آذربايجاندا فارس سياستلري تورکجه ياييلماماليدير!! آذربايجاندا آمريکا سياستلري تورکجه ياييلماليدير!! او زمان آذربايجانين اؤز سياستي نئجه اولماليدير؟

اينانجدا شوبهه اولماماليدير. اینانجدا ايکي اؤزلولوک هیچ اولماماليدير. اينانجي اساس ياراتاندا بو ايکي اصلدير. اگر بير شئيه اينانيرسان٫ باشقاسيني اونا اوستون گؤره بيلمه سن. يوخسا اگر بير يالانچي اينانج ايله اورتاليقدا آت چاپديريرسان٫ دئمک تئز تئز سؤز و يول ده ييشديره بيليرسن. اگر بير سس و اتکي صاحيبيسن٫ بونون آدي  وطنه خيانتدير.

آذربايجان نئچه ايللر دير کي اؤز کيمليگي و اؤز تورپاقيني قوروماق اوچون ساواش وئرير. اؤزده بو ساواش فارسلارا قارشيدير آنجاق آرخادان فارسلاري حمايت ائدنلر ايله هيچ بير سؤز سويله نمير. بو دا يانيق سياست آدلانير. بو سياستي ايران آدلانان اؤلکه نين سراسري تشکيلاتلاري و اونلاردان قوپان قويروقلار ايشه آليرلار. هم نالا و هم ميخا چالماق٫ ايکي اؤزلو خائنلرين ايشيدير.

ايللر بويو ساواشيميزا٫ باتيدان هيچ بير دستک وئريلمه ييب و حتي آشيميزا سو بيله قاتيليب. تورک دونياسي ايسه گئچميش ياخين ايللرده بير آزدا اولسا يارديما قالخيشيبدير٫ آما اودا ايستک سيز ده يير. يعني صرف بيزيم تورک اولدوقوموزا يارديم ائديلمير٫ بلکه يارديم ائدنلرين بيزدن ايستکلري واردير. مثلا تورکیه کوردوستان یارانماسین دیه، بیزدن مایا قویور. بوجورسونه قولای.

قونولار قاريشماسين ديه بو مقاله ده ايکي سياسته باخماق ايسته ييرم. فارس و آمريکا.

فارسلارين شوونيستي سياستلري:

- دونيادا مدنيت ياراتان ايلک و تک ميللت

- اؤزلريني اوستون گؤرمک

- باشقالاريني قول ائتمک

- هر شئي فارسين اولسون دئمک

- دونيا بيزيم اولا بيلير دؤشونجه سي

آمريکانين امپرياليستي سياستي:

- دونيادا مدنيت نه اولدوقو و نئجه اويقولانديقيني آنلايان ميللت

- اؤزلريني اوستون گؤرمک

- باشقالاريني قول ائتمک

- هر شئي آمريکانين اولسون دئمک

- دونيا بيزيمدير دؤشونجه سي

بو ايمکي سياستین ايکي بالاجا فرقي وار: بيراينجي بودور کي فارسلار گئچميشده ياشاييرلار آنجاق آمريکاليلار بو گونده (حتي ايلريده) ٫ ايکينجي ايسه دونيايا باخيشلاريدير. فارسلار دونياني ايسلام آدي ايله آریالارا آلماق ايسته ييرلر آنجاق آمريکا گؤجو ايله دونياني منيمسه يير.

بيز بير ميللت اولاراق بو ايکي سياستين اورتاسيندا جان وئرمه يه مشغولوق. بير گون بيري فارسلاري پيسله يير و آمريکاني ياغلايير٫ بيرگون بيري آمريکاني پيسله يير و روسيادان ياپيشير٫ بير گون بيري هاميني پيسله يير و فارسلار ايله دموکراسي قورماقدان دانيشير. و بونلارين هاميسيني اؤز اينانج و يوللارينا بدل ائدنلر ايسه ايکي اؤزلو خائنلر ساييليرلار.

آذربايجان بو ايکي عمده سياستين آلتيندان چيخماليدير. بونون ايسه بير تک يولو وار:

ميلي قالخيش

بيز بير ميللت و تاريخده ياشايان ايلکر دولتلردن ساييليريق. آذربايجان آدي يازيلي تاريخين باشلانقيجيندان بري گئچيب و بو دانيلماز حاله گليب. آديني ده ييشيب و يا تاريخين تحريف ائدنلر بوشونا اوغراشيرلار. بيزيم ميللت و دولتچيليگيميزين مين ايللر بويو اثري قاليب. اگر بو گون ۸۰ ايلدير کي آمريکا-روس-بريتانيا سياستي سونوجو فارسلارا تاپيشيريلميش اولوروق!! بو بيزيم آتالاريميزين سؤچو ساييلير. ندن کي اگر او زامان گؤجلو اوسايديلار٫ ساواشيب و آنا يوردوموزي قورتارا بيليرلردي. ايندي ايسه بو سؤچ بيزه عايددير. ندن کي گؤجلو اولماقدان قورخوب و يالوارماق ايله يالقيز مدرسه ايستکينده بولونوروق!! هاني او وطن اوغروندان قان وئرن ايگيدلر؟

يالوارماق عيب اولدوقدان سورا٫ همده بيزيم گله جه ييميزي ساتار. ایستر فارسلارا يالوارماق٫ ايستر آمريکايا و ايستر روسلارا يا چينلره (چينلره بير آز اينانيلماز دير)

هر دانيشيقدا٫ هر يازيدا٫ هر مقاله ده و هر تي.وي پروگراميندا بير قونو وار: فارسلارين ايسته ديکلري سياست تورک ديلينده و آذربايجان ميللتينه اينانديريلير. بونو ياپان ايسه ايالتي تلويزيون٫ راديو و قزئته لر ديلر. يعني فارسلارين ايستکلري سیاست٫ فارسجا یوخ بلکی تورکجه ده یاییلر/يازيلير.

بيزده اينانيريق کي بو بويوک تهلوکه دير. بيزي آسيميله ائتمک ايله بيزليکدن اوزاقلاشديران سلاحلارين ان آغير و ان تهلوکه لي سي بودور.

بيزه باشقالارين سياستيني اؤز آنا ديليميزده يئديرتسينلر.

آنا ديليندن اؤزاق قالميش٫ آنا ديلينده دانيشماقا٫ يازماقا و دوشونمه يه سوسوز اولان بير ميللت٫ طبيعي دير کي ايلک آنا ديلينده ياغان ياغيش ايله اؤزوندن چيخاجاق. بو ياغيش اونون سوسوز جانينا و روحونا توخونوب و آغير اتکي بوراخاجاق.

ياغيش آما٫ اسيدلي ياغيش اولا بيلير. ۵۷ اینقیلابی بیر اؤرنک اولمالیدیر.

ايندي آذربايجان بؤلگه لرينده فارس اسيدي ايله ياغان ياغيش وار. بو ياغيشين اتکي سي اوقدر آغير اولماييب ندن کي ۸۰ ايلدن آز دوام گتيريب و ايندي هر کس اونا قارشيدير. بو ياغيشي ايسته ينلرين ساييسي گؤن به گؤن آزالير. سوسوزلوقو بو ياغيشا ترجيح وئرنلر ايسه آذربايجان کيمليگيني ياشاتماقدا بويوک رل اويناييرلار.

اسيدلي ياغيشي خالص اسيده چئويرنلرين قارشيسيندا نئجه سس سيز قالا بيليريک؟

بو گونلر فارس اسيدينه بولاشميش ياغيشين يئرينه باشقا ياغيش ياغماقا باشلاييب. بو ياغيشين آدي ايسه خالص اسيد ياغيشيدير. آمريکا يانليلاري (يالاخچيلاري) بو ايشده ميللتي اويدورماقا باشلاييبلار. ساعاتلارجا آمريکا سياستيني تبليغ ائدن خائنلر٫ ايندي ايسه ميللتدن ايسته ييرلر اؤز اللري ايله اؤز باشلارينا داش سالسينلار و اسيد ياغيشينين ياغماسيني داها چوخالتسينلار.

اگر قراردير آذربايجانين تورک ميللتينه يارديم ائديلسين٫ ندن فارسلاري حمايت ائتمکدن ال چکميرلر؟ اگر قرار دير آذربايجان آديندا بير اؤلکه و اونون ايچينده ياشايان ميللته يارديم ائديلسين٫ ندن اونلاردان آد آپاريلمير و يالقيزجا ايرانا دموکراسي گتيرمکدن دانيشيلير؟

بير آن دؤشونمک يارديمجي اولا بيلير. دوشونون کي ايراني يؤنه تن فارس ملالار٫ ساباح دئديلر کي: تمام٫ سيز اي آمريکا و باتي اؤلکه لري٫ بيلين کي بيز بو گوندن اعتبارن٫ اتم چاليشمالاريميزي دايانديرديک٫ عراق ايشينه قاريشماياجاييق٫ حماس و حزب الله بيزيم حمايتيميزدن چيخديلار٫ افغانستان و .. يعني آمريکانين ايسته ديگي بؤلکه لردن واز گئچديک!!!

بو دورومدا آيا آمريکانين گونئي آذربايجان ديه بير ماراقي اولاجاق مي؟ يوخ٫ سيزده ياخجي بيليرسيز کي اگر آمريکا ايران حکومتي ايله آنلاشسالار٫ گونئي آذربايجان مسئله سي سيلينه جک.

آمريکا ايرانا دموکراسي گتيرمک اؤچون ميليونلار دولار پول هزينه ائدير آنجاق اؤز اؤلکه سينده دموکراسي تام آنلاميندا اويقولانمير. تانينميش خبر آژانسلارينين دانيشيقلارينا اویمایین. اوردا اينسانجا سينا ياشايانلاردان سوروشون آيا اورتا دوغويا تعريف اولونان دموکراسي اوردا اويقولانير يا يوخ؟

نئچه ايل سؤرگون قاليب٫ دولت پولي ايله بير ايکي کلاس درس اوخويوب و روحونو باشقالارينا ساتان ضياليلار !!! (اوتانج وئريجيدير) ايندي ميکروفون آليب و آذربايجان آدينا آمريکايا يارديم ائديرلر. ساباح اگر حسابلار قاريشسا و ايرانا سالديري اولسا (اينانمالي ده يير) چلبي لر کيمين ساتقينلار آذربايجانا گئري دونوب و دولت قوراجاقلار!!!

یا مثلا نروژده ساباحدان آخشاما دراقاشاییردلیق ایله مشغول اولان بیریسی اوتوربدا باتی نی و دموکراسینی یانلیشلیقلا اؤز تایلارینا کی آذربایجانین ایچینده یاشاییرلار ایناندیرسا، او زمان آیا آذربایجان افغانستان اولاجاق یا سوئد؟ بیلگی سیز میللتی سوروندورمک یالقیز دشمن و ساتقینلارین ایشیدیر. بیزیم میللتیمیز ایلک اَنجه بیلگیلنمه لیدیر. یعنی ایلک اؤنج بشر تعریف اولونور و سورا حقوقو بشر. آذربایجان دا بشر تانینان میللت هله لیک یوخدور و بو دا باتی ایله فارسلارین سوچودور.

بیلگی سیز میللت نه ایسته مه دیگی، نه ایسته دیگینی و نئجه ایسته دیگینی بیلمیز.

آمريکا هر نقدر ظالم اولورسا٫ دونيايا بويوک خدمتلر ائديب. آما بو خدمتلردن يارارلاناراق يئني کؤله ليگي باشلاتان٫ يئني و گؤجلو امپرياسينا دوام ائدن بير اؤلکه٫ نه گونئي و نه قوزئي آذربايجانا اؤنم وئرمير. اونا اونملي اولان يالقيز بير شئي وار: آمريکانين منفعتلري.

هر کس آذربايجان و اؤزونون استقلاليتيني فارسلارين اليندن قورتارمادان آمريکايا وئرمک ايسته يير٫ دوشسون او خائنلرين داليسينا و شعار وئرسين: آمريکا گل بيزه دموکراسي اويقولا!!

آذربايجان کيمسه يه ساتيلمادان مستقل اولماليدير. معامله و معاوضه آراسيندا بويوک فرق وار. آذربايجاني فارسلاردان آليب آمريکايا وئرمه نين نه بيزه و نه بيزيم گله جک نسيللره ياراري وار.

بيزي و اينسانليقي سئون اؤلکه لر و باشدا آمريکا٫ حمايتلريني فارسلاردان و فارس تشکيلاتلاريندان (حتي اؤزلري تروريست آدي قويدوقلاري تشکيلاتلار) آزالتسينلار٫ بيزه يارديم ائتسينلر اؤز آياقيميز اوستونده دوراق. يوخسا اؤز منفعتلري اؤچون بعضيلريني حيوان کيمين قوللانيرلارسا٫ اونلاردا بيزه فارسلاردان بئتر و تهلوکه لي ساييليرلار.

بيزه آذربايجان ديلينده٫ آذربايجانلي الينده و آذربايجان منفعتلريني قوروماق سياستينده راديو٫ تلويزيون و قزئته لازيمدير.

آذربایجانا قورتولوش لازيمدير٫ ساتيش يوخ

مسعود انتظار

۰۷/۰۲/۲۰۰۷

گلاسگو