«AZADLIQ» BLOKUNUN HƏMTƏSİSÇİLƏRİ AŞ PA-nın MƏRUZƏÇİLƏRİ İLƏ GÖRÜŞÜB

Oktyabrın 30-da «Azadlıq» siyasi blokunun həmtəsisçiləri Avropa Şurası Parlament Assambleyasının Azərbaycan üzrə məruzəçiləri Andreas Herkel və Toni Loydla görüşüb. Bu haqda AXCP Mətbuat Xidmətinə verdiyi açıqlamasında AXCP sədri Əli Kərimli bildirib ki, görüşdə AŞ PA-nın yanvar sessiyasında Azərbaycanla bağlı qəbul edilmiş qətnamədən sonra mövcud vəziyyət və ölkədəki siyasi durum müzakirə olunub. «Xüsusilə AŞ PA qətnaməsinə uyğun olaraq demokratik seçkilərin keçirilməsi üçün Azərbaycanda şəraitin yaradılıb-yaradılmaması, o cümlədən AŞ PA-nın Seçki Məcəlləsi ilə bağlı tövsiyələrinin, həmçinin seçki saxtakarlığına yol verən şəxslərlə bağlı tövsiyələrin icra qaydaları, insan hüquq və azadlıqlarının təminatı, siyasi partiyaların fəaliyyət imkanları, mətbuat azadlığının vəziyyəti, siyasi məhbusların taleyi geniş müzakirə olunub. Söhbət zamanı son vaxtlar «Azadlıq» qəzetinin binasının əlindən alınması istiqamətində hökumətin atdığı addımlar, ümumiyyətlə bu qəzetin dayandırılması üçün edilən səylər, bütövlükdə müstəqil KİV-ə qarşı olan hücumlar ətraflı müzakirə mövzusu olub».