اونودولموش قونولار (3)

آیدین تبریزی

سید حیدر بیات و یاشار تبریزلی بی لری بیر اونملی مساله نی خاطیرلاتمیشلار کی منده او قونو دا اوز باخیشلاریمی یازماغی اوزومه بورج بیلیرم. من دفعه لرله یازمیشام کی ایندی بیزه فارس دیلینده و سراسری مئدیالاردا اوز منطقی و دونیا قانونلارینا دایانان سوزلریمیزی مختلف تعبیرلر ایله و گونون حادثه لر بهانه سی ایله، دفعه لرله یازماغیمیز، ان اونملی بیر مبارزه یولودور.

آما تاسوفله بو یولدا چالیشانلار چوخ آزدیلار و بیر 30 میلیونلوق میللتین بوندان داها آرتیق یازارلاری اولمالی دیر. بیزیم یازارلاریمیز او قدر آز اولمامالیدیر کی نئچه نفر اولماسا بو چراغین ایشیغی سونمه یه ساری گئتسین. بیز تورک لر بوتون تاریخ بویو بیر بویوک تنبل لیکدن چوخ ضربه لر گورموشوک اودا یازماق تنبللیگیدیر! بو او زامان چوخ اوتاندیریجی اولور کی ایندی بیلیریک کی بیرینجی دفعه دونیادا تورک اولان سومرلر یازماغی یاراتمیشلار! بیز بویوک امپراتورلوقلار قورموشوق آنجاق اونلارین تاریخینی یازمامیشیق و بیزیم تاریخیمیزی دوشمن لریمیز و یا منطقه ده کی رقیب لریمیز یازیب لار و بیز هله لیک بو تاریخی تنبل لیگین ضررین گوروروک آما تاسوفله بو تنبل لیک گینه ده داوامی وار و بوگونده بونو گوروروک.

منجه بو ضعفین آیری دلیل لری ده وار کی اونلارین چوخونو عزیز دوستلاریمیز یازیبلار و منده اونلاری تکرار ائتمه ییب و باشقا دلیل لری کی اونلارا آرتیرا بیلرم گتیریرم. بیر چوخ چالیشقان یولداشلاریمیز وار کی میللی مساله یه بیر تعصب گوزو ایله باخیرلار اونلار فارسجا یازماغی عار بیلیرلر! و بو بهانه ایله کی بوتون فارس تشکیلات لار و مئدیالار ضد تورک دولر (کی تاسوفله دانیلمازدی کی بو سوزده بیر چوخ حقیقت ده واردی) مسئولیتی بویون لاریندان آتیب و اوز خلوت لرینه دونمه یی، رقیبین میدانیندا ساواشا گئتمه یه ترجیح وئریرلر کی بو بلکی بیر آز دا همان تنبل لیگین نتیجه سینده دیر! بو نئچه آی خرداد دان سونراکی یاییلان مقاله لر گوستردی کی بیرآز لحنی یوموشالدیب، شعاردان فاصله توتوب و منطقی آرتیرماق ایله چوخ دیرلی یازیلار، سرتاسری سیته لرده یایماق اولار.

بیزیم میللی حرکت ده آیدین فیکیرلی چالیشانلاریمیز آز دئیللر. حتی گنجلریمیزین آراسیندا و اویرنجی لر آراسیندا چوخ چالیشقان لاریمیز وار. همان لار کی چوخلو نشریه لر اولکه ایچینده یاییرلار. اولور کی اونلار بو گونلرده ایچری ده داها آرتیق باسقی آلیتندادیرلار آما بیز بو گوجلردن بیر «یازارلار توپلومو» یاراتماق ایله آرتیق فایدالانا بیله ریک. هابئله ایچری ده اولان فعاللاریمیز بیر گیزلی و مستعار آد امضاسی ایله یازیلارین یایا بیلرلر. من اوز طرفیمدن بو یازارلار توپلومونون قورولماسیندان استقبال ائله ییب و اونو بیر بویوک آددیم کیمی سانیرام کی بیزی اقلا اینترنت واسیطه سی ایله توپلاییب و گروهی ایشله مه یه باشاریلی ائده بیلر.

بیر آیری چتینلیک شاید مقاله لره موضوع تاپماق اولا کی یازارلار توپلومونون قورولماسی بو مساله نی حل ائده بیلر. نیه کی دفعه لر له اولور کی چوخ یاخشی موضوع لار ذهنه چاتیر آنجاق وقتین اولمامازدیغی بو قونویا توخونماغا فرصت وئرمیر و زامانی کئچندن سونرا دا بو مساله اونمین الدن وئریر. بعضی وقت لرده فرصت وار و یاخشی موضوع ذهنه چاتمیر. یازارلار توپلومو بو مساله نی راحاتلیک لا چوزه بیلر. بیر چوخ اونملی یول موضوع تاپماغا گونده لیک خبرلر و حادثه لرین بارسینده یازماق دیر کی بیز بو بولومده چوخ آز چالیشمیشق. مثلا من شرق توقیف اولاندا ایسته دیم بیر مقاله حاضیرلیام بو عنواندا کی «توقیف ایران و شرق، شباهتها و تفاوتها» و اوندا دئیه م کی ظاهرده هر ایکی سی کاریکاتور بهانه سینه توقیف اولوب آنجاق ایرانین کاریکاتورو آذربایجان قیامینا بیر بهانه ایدی و ایرانین توقیفی بیر تاکتیکی حرکت دولت طرفیندن ایدی کی آذربایجانین قیامینی یاتیردا و آما شرقین توقیفی سانسور هدفی ایله ایدی کی کاریکاتور، اونون بهانه سی ایدی و دولت موذیجه سینه بسیجیان آذربایجان طرفیندن شرقین کاریکاتورونا اعتراض ائدیب کی دئسین آذربایجانلی لار اصولا کاریکاتورلا مخالف دیلر؟! آما تاسوفله بو مقاله نی حاضیرلامایا هله لیک وقت اولماییبدیر.

هابئله بیر خبری آژانسین قورولماسی کی لاپ آزی اینترنت صحیفه سینده فعال اولا بیزیم ان چوخ احتیاجیمیز اولان شئی لردن بیری دیر کی منجه بیزیم بوگونکو امکانلاریمیز لا گرچک لشه بیلر و یالنیز بیزیم سیته لریمیزین آراسیندا بیر ایش بیرلیگی آپارماق ایله و بیر پروفئشنال مودورلوک ایله یارانا بیلر. بو خبری آژانس، آذربایجان، ایران و دونیا خبرلرین، آذربایجان تورکجه سینده، فارسجا و انگلیسجه یایمالیدیر. آیدیندیر کی یازارلار توپلومو یارادیلیرسا، بو خبری آژانسین تحلیلی مقاله لرینی ده حاضیرلایا بیلر. من اینانیرام کی بیز باشارا بیله ریک گوجوموزو بیر یئره ییغماق ایله بویوک آددیملار بو یولدا گوتورک. بیزیم سیته لریمیز یازارلاریمیزلا باغلانتی قوروب و اونلاری بو توپلوما چاغیرسینلار. منجه بیر ایمیل گروپو یارتماق ایله بو توپلوم ساده جه گرچکلشه بیلر. گنج یازارلاریمیزدا بو توپلوما قاتیلیب و اونو داها دا گوجلندیرسینلر. بو یول آچیقدیر و یئنی یولچولاری گوزله ییر.یالنیز اوزوموزه اینانیب و قاباغا گئتمک لازیمدیر.

بو یولدا باشاریلار اومودویلا.