رفسنجاني و گوناز تي.وي

گونآل آیقار

قارداشيملا بير يئرده ايستمه ديگيميز بیر يئره يولوموز دوشموش. رفسنجاني بير تئلئويزيون پروگرامينا حاضيرلاشير. ميکروفونون آرخاسيندا اوتورموش و پروگرامين ۱۰ دقيقه دن سونرا باشلاياجاغيني گؤزله يير. بو موددت عرضينده يانيندا چوخ مؤوددبانه اوتوران بيريسي ايله دانشيرو دانيشيقلاري نين کيمسه طرفيندن دويولماسيني ايستمه مکده دير.

اونا گؤره ده ميکروفونلارين يوخلانيلماسيني ايسته يير. “دقيقت ائدين ميکروفونلار آچيق اولماسين” - دئيير. آنجاق بيزیم ائشيتديکلريميزي بيلميرلر. رفسنجاني [1] گوناز تی وی حاققيندا دانيشير. ” آمئريکاداکي دوستلاريميز بو تی وی نين باغلانماسي اوچون ندن يارديم ائتميرلر. اونلارلا علاقه ساخلاماق لازيمدير. آمئريکا دؤولتينده اولان دوستلاريميزلا دانيشماليييق. نييه بو تی وی نين فعاليتينه ايذن وئرميشلر؟ اونلارلا درين ايرتيباطا گيرمه لي یيک. بيزيم آمئريکا ايله اولان پروبلئملريميز سطحيدير. بو پروبلئملر اصلینده هم آمئريکايا، هم ده بيزه خئيير وئرير. آنجاق [1] گوناز تی وی مسئله سي اورتاميزدا اولان پروبلئملر منطيقينه سيغمير، آنجاق سيغديرماليييق. ” - دئيير.

رفسنجاني نين جان گودَنلري بيزيم اورادا اولدوغوموزو گؤرورلر. جانيميزا گيزلين بير قورخو گيرير. اورادان اوزاقلاشماق ايسته ييريک. بيزيم اورادا اولدوغوموزو و رفسنجاني نين سؤيله ديکلري نين هاميسيني دويدوغوموزو رفسنجاني اؤزو ده بيلميش اولور. جان گودنلردن بيريسي رفسنجاني نين قولاغينا ” سؤيله ديکلرينيزي لازيمسيز آداملار دا ائشيتميشلر” - دئيه پيچيلدايير. رفسنجاني چوخ عصبله شير و اوز-اؤزونون ساغ قولاغيني توتوب دارتماغا باشلايير. بو آندا تی وی پروگرامي نين باشلانماسينا ثانيه لر قالميش. رفسنجاني “منيم دئديکلريمي کيم ائشيتميشسه حسابينا يئتيشين” - دئيير.

بو سؤزلري دويدوقدان سونرا اورادان قاچماق ايسته ييريک. قارداشيم دا چوخ عصبله شميش و منه “مني بو خارابايا نييه گتيردين، بو کوپولو بيزي اؤلدورتدوره جک” - دئيير. ايچيميزي قورخونج بير هيجان بوروموش. قاچماق ايسترکن يولوموزون اوستونده اونلارجا قودوز کؤپگين دوردوغونو گؤروروک. قاچساق بو کؤپکلرله بيزي توتوب سونرا دا کؤپَکلره يئم ائده جکلر. رفسنجاني نين خوصوصي گاردلاري بيزي ياخالاييرلار. قارداشيمي مندن آييريب باشقا يئره آپاريرلار. يوکسک سسله باغيرتي سسلريني دويورام. يقين کي، ايشکنجه ائتمه يه باشلاميشلار.

گؤزلريمي باغلاييب اوزون بير کريدوردا آپاريرلار. مني آپاران آدامين بيريسي نين تئلسيزيندن(بی سیمیندن) سسلر گلير. کودلا دانشيرلار. بالاجا و قارانليق بير اوتاغا ايتله ييب سوخورلار و قاپيني اؤرتوب گئديرلر. ۲۰ دقيقه دن سونرا ۴ نفر گلدي. يئنه ده گؤزلريمي باغلاييب اوزون کريدوردا آپاريرلار. بير اوتاغا سالديلار. اوتاقدا ايشکنجه اوچون هر نؤوع مودئرن آلتلر وار. اوره یيم گوپ- گوپ ائدير. دئمه لي مني بورادا ايشکنجه آلتيندا اؤلدوره جکلر. ساققاللي بيريسي ” پدر سگ گوش به حرفهاي مقامات ايراني ميدهي؟ ” - دئيه باغيرير. من ده “من ندانسته شنيدم، نيت شنيدن نداشتم، باور کنيد ” - دئييرم. گؤزوم شيشه دن دوزَلمیش بير قازانا ساتاشير. قازانين ايچي آدام ديرناقلاري ايله دولودور. بوتون بو ديرناقلار بورادا ايشکنجه ائديلن اينسانلارين ديرناقلاريدير. ديوارين بير طرفينده ده رفسنجاني نين بير رسمي وار. پالتاريمي سويوندوروب دمير بير ياتاق اوزَرينده اوزاديرلار. ۲ ساققاللي آدام اؤنجه آدام باشينا بير رکعت ناماز قيليب سونرا اللرينه شاللاق آليرلار. ايلک ضربه ايله بئليمه ووردوقلاريندا باغيرماغا باشلاييرام. دمير ياتاق دا ياواش- ياواش قيزماغا باشلايير. بونلار مني يانديراجاقلارميش. داها سونرا ايکينجي آدام دا شاللاقلايير مني دمير ياتاغين اوستونده. آرتيق بورادان ديري چيخماياجاغيمي بيليرم. اونا گؤره سون نفسيمده تورکجه بير شئي دئمک ايسته ييرم. آلتيمدا قيزان ياتاغين اوستونده، آغير شاللاق ضربه لري آلتيندا باغيرا- باغيرا:

” دونيا دولسا شرقي ايله
تورکوز تورکو چاغيريريق
يول گئديلمز قورخو ايله
تورکوز، تورکو چاغيريريق”

بو آندا ايشکنجه چيلرين نيفرتلري صيفتلرينده گؤرونور. داها سرت ضربه ايله وورورلار. آلتيمداکي دمير ياتاق قيزارماغا باشلايير، يانان دَريمين قوخوسو بورنوما دولور. سون نفه سيمي چکمکدَيَم. آنجاق ايچيمده سؤنمز و درين بير اينام حيسس ائديرم. ايچيمدن بير سس “سني اؤلدوره جکلر، سون نفه سينه قدر تورکجه ماهني سؤيله، تورکجه شرقيلر دوداغيندان عکسيک اولماسين” - دئيير.

باغيرتيلاريمي آنام دويموش و يوخودان اويانميش. يورغاني اوستومدن گؤتوروب و تلم-تله سيک مني يوخودان اوياديب “آي اوغول نييه باغيريرسان، نه اولوب، اويان، قالخ آياغا اؤلدون” - دئدي.

يوخودان اويانديم. قان-تر ايچينده ايديم. اولوب-بيتنلرين يوخو اولدوغو اوچون چوخ سئوينيرديم. آنجاق يوخوداکي ماجرانين تاثيرلري جانيمدان چيخماميشدي.