LİSANİ İLƏ BAĞLI AVROPA PARLAMENTİNİN ÜZVÜ AVROPA KOMİSSİYASI PREZİDENTİNƏ MÜRACİƏT EDİB. İSVEÇ YAŞILLAR PARTİYASI BƏYANAT VERİB
2007-02-07 - 11:15:00

Avropa Parlamentinin üzvü, Portuqaliya parlamentinin deputatı Paulo Kasaka Güney Azərbaycanın tanınmış milli fəalı Abbas Lisaninin məsələsi ilə bağlı Avropa Komissiyasının prezidenti Xose Manuel Barozoya müraciət edib. Azərbaycan Gənclər Federasyonu İsveçin sədri Nərgiz Nedainin «Media forum»a verdiyi məlumata görə, məktubda P.Kasaka hələ ötən ilin noyabrında A.Lisaninin məsələsini qaldırdığını, amma onun sorğusunun cavablandırılmadığını xatırladıb.

P.Kasaka A.Lisaninin hüquq müdafiəçisi və siyasi fəal olduğunu, hazırda Ərdəbil həbsxanasında saxlanıldığını qeyd edib. Deputat Avropa Komissiyasının prezidenti Xose Manuel Barozodan A.Lisaninin aclıq aksiyası keçiridiyini, onun ailəsinə təzyiqlər edildiyini nəzərə alaraq siyasi fəalın işinə daha diqqətlə yanaşmağı xahiş edib.

Lisaninin azad edilməsi tələbi ilə İsveçin Yaşıl Partiyası İranın İsveçdəki səfiri Həsən Qaşqaviyə müraciət edib. Yaşıllar Partiyanın xarici məsələlər üzrə sözçüsü Bodil Çeballosun İran səfirinə göndərdiyi bəyanatda bildirilir ki, İsveçin Yaşıllar Pratiyası A.Lisaninin səhhətində yaranmış kritik vəziyyətdən narahatdır: «Cənab Lisani İran hökuməti tərəfindən kütləvi iğtişaşların təşkilində və İranın Azərbaycan əyalətində separatizmi təbliğ etməkdə günahlandırılıb. Beynəlxalq Amnistiya Təşkilatına görə, o vicdan məhbusudur və öz fikirlərini dinc yolla ifadə edib».

Yaşıllar Partiya aclıq aksiyasından sonra Lisaninin səhhətinin pisləşdiyini vurğulayıb. Bəyanatın sonunda A.Lisaninin azadlığa buraxılması tələb olunur: «Biz İsveçin Yaşıllar Partiyası olaraq İran hakimiyyətini cənab Lisanini təcili və qeyd-şərtsiz azad etməsini və ona zəruri tibbi yardımın göstərilməsini istəyirik».