يييه سيز قالميش ائو

پالچيقدان تيکيلميش بو ائو داها اؤنجه بؤيوک کدرلري، سئوينجلري اؤز ايچينده بارينديرميش. ايندي کيمسه سيز قالان، ديوارلاري اووولوب تؤکولن بو ائوده تويلار اولدو، اوشاقلار دونيايا گلدي. گنج بير گلين ده ايلک چوجوغونو دوغورارکن بو ائوده اؤلدو. اللريم تيتره يير بونلاري يازارکن، آنجاق يازاجاغام. اؤلوم ده بير ائوه دَيَر وئرَن حاديثه دير. سادجه خوش اولايلارلا دَيَر قازانماز کي بير ائو. قاپيداکي کؤپکلري ايله، تؤوله ده کي  اينکلري ايله، آتلاري و ائششکلري ايله دَيَر قازانار بير کند ائوي. قويونلارين، ماللارين قيش يئمي اولان تايالاري ايله آنلام داشييار کند ائوي. آرتيق او تايالار، او اينکلر، او کؤپکلر، او تؤوله لر يوخدور. هر سحر ائرکَندَن قالخيب شرقي دئيه-دئيه اينک ساغان او گؤزل سسلي ياشلي قادين دا يوخدور. اؤنجه ماللار، قويونلار يوخ اولدو، ساتيلدي هاميسي. داها سونرا دا ائوين آداملاري کؤچوب گئتديلر. بير نئچه سي او دونيايا کؤچدولر، قالانلاري دا شهره کؤچدولر، فرقلي حيات ياشاماق ايسته ديلر. ائو صاحيبسيز قالدي. ائوين اطرافيندا دولاشان تويوق- جوجه لر ده دولاشماز اولدولار. سونرا دا ائوين ديوارلاري نين دليکلرينه سانجيلان ميخچالار سؤکولدو، چونکو آرتيق او ميخچالارا پالتار آسان کيمسه قالماميشدير. سادجه کندين کناريندا يئرلشن مزارليقدا بير گنج خانيم ياتيب قالدي بو ائو عضولريندن. بو ائو بير زامانلار اورادا ياشايانلارين يوخوسونا گيرمه يه باشلادي. ائوين اطرافيندا چوخ شئيلر يوخ اولسا دا آنجاق يوخولارا گيرديگينده اَووَل اولدوغو کيمي گؤرونوردو. چونکو اونون ديوارلاريندا و اطرافينداکي خاطيره لر اورادا ياشايانلارين آنيلاريندا، عاغيللاريندا تام اولاراق حَک اولموشدو. 

 ايللر کئچدي، بير زامانلار بو ائوده ياشايانلارين چوخو فرقلي يئرلرده ياشاماغا باشلاديلار. دَيَريني ياواش-ياواش ايتيرن بو ائوين پئنجره لري ده سؤکولدو. سونرا دا بير زامانلار ائوين قونشوسو اولان آدام بو ائوين اوستونه اؤز تاياسيني يوکله دي. ائوين ايچيني ده سامانليغا دؤنوشدوردولر.  

  بير گون بو ائوده ياشاميش بيريسي نين يوخوسونا گيردي اوچماغا ديرَنَن بو ائو. يوخو بئله ايدي:  "ائوين ايچينده کي  سامانليق و اوستونده کي  تايا اود توتوب يانيردي. بو يانغيني يوخودا گؤرَن آدام دا ياتديغي يئردجه باغيريردي کي: "ائويميز ياندي، منيم خاطيره لريم يانيب کول اولدو." آدامين باغيرتيسينا و هؤنکورتوسونه قاديني ديکسينيب يوخودان اوياندي. يوخودا باغيريب آغلايان اَريني اوياتدي کي: "نه اولموش، نييه آغلاييرسان؟" آدام سوسقون و قان-تر ايچينده هئچ بير شئي دئمه دن ايچين-ايچين آغلاييردي"

    گونآل آیقار