Abbas Lisani aclığı dayandırdı

Vicdan məhbusu mübarizənin davam etdiyini deyir

31/01/2007

Yanvarın 1-dən aclıq aksiyasına başlayan Güney Azərbaycan milli hərəkatının önəmli simalarından biri Abbas  Lisani yanvarın 30-da aclıq aksiyasını dayandırıb.

Yanvarın 30-da 50-yədək Azərbaycan fəalı və ziyalısı Ərdəbilin baş prokuroru Ərcəngi ilə görüşüb, sonra isə 15 nəfərə Abbas Lisanini həbsdə ziyarət etmək imkanı verilib.

Ərdəbil baş prokuroru bildirib ki, Abbas Lisaninin qısa müddətli tərxis hüququnun temin olunması ilə bağlı Tehrana məlumat verilib ve hazırda İranın baş prokuroru ayətullah Şahrudidən bu istiqamətdə qərar gözlənilir.

Abbas Lisani ilə görüşən fəallar onun sağlıq durumunun olduqca ağır olduğunu bildirir. Onlar Abbas Lisaniyə aclıq aksiyasını dayandırmağın vacib olduğunu və artıq etiraz aksiyasının öz siyasi nəticələrinə nail olduğunu bildiriblər.

Abbas Lisani bu müraciətləri və onun aclığı dayandırması üçün bütün dünya boyu toplanan imzaları nəzərə alaraq, aksiyanı dayandırmağa razılıq verib. Lakin Abbas Lisani məhbus hüquqlarının pozulmaqda davam edəcəyi təqdirdə yenidən qidadan imtina edəcəyini də diqqətə çatdırıb.  

Abbas Lisani deyib: “Azərbaycan milli hərəkatının verdiyi mücadilə dinc və mədəni mübarizədir. Buna görə də biz yalnız dinc üsullardan istifadə edərək mübarizəmizi davam etdirməliyik. Mənim aclıq aksiyamın səbəbi də şəxsi hüquqlarımın pozulması yox, məhz bu dinc mübarizənin sorağının dünyaya yayılması idi. Mən mübarizəni davam etdirmək əzmindəyəm”.

Abbas Lisaninin Hüquqularını Müdafiı Komitəsi vicdan məhbusunun sağlıq durumu ilə bağlı narahtlıqların hələ də qaldığını bildirir və onun təcili tibbi yardıma ehtiyacı olduğunu İran rəhbərliyinin, beynəlxalq təşkilatların və İran ictimaiyyətinin diqqətinə çatdırır.

Komitə Abbas Lisaninin təcili xəstəxanaya köçürülməsini, onun ailəsinin nəzarəti altında müalicə alması üçün şərait yaradılmasını tələb edir.

Aclıq aksiyası zamanı sağlamlığına ciddi zərbə dəyən və həyatı təhlükə altında olan Abbas Lisaninin etirazı İranda böyük qalmaqala səbəb olub.

Beynəlxalq təşkilatlar, insan hüquqları qrupları Abbas Lisanininn durumundan dolayı narahatlığını bildirib, İranın Azərbaycanlı əhalisi millət vəkillərinə və dövlət idarələrinə saysız müraciətlər göndərib.

İran parlamentinin yanvarın 30-da keçirilən iclasında  Şərqi Azərbaycan seçicilərini İran Məclisində təmsil edən Əkbər Ələmi Abbas Lisaninin vəziyyətinin olduqca ciddi olduğunu və məsələnin İranın milli təhlükəsizlik məsələsinə çevrilə biləcəyini deyib.

Abbas Lisaninin həyatı üçün təhlükə hələ də mövcuddur və Komitə Abbas Lisaninin yaşamaq və azadlıq hüququnun təmin olunması uğrunda mübarizəsini davam etdirir.

Biz bütün dünya üzrə Azərbaycan təşkilatlarını, beynəlxalq qurumları və İran ictimaiyyətini Abbas Lisaninin dərhal  xəstəxanaya yerləşdirilməsi və lazımi tibbi yardım alması üçün İran rəhbərliyinə müraciətləri davam etdirməyə çağırırıq.

Abbas Lisaninin Hüquqlarını Müdafiə Komitəsinin ünvanı:

e-mail: lisani.info@yahoo.com

Əlaqə telefonları:

Faxtə Zamani (Kanada) + 1 604 677 2524

Nərgiz Nedayi (İsveç) + 46 735 68 78 82