حركت ده ارتباطي آراجلار

بو گونگو دونيادا ارتباطين گئنيشلنمه سي ، ارتباطي آراجلارين  چوخالماسي وچئشيدلي اولمالسي دونيادا بويوك دئييشيك لره ندن اولوبدور . ارتباطي آراجلارين چوخالماسي اؤلكلرده و اؤزلليكله توتاليتر اؤلكه لرده گنئيش تاثيري گؤرونور . نئجه كي بعضا سياسال ، توپلومسال ، اكونوميكسل و كورتورل دوريملره سبب اولور. سياست اوزمانلارين گؤروشونده فاكس و تلفون ، ايران ايسلام اينقلابيندا بويوك رولو اولوبدور . اينديليكده هئچ نه يي دونيا ايجتماعييتيندن گزلتمك مومكون دئييل.

ارتباطي آراجلار ميللت آراسي وميللت ايله نوخبلر آراسيندا واسيطه دير. اؤنجه ميللتچي ندن ميللتينه مراجعت ائدير؟ سورغوسونا جاواب تاپمالييق . ميللتچي نين دوشونجه سينده ميللت هر نه دن اوستوندور ، ميللتين گلجه يي ، سعادتي ومنافعي هر نه دن اؤنملي دير و اونون فيكريجه ميللتدن گؤزل سؤز يوخدور ، اونو سئوير اونلاياشاييرواونون يولوندا اؤلمه يي فخر حساب ائدير. ميللتين منافعي جناهي و كيشي سل منفعتدن اوستون گؤرور وبونا اينانير كي هر تورلو بويوك دئيشكليك  عموم ميللتين چاباسيندا آسيليدير. بئله بير آتا بابا سؤزو وار " ميللتين يوكون ميللت داشييار" ميلتچي تك باشينا ميللتين يوكون چكمه يه قادير دئييل او اوزدن ميللتينه موراجيعت ائدير.

ميللته نئجه مراجيعت اتمه اييك ؟

بللي دير كي گون دورومون دوغرو دوشونمه سك يانليش يول سئچه جييك . او اوزدن حركتي  و شرايطي داواملي تحليل ائتمك مجبورييه تينده يك .

 شونيزمين باسقي لاري سون زامانلار آرتيرماسي وپليسي دوروم ياراتماسي خورداد حركتيندن اؤنجه هر طرفلي گؤرونودو. بابك قالاسينين يوروشونون چئشيدلي مئتودلارلا قاباغين آلماسي ، آذربايجان حركتين اؤلومجول بايكوتدا ساخلاماسي ،‌باقير خان مراسيمينه و خوجالي فاجيعه سينين اعتراضينا سرت تئپكي سي و حركتچي لره دولت قوولري طرفيندن آغير باسقيلار آپ آچيق گوروندو و گؤرونور . خورداد حركتيندن اؤنجه عباس بي ليسانين بير مصاحيبه سين دينه ييرديم به ين سؤزلريندن بئله آلديم : ميللتين ايچينه گيرمه لييك وبونون يولو ايكي نفرليك قوروپلار ياراتماق و ميللت آراسي بيلدريش و سي دي يايماق گؤره ويميزدير.  به يين دئديكلريندن بئله آلينير كي مبارزه نين استراتژي وارتباطي مئتودلاردئييشيليب  و باسقي لاري نظره آلاراق ايكي نفرليك قوروپلارا اؤنم وئرير و سي دي يه اوستونلوك وئرمه سي  اونون درين موثبت تاثيرين (سمعي – بصري) ورغولايير .  بو مصاحيبه خورداد قياميندان قاباق اولموشدور و بيليريك كي خورداد قياميندان سونرا باسقي لار آرتيب  درگي لر ، درنك لر ، مراسيم لر ، ميتينگ لر رژيم طرفيندن باغلانيب ،قاباغي آلينيب و يا آغير باسقي آلتينداديرلار. بو دورومدا نه اتمه لييك ؟  فيكريمجه حركتين مدني اولماسي داواملي اولماليدير. هه له ليك بو بيراصل كيمي قبول اولونمالي دير نيه كي  خشونت بيزي محو ائده بيلر ، حركتين يوزايلليك كئچميشينده بو قدر گوجلو اولماميشيق و ايندي بيزي دوشمان يخماغا قادير دئييل آما اؤزوموزشرايطي  دوشونمه سك اؤزوموزو ييخا بيله ريك. ميللتيميزنن سيخ ارتباطا گيرمه لييك . بو مقاله چاليشيرارتباط آراجلارين تانيتديرسين.

ارتباطي ابزارلار:

1- راديو وتلوزيون

2- اينترنت

3- تلفون و فاكس

4- سنتي ابزارلار( سي دي – بيلديريش – ديوار يازما و...)

5- ...

راديو و تلوزيون:

ارتباط اوزمانلارين بيرقيسمي اينترنت و جيب تلفونون ايمكانلارينين آرتيرماسين ، تي وينين اليگيلنمه باخيميندان گئريده قالديغين دوشونورلر. آما اينترنت و جيب تلفونون ايراندا آزاينكيشاف تاپديغينا گؤره تي وي يئنه ده بيرينجي يئري توتور. تي وي ايلديريم گوجونه صاحيب اولان بير معضمه ساييلير، نئجه كي گوناز تي نين ائتگيسين بير نئجه آي تورك ست ده اودوغو زامان هئچ كيم دانا بيلمز. يولداشلارين بعضا يازيلاريندا بئله ايفاده گؤرونور كي "ميللتين نئچه فاييزينين اويدوسو وارو نئچه فاييزي تل استاررا باخابيليرلر." بئله بير ايفاده ده چاليشيلير گونازين و يا تي وي نين ائتگيسين آز گؤرستسينلر، آما گونازين تاثيرينين ايثباتي اونا اولان آلقيشلاروقارقيشلاردير.

ميللتين بيرحيصه سي ده راديو ايله سيخ علاقه ساخلايير. وبو اوزدن اونملي بير مئديا ساييلير. خاريجده اولان سوي داشلاردان تي وي لر و راديولاري گوجلنديرمك ويني تي وي لر و راديولار يارتماق اومولور.

اينترنت:   

ياديمدادير ايرانا اينترنت گلمه سي چوخ موباحيثه لره سبب اولدو بير طرفدن گلجك دونيادان گئري قالماماق اوچون لازيم گؤرونوردو وبير طرفدن ده بو اقيانوسو كنترل اتمك رژيم طرفيندن اولدوقجا آغير بير ايشيدي ، سوندا تهران بونا چاره سيز باش ايدي وايندي كنترل اتمه يي راحاتجاسينا باشارمير و بو اوزدن مللي اينترنت دن سؤز آچير.

« بيل گيتس» مايكروسافتن صدري يازير:" ييرمينجي قرنين سكسن اون ايلليي كيفيت اوستونلويو واريدي ،دوخسان اون ايللي يينده يني تكنولوژي دوروساييلير، ييرمينجي قرنين سون اون ايلليينده سرعت اؤنم داشييرو ييرمي بيرينجي قرن ده سرعت ايكيشافين آچاري دير. "

بوگون اينترنت بيزيم سيلاحميزدير. وحركت فعاللاري اينترنتي قولانماسين اؤيرنمه لي ديرلر.

اينترنت ساحسينده سون ايللرده بويوك بير آدديم آتيليبدير. سيته لر ، قروپلار،فروملارو.... يارنيب و يارانماقدادير بير ميللتچي كيمي اؤز تشكورومو بوساحده چاليشانلارا بيلديريرم .بيزي ايچريده اينترنت سيز هئچه ياخين بيرنومره ييك  بو بير گرچك دير. اينترنت بيرالكتريك ارتباطي ابزار اولدوغونا گؤره ايزله نه بيلر و بو ابزارلا احتياط لا ياناشمالييق .

تلفون:

چوخ تهلوكلي بير وسيله دير و دوشمان راحاتجاسينا بو وسيله ايله بيزم شخصي روحياتيميزي ، اؤزل ياشاييشيميزي ، مللي يولداشلاريميزي و آراميزدا اولان مناسيبتين سوييه سيني و بير كلمه ده هر نه يي ميزي الده ائده بيلر. اولدوقجا تلفونلا علاقه ساخلامامالييق و حضوري گؤروشلريميزي آرترمالييق .

سنتي ابزارلار: ( سي دي – بيلديريش – ديوار يازما و...)

ايندي كي دوروما اويغون ، ائتگيلي و ساغلام بير ابزاردير.

بو ابزار اونجه ده ورغولاديغيميزايكي نفرليك قوروپلارلا داها راحات باشارا بيله ريك.

بو ابزارين بير نئچه اؤزلليي :

-          بيزيم اقتذاريميزي و شونيستي حاكميتين ضعيف لنمه سين  گوسترير

-          ملتيچي موستقيم مللتينن علاقه قورور

-          حركتين ديريليين گورسترير

-          چوخ راحات تكثير تاپيرو گوندمه گلير

-          ميللتچي ني بويوك تشكيلاتي ايشلمه يه يئتيشديرير.(آلتميش ايلدير كي ديري بير تشكيلاتيميز اولماييبدير ومللتچي ميز بو ساحه ده تجروبه سيزدير.)

سوندا آيدين گلجك اوچون يولداشلاردان حركتي هر آچيدان تحليلي اومولور و ارتباط لاريميزين ساغلانماغي اوچون بير داها ديققت لي اولماغا چاغيريلير.

گلجك بيزيم دير

vurğun