صفرخانين حيات سفري

حميد داديزاده

صفر قهرمانيان بير انسان عمرونو حبسخانه‌ده قالاندان سونرا بو دونيادان کوچدي. ملت لرين تار يخينده و اونلارين درين کولتور و معنوي حياتلاريندا بير نشانه‌لر، کدلار وار، کي تاريخ بويو ديللرده ازبر اولوب ابدي قالاجاقدي. زامانين گئچمه سي و دورانين ديشمه سي بو نشانه لري مللتلرين تاريخي صحيفه لريندن سيله بيلمز. هر ميللتين کيمليگي ، وارليغي ، هويتي و کاراکترلارين بو نشانه لرله تانيماق دا اولا بيله‌ر. صفر بو سيرادا آذربايجان تاريخيميزده بير نشانه دير.

صفر خان ايران آذربايجانين بير بويوک قهرمان اوغلو اولاراق، گنج ايکن ظولمکار اربابلار و فئودال لارلا مبارزه يه باشلادي. سفر خان آذربايجان خالقي نين نشانه سي اولاراق، ميللتيميزين ديلين، شرفين، وارليغين و تاريخين ۳۲ ايل شاه رژيمينين حبسانه لرينده قورويوب ساخلادي. او بير بايراق کيمي هر بير زامان هاوالانيب، دايانيغلي، قدرتلي و محبتلي بير انسان کيمي مينلر آزادليق يولون گئدنلره بايراقدار اولدو. صفر خانين آدي آذربايجان تاريخي، کولتوري و مدنيتينده بابک، ستارخان، خياباني و باشقالاري کيمي حک اولونوب ياشيه جاقدير.
صفر خان بير آيکان کيمي ميللتيميزين سسين، آرزولارين و اونون ظولمه قارشي مجادله ايده‌الارين ترنم ائدير. ۳۲ ايل سورگونلر، اشکنجه لر دوستاقلاردان سونرا، صفر خان تهرانين اوين حبسانه سيندن آزاد اولاندان سونرا، دوستلاريميزين چيکينلري اوستونده چوخ حرمتله قارشيلاندي.

اونون سويملي آذري ديلي، انسان کاراکترلاري، متانت و دوزومو افسانه لرده قيد اولماليدير.

صفر خانين عمور سفري و حيات يوللاري بوتون ظولم آلتيندا قالان مولتي کالچير (نئچه مدنييتلي) ئولکه لرده بير سمبل اولا بيله‌ر. تاسف له صفر خان بير دسپوتيک نظامدان قورتولارکن باشقا بير انسان تاپدالايان رژيمله اوز اوزه اولدي.
صفر خانين ايده‌الارين آذربايجانين گله‌جک نسيللري دگرله نديره جک . اونون سسي و مهربان باخيشي ائليميزه سوينج و الهام ورير . معاصر شاعريميز نه گوزه‌ل بو ايده‌الاري سويله ميشدير:

کاش کدر آلمايا يئر کوره‌سيني

انسانلار غصه‌يه دولمايا بئله

هامي سئوگي دئيب سئوگي ائشيده

داغلي بير اوره‌کده اولمايا بئله

هر باخيش هر دوداق هر ديل هر آغيز

پاييني سئوينجله داشييا بيله.......

(عليرضا ميانالي)

آذربايجانين ضياليلاري و باشقا عدالت پرور و صلح سون وطنداشلاريميز اونون تورپاقا تاپشيرما مراسمينده اشتراک ائديب و حاضر اولدولار. يوزلرجه توپلانتي، چيخيش و مجلس بو الهام وئره‌ن انسانين حاقينده تشکيل وئريلدي و يازيلار يازيلدي. سوزومون سونوندا بونا اشاره ائديم کي صفر خان حاقينده لازم اولان تديبرلر و اونا لايق خدمتلر عمله گلمه‌دي. يالانچي ايرانچيلار واقتي غنيمت بيليب ، صفر خاني وفات ائدندن سونرادا راحات بوراخميوب، اونا تهمت وورورلار

هر حالدا، سعادت و آزادليق اولدوزو وطنيميزده دوغان زامان صفر خانين آدي و اونون کاريسماتيک کاراکتري داها ديللره دوشوب وائللر ايچينده يايلاجاغ.

روحو شاد و آدي ابدي قالسين.