ساوالان یولداشی بیر قادین.
لاله جوانشیر

تبریز، اطرافیندا مین لر آرزو دولانان شهردیر. هر کوچه سیندن، خیابانیندان، بازاریندان، کتابخاناسیندان و … کئچنده اوره ییندن دیله گتیره بیلمه دیگین سؤزلر کئچیر، کلمه لر دولانیر. سینیق کاشی لارینی، اطرافیندا پاساژلار تیکیلمیش گؤی مَچیدینی، ییغیلماقدا اولان ارکینی گؤروب سینمیش قول – قانادینلا ائوینه دؤنمه یه بیلمزسن.

تبریزین رنگی قاچیر. گوندن – گونه بوزاریر شَهَریمیز، اما اوره کلریمیزده کی جوجره ن کؤزلر بیزلری گله جه یه، آذربایجانیمیزی یئنیدن چیچکلندیرمه یه اومودلو ساخلاییر. ساوالانین، سهندین، بوزقوش داغلارینین آردیندان دوغان هر یئنی گون کؤنوللریمیزی، ایراده لریمیزی داها دا گوجلندیریر. داغلارا، داغلارا، داغلارا دوغرو گئدیریک…
دئییرلر بیزیم یوردون تاریخی یازیلمیر. اصلینده بیزده تاریخی کیچیک گؤرونن اما درین ایزلر، جیغیرلار آچان اولایلار یارادیب واراقلاییر. بیزسه بعضا اونلاری اؤنمسه مه دن، گؤرونمه ین اینجه تاثیرلره آلدیرمادان چکیب گئدیریک.

منجه بو یازیلمایانلارین بیری ده آذربایجان قادینلارینین تاریخی، اونلارین بوتون چتین لیکلره قارشی آپاردیقلاری ساواش، مجادله و یاراتدیقلاری ده ییشیک لیک لردیر. گونئی آذربایجان قادینی گوجله نیب، ایللر کئچدیکجه داهادا گوجله نیر. قول گوجو ایله آلینمیش حاخلارینی بو دؤنه علمی، فلسفی، سیاسی، ادبی و اجتماعی چابالارا قاتیلاراق گئری قایتارماغا چالیشیر. قادینین گوجلنمه سی توپلومون گوجلنمه سی دئمک دیر. قادینین شعور یوکسک لیگی توپلومون اوستون سوییه یه قالخماسی دیر.تحقیرله، سوییه سیزلیکله باریشمایان قادین طبیعی کی عینی روحدا ائولادلار یئتیشدیره جک. گله جک توپلومون شعورونا یؤن وئره جک.
بونلاری گؤز اونونه آلاراق سون ایللرده تبریزده آیدینلانما و اجتماعی چابالارا قاتیلما یولوندا وار گوجو ایله چالیشیب یئنی جیغیرلار آچان، چالیشما اورتامی یارادان بیر قادینی تانیتماق ایسته ردیم:

عدیله طهماسبی، 1335 – اینجی ایلده اهرده دونیایا گلیب ائولندیکدن سونرا تبریزده ائولی لیک حیاتینی سوردوردو. 1354 – دن باشلایاراق حیات یولداشی یوسف پورموسوی ایله بیرلیکده آذربایجانی قاریش – قاریش گزیب داغلارینی، طبیعتینی تانیماغا باشلادی. 1364 – دن ائو خانیمی اولماغی بیر کنارا قویوب درزی لیک صنعتینه گیریشدی. چوخ کئچمه دی تبریزده ایلک قادین درزیلر بیرلیگینی یاراتدی. خانم طهماسبی شرقی آذربایجان قادین درزیلر بیرلیگی نین باشچی سی اولماغا رای گتیردی. بو بیرلیکده قادینلارا ایش و چالیشما مجوزی وئریلیردی. 9 آی بو بیرلیکده چالیشیب اونون قوروجوسو اولسا دا، بعضی سبب لر اوزوندن ایشدن اوزاقلاشدیریلدی. بوندان سونرا اؤز شخصی ائوینده مختلیف تئاترلارا گئییم تیکمکله برابر آذربایجان میللی گئییملری و رقص پالتارلارینی تیکمه یه باشلادی. اونون حاضیرلادیغی ملی گئییملر سون ایللرده خارجی مملکت  لرده یاشایان آذربایجان توپلولوقلارینا بئله  گؤنده ریلدی.
1387 – ده عموم دونیا قادینلار گونونده ” تورک – آذری” قادینلار توپلولوغونون باشچی سی خانیم تنزیله روستم خانلی طرفیندن باکی – یا دعوت اولوندو. بو سفرده میللی گئییم لر و قوزئی آذربایجاندا قورونوب ساخلانان عادت – عنعنه لرله یاخیندان و داها جیددی تانیش اولدو. سفردن دؤندوکدن سونرا گونئی آذربایجاندا باغیمسیز بیر قادین جمعیتی قورماغا قرار وئردی. داغ و طبیعتله باغلی تجربه لرینه دایاناراق بو جمعیت ” داغچی قادینلار جمعیتی” اولدو. برق و مخابرات ایداره سینین قادینلاریندان اولوشموش بو توپلولوق آذربایجاندا ایلک باغیمسیز(مستقیل) قادین تشکیلاتی ایدی. توپلولوق تهرانداکی داغچیلیق جمعیتی ایله علاقه لر قوراراق تبریزده قادینلار اوچون داغچیلیق موضوعسوندا ایلک تئکنیکی کورسلار دوزه نله دی و علمی شکیلده اؤز چالیشماسینا داوام ائتدیردی.

1379، 8 مارت گونو ” نشر فرهنگی زنان ” طرفیندن تهرانا دعوت اولونوب ” حیاتینی ده ییشدیره ن بیر قادین” عنوانی ایله چیخیش ائتمیش دیر. بو پروگرامدا سیمین بهبهانی و شیرین عبادی گؤردویو ایشلر اوچون خانیم طهماسبی نی خصوصی شکیلده تقدیر ائتمیشدیلر و دانیشیق فرانسه رادیوسوندان یاییلمیشدیر.
بوندان سونرا گئنیش و گوجلو چالیشمالار نتیجه سینده تبریزین بدن ائیتیمی ایداره سی طرفیندن ایشه دعوت اولونوب رسمی شکیلده ایشه باشلادی. بو رسمیت دن سونرا تبریزه ایرانین دؤرد بیر یانیندان داغچی قادینلار دعوت اولوندو. 1380 – اینجی ایلده 250 نفر قادین یوردوموزون ذیروه سی ساوالانا یوکسلدیلر. ایکی ایل سونرا 720 نفرلیک بیر گروپلا بابک قالاسینا گئدیلدی. بو داغلارا گئدیشین مقصدی آنجاق طبیعتی گؤرمک دئییل، همده یوردوموزون طبیعتینی ، داغلارینی قوروماق، قدیم آبیده لریمیزی گؤروب تاریخیمیزله تانیش اولماق، شهرلردن اوزاقلاشماق، اجتماعی فعالییت لره قاتیلماق، خئییر ایشلر گؤروب احتیاجی اولانلارا یاردیم ائتمک و بو کونولاردا یئترلی بیلگی وئرمک ایدی.

چوخ ساییلی صعودلارین گئنیش اجتماعی تاثیرلریندن باشقا ماددی تاثیرلری ده وار ایدی. اؤرنه یین: داغلارین اطرافیندا کمپ لرین تیکیلمه سی، بهداشتی یئرلرین یارانماسی، یوللارین دورومونون یاخشیلاشماسی و … .
همن ایللرده ایراندان ائورئسته یوکسه له جک قادینالار گروپونا بیر نفر ده تبریزدن، خانیم طهماسبی نین یئتیشدیردیگی گنج داغچی فریبا یاری قاتیلدی. سال داشلارا چیخا بیلمه یی اؤیره تمک اوچون تهراندان یئنی اؤیرتمن لر دعوت اولوندو. آرتیق تبریز هر شئی کیمی قادینلار داغچی لیغیندا دا اؤنجول اولماغا گئدیردی.
بو چالیشمالار داها ایلک بارینی وئرمکده ایکن تبریزین بدن ائیتیمی ایداره سی چئشیدلی سبب لر اوزوندن خانیم طهماسبی نین بو ایداره ده چالیشماسینی یاساقلادی. یاساقلامانین سونوجو ایسه ” یاشیل یول” آدلی یئنی بیر جمعیتین یارانماسی ایدی. یاشیل یولون یارانماسی ایله گروپون فعالیتی دایانمادان داها دا گئنیشلندی. تبریزدن باشلایان یام – یاشیل بیر یول آچیلدی انسان حاخلاری و قادین مسئله لری اوزه رینه چالیشان توپلولوقلارا. خانیم طهماسبی تهرانداکی انسان حاخلاری کورسلارینا قاتیلیب یئنی فیکیرلرله الی دولو تبریزه قاییتدی. 8 مارس موناسیبتیله کنفرانسلار، سرگیلر و … سون زامانلارین چاباسی دیر.

یاشیل یول جمعیتی آنجاق طبیعتله یئتینمه ییب شَهَریمیزین ایچینده ده چالیشمالارا دوام ائدیر سون پروقراملارین بیرینده قوجالار ائوینده کی - بلکه ده - اونودولموش، عؤمرونون سون یارپاقلارینی خزان یئلینه تاپشیرمیش یاشلیلارلا ایلگی لنمه یه باشلامیش دیر. تبریزین قورو گؤلونه آپاریلمیش قوجالاریمیزا آذربایجان موسیقی گروپو و بو آن تبریز زندانیندا اولان حسن دمیرچی جنابلاری اونودولماز آنلار یاشاتمیش دیر.

خانیم عیله طهماسبی ایللر بویو دماوند؛ علم کوه، تفتان، دنا، اشترانکوه و… کیمی ذیروه لره یوکسلدیگینه باخمایاراق ساوالانا باشقا بیر سئوگیسی وار. سیررینی، کؤنلونو پایلاشیر سولطان ساوالانلا. ایلده ان آز ایکی دؤنه ساوالانین گؤروشونه گئتمه سه اوره یی دینجه لمیر. ذیروه لر اونو اؤزونه سسله ییر.
هر زامان ذیروه لرده اولسون دئییریک.