DAVUD BƏYƏ CAVAB

Əziz, Davud qardaşım Siz də olmasanız, M. Çöhrəqanlının bir başqa tərəfdarının yazıya cavab verəcəyini gözləyirdim. 

Mən “Azadtribun” saytının sahibinə təşəkkür edirəm ki, mənim yazılarımı oraya yerləşdirmişdir. Eyni zamanda üzr istəyirəm ki, onun saytını həm də mübahisə stoluna çevirməli oluruq. Amma güman edirəm ki, millətsevər bir şəxs kimi o, bunu bizə bağışlasın. Çünki bu mübahisə şəxsi olmayıb, elə milli bir məsələ üçündür.

Yazımdakı orfoqrafik səhvlərə iradlarınızı haqlı sayıram. Gərək yazını yoxlayıb göndərəydim. Amma buna vaxtım yox idi və buna görə sayt sahibinə də bunu bildirərək “ümid edirəm ki, orfoqrafik səhvlər az olsun” yazmışdım. Amma hər halda, səhvlər olub. Məsələn, ingilis qrafikası ilə yazdığınızda vergül işarəsinin yerində Azərbaycan qrafikasında “Ç” hərfi durur ki, bu da sürətlə yazma zamanı bəzən avtomatik olaraq vergül yerinə “ç” hərfi düşməsinə səbəb olur. Nəticədə iki yerdə “ki,” yerinə “kiç” getmişdir. “Səlist” sözünü başa düşməməyiniz təəccüblüdür

Amma mənim iradım heç də Sizin yazınızın orfoqrafik səhvlərinə deyildi. Yazınızda cümlə quruluşlarının əksəriyyəti yerində deyildi. Cümlələrin coxunun nə xəbəri bəlli idi, nə də mübtədası. Əksinə bu yazınızda bu sarıdan ciddi müsbət dəyişiklik vardır.

Əlifba barədə dedikləriniz də yanlışdır və təəssüf ki, Sizin o cümlələrinizdə mən irançılıq və İran təbliğatının təzahürünü görürəm – Şimali Azərbaycana qısqanclıq və nifrət irançılığın elemtinə çevrilmişdir.

Mən Azərbaycanın keçmişində olmuş dövlətlərin nailiyyətlərini rədd etmirəm. Əksinə, Səfəvilər dövləti və onun qurucusu haqqında yazdıqlarımı bir daha oxumağınız lazımdır. Burada bir daha yazım ki, mən Şah İsmayıl Xətaini Azərbaycan tarixinin fəxri sayıram.

Şeyx Məhəmməd Xiyabani və Səttərxan Azərbaycanın milli qəhrəmanlarıdırlar. Biz hər birimiz onlarla fəxr edirik. Amma onların Azərbaycanın müstəqilliyi uğrunda deyil, yalnız Iran daxilində islahatlar, Azərbaycanlılara hüquqlar verilməsi uğrunda mübarizə apardıqlarını danmaq olmaz. Xiyabani öz dövründə Şimali Azərbaycanda yetişmiş Fətəlixan Xoyski, Rəsulzadə, Nəsib bəy Yusifbəyli, Əkbər ağa İbrahimoğlu Şeyxülislamzadə və sairləri kimi millətçi deyildi və Azərbaycanın müstəqil dövlətini qurmaq ideyasına malik deyildi. Əksini iddia edrsinizsə, bircə sənəd adı çəkin.

Qacarlara gəlincə, onlar türk mənşəli olsalar da  Azərbaycan türklərinə həmişə yuxarıdan aşağı baxmış və tam farspərəst olmuşlar. İndi də onların nostalgiya ilə yaşayan nümayəndələri xaricdə oturub bir “Qacar evi” yaramışlar və onların saytına baxsanız Azərbaycan türkünü öyən, ona yaxşı deyən bir kəlmə də yoxdur. Amma aryanizmdən, İranın böyük aryan mədəniyyətindən bolluca dəm vururlar.

Siz Türkçülüklə Türkiyyəni eyniləşdirirsiniz, əziz qardaşım.

Türkiyyənin bayrağı onun tarixindən qaynaqlanır. Bayraqların bu cür yaranması, tarixi proseslər və nə vaxtsa mövcud olmuş dövlətin bayrağının yenidən milli bayraq olması barədə mənim yazımda vardı.

Azərbaycan tarixində mövcud olmuş dövlətlərin bayraqlarına bu keyfiyyətin verilməsinin çətinliyindən idi ki, 1918-ci ildə Azərbaycan Xalq Cumhiriyyətinin parlamenti ona bir bayraq qəbul etdi. Bu bayraq gənc bir millət kimi Azərbaycanlıların tarixi və milli dəyərlərini bərabər nisbətdə əks etdirir və buna görə millidir, əzizdir.

Yenə də israrla GAMOH bayrağını Güney Azərbaycanın “milli bayraği” adlandırırsınız. Əl çəkin bu mənasız isrardan. O bayraq “milli  bayraq” deyil, GAMOH və Çöhrəqanlının bayrağıdır. Sizin tərəfdarlarınızın o bayrağı qaldırmasına etiraz edən və qısqanan yoxdur. Amma ona “ümummilli” yarlığı yapışdırmayın. Digər təşkilatların tərəfdarları vardır ki, başqa cür düşünürlər və Sizin bu mənasız israrınız milləti bölür, parçalayır.

Mənə elə gəlir ki, yazınıza bu qısa izahat kifayətdir. Yazını “Azadtribun” saytının sahibindən min dəfə üzr istəyərək yenə də onun üzərinə göndərməli oluram. Amma bu Sizə də sonuncu cavabdır.

F.

P.S. Ötən yazıdakı orfoqrafik səhvləri vaxtım çatan qədər düzəldərək bir daha göndərirəm. Babək bəy onu əvəzləyə bilərsə, elə düşünürəm ki, yazını oxumaq istəyən digər soydaşlarımıza da kömək etmiş olacaq.

P.S.S. Mənə “Qardaş” və eləcə “bəy” deyə müraciət edə bilərsiniz.