http://www.voanews.com/azeri/iranAzerbaijanisactions.cfm

هر ايل مهر آیی نين 1 ده سپتامبرين 22 يا 23 ده ايرانداکی شاگرد لر و ئويرنجی لر مکتب لره و علم اوجاقلارينا گئديرلر. آنجاق ايراندا ياشايان آذربايجانليلارين سياسی تشکيلاتلاری و جمعيت لری بو گونو معنوی سوی قيريمی- مدنی قتل عام گونو آدلانديريب و تحصيل ايلينين ايلک گونونو اوشاقلارينی مدرسه لره گوندرمک دن امتناع ائديبلر. اونلار بونونلا آنا ديلينين ياساق ائديلمه سينه اعتراض ائديرلر. مهرين 1- جی گونون بايکوت ائديلمه سی و بونونلا باغلی اعتراض لارا حاضيرليق لار زامانی بير سيرا آذربايجان فعال لاری يئنی دن توتولوب. تبريزده قيسا بير مدت ئونجه حبس دن آزاد ائديلن مهندس غلامرضا امانی، مصطفی عوض پور و قارداشلاری ائله جه ده چنگيز بخت آور، زنجان دا محرمعلی عرفان و مجيد نظريان و ... حبس ائديليب لر. حق، سانيوز، اورمو نيوز کيمی وب سايت لارين معلوماتلارينا اساسا ايران رژيمی مهرين ايلک گونو آذربايجان شهرلرينده آغير امنيت تدبيرلری حياتا کئچيريب. بيلديريلير کی، مدرسه لرين تحريمی نسبتا اوغورلو آلينيب. بونونلا ياناشی خارجی ئولکه لرده ياشايان آذربايجانليلار، ياشاديقلاری ئولکه لرده ده اعتراض آکسيالاری کئچيرديبلر. ايلک اعتراض 22

سپتامبردا کانادانين ان بويوک شهری تورونتو دان باشلاييب. اونتاريو پارلمانی قاباغيندا کئچيريلن اعتراضين سونوندا کانادا حکومتيندن ايسته نيليب کی، بيرلشميش ملت لرين انسان حاقلاری شوراسينين عضوو کيمی ايرانداکی آذربايجانليلارا قارشی اتنيک تميزله مه سياستينی پيسله ين قطعنامه لايحه سی ايله چيخيش ائتسين و ايرانلا علاقه لرينی کسسين. آذربايجان جمهوری سينده پايتخت باکی دا ايران سفيرليينين قاباغيندا، سوئدين گوتنبرگ و استکهلم شهرلرينده ،کلن دا بو شهرلرين گور يئرلرينده، لندن ده ايسه بی بی سی خبر آژانسی بيناسينين قاباغيندا و ... اوخشار اعتراض لار کئچيريليب.