دموکراسی حرکاتی ، اوليگارشی سيستئمی نی قوروماق اوچون باشقا بير قورغو

      اولوسلار آراسی( بين الخالق) ايليشگی لرده ايران ايسلام جومهورييتی ايله آمريکا بيرله شيک دولتلری آراسيندا موچود اولان گرگين ليگه باخديقجا بئله آلينير  ايسلامی رژيم ، ديش( خارجی) سياستده ، سياسی کيمليگينی ( هويت )  آمريکا و ايسراييل له دوشمن ليکده تانيتديرير. آيری ياندان باتی ( غرب ) دونياسی آمريکا اؤندرليگينده سووئت لر بيرليگی داغيلديقدان سونرا ، اؤز هئگمونياسينی يئنی جومهوری لرده و اورتادوغودا ، ضعيف لنميش روسيه نين ديرچه لمه يينی و چين دولتی نين يوکسه ليب گئنيش لنمه يينی اؤنله مک اوچون ، يايماقدادير کی اوزون و گله جک ايللرده ، اولوسلار آراسی ساحه ده آصيل و اؤنملی بير گوج کيمی حياتينا دوام ائده بيلسين . بئله ليکله ، دموکراسی يايماق ، اينسان حاقلارينی ساوونماق ( مودافعه ائتمک ) ، تئروريسمی اؤنله مک ، ساواش سيز بير دونيا ياراتماق و بؤيوک اورتادوغو پروژه سيله ،ثروت و انرژی ايله دولو اورتادوغو بؤلگه سينده ن چين و روسيه نين الينی کسمک ايسته يير و يا ان آزی اونلارين نفوذ و ائتگی سينی ( تاثير ) آزالتماغا و اونلاردان قاباقجيل اولماغا چاليشير .آمريکانين بو چاباسی کی افغانيستان ساواشی ايله باشلانيب ايکينجی نوبه ده عراق ساواشينا يول آچدی ، هله ، دوام ائتمکده دير . بللی اولان بؤيوک اورتادوغو پروژه سی  يالنيز ايران اؤلکه سينده رژيمين دييشيلمه ييله سونا چاتاجاقدير  و ماراغلی بودورکی ايران بو پروژه نين بيتمه يی اوچون ان استراتئژيک و کيليد اؤلکه دير . و آمريکا بورادا باشاريلی اولماسازسا ، ايران آمريکانين قيريلان نوقطه سی ساييلا بيله ر . اونون اوچون بوتون يؤنته م لری بو ايشده باشاريلی اولماق اوچون حتی ساواشی بئله  گؤز اؤنونه آلاجاق دير ، آمما ساواشين ايقتيصادی ضررلری چوخ اولدوغو اوچون هله ليک سون سئچه نه ک کيمی گؤرونور.

     آيری ياندان ايسلامی رژيم کی 57 اينجی ايلده ايدئولوژيک شوعاريله دونيايا آياق باسدی ، اؤز قاليجی ليغينی قوروماق اوچون باتی دونيا سيله ساوشماقدان سونرا ، هر ايشه ال آتير .بو رژيم توتاليتر ، غير دموکراتيک ، بير پارتييالی و اوليگارشي سيستئمی نين کاميل بير اؤر نه يي دير .  اونون موخاليف لری ايچه ريده و ديشاريدا ، سلطنت چی لر ، سولچولار ، دالدادا فارس محور و اوزده دموکرات جومهوری چيلر ، تورک ، کورد و عرب ميللت چی لردير . رژيم هله ليک ديشاريدا اپوزيسيونو کنترل ائتمک له و ايچه ريده اونلارين حرکه تينی ياواشلاتماقلا اؤز حياتينا دوام ائتمک ده دير. اونوتماياجاغيميز چوخ اؤنملی بير مسئله بودورکی ايسلامی رژيم ديش سياستده ، سياسی باخيشی ايدئو لوژيک باخيشدان اوستون توتور . بلکه بير گون گله جک ايللرده ، بو يؤنته م  ، ايران ايچينده ، ايندی کی حاکيم اوليگارشی نين و اوليگارش حاکملرين قاليجيليغينی قوروماق شرطی ايله ايستيفاده اولونسون و سکولاريسم وجومهوری سيستئمی نين يارانماغينا سونوجلانسين . سونوندا ، هله ليک ، اوليگارشيک قاليجی ليق ايسلام رژيمی آدی آلتيندا و بلکه گله جک ايللرده باشقا بير آد آلتيندا و باشقا بير سيستئمده رژيم اوچون ان اؤنملی حيات مسئله سی دير . بئله ليکله رژيم اؤزونو قوروماق اوچون  هر قورغو و آراجدان ايستيفاده ائدير .

     بونلارين بيری نوکله ر ( هسته ای ) سيلاحا ال تاپماقدير . بو آرادا بو ييخيجی و داغيديجی سيلاحا ال تاپماق اوچون  اونا لازيم اولان يئته رينجه زمان دير . البته اولا بيله ر عاغيللی اولدوغو اوچون باتی دونياسی قارشيسيندا اوندان ايستيفاده ائتمه يه قورخسون ، آمما بو سيلاحا ال تاپماق باتی دونياسی نی دا ايسلامی رژيم ايله جيددی قارشيلاشماقدا دوشوندوره جکدير . بللی دير کی سونوندا رژيم آغير و چتين شرايط آلتيندا اؤزونو قوروماق اوچون  نوکله ر مسئله سينده آياغينی دالی قويار . کسين ليکله ايمکان اولدوغو حالدا نوکله ر سيلاحا ال تاپماق چوخ ياخشی اولاردی آمما سيستئمين داغيلماغی نين قيمتينه يوخ .

     ايسلامی رژيمين باشقا بير قورغوسو اؤزونو قوروماق اوچون همده نوکله ر مسئله سينی کؤلگه يه بوراخماق اوچون  لبنان حيز ب اللهی آراجيندان ايستيفاده ائتمکدير .  سون گونلرده بؤلگه نی گرگين لشديرمک اوچون لبنان حيزب الله نی ايسراييل دولتی ايله  چارپيشديرماقلا  ، همده سون ايللرده شيعه آراجيله ( وسيله ) عراقدا گرگين ليک ياراتماقلا ، بؤلگه ده اؤنملی بير گوج اولدوغونو باتی دونيا سينا ثوبوت ائتمک ايسته يير . و باتی دونياسی نا  اونا دانيشيق ، موذاکيره ، و ديپلماتيک يؤنته م لر له ياناشماغی نی ، قبول ائتديرمک ايسته يير . البته چاشمامالی ييق ايسلامی رژيم اؤز اورتاغی يعنی سوريه اؤلکه سينی  باتی دونياسی قارشی سيندا  بير سيپر کيمی الده توتدوغو گونلرده . بلکه بئله ليکله عراقدا اولدوغو کيمی باتی دونياسی نی  يورماغا چاليشابيله ر . بو ايش ايسلامی رژيمين ديش سياستده ، سياسی باخيشلاری ايدئولوژيک باخيشلاردان اوستون توتدوغونو گؤسته ره بيلر . 

     ايسلامی رژيم همده روسيه و چين اليله موخاليف بلوکدا چاتلاق و اويمامازليق ياراتماغا چاليشير . گؤرونه ن هله ليک بو ايشده باشاريلی اولوبدور ، آمما کسين ليکله اوزون موددت ده  ، چين و روسيه آمريکا و باتی قارشی سيندا ميللی چيخار لارينی ايسلامی رژيمه آرخا دورماق قيمتينه تهليکه يه آتمازلار .

     ايسلامی رژيمين ماراغلی قورغولاريندان بيری ده اؤزونو قوروماق اوچون ، اپوزيسيون آراجيندان ايستيفاده ائديب ، آمريکا اؤندر ليگينده باتی دونياسی نين اونونلا جيددی قارشيلاشما غينی اؤنله مکدير . او باشا دوشورکی ديپلماتيک يؤنته م لر ، دانيشيق و موذاکيره ، و حتی ايقتيصادی و سياسی باسقی لار رژيمی دييشديره بيلمه يه جکدير و بؤيله باسقی لارين منفی تاثيری تکجه ايران ميللت لرينين اوزه رينده اولاجاق کی رژيم بو مسئله د ه ن کوتله ايچينده اؤز نفعينه آنتی آمريکا حس لری ياراتما غا چاليشا بيله ر . بئله ليکله او قهرمان ياراتماغلا و گنجی کيمی شخصلری اؤلکه ده ن ديشارييا گؤندرمکله اپوزيسيون ذهنينه بو دوشونجه نی يئديردمک ايسته ييرکی آمريکانين ايسلام رژيميله جيددی قارشيلاشماغينی اؤنله سينلر .گنجی نين اپوزيسيون و بوتون دونيايا اولان سؤزلرينده ، دموکراسی حرکتی ياراتماق ايسته يي و مدنی اعتراض داشينيلماقدادير . او دئيير بيز ايران ايچينده ايسلامی فوندامنتاليستلر و آمريکاداکی يهودی و خريستيان فوندامنتاليستلرين قارشی سيندا دايانيريق . بيز ساواش ايسته ميريک ، بيز ساواشی اؤنله مک ايسته ييريک . و چوخ راحاتجاسينا سکولاريسم و جومهوری سيستئمينده ن دانيشير . تير آيي نين اوتوز بيرينده صدای آمريکا آدلی تئلئويزيون وئرليشينده آپارديغی دانيشيق لاريندا بير شخص اونا بؤيله سوال وئرير: سيزی بورايا ايسلامی رژيم گؤندر مه ييب دير ؟ جاواب ايسه : توتاق کی من ايرانين گيزلی سرويسی طرفينده ن و يا آيت الله خامنه ای نين طرفينده ن بورايا گؤندريلميشه م ، هله کی سکولاريسم ، دموکراسی ، اينسان حاقلاری و جومهوری دن دانيشيرام، بو سؤزلرين عيبی هاراسيندادير ؟

    بو سؤزلری آناليز ائتديکده ايکی مسئله اورتايا چيخير . بيرينجی گنجی ايسلامی رژيمه قارشی آچيلان ساواشی اؤنله مک ايسته يير و بو ايسته يی ايران ميللت لری آدينا چالير چونکی او واونو گؤندرنلر بيليرلرکی تکجه ساواش ، ايسلامی رژيمی و مرکزی گوجو هانسی آدلا اولور اولسون ايران ميللت لرينين قاباغيندان قالديرا بيله ر . باشقا دئييم له آمريکايا دئيير باتومونو ائله جه آرخاندا ساخلاو يوموشاق ديلله و ديپلماتيک يؤنته م له ايسلامی رژيمه قارشي چيخ . بو يؤنته می هله ليک چين ، روسيه ، آوروپا و آمريکادا اؤن پلاندا توتماقدادير . باشقا ،گنجی جومهوری و دموکراسی حاققيندا دانيشماقلا  آمريکايا دئيير بيزيم ايشيميزه قاريشما ، بيز اؤزوموز اؤلکه ده دموکراسی ياراداجاييق ، بيزيم اؤلکه يه قوشون چکمه ، ايران ميللت لری دموکراسی حرکتينی ياراتماقلا اؤز ايسته ديکلری دموکراسی نی اؤلکه لرينده يايماغا چاليشيرلار ، بيز اؤزوموز مدنی اعتراض يؤنته ميله ايسلام رژيميله بير سونوجا چاتاجاييق ، يعنی تام رژيمين ايسته ديگی بير شئی . ان آزی ايسلامی رژيمه زمان قازانديرا بيله ر . اگر گنجی بو ايشده باشاريلی اولماسا قورخوسو يوخ ، بئله کی آمريکا ايسلامی رژيم قارشيسيندا سون چاره نی ساواش سئچه نه يي بيلديگی حالدا ، بلکه او زمان

ايسلامی رژيم ايران ايچينده اؤزونون اوليگارشيک قاليجی ليغينی قوروماق اوچون ايدئولوژيک اينتيحارا ال وورسون . دوغرو اولان گنجی فارس محور پان ايرانيست لرين ائلچی سی دير و بو گروهون رفورميسم ماسکاسيندا يازديغی کيتابلارين بيرينده گلديگی کيمی پان ايرانيست لرده ( نئجه کی گورونور اؤلکه ايچينده و ديشيندا ، سون زمانلار چابالاماغا دوشوبلر و زمانين آزالديغينی ادعا ائديرلر ) ايسلامچی فوندامنتاليست لرده اويون مئيدانی نی ( ايران )  الده ن بوراخماق  ايسته مير لر  . بئله ليکله گنجی آرخايينليقلا سکولاريسم و جومهوری  سيستئمينده ن دانيشير و غير فارس ميللت لری آلداتماق اوچون غير فارس ميللت لرين و سنی لرين حاقلاريندان  بئله اورتايا بحث آتير . نئجه کی سلطنت چی لر (سون زمانلار شرطی و مشروطه سلطنت چی ليق شعارينی وئرمکله جومهوری چی لره ياخينلاشماق ايسته يير لر )  و حتی ايسلامی رژيم غير فارس ميللت لرينی آلداتماق اوچون فدراليسم بحثينی اورتايا آتيرلار . بئله ليکله گنجی دموکراسی حرکتينی ياراتماقلا آمريکا و باتی نين ايسلامی رژيمه قارشی آچا بيله جه يي ساواشی اؤنله مک ايسته يير ( تام رژيمين ايسته يي ) و بو ايشده باشاريلی اولمازسا ، تهليکه آنيندا ، ايران ميللت لری آدينا ساواشا قارشی چيخماق زيرناسينی چاليب و بلکه ايسلامی رژيمين تاپشيريغی اساسيندا باتی دونياسی و اونلارين آراسيندا يارانا بيله جک ساواشا ، آراچی ليق ائدسين کی ايسلامی رژيم ايران ايچينده ايدئولوژيک باخيمدان ( اويون مئيدانی نين الده ن گئد مه مه يينه گؤره ) سلاحسيز  ائديلسين . البتته يئنی سيستئمده اوستونلوک پان ايرانيست لرين الينده  اولماغی آمما اينديکی ايدئولوژيست حاکيم لرين ده يئنی سيستئمده يئر توتماغی شرطيله . نورمال اولان ، گنجی نين غير فارس ميللت لری ، لائيک جومهوری چی لری ، مشروطه يانلی سلطنت چی لری ، فمنيست لری و باشقالارينيدا ، حاقلارينين وئريلمه ک وعده سيله بو  آخيما قاتماغا چاليشما غی دير . ايندی ايسلامی رژيمين قوردوغو بو قورغولارينين نه قدر باشاريلی اولدوغو گله جکده ثبوت اولوناجاقدير . آيری ياندان غير فارس ميللت لری دقت ائتمه لی دير لر ، مرکزی گوج کی هله ليک فوندامنتاليست اوليگارشلارين الينده دير ، ايسلامی رژيم ، جومهوری و يا حتی فدرال سيستئمينه دييشيلد يگی زامان ، پان ايرانيست اوليگارشلارين الينه گئچمه سين . بؤيله حاديثه باش وئر ه رسه غير فارس ميللت لرين حاقلاری هئچ زامان اؤده نيلمه يه جکدير .

   آمما بعضی لرينين ايره لی سوردويو فدراليسم ده همده گنجی نين ايره لی سوردويو جومهوری سيستئمينده ، غير فارس ميللت لرين حاقلارينين وئريلمه يي نين همده گرچک دموکراسی نين يارانماغی نين قارانتی سی نه دير ؟  دوغرو اولان بو کی فارس محور پان ايرانيست لرين مرحمتی و دموکراتليغيندان باشقا بير قارانتی يوخدور .همده اؤلکه نين گوجو اونلارين الينه گئچديگی زامان، بؤيله وعده لر سياسی ساحه ده اله چاتيلان و آرخايين لی قارانتی لر دئييل . سون يوز ايلين تاريخی تجروبه لرينه گؤره غير فارس ميللت لری حاقلارينين وئريلمه يي وعده سيله آلدانيليب،  اسکی سيستئمي داغيديب و يئنی سيستئم قورماق اوچون  بير آراج کيمی ايستيفاده اولونوبلار و هئچ زامان يئنی سيستئمده اؤز گرچک حاقلارينی الده ائده بيلمه ييب لر . سيزجه جومهوری چی ليق و فدراليسم پان ايرانيست لر و حتی ايسلامچی فوندامنتاليست لر طرفينده ن ، کورد ، عرب و تورک ميللت لرينين اريتمه سياستی نين دوامی اولاراق بير قورغو دئييل می ؟ نييه ايسلامی رژيم ، ايران ايچينده  بعضی قه زئت لر و درگی لرده فدراليسم بحثينه يول وئرير ؟ بيزيم اولکه ده حاکيم لر يايين لاردا ( نشريات ) آپاريلان دوشونجه بحثينی اؤزه لليکله ( خصوصا ) سياسی ساحه ده گؤزآلتينا آلميرلارمی ؟ باتی دونياسی نين آمريکا اؤندر ليگينده ايسلامی رژيمه قارشی توتدوغو يؤنته م ،  افغانيستاندا و عراقدا اولدوغوندان فرقلی اولاجاقدير می؟ هر حالدا آمريکا باشا دوشورکی بو مرحله ده آياق دالی قويماغين ضرر لری اونلارا و باتی دونياسينا گله جک يوز ايلده بئله چوخ آغير اولا بيله ر . بئله ليکله گله جکده ، بؤلگه ده ، چين و روسيه نفعينه نفوذ و ائتگی سينين آزالماغی ايمکان سيز دئييل . اومود ائديريک غير فارس ميللت لرين حاقلارينين وئريلمه يي و گرچک دموکراسی ، گله جکده فارس محور پان ايرانيست لر له ( هر سيستئمده اولورسا اولسون )  باتی دونياسی آراسيندا و بلکه ده فارس محور پان ايرانيست لر له  هر اوچ اؤنملی طرفين ( چين ، روسيه و باتی )  آراسينداکی آليش وئريشه قوربان اولماسين . اومود ائديريک گلمه سين او گون کی غير فارس ميللت لری ياغيش آلتيندان دوروب دولو آلتيندا اوتورسونلار . 

               ح ، ر ، ش                                             85 / 5 / 5