بابک قالاسی یوروشو و گونئی آذربایجان تورک گنجلیگی

گونئی آذربایجان اویرنجی سی، آیدین ائل سئوه ر

آذربایجانین میللی دوشونجه سی اولان بیر آیدین و ضیالی سی نین ان اونملی رولو گله جه گی اون گورمک و یئنی تاکتیک لر و استراتژی لرله میللی حرکتی گوجلو اولاراق آماجلارینا دوغرو ایلری گوتورمکدیر. هئچ زامان اونوتمایاجاغیمیز و دایما اونو اوره ییمیزده ساخلایا جاغیمیز تورک دونیاسی نین تانینمیش آیدینی رحمتلیک پروفسو زهتابی بئله بیر آیدینلارین اونده گئدنی اولموشدور. او رحمتلیگین روحو بو گونلرده میللتیمیزین یانیندادیر و اینانیرام کی سون گونلرده چیخان اولای لار و میللتیمیزین آیاقلانماسیندان ممنون قالیب و شبسترین قوتسال توپراغیندا راحتجاسینا اویماقدادیر. او بوتون دونیانین گلیشمیش اولکه لرینده اوزگورجه سینه مومکون اولان یاشاماق ایمکانلارینی بوراخیب گونئی آذربایجانین قوجامان شهری آتا بابا یوردو اولان شبستره گلدی و آذربایجان میللی حرکتینین تمللرینی قویماقدا اینانیلماز سویه ده امک لری اولدو. او اویرنجی لره اویره تدیگی تورک دیلی و تاریخی درسلرینده اونلارا کیملیک و کیملیگه صاحیب دورما یوللارینی دا اویره تدی. بورادا اونون انسانجیل اوزه للیکلرینی سیرالاماق فیکرینده دئییله م آما اونون بابک قالاسی یوروشو ایده سینین مئیدانا آتماسی یولوندا اولان رولونو خاطیرلایندا ایستر ایستمز قلم او اونودلماز شخصیتی آراماغا چالیشیر. آذربایجان اویره نجی سی و گنجلیگینین اولمز آیدین رهبری و لیدری اولان رحمتلیک پرفسور زهتابی بابک قالاسی یوروشونون اونرمه سی ایله آذربایجان میللی حرکتینه یئنی بیر روح باغیشلادی. بابک قالاسی یورویوشو میللی حرکتی محفیلی حرکتده ن چیخاریب عادی میلت ایچینه داشیماغی باشاردی. میللی حرکته دونیا سویه سینده پرستیژ و گوج وئردی. میللی حرکت آرتیق بابک قالاسیندا دوزه نلی، دمکراتیک، مدنیتلی و سکولار بیر حرکتی ایره لی گوتورمه یی تجروبه ائتمه گه باشلادی.

آمما نده ن بابک؟

بابک آذربایجانین اولمز قهرمانی میللت گوجونه آرخالاناراق اوگونون ایشغالچی و ظالیم حاکمیتینه قارشی آیاغا قالخمیش و اوز مدنیتی و دوشونجه سیستمی نی اوز آنا یوردوندا حاکیم ائتمه گه چالیشمیشدیر. او ساده جه اوز میللی وارلیغی و آنا یوردونا صاحیب چیخیب اورادا اوزگورجه سینه و اوز میللی چیخارلارینا دایانیب گووه نه ره ک یاشاماق ایسته میشدیر. اونون دیره نیشی قیرمیزی آذربایجان تورک بایراغی الده زورا قارشی سکولار و میللی بیر دیره نیش اولموشدور. او گونون دورومونو نظره آلاراق داغلارا قالخمیش و قالالارا سیغنمیش و اورادان 20 ایللیک دیره نیشی یونلندیرمه یه چالیشمیشدیر. یئنی عصیرده ایسه میللتیمیزین حاق موباریزه لری مغلوب اولموشدور. بیر چوخلاری شونیسمین قازانیندا اریمیشدیلر. بیر چوخ شئی لری الده ن وئر میشدیک. کوچه لره چیخا بیلمزدیک و اوزگورجه سینه میللی حاقلاریمیزی ایسته یه بیلمزایدیک. آذربایجان میللی حرکتی یئنی بیر گوج آلما، اوزونه اینانما و گونمه زوروندایدی. میلی حرکتیمیز اوزونه اینانیب و گونمه روحیه سینی الده ائتمک و میللی حاقلاری یولوندا کوچه لره چیخماق ایچین یئنی بیر پلان و روحیه آراییشیندا ایدی. بئله بیر آغیر سیاسی فرهنگی و اجتماعی اورتامدا آذربایجان میللی حرکتی حاقلاری یولوندا دیره نیشی تجروبه ائتمک ایچین بابک ده ن ایلهام آلدی. آذربایجان میللی حرکتی ائل گوجو سئل گوجونون نه اولدوغونو و داغلاردان کوچه لره اینمه روحیه سینی بابک قالاسیندان آلدی. بابک هانکی سیاسی و اجتماعی دورومدایدی عینی دورومو گونئی آذربایجانین بو گونکو دورومو اولاراق میلتیمیز دیرلندیریب و دوروملاری بیر بیری ایله بنزتمه یه باشلادی. آرتیق بابک قالاسی اونا اینانج و جسارت وئردی. بابک ین آل بایراغی دیره نیش سمبولو اولاراق اوزون ایللرده ن سونرا بیر داها مئیدانا چیخماغی باشاردی. بو گون بابک قالاسی حرکاتی داها اوزونو کلیبر داغلاریندا قیسیتلاماق و محدود ائتمک ایسته میر. آرتیق بابک قالاسی یورویوشو آماجلارینا ال تاپماقدادیر. ایندی بو حرکت داغلاردان یئنیر و گونئی آذربایجانین هر بیر کوچه سی و خیابانی نی قالا کیمی گورمک ایسته ییر. بو حرکت قیلینجا و قالخان احتیاجی یوخدور. بو حرکت سیلاحینی کوچه لره توپلانان مدنییتلی و دوشونجه لی گنجلیگیمیزده ن آلیر. گنجلیگمیز اوز گوجونه آرتیق اینانمیشدیر. او آزادلیق یولونون نه قده ر اوزون و زحمتلی اولدوغونو بیله ره ک دایانمادان و یورولمادان بابک ین آل بایراغی الینده تاریخ بویو یاریم چیلیق و یاری یولدا بوراخیلان میللی آزادلیق پروژه سینی سون آماجینا چاتدیرماغا دوغرور یورویور. 20 ایلده ن آز عمرو اولان اویره نجیسل حرکاتیمیز و میللی حرکتده اولان آیدین گنجلیگیمیز میللی آماجلارا یئتیشمک ایچین یئنی تاکتیک لر آرایشیندادیر. بو گنجلیک هله یولون ایلک آشاماسیندایر. بو گنجلیک اوزونه اینانیر و اونا گوره سویله ییر کی: گله جک بیزیمدیر.  

 تیر آی نین بیرینجی هفته سی 1385- تبریز