشا گيرسين.

ساواش آما هيچ عراق يا افغانيستان کيمين اولماياجاق. بونو هامي بوجور دؤشونور. ايرانين ياراتديقي تروريست تشکيلاتلار دونيانين دورت يانيداد داغيليبلار. کؤتوسو بودور کي بونلار بيتمز حاله گليبلر. يعني ترور کلاسلاري آرتيق ايران ايچينده ياپيلمير. اروپا٫ آمريکا و اورتادوغو٫ ايرانين ترور کمپلرينه چئوريليب.

آمريکا بير آز سرت دانيشير٫ عراقدا پارتلاييش ميدانا چيخير٫ فرانسه بير آز قورو باخير٫ لبناندا گؤستري ياپيلير٫ بريتانيا ايکي اؤزلولوق ائدير٫ بصره ده هليکوپتر دوشور٫ اسرائيل مئيدان اوخور٫... بوردا دوروم بير آز گرگينله شير. اسرائيل آرتيق اؤز محبوبيتيني ايتيريب. بونو دانيشيقلاردا و توپلانتي لاردا آيدينجاسينا گؤرمک اولور. نه يازيق کي ايکي اؤلکه نين يارانيشي رويالاردا ياشايير. اسرائيل فلسطينليلرين حاققيني وئرمدن٫ اونلاردان اؤز حاقيني ايسته يير٫ دونيا آرتيق بو ايشي گؤرمه مزليقدان گله بيلمير. منجه اگر اسرائيل بير آزجاسينا فلسطينلي لرين حاقلاريني وئريب و اونلارين تورپاقلاريني گئري وئرسه (اؤلوسلار آراسي اؤرگوتلرين بللي ائتديگي سئنئرلارا قاييدسا)٫ اورتا دوغو دا سورونلار بير بير چؤزولور.

يا مينيم بو حدسياتيم بوش چيخسا؟ يا آمريکا سالديرماسا؟ يا ايران پنجره دن اتم توپلومونا آتيلسا؟ يا ...

آما بير مثل واردير کي دئيير: امير بازاري اوت توتسون٫ منه بير دستمال قالسين

تبريزده بو مثل چوخ قولانيلير. هر کسين ايسته ديگي٫ اؤز قازانجيني قوروماق و بلکي ده قازانج قايناقي ياراتماق دير. مثلا عراق قاريشاندا٫ ايرانا قازانير. ايندي باخاق اگر ايراندا اورتاليق قاريشسا٫ بيزيم قازانجيميز نه اولاجاق؟

آذربايجان منيم کيمينلرين ايسته کينه باخماياراق مسلح اولماييب و مسلحانه ساواشدا هيچ تجربه سي يوخدور. ستارخان تفنگيني يئره قوياندان سورا٫ آذربايجانلي باروت قوخوسوندان قورخور. بونا قارشي٫ بيزيم قومشولارين هاميسي سلاح ايله دوغوب٫ بويويوب و اولورلر. يعني طبيعت دن مثال ووراندا٫ جئيران چاققاللرين اورتاسيندا قاليب. اونلاري آييران ايسه اينجه بير پرده دير. سيزجه بو پرده يرتيلسه (گئج يا تئز) جئيرانين باشينا نه گله جک؟

قوياق کي آمريکا ايرانا سالديردي و چوخلارين دؤشونجه سينه گؤره (منجه يا جاسوسدولار يا آنلاماز) کيمسه نين بورنوندان قان بيله گلمدي. عراقي اؤنوتاق کي نئچه يوز مين سيويل اينسان اؤلدورولدولر و کيمسه جواب وئرمه گه اورتاليقدا يوخدور. توتاق کي آمريکا ايرانا سالديردي و ساده جه اتمي تاسيساتلاري پارتلاتدي. توتاق کي آمريکا ايرانا سالديردي و ايرانين رژيمي اورتاليقدان يوخ اولدي.

ايندي ايشين چتين بؤلومو باشلايير. اشنجه ليکله بو ساواش بوجور قولاي اولماياجاق٫ ايراندا ياشايان آذربايجانليلار ايستک يا اجبار ايله ساواشا گيره جکلر. سرباز٫ بسيجي و سيويل دئمدن قيرقين باشلاياجاق. سؤزون آچيقي آراقاريشيب مصصب ايته جک. چئرچوه لر پوزولاجاق٫ اورتاليق قاريشاجاق و سيويل ساواشلار باشلاياجاق. عراقدا ۳ آد ايله ساواشانلار٫ ايراندا ۱۱ آد ايله ساواشاجاقلار. بونلاردان ان مدني و ان قورخاقي ايسه آذربايجان دير٫ ان آزيندان اينديکي آيدينلار بويله تعريف ائديرلر.

سلاحلار اينديدن هر يئرده توپلانيب٫ آذربايجاندان خاريج. پلانلار هر يؤندن هر کس ايله تارتيشيليب٫ آذربايجانليلاردان خاريج. گله جک قرارلار ايندي دن وئريليب٫ آذربايجاندان خاريج. بيزلره قالان يالقيز ساتيلميشلار و مانقورلار اولاجاق. بونلار ايله ده ياشاماق اؤلومدن داها ايرنج و داها پيس دير.

من هر زمان بونو سويله ميشم کي آذربايجان اؤز استقلاليتيني ايران بمبا ياپمادان و آمريکا بو بؤلگه يه سالديرمادان اؤنجه تثبيت ائتمه ليدير. آذربايجان حاقلاري ديه بير شئي اورتاليقدا يوخ. اونو بيزلر ياراتمالييق. ايکي مقاله يا آغيز کؤپوردن دانيشيقلار ايله آذربايجانين استقلاليتي گارانتي اولماز. سؤزون آچيقي بو کي٫ آمريکا آذربايجان درديندن اولمور کي اونا اورک يانديرسين. او يالقيز اؤز منافعيني گؤرور. روسيه يا باشقاسي بيزه عاشق ده ييرلر کي يارديم ائتسينلر٫ اونلار قازانج آخداريرلار.

آذربايجان اؤزونو ساتماماليدير. بير تک ايش گؤره جک و اودا گؤجلولردن يارديم آلاجاق. يارديم او ده يير کي قورو اؤزگورلوق قارشيليقيندا٫ وطنيميزي ساتماميز لازيم اولسون. وطن اؤچون ساواشان٫ وطندن مايا قويماز. تورپاقين آدي بيزيم اولدودا٫ يؤنه تيم باشقالاريندا!!! بو نه آنلاما گلير؟ ايندي ده آذربايجانين يؤنه تيمي باشقالارين الينده دير٫ و بو دور کي آذربايجانليلار داها ديققتلي اولماليديلار. جولادان چيخيب قويويا دوشمک عاغيللي آدامين ايشي ده يير. پروپاگاندا ايله آذربايجان ميللتيني قانديرانلار بير گؤن بدل اؤده يه جکلر.

سوزون قيسساسي٫ ساباح-بيري گؤن آمريکا ايرانا سالديرسادا٫ بيزيم ايشلم ياپماقا هيچ بير شئي يوخوموزدور. وطن آليسنا بيله اونو يؤنتماقا گؤجوموز يوخدور. وطن هر شئي بيزه وئرير آنجاق سياسي٫ اقتصادي٫ نظامي و اجتماعي باخيميندان کيمسه لريميز يوخدور کي اورک دن وطنه خدمت ائتسينلر. بير ايکي شخص ايله اؤلکه قورونماز و يؤنه تيلمز.

ايکي يول وار:

۱- وطني ديش ديرناق ايله يؤنتماقا باشلاياق

۲- وطني بيزه حاضيرلانميش يؤنه تيجيلره بوراخيب و اؤلاق.

آذربايجان گله جه يي و دؤشونجه سي باشقالارين جيبينده گزمه مه ليدير.

مسعود انتظار (تبريزلي باي بک)

۱۳/۰۲/۲۰۰۷

گلاسگو