سئویملی یولداشیمیز " رضا عباسی " جنابلارینا اتحاف اولونور

"آنا دیلی آزادلیق بیرلیگی" و سیزین گو روشلرینیزآیدین ائل سئوه ر(گونئی آذربایجان اویره نجی سی)

بیر-  سون گونلرده آذربایجان فعاللاری و تشکیلاتلاری آراسیندا  اولان  یونگول-یونگول  دارتیشمالار آچیق آشکار آذربایجان سیاسی فعاللارینین و تشکیلاتلارینین سیاسی بلوغا چاتماماسیندان خبر وئریر. اوزه للیکله " گاموح" و اونون یانداشلارینین داورانیشلاری گونئی آذربایجان سیاسی اتمسفرینین اخلاقی ایلکه لرده ن یوخسون اولدوغونو ثبوت ائتدی. داها دوغروسو اوتانمادان سویله مک ایسترسه ک آرتیق گاموح و گاموح چیلار گونئی آذربایجان میللی حرکتینین انگل لرینه و اونون دونیا سوییه سینده آبری سیزلیغینا سبب اولموشلار. یئنی بیر ولایت فقیه آراییشیندا اولان گاموح چیلار آرتیق بت پرست لیگه اوز دونده رمیشلر. من گاموح لیدئری ( بیر پروفسور  و اونیوریسیته معلیمی کیمی) و گاموح چیلارین دئدیگی (گونئی آذربایجان رهبری) اولان سایین چهرگانی ده ن بیرنئچه سوالیم وار: " سیز بو یاشا کیمی و گوونلی بیر اولکه ده اولدوغونوزا باخمایاراق نئچه دانا کیتاب و یا آنالیتیک مقاله گونئی آذربایجانین سیاسی-اجتماعی-اقتصادی مسئله لری ایله ایلگی لی یازمیشسینیز؟". عجبا سیزین و یولداشلارینیزین بو قده ر رهبر و بایراق اوزه رینده دورماسینی نئجه دیرلندیرمک اولار؟ سیز آذربایجانامی فیکیرله شیرسینیز یوخسا گونئی آذربایجان دیکتاتوریا جمهوریتینه؟ اگر سیز اوزونوزو یویوب یارپاق اوستونه قویسانیز بئله سیز بو سوره ج ایچینده گونئی آذربایجان میللی حرکتی نی پارچالانمایا، گئری چلیگه و دیکتاتوریایا گوتوروسونوز. من سیزین بیر سیاسی رقیبینیز دئییلم. آما سیزین یولونوزون سونوجو نهایت دیکتاتوریا یادیر. سیز بوتون کورپولری اوچورتدونوز. سیز اوولینی یاخشی باشلامیشدینیز آمما گئت گئده ایشلری خرابلادینیز. یقین ساغ و سول قوللارینیزی هر کسده ن یاخشی تانییرسینیز. سیز هارا گئدیرسینیز؟ لوطفا آذربایجان نامینه بو عیناددان ال چه کین. تبریزین کوچه لرینده ایچدیگینیز آندلاری یادا سالاراق گلین اختلاف توره ده ن گاموح تشیکلاتینی قاپادین. و یا ان آزایندان قیرغا چکیله ره ک اونو ایصلاح ائتمه یه چالیشین. سیز بیزی اونوتسانیزدا بیز سیزی و سوزلرینیزی و داورانیشلارینیزی اونوتمامیشیق. سیز چوخ ائرکن یولون سونونا گلدینیز.  من و منه تای لارا خائن دامغاسی و یا یالانچی-قوندارما آغلایا آغلایا حمایه مکتوبلاری سیزین سورونلارینیزی چوزمه یه جک. گلین آذربایجانین چهرگانی سی یوخ بلکه نلسون ماندنلاسی اولون. گئرچک لری قبول ائدین و گئری اوتورون. تاریخ ده اوزونوزدن بیر مثبت ایز بوراخین. ایندیه قده ر چکدیگینیز زحمتلری باده وئرمه یین.

ایکی-  دموکراسی، سکولاریسم و اوزگورلوک آذربایجان میلی حرکتینین آییریلماز حیصه سی دیر. هر بیر بیرلیک بو ایلکه لر چرچیوه سینده اولماق زوروندادیر. دموکراسی یه اینانان چالیشقان آذربایجانچی لارین بیر آرایا گلمه زامانی گلمیشدیر. ایستر باغیمسیزلیق ایستر فدرالیسمه اینانانلار اورتاق آماج اطرافیندا بیرلشه بیلرلر. بیز آرتیق تشکیلاتلاردان یورولدوق و سون اولاراق اوزوموزو مستقل آذربایجانچیلارا توتوروق. ایچری نین دورومو هر کسه بللی دیر. اوزوموزو سیزلره توتورق. سایین دکتر صدر، دکتر جوانشیر، دکتر غروی، فاحته خانیم زمانی، بویوک رسول اوغلو، دکتر رضا براهنی، علیرضا میانالی، ماشااله رزمی، انصافعلی هدایت، علیرضا اردبیللی، یاشار تبریزلی، آیدین تبریزلی، بابک آذری، انتظار، تقی تبریزلی، احمد اوبالی و... سیزین فیکرینیزی " آنا دیلی آزادلیق بیرلیگی" حاقدا اویرنمک ایستردیک. دونیانین هر یئرینه سپله نمیش آذربایچانچی لارین بو باره ده فیکری نه دیر؟ هر کسه بللی دیر گونئی آذربایجان آزادلیغی یولوندا آنادیلیمیزین آزادلیغی بیرینجی آشامادیر. بو بیرینجی آشاما دوغرولتوسوندا بیرلشمه یه نه دئیرسینیز؟ ایسترسه نیز گلین بیرلیگی بورادان باشلایالیم. اگر بو بیرلیک یارانا بیلیرسه دئمک سونرا بویوک بیرلیک لره ده گئچه بیلریک. بیز سیویل ایطاعتسیزلیک یونتمی ایله سسیمیزی دونیا مئدیاسی قولاقلارینا چاتدیرا بیلریک. فاخته خانیم و بویوک بی کیمی قوجامانلاریمیزا عشق اولسون. اونلار بو ایشی باشارا بیلدیلر. بو گون ایچریده توتولانلارین حاق سسینی بونلار دونیایا چاتدیردیلار. اله گلن تجروبه لرده ن یارارلاناراق واللاه بو بیرلیگی ده قورا بیله ریک. آیدین لاریمیز تاریخی سوروملولوقلارینی لوطفا بیر آز باشا دوشسونلر.  بو بیرلیگین اوزونه مخصوص سمبلودا اولا بیلر. بو سمبل و نیشان بایراقلادا هئچ ایلگی سی اولما مالی دیر. 

اوچ- سیاسی لریمیز و یازارلاریمیز نده ن دوروب اوزاقدان باخماغا دوام ائدیرلر؟ سون گونلرده اولان اولای لارا نده ن موناسیبتینیزی بیلدیرمیرسینیز؟ سیزینده آدینیزی خائن دئیه قویماقدانمی چکینیرسینیز؟ تاریخ قارشیسندا و گله جک نسیلین قاباغیندا اولان جوابینیز نه اولاجاق؟ هر زامان اینترنت صحیفه لرینده گوزه ل گوزه ل مقاله لرینه راستلادیغیمیز ده یرلی یازارلاریمیز هاردا قالیبلار؟ بو قده ر چاغریش قارشیسیندا سوسمانین نده نی نه اولا بیلر؟ بیز بیرلیک ده نسه پارچالانیریق سیز ایسه حالا باخیرسینیز؟ بیز بئله بیرلیک قورا بیله ریک. بوندان آرتیق اوزموزو باشقا قوروملار و میللتلرین مسخره سینه چئویرمه یه لیم.

بو یازی نی اوخودون! دایانمادان، چکینمه ده ن  همن سنده اوز فیکیرینی یاز. آذربایجان گنجلیگینین سسینه سنده سس وئر.