عباس لیسانینین محکمه یه یازدیغی اعتیراض مکتوبو

اولو تانری نین آدی ایله  

  خورداد آیینین آلتیسی حادیثه لری ایله باغلی اردبیل اوستانی محکمه سینین 29.07.1385 سایلی قرارنا اعتیراض مکتوبو. 

  دوسیالاری یئنیدن ده یَرلندیرن اردبیل اوستانینین 193 سایلی محکمه سینین سایین باشقانی سالام! 

  حؤرمتله حضورلارینیزا چاتدیرمالییام کی، من عباس لیسانی اردبیلین 105- جی جزایی شعبه سینین 105.85- 546 سایلی قراری اساسیندا 16 آی زیندانا و 50 ضربه شاللاغا محکوم ائدیلمیشم. قانونون 5.7.85-630 مادده سینه ایستیناد ائده رک، حاققیمدا چیخاریلان بو حؤکمو عدالتسیز، غئیری- حقوقی، سیاسی و تامامی ایله ظالیمانه و غئیری- قانونی اولاراق حساب ائدیرم. بو وسیله ایله ده اعتیراضیمین سببلرینی حضورلارینیزا چاتدیریرام: 

  1. منیم حاققیمدا چیخاریلان حؤکمده بیرینجی ایتتیهام بوندان عیبارتدیر کی، "غئیری- قابیلی قبول حرکتلرله جمعییتین عمومی آساییشینی پوزماق، 6.3.86 تاریخینده اردبیل شهرینده ایغتیشاش مقصدی ایله نیماییش تشکیل ائتمک. "

  آ- ایران ایسلام جمهورییتینین آنا یاساسینین 27- جی مادده سینده دئییلییر: "سیلاحسیز نیماییش تشکیل ائتمک ایسلامین اساسلارینی اینکار ائتمه مک شرطی ایله جایزدیر."  قانونی اساسینین بو شکیلده آچیق- آیدین صراحتی و آیدینلاتماسی اورتادا ایکن، میللتین او میللی حماسه ده دؤولتین رسمی اورقانی اولان "ایران" قزئتینین شرمسیز، حیاسیز تحقیرینه اعتیراض اولاراق خیابانلاردا نیماییشلره قاتیلماسی نه اینکی غئیری - قانونی دئییل، بلکه بو میللتین ان قانونی، ان نجیب، ان باریشجیل حاققی اولموشدور. جرأتله سؤیله مک اولار کی، بو نجیب و اصیل رفتار آنجاق آذربایاجان میللتی کیمی مدنی بیر میللته مخصوصدور. آذربایجان  میللتی بو باریشجیل و جسور داورانیشی ایله تورک میللتینی تحقیر ائدن عامیللره، آمیرلره و دیگر مجریملره اؤزلرینی ایصلاح ائتمه لری اوچون یئنه ده فورصت تانیمیشدیر.  

  ب- ایتتیهامین بیر قیسمینده ادعا ائدیلیر کی، "غئیری- قابیلی قبول حرکتلرله جمعییتین عمومی آساییشینی پوزماق و ایغتیشاش تؤرتمک..."  تأسفلر اولسون کی، قاضی و حؤکمون وئریلمه سینده تاثیری اولان دیگر عامیللر، منی محکوم ائتمه هیجانینا ائله قاپیلمیشلار کی، بو ایتتیهامین خورداد آیینین 6- داکی میللتین مقدس قییامینا کئچرلی اولمایاجاغینی آنلامامیشلار. چونکو یوز مینلرله اردبیل اهالیسینین دیگر تورک شهرلرینده اولدوغو کیمی بو مؤحتشم و تاریخی حماسه ده ایشتیراک ائتمه سی "ایغتیشاش تؤرتمک" دئییل، نیظام- اینتیظامی برقرار ائتمک و ایرانین سیاسی جوغرافییاسیندا غئیری- فارس میللتلره تطبیق ائدیلن مدنی، ایقتیصادی امنییتسیزلییه، گوونسیزلییه و بونون نتیجه سی اولاراق آذربایجاندا حاکیم اولان آنارشیزمه سون وئرمک اولموشدور.  

  2. منیم حاققیمدا باشقا بیر ایتتیهام بو شکیلده دیر:  " خصوصی و دؤولت املاکینی تخریب ائتمک آماجی ایله اهالینی تحریک، ترغیب و اونلارا یاردیم ائده رک ذیکر ائدیلن تاریخده 66 بانکین خسارت گؤرمه سینه سبب اولماق، وطنداشلارین خصوصی ماشینلارینا ضرر وئرمک، ریفاه دوکانینی زیانا اوغراتماق، اردبیل دؤولت یول پولیسینی تخریب ائتمک "  

  آ.  جورمون تعریفینده آنلاتیلیر کی، قانونون موعین ائتدیگی فعل یا ترکی-فعل همچی نین جورمو تشکیل ائدن عنصورلر بونلاردان عیبارتدیر: ماددی- معنوی و قانونی بوشلوغون اورتادا اولماسی، متتهیمین فعللرینه جورم کیمی باخیلماسینا مانع اولور. یاردیم قاورامی (ایصطیلاحی) اونون لغت معناسیندان آسیلی اولمایاراق، حقوقی آنلامدا فعللره تحریک ائدیجیلیک ایفاده ائدر کی، منیم حاققیمداکی ایکینجی ایتتیهامدا اونون اوزرینده دورولموشدور. بوتون دونیانین دا بیلدیگی کیمی جاری ایلین خورداد آیینین 6- دا 200 مین نفردن آرتیق اردبیلین غئیرتلی اهالیسی بؤیوک تورک میللتینی تحقیر ائدن کاریکاتورا اعتیراض اولاراق نیماییشه قاتیلمیشدیر. بو نیماییش آذربایجانین دیگر شهرلرینده اولدوغو کیمی میللتین اؤز ایچیندن سئل اولوب داشاراق تظاهور ائتمیشدیر. آذربایجان- تورک میللتی بئله لیکله، باریشجیل احوال- روحییه ایله و مدنی شعارلارلا فارس عیرقچیلرینین عمللرینی محکوم ائتمیشدیر. بو دورومدا من میللتیمین ایصرارلی ایستکلرینه بویون اََیه رَک نیطق سؤیله مه یه باشلادیم و کئچن یوز ایل عرضینده مظلوم آذربایجان میللتینه ائدیلن ایقتیصادی- مدنی ظولملر حاققیندا دانیشدیم. تاکید ائتدیم کی، میللتین بو بؤیوک نیماییشی، سادجه بیر کاریکاتورا اعتیراض اولاراق دئییل، هم ده فارس حاکیملرین شووینیست سییاستلرینه قارشیدیر. آنجاق تأسفلر اولسون، هر زامان اولدوغو کیمی ظولمون عامیللری منطیقی اعتیراضی تحمل ائده بیلمه ییب، مودافیعه سیز میللتی اَزمَک اوچون یئرلی اولمایان یابانجیلاری میللتین اوستونه یوروتدولر. یئرلی اولمایان یابانجیلار مظلوم آذربایجان میللتینی اَزمَک اوچون هر نؤوع آله تدن، او جومله دن ده یه نَکدن، خصوصی حاضیرلانمیش چوماقلاردان، گؤز یاشاردیجی قازدان ایستیفاده ائدیر و هاوایا آتش آچاراق، میللتین مدنی حرکتینی ساواش صحنه سینه چئویردیلر. دئمک، منیم میللتین گئنیش میقیاسلی مدنی اعتیراضینا "یاردیم" ائتمه گیم عبث بیر ادعادان باشقا بیر شئی دئییلدیر. آنجاق حاققیمدا حؤکم چیخاران بو ادعادا اولدوقلاری اوچون بیلمه لیدیرلر کی، منیم بوتون فعالیتلریم، او جومله دن همین گون میللته خیطابن صحبتیمین هامیسی حادیثه لرین ماهییتینی بیلن اردبیل اهالیسینین حضوروندا اولموشدور. منیم بوتون تلاشیم بو حماسه ده ایشتیراک ائدن میللتین غضبینی انگلله مک اولموشدور. آدام دؤوَن اؤزَل کادرلارین غئیری- اینسانی موداخیله لری اولمادیغی مددتجه  من بو ایشی باشارمیشدیم. وضعیت بو شکیلده ایکن حاققیمدا امر چیخاران عامیللر  او گونکو منیم حرکتلریمله باغلی اولاراق، هئچ بیر نیطقیمی، رفتاریمی ویدئو- سند شکلینده اورتایا قویمادان، منی گیزلین محکمه ده محکوم ائتمک ایسته ییرلرسه، اعلان ائدیرم کی، لازیم گلیرسه 10 مینلرله اینساني شاهید کیمی محکمه یه دعوت ائتمه یه حاضیرام. چونکو بؤیوک آذربایجان میللتی هئچ بیر تاریخی مرحله ده اؤز فداکار ائولادلارینی یالنیز بوراخمامیشدیر. بو گون آذربایجانین حاقسئور اینسانلاری جزالانیر، اصلینده ایسه بوتون ایمکانلاردان فایدالاناراق آذربایجانی ایقتیصادی و مدنی باخیمدان بدبختلییه سوروکله ین عامیللر جزالانمالیدیر. بؤیوک تورک میللتینی اؤز رسمی دؤولت قزئتلرینده تحقیر ائدنلر موحاکیمه ائدیلمه لیدیر. اونلار موحاکیمه ائدیلمه لیدیرلر چونکو بو عامیللر تورک میللتینی تحقیر ائتدیکلری اوچون نه اینکی عذر ایستمه دیلر، حتّی میللتین ان مدنی اعتیراضینی بوغماق اوچون سیلاحلی گوجلرینی آذربایجانا یئریدیب بو میللتی اَزمه یه، دؤومه یه باشلادیلار. بو وحشیلیک ایسه سایسیز آذربایجان ائولادلارینین شهادتی ایله نتیجه لندی. آذربایجان میللتینه ائدیلن بو تجاووز تاریخیمیزده کی  21 آذر حادیثه سینی تصوورلریمیزده جانلاندیردی. او زامان دا 70 مین نفر دده لریمیز اؤز میللی حاقلاری یولوندا قانلارینا قلتان ائدیلدی. اونلارین بیریجیک گوناهلاری بوندان عیبارت ایدی کی، آذربایجان میللتینه آزادلیق و اینسانی حقوق ایسته مَکده ایدیلر. میللتین معصوم جاوانلاری دئییل، آذربایجان میللتینین مدنی و اخلاقی اعتیراضینا سیلاحلا جاواب وئرنلر جزالانمالیدیرلار. مینلرجه آذربایجان اوغوللارینی اطلاعاتین زیندانلاریندا وحشیجه سینه فیزیکی و روانی ایشکنجه ائدنلر جزالانمالیدیر. بوتون بو وحشی عمللر بیر داها بللی اولان بو مساژی تکرار ائدیر کی، سن آذربایجانلی تورک، من فارسین کؤله سی اولمالیسان کی،  یاشاییش حاققیندان برخوردا اولاسان و بیر گون اویانیب، آزاد میللت اولاراق یاشاماغی عاغلیندان کئچیره جک اولسان بیلمیش اول کی، جاوابین گولله اولاجاقدیر. آذربایجان میللتی باغیشلایا بیلر، لاکین میللتین حماسه یاراتدیغی بیر گونده کؤله کیمی اؤزلرینی و دوشونجه لرینی فارس شووینیزمینه تسلیم ائدنلری هئچ واخت اونودا بیلمز. نه قدر راحاتجا اؤز میللتلرینه آرخا چئویردیلر او بسیجیلر و پاسدارلار کی، شووینیزمین الینده اویونجاقدان باشقا بیر شئی دئییللر. شووینیزم بو شکیلده آذربایجان میللتی نین بو قئشرینی آذربایجانا قارشی ایستیفاده ائتمه گی باشارمیشدیر. بلی، آذربایجان میللتی باغیشلایا بیلر، لاکین سوموکلری اؤز سویداشینین ضربه لری ایله قیریلان آذربایجانین فدایی اوغوللارینین آجی ناله لرینی هئچ واخت اونودا بیلمز. شووینیزمین چیرکین سییاستی میللتیمیزی اؤز جاهیل و روحو سؤمورولموش، روحو قارانلیقلارا گؤمولموش اینسانلاری واسیطه سی ایله اسیر ائتمیشدیر. بلی، آذربایجان میللتی یالنیز خطاکارلاری دئییل، خاینلری ده باغیشلایا بیلر، آنجاق بیر شرطله کی، خورداد آیینین اوللرینده میللتین وئردیگی مئساژی دویوب و میللتین باغرینا دؤنسونلر. «فاعتبرو یا اولوا الابصار». (عبرت آلین ائی بصیرت اهلی). خورداد آیینین بیرینجی یاریسیندا حیله گرلر، ساوالان اوغوللارینین آذربایجانین دیگر یوردلاری ایله امکداشلیغینی و هم رایلیگینی انگلله مک اوچون ال-اله وئرمیشدیلر. بو حیله گرلر گون کئچدیکجه بیر- بیرلرینی تبریک ائدیر و مرکزه خبر وئریردیلر کی، "اردبیلده هئچ بیر حادیثه  باش وئره بیلمز."  آنجاق خورداد آیی نین 6- سیندا مجهول قهرمان اوغوللارین هیممتی و ایراده سی ایله ساتقینلارین و مانقورتلارین خام خیاللاری آلت- اوست اولدو. ساوالان ائولادلاری ایثبات ائتدیلر کی، آذربایجانین دئموکراتیک و مدنی حاقلاری یولونداکی موباریزه ده، حتّی آذربایجانین دیگر بؤلگه لریندن داهادا ایره لی کئچمک ایسته ییرلر. اردبیل بو شانلی، شرفلی و خئییرلی ایشده سانکی یوردوموزون دیگر شهرلری ایله یاریشا گیرمیشدیر. بلی، بوتون فیتنه لره رغمن ساوالان اوغوللاری اؤز نَفسلرینه و ایمانلارینا گووه نی کشف ائتمیش، میللی غرورو بؤیوک بیر ووقارلا سرگیله میش اولدولار. اؤز اوجا ایراده لری ایله اردبیل اوستانیندا بعضی تورک دوشمنی و فاشیست سیمالاری دا ایفشا ائتدیلر. اونلاردان بیریسی اردبیلین ایمام جومه سی سید حسن عاملیدیر. هر خطبه سینده اؤزونو و باشقالارینی تقوایا دعوت ائدن واعیظ، عمل، ایمتحان و سئچیم عرصه سینده فرقلی دوروش سرگیله دی . خورداد قییامیندا ایمام جومه نین گوناهسیز اینسانلاری وحشیجه سینه ازیب، دؤومکده اوینادیغی رول هر کسه معلومدور. حکومتین بوتون ایمکانلاریندان فایدالانیب و "دینی"  خطبه لری ایله ساوالانین اویاق ائولادلارینی قانینا غلتان ائدن شهرین واعیظی ایدی. میللتین افکاری- عمومیسینده بو میللتین شرفلی ائولادلارینی یاباجیلارین موزدورو کیمی تقدیم ائدن ده شهرین واعیظی ایدی. مرکز نیشینلرین شووینیست سییاستینین قوربانی اولان "بسیجی و سیپاهی" نین ده آذربایجانین میللی فعاللارینین اوزه رینه گئتمه سینه فتوا وئرن یئنه شهرین واعیظی ایدی. واعیظین نه وئجینه دیر کی، اونلار قارداش قانی تؤکه جک و آنا وطنلری قارشیسیندا ابدییا اوزو قارا قالاجاقلار. بوتون بونلار اونا گؤره ایدی کی، آذربایجانین آزادلیق فریادلاری اؤز نوطفه سینده باسدیریلسین،بوغولسون. آذربایجان میللتینین آزادلیق و عدالت یولونداکی موباریزه سینی دَیه نَکله،ایشکنجه ایله، سیلاحلا سؤندوره بیله جکلرینی ظن ائدنلر نه قدرده خام خیالدادیرلار. داها اؤنجه کی  محکمه ده بیر ساوونمامدا سؤیله دیگیم کیمی یئنه ده دئییرم کی: "آذربایجان میللتی سسسیز قالمایاجاقدیر."  بونون سببلرینی ده ایختیصارلا بیان ائتمیشدیم و یئنه ده تام قلبی بیر گووَن و اینانجلا بیان ائدیرم کی: "بؤیوک آذربایجان میللتی آزاد اولاجاقدیر."  چونکو بَنزَرسیز خورداد حادیثه سی بو قورتولوشو موژدله میشدیر. چونکو کئچن یوز ایلده فارس فاشیزمینین تؤرتدیگی عیرقی و مدنی قتل و عاملارا  باخمایاراق، بو گون دیگر میللتلرله بیر یئرده آذربایجان میللتینین ده ماددی- معنوی یوکسه لیشینه، گوجلنمه سینه شاهید اولماقداییق. بو دا فارس عیرقچیلرینین سیستئملی شکیلده آذربایجانا تطبیق ائتدیکلری عیرقچیلیک سییاستینین مغلوبییته اوغراماسیندان خبر وئرمکده دیر. دیگر ساوونمالاریمدا بو اؤنملی نوکته لره توخوموشدوم کی: " آذربایجان میللتینین مدنی حرکتی ایله باریشجیل و اینسانی داورانماق یئرینه غئیری- معقول و زوراکیلیق یولونو ترجیح ائتسه لر، بیر گون گله جک کی، کیچیک اویغون بیر کولک اسدیگینده آذربایجان میللتینین کول آلتیندا ظاهیرن گؤرونمز اولان وولکان ایراده سی پارتلایاجاقدیر. او زامان آپارتایدین، تبعیضین و ظولمون سارایلاری آذربایجان میللتینین غضبینده اود توتوب یاناجاقدیر. بو تاریخین امریدیر، تاریخی ضرورتدیر." اگر ایقتیداردا اولمانین سرخوشلوغو و شووینیست تکببورلوگو قولاقلاری کار ائتمه سه یدی "خورداد حماسه سی"نین وئردیگی مئساژی درک ائتمک فورصتینی آنلاردینیز و بو ایفادنی جیدی شکیلده درک ائدردینیز کی: «فاعتبرو یا اولوالابصار». خوردادین تاریخی حماسه سی وعد ائدیلن وولکاندان سادجه بیر گؤرونتو و تظاهور ایدی کی، بو فریادلار اگر ائشیدیلمز، دویولماز اولورسا بؤیوک بیر پارتلاییشلا آذربایجان تورک میللتینین میللی ایراده سی حرکته کئچه جکدیر. بو پارتلاییشین دالغالاری فارس عیرقچیلرینین، نژادپرستلرینین کؤکونو کسه رک اونلاری اؤز بابالارینین یوردو اولان قومساللیقلاردا، کویرلرده دفن ائده جکدیر. سون سؤز اولاراق دا بونو سؤیله مک ایسته ییرم: آذربایجان میللتینین موباریزه تاریخی ایثبات ائتمیشدیر کی، نه زامان بو میللت اؤنم وئردیگی بیر ایشه ایراده ائتمیشسه، بؤیوک بیر غزمله اؤز هدفینه چاتمیشدیر. آذربایجان میللتینین ایراده سینی انگلله یه جک هئچ بیر قوووه اولمامیشدیر. بو گون ده یئنه اؤیله اولاجاقدیر و عاغلی باشیندا اولان سینانمیشی تکرار سینامامالیدیر. آذربایجان ائولادلارینی حبس ائتمک، اونلارا ایشکنجه وئرمک خطاسیندان ال چکیلمه لیدیر. بو ایشکنجه لر، زیندانلار، تعقیبلر، سادجه آذربایجانین موباریز ائولادلارینی داها دا یئتیشدیره جک، داها دا کسکینلشدیره جکدیر. 

  چکیج آلتیندا محققر ازیلیر گونلرجه 

  بیر ده میر پارچاسی بیر تیغی- مهیب اولماق اوچون 

  عباس لیسانی 29.7 1385 اردبیل 

Abbas Lisaninin Məhkəməyə yazdığı etiraz məktubu

Ulu Tanrının adı ilə

Xordad ayının altısı hadisələri ilə bağlı Ərdəbil ustanı məhkəməsinin 29.07.1385 saylı qərarəna etiraz məktubu.

Dosyaları yenidən dəyərləndirən Ərdəbil ustanının 193 saylı məhkəməsinin sayın başqanı salam!

Hörmətlə hüzurlarınıza çatdırmalıyam ki, mən Abbas Lisani Ərdəbilin 105-ci cəzai şöbəsinin 105.85-546 saylı qərarı əsasında 16 ay zindana və 50 zərbə şallağa məhkum edilmişəm. Qanunun 5.7.85-630 maddəsinə istinad edərək, haqqımda çıxarılan bu hökmü ədalətsiz, qeyri-hüquqi, siyasi və tamamı ilə zalimanə və qeyri qanuni olaraq hesab edirəm. Bu vəsilə ilə də etirazımın səbəblərini hüzurlarınıza çatdırıram:

1. Mənim haqqımda çıxarılan hökmdə birinci ittiham bundan ibarətdir ki, “qeyri-qabili qəbul hərəkətlərlə cəmiyətin ümumi asayişini pozmaq, 6.3.86 tarixində Ərdəbil şəhrində iğtişaş məqsədi ilə nimayiş təşkil etmək”

a- İran İslam Cümhuriyətinin Ana Yasasının 27-ci maddəsində deyilıir: “Silahsız nimayiş təşkil etmək İslamın əsaslarını inkar etməmək şərti ilə caizdir.” Qanuni əsasinin bu şəkildə açıq-aydın sərahəti və aydınlatması ortada ikən, millətin o milli həmasədə dövlətin rəsmi orqanı olan “İran” qəzetinin şərmsiz, həyasız təhqirinə etiraz olaraq xiyabanlarda nimayişlərə qatılması nəinki qeyri qanuni deyil, bəlkə bu millətin ən qanuni, ən nəcib, ən barışcıl haqqı olmuşdur. Cürətlə söyləmək olar ki, bu nəcib və əsil rəftar, anaq Azərbayacan milləti kimi mədəni bir millətə məxsusdur. Azərbaycan  milləti bu barışcıl və cəsur davranışı ilə Türk millətini təhqir edən amillərə, amirlərə və digər mücrimlərə özlərini islah etmələri üçün yenə də fürsət tanımışdır.

b- İttihamın bir qismində iddia edilir ki, “qeyri-qabili qəbul hərəkətlərlə cəmiyətin ümumi asayişini pozmaq və iğtişaş törətmək...” Təəssüflər olsun ki, qazi və hökmün verilməsində təsiri olan digər amillər, məni məhkum etmə həyəcanına elə qapılmışlar ki, bu ittihamın Xordad ayının 6-daki millətin müqəddəs qiyamına keçərli olmayacağını anlamamışlar. Çünkü yüz minlərlə Ərdəbil əhalisinin digər Türk şəhərlərində olduğu kimi bu möhtəşəm və tarixi həmasədə iştirak etməsi “iğtişaş törətmək” deyil, nizam-intizamı bərqərar etmək və İranın siyasi coğrafiyasında qeyri-fars millətlərə tətbiq edilən mədəni, iqtisadi əmniyətsizliyə, güvənsizliyə və bunun nəticəsi olaraq Azərbaycanda hakim olan anarşizmə son vermək olmuşdur.

2. Mənim haqqımda başqa bir ittiham bu şəkildədir: “Xüsusi və dövlət əmlakını təxrib etmək amacı ilə əhalini təhrik, tərğib və onlara YARDIM edərək zikr edilən tarixdə 66 bankin xəsarət görməsinə səbəb olmaq, vətəndaşların xüsusi maşınlarına zərər vermək, rifah dükanını ziyana uğratmaq, Ərdəbil Dövlət Yol Polisini təxrib etmək”

a.  Cürmün tərifində anlatılır ki, Qanunun müəyyən etdiyi fel ya tərki-fel həmçinin cürmü təşkil edən ünsürlər bunlardan ibarətdir: Maddi-mənəvi və qanuni boşluğun ortada olması, müttəhimin fellərinə cürm kimi baxılmasına mane olur. YARDIM qavramı (istilahı) onun lüğət mənasından asılı olmayaraq, hüquqi anlamda fellərə təhrik edicilik ifadə edər ki, mənim haqqımdaki ikinci ittihamda onun üzərində durulmuşdur. Bütün dünyanın da bildiyi kimi cari ilin Xordad ayının 6-da 200 min nəfərdən artıq Ərdəbilin qeyrətli əhalisi Böyük Türk Millətini təhqir edən karikatura etiraz olaraq nimayişə qatılmışdır. Bu nimayiş Azərbaycanın digər şəhərlərində olduğu kimi millətin öz içindən sel olub daşaraq təzahür etmişdir. Azərbaycan-Türk milləti beləliklə, barışcıl əhval-ruhiyə ilə və mədəni şüarlarla fars irqçilərinin əməllərini məhkum etmişdir. Bu durumda mən millətimin israrlı istəklərinə boyun əyərək nitq söyləməyə başladım və keçən yüz il ərzində məzlum Azərbaycan millətinə edilən iqtisadi-mədəni zülmlər haqqında danışdım. Təkid etdim ki, millətin bu böyük nimayişi, sadəcə bir karikatura etiraz olaraq deyil, həm də fars hakimlərin şovinist siyasətlərinə qarşıdır. Ancaq təəssüflər olsun, hər zaman olduğu kimi zülmün amilləri məntiqi etirazı təhəmmül edə bilməyib, müdafiəsiz milləti əzmək üçün yerli olmayan yabancıları millətin üstünə yürütdülər. Yerli olmayan yabancılar məzlum Azərbaycan millətini əzmək üçün hər növ alətdən, o cümlədən dəyənəkdən, xüsusi hazırlanmış çomaqlardan, göz yaşardıcı qazdan istifadə edir və havaya atəş açaraq, millətin mədəni hərəkətini savaş səhnəsinə çevirdilər. Demək, mənim millətin geniş miqyaslı mədəni etirazına YARDIM etməyim əbəs bir iddiadan başqa bir şey deyildir. Ancaq haqqımda hökm çıxaran bu iddiada olduqları üçün bilməlidirlər ki, mənim bütün fəaliyətlərim, o cümlədən həmin gün millətə xitabən söhbətimin hamısı hadisələrin mahiyətini bilən Ərdəbil əhalisinin hüzurunda olmuşdur. Mənim bütün təlaşım bu həmasədə iştirak edən millətin qəzəbini əngəlləmək olmuşdur. Adam dövən özəl kadrların qeyri-insani müdaxilələri olmadığı müddətcə mən bu işi başarmışdım. Vəziyyət bu şəkildə ikən haqqımda əmr çıxaran amillər  o günkü mənim hərəkətlərimlə bağlı olaraq, heç bir nitqimi, rəftarımı vidio-sənəd şəklində ortaya qoymadan, məni gizlin məhkəmədə məhkum etmək istəyirlərsə, elan edirəm ki, lazım gəlirsə 10 minlərlə insanı şahid kimi məhkəməyə dəvət etməyə hazıram. Çünkü böyük Azərbaycan milləti heç bir tarixi mərhələdə öz fədakar evladlarını yalnız buraxmamışdır. Bu gün Azərbaycanın haqsevər insanları cəzalanır, əslində bütün imkanlardan faydalanaraq Azərbaycanı iqtisadi və mədəni baxımdan bədbəxtliyə sürükləyən amillər cəzalanmalıdır. Böyük Türk Millətini öz rəsmi dövlət qəzetlərində təhqir edənlər mühakimə edilməlidir. Onlar mühakimə edilməlidirlər çünkü bu amillər Türk Millətini təhqir etdikləri üçün nəinki üzr istəmədilər, hətta millətin ən mədəni etirazını boğmaq üçün silahlı güclərini Azərbaycana yeridib bu milləti əzməyə, dövməyə başladılar. Bu vəhşilik isə saysız Azərbaycan evladlarının şəhadəti ilə nəticələndi. Azərbaycan millətinə edilən bu təcavüz tariximizdəki 21 Azər hadisəsini təsəvvürlərimizdə canlandırdı. O zaman da 70 min nəfər dədələrimiz öz milli haqları yolunda qanlarına qəltan edildi. Onların biricik günahları bundan ibarət idi ki, Azərbaycan millətinə azadlıq və insani hüquq istəməkdəydilər. Millətin məsum cavanları deyil, Azərbaycan millətinin mədəni və əxlaqi etirazına silahla cavab verənlər cəzalanmalıdırlar. Minlərcə Azərbaycan oğullarını ittilaatın zindanlarında vəhşicəsinə fiziki və rəvani işkəncə edənlər cəzalanmalıdır. Bütün bu vəhşi əməllər bir daha bəlli olan bu məsajı təkrar edir ki, sən Azərbaycanlı türk, mən farsın köləsi olmalısan ki,  yaşayış haqqından bərxurda olasan və bir gün oyanıb, azad millət olaraq yaşamağı ağlından keçirəcək olsan bilmiş ol ki, cavabın güllə olacaqdır. Azərbaycan milləti bağışlaya bilər, lakin millətin həmasə yaratdığı bir gündə kölə kimi özlərini və düşüncələrini fars şovinizminə təslim edənləri heç vaxt unuda bilməz. Nə qədər rahatca öz millətlərinə arxa çevirdilər o bəsicilər və pasdarlar ki, şovinizmin əlində oyuncaqdan başqa bir şey deyillər. Şovinizm bu şəkildə Azərbaycan millətinin bu qeşrini Azərbaycana qarşı istifadə etməyi başarmışdır. Bəli, Azərbaycan milləti bağışlaya bilər, lakin sümükləri öz soydaşının zərbələri ilə qırılan Azərbaycanın fədai oğullarının acı nalələrini heç vaxt unuda bilməz. Şovinizmin çirkin siyasəti millətimizi öz cahil və ruhu sömürülmüş, ruhu qaranlıqlara gömülmüş insanları vasitəsi ilə əsir etmişdir. Bəli, Azərbaycan milləti yalnız xətakarları deyil, xainləri də bağışlaya bilər, ancaq bir şərtlə ki, Xordad ayının əvvəllərində millətin verdiyi mesajı duyub və millətin bağrına dönsünlər. «فاعتبرو یا اولوا الابصار