«اوْيان! ستّارخان! اوْيان!»

فتح الله ذوقی

خان!

اوْيان!

نه ياتيبسان!

سردارسيزيق اي اوْيان ستارخان!

بو گون نه ياتماق گونو!

بو گون نه اويماق گونو!

آمانين بير گونودور

باشسيزيق اي...

باش گؤتور يوخودان اوْيان ستارخان!

بو گون نه سوسماق گونو!

بو گون نه اوسماق گونو!

قاراباغ چاغيرير سني؛

ساواش گونودور

باش گؤتور داشدان، اوْيان ستارخان!

آلديغين آزادليغيميز

دانيشديغين ديليميز

اسگي كيمليگيميز

دانيليب، گئدير الدن اي اوْيان ستارخان!

ياساقليق ياراسالاري باشيميزدا

اؤزگه سؤزجوكلر قولاغلاريميزدا

يابانجي ديل دوْداغلاريميزدا

اوره‌گيميزين آجينميش ياراسي، اوْيان ستارخان!

آل پالتارلاريني گئي، آغ كفنيني سوْي!

قيزيل بوغلاريني بور، پاپاغيني باشينا قوي!

داراقلي فيشنگي‌ني باغلا، آتيشلي توفنگي‌ني گؤتور!

چكمه‌لريني اياغلارينا چك! اوْيان ستارخان!

سيرداشلارينيق اي...

دؤيوشداشلارينيق!

اينان!

دؤزوملو يوْلداشلارينيق!

ياتما قيزيلباشلارينيق اي اوْيان ستارخان!

دوْقسان ايلدي بو قارا غربتده ياتيبسان

هله‌ده سسله‌يير سني آناتوْرپاغين، آذربايجان:

«جان!جان! قان!‌قان! اوْيان‌اوْيان! ستارخان!

يا تبريز سني باغرينا باساجاق، بالام!  يا ارك‌قالاسين تهران!»

دورماسان ستارخان!

تبريزي تهرانا گتيره‌جه‌ييك!

سنگرلريميزي باشكتده قوراجاييق!

شوْوونيزميله ائله بوردا ووروشاجاييق!

ياني؛

بو بسله‌ديگيميز شئيطان پيشيگي ـ قولاغدان قويروغا ـ اوْدلاياجاييق

و ايتيب ـ باتان حاقلاريميزي، آیاقلانان حاقلاریمیزی، بوتون ايراندا آراييب آلاجاييق

اوْتوز ميليون يئرلي ـ‌ يوردلو، ائللي ـ اوْبالي، آتالي ـ بابالي اوزگور توركوك

بوسبوتون تهرانيق

بوسبوتون ايرانيق

                            ياني ايرانين دامارلاريندا آخان قانيق!

ياني آذربايجانيق!

اوْيانماييرسانسا ستار؛

دورماييرسانسا خان!

                             ـ سن اوْ سئوديگين آنان ـ

ايناميني بيزه تاپشير

اردميني بيزه سوْن

ایگیدلیگینی بيزه باغيشلا

و امين اوْل!

بيزه باغيشلاديغين شرفي؛

بيزه تاپشيرديغين اينامي؛

بيزه سوْندوغون حميّتي

ـ آنالاريميزين آغ ساچلارينا آند اوْلسون ـ

جانلا! قانلا! قوْروياريق!

Oyan! Səttarxan Oyan!

Xan!

Oyan!    

Nə yatıbsan!         

Sərdarsızıq ey oyan Səttarxan!                                     

Bu gün nə yatmaq günü

Bu gün nə uymaq günü

Amanın bir günüdür          

Başsızıq ey...                                    

Baş götür yuxudan oyan Səttarxan!                              

Bu gün nə susmaq günü

Bu gün nə usmaq günü

Qarabağ çağırır sənı    

Savaş günüdür              

Baş götür daşdan oyan Səttarxan!                   

Aldığın azadlığımız

Danışdığın dilimiz                            

əskı kimligimiz                   

danılıb, gedir əldən ey oyan Səttarxan!                      

Yasağlıq yarasaları başımızda

Özgə sözcüklər qulağlarımızda        

Yabancı dil dodağlarımızda           

Ürəyimizin acınmış yarası, oyan Səttarxan!             

Al paltarlarını gey!

Ağ kəfənini soy!  

Qızıl bığlarını bur,                            

Papağını başına qoy,                        

Daraqlı fişəngini bağla,                                   

Atışlı tüfəngini götür,                                      

Çəmələrını ayağlarına çək,                  

Oyan Səttarxan!                                      

Sırdaşlarınıq ey

 doyuşdaşlarınıq!            

İnan!

Dözümlü yoldaşlarınıq,                    

Yatma, Qızılbaşlarınıq ey,

Oyan Səttarxan!                                             

Doqsan ildı bı qara qurbətdə yatıbsan,

Hələdə səsləyir sənı anatorpağın Azərbaycan:

CAN! CAN!

QAN! QAN!

OYAN OYAN   SƏTTARXAN!

YA TƏBRIZ SƏNI BAĞRINA BASACAQ, BALAM!

YA ƏRK QALASIN TEHRAN!

Durmasan Səttarxan!

Təbrizi Tehrana gətirəcəyik,

Səngərlərımızı başkətdə quracayıq,

Şovonim ilə elə burda vuruşacayıq,

Yanı,

Bu bəslədiyimiz şeytan-pişigi,

qulağdan-quyruğa odlayacayıq!

Və itib-batan haqlarımızı,

Ayaqlanan haqlarımızı,

Bütün İranda arayıb alacayiq!

Otuz milyon yerli-yurdlu,

Elli-obali,

Ata-babali üzgür Türkük,

Büsbütün Tehranıq, büsbütün İranıq,

Yanı İranin damarlarında axan qanıq,

Yanı Azərbacanıq!

Oyanmayırsansa Səttar,

Durmayırsansa Xan!

- sən o sevdigin anan! -

İnamını bizə tapşır,

İgitligini bizə bağışla,         

ərdəmini bizə son,                        

və əmin ol!

Bizə bağışladığın şərəfi,

Bizə tapşırdığın inamı,

Bizə sonduğun həmiyəti,

-Analarımızın aq saçlarına ans olsun,-

Canla – qanla qoruyarıq!