آذربایجان میللی حرکتی و گیزلی چالیشمالار؟!

احسان تبریزلی     تیر آی نین سون هفته سی 1385

آذربایجان ملی حرکتی نین گلجکده کی اونملی موباریزه تاکتیک لری بو گونلر هر شئی ده ن آرتیق آذربایجان چالیشقانلارینی دوشوندورور. بو آرادا بعضی لری آذربایجان میلی حرکتی نین اساس درد نوقطالارینی و بیر آیری طرفده ن فارس شونیزمینین گونلیک گوجلری و سیاسی لیدرلرینین پسیکولوژی  لرینی تانیمادان گیزلی موباریزه یوللارینی اونرمکده دیرلر.

آذربایجان میلی حرکتی نینی سون آماجی ایستر موختارلیق، ایستر فدرالیسم و ایستر باغیمسیزلیق اولسون " حق تعیین سرنوشت " جاده سینده ن کئچمه کده دیر. آرتیق آذربایجان میلتی اوز میلی حاقلارینی ایستمه ک زوروندادیر. بو میلت اوز میلی حاقلارینی تانییرسا او زامان اونو طلب ائتمه گه ده باشلایا جاق. سون آیلاردا میلتیمیزین کوچه لر توکولوب و هارای هارای من تورکم سسله مه سی بونا بیر آیدین ثبوت دور. وئریلن استاتیک لره گوره تهرانین 60% تورک کوکنلی دیر، آما بونلارین نه قده ری خرداد آی نین 7 سینده ایران مجلیسی قارشیسندا اولان متینگ ده بیزیم اویرنجی لریمیزین یاردیمینا گلدیلر؟ آذربایجاندا یاشایان تورکلر آزاجیق دا اولسادا اوز حاقلارینی تانیمایا باشلامیشدیلار. آما ایرانین مرکزی و خزر دنیزی سا حیلینده یاشایان تورکلر هله ده اوز میلی وارلیق لاریندان خبرسیزدیرلر. بو گون 35 میلیون آذربایجانلی دان صوحبت ائتدیمیز زامان آذربایجاندان ائشیکده یاشایان تورکلرده ن واز گئچه بیلمریک. دئمک آذربایجان میلی حرکتی نین اساس آماجی بوتون ایرانا سپلنمیش آذربایجان تورکلرینی اوز میلی حاقلاری ایله تانیش ائتمک دیر. آذربایجان بئله بیر دوروما گله بیلرسه ان آز هزینه ایله اوز میلی آماجلارینا راحتجاسینا ال تاپاجاقدیر. آذربایجان میلی حرکتینده چالیشانلار میلتیمیزی اویاندیرماقدان باشقا بیر گورولری اولا بیلمز. چونکو آییلان میلت اوز حاقلارینی دا دمکراتیک و مدنی یوللارلا بیر پلورال اورتامدا آلماغی دا باشاراجاقدیر. او گونه ال تاپانا قده ر میلی چالیشقانلاریمیز صبر ائتمک زوروندادیرلار. آتالار دئمیشکن خمیر چوخ سو آپارار.

بوگون ایرانین ایچریسنده یاشایان میلی چالیشقانلاریمیز گنجلیگیمیز و اویرنجی حرکاتیمیزلار بیرگه میلی اویانیش سوره جی نی بیر باشا سیر ائتمه لی دیرلر. ایللر بویو گوزه ل سونوجلارا گتیریب چیخاران پلانلار و پروگراملاریمیزی یئنه ده داها دوزنلی و یوخاری دوزه یده اولان بیر کیفیت له دوام ائتدیرمه لییک. یازیب یارتماق، میلی موباریز کادرلاری بئجرمه ک، تلویزیون و اینترنت سایتلارینی گوجلندیرمک و میلی توره نلرده گوجلو اشتراک ائتمک بو چالیشمالارین باشیندا گئده بیلیر.

میلی چالیشقانلاریمیزدان بیر چوخو ایران گوه نلیک گوجلرینی تجروبه ائتمیشلر. اونلار هر کس ده ن آرتیق آچیق، آشکار چالیشمالارین گوجونو و ائتکن لیگینی چوخ گوزه ل آنلاماقدادیرلار. تام ترسینه گیزلی چالیشمالارین سونوچ وئرمه دیگینی ده دفعه لر له تجربه ائتمیشلر. داها دوغروسو گیزلی بیر چالیشمایا هئچ بیر نده ن یوخدور. گیزلی چالیشمالارین محدوده لرینی ایچریده چالیشان فعاللاریمیز گوزه لجه سینه بیلمک ده دیرلر. انسان اوز عائله سینده ده اولدوغو کیمی چوخ طبیعی اولاراق بعضی شئی لری گیزلی ساخلامالی دیر، آما بو حرکتین تام معنادا گیزلی بیر یاپیا گیرمه سی دئمک دئییل.

بوگون میلی حرکتین ان گوجلو و ائتگن گوره وی یورد دیشیندا یاشایان صادیق میلی یولداشلاریمیزین  بوینونا دوشور. خاریجده اولان اینسان حاقلاری مدافعه اورگوت لری و عینی زاماندا دولت پارلمانلاری اویه لری ایله سیخ ایلشگیه گیرمک و آذربایجان میلتی نین ایستک لرین و دوروملارین اونلارین نظرینه چاتدیرماق و دوزه نلی اولاراق اروپا و آمئریکادا اعتراض متینگ لری کئچیرمک میلی حرکتیمیزی بن بست ده ن چیخارماقدا چوخ اونملی رولو اولا بیلر..

 هر دفعه ده دئدیمگیز کیمی یئنه دئییریک کی آذربایجان میلی حرکتی اوز اوزون؛ آغیر و زحمتلی  یولونون ایلک آشمالاریندادیر. تلسمه ده ن، دوشونه-دوشونه محکم آدیملارلا ایلری گئتمه لییک. بوتون گوجوموز بیرآندا و بیر گونده خرجله مه مه لییک. ایناناق کی:

گله جک بیزیمدیر