دؤولتیمیز نه ائدیر؟

یازان: توغای بؤروتئگین

ایکی گوج آراسیندا چکیشمه آرتدیغیندا، نیسبتاً ضعیف اولان گوج، اؤزونو راحاتلاتماق ایچین بیر متفق آختارماغا باشلار. أن آزیندان چئورسینده­کی گوج­لرین قارشی طرفه کئچمه­مه­لرینی ایستر. بونون ایچین بعضی ایش­لر ائتمه­سی گره­کیر (لازیم اولور). مثلا دوستجا داورانیشلار سرگیله­مه­سی گره­کیر. أن آزیندان گؤسترمه­لیک ده اولسا، بئله ائیله­مه­سی گره­کیر.

اسکی بابالاریمیز(مادلار زامانیندا)، آشوری­لرین میلیتاریست ایمپاراتورلوغو قارشیسیندا چئوره­لرینده­کی تام دؤولتلری بیرلشدیردیلر. سونراکی دؤورلرده روم ایمپاراتورلوغو قارشی­سیندا قوزئییمیزده­کی هئپتالیت­لر (هون­لار)، خزرلر و ... ایله متفق اولموشدوق. قاجار ایمپاراتورلوغو، گئریله­مه دؤنمینده روسیایا قارشی اینگیلتره و فرانسا ایله اتفاقا یؤنلمیشدی. حتتا اؤزونه باغلی اولان مشروطه­چی قوه­لره قارشی روسیا ایله اتفاقا یؤنلمیشدی. هابئله، محمدریضا پهلوی، آذربایجان میللی حوکومتی قارشی­سیندا (حاق­سیزجاسینا) آمئریکا ایله بیرلشمیشدی. نییه؟ چونکو ضعیف­دی.

بونلاری نییه دئییرم؟ بوگونلرده اوزریمیزه یؤنه­لیک بیرآمئریکا سالدیری­سی گوندم­ده­دیر. بیز ضعیف­یک. أن آزیندان گوج باخیمیندان آمئریکا ایله قیاس­لاندیغیمیزدا اولدوقجا ضعیف قالیریق.

یاخشی، بو دورومدا نه ائتمه­میز گره­کیر؟ یا آمئریکا ایله آرامیزدا دنگه­یی (موازنه­یی) قورماسینی ساغلایاجاق گوجلو بیر متفق بولمالی­ییق - روسیا کیمی، یا دا چئوره­میزده­کی قونشولاری­میزلا ایلیشگی­لریمیزی یاخشی توتمالی­ییق کی آمئریکانین اونلار اوزریندن توپراقلاریمیزا ساالدیرماسینی أنگل­له­یه­بیلک.

یاخشی، بیز بونلارین هانکی­سینی ائلیریک؟ هله­لیک روس ترجیحینده اصرار ائدیب و اؤزوموزو تامامی ایله روسیایا باغلامیشیق. بوتون تئکنولوژی­میزی روسلارا بوراخمیشیق. هر شئیی روسلاردان گؤزلوروک. بو من­جه ساغلیق­لی بیر داورانیش اولابیلمز. چونکو روسیا، اولماسی گره­کدیغی شکیلده، اؤزونو دوشونور. یعنی ساواش باشلادیغی آن، آمئریکا روسیا ایله گؤزل - گؤزل آنلاشاجاق و روسیا اؤزونو قیراغا چکیب بیزیم آرخامیزی بوشالداجاق؟ سیزجه دؤولتیمیز بونلاری بیلمیر ؟ من­جه چوخ دا یاخشی بیلیر، آما... گئریسینی بوش وئرغین.

***

هامیمیزین بیلدیغی کیمی کئچن آی دؤولت رسمی خبر آژانسینین یییه­سی اولان «ایران» قزئته­سینده تورکلری «حامام بؤجویو»نه بنزه­دن چیرکین بیر کاریکاتور[[1]] چیخدی. بو کاریکاتور،اؤلکه­میزده بؤیوک اولایلارا ندن اولدو و چیخان اولایلاردا بیلمه­دیغیمیز فدر تورک شهید اولدو، یارالاندی یاخود توتوقلاندی (وئریلن غیررسمی خبرلر یوزلرجه شهید، مین­لرجه یارالی و اون­مین­لرجه توتوقلانان­دان دانیشیرلار، رسمی خبر آژانس­لاری ایسه بو باره­ده سوسوبلار و. آغیر سانسور سیاستی کئچیرلر).

دؤولتیمیزین یؤنه­دیمی، تؤحفه داورانیشلار سرگیلیر. چونکو آمئریکایا قارشی بیر یاندان تورکیه و قوزئی آذربایجان جمهوریتی ایله ایلیشگی­لرینی دوزلتمک ایسترکن، بیر یاندان دا بئله اولایلارلا تورک­لوگه سالدیریر. بو دوروم­دا بیزیم عاقلیمیزا بیر سورو داها تاخیلیر. تورک­لوگه سالدیراراق، تورکیه و قوزئی آذربایجان­لا ایلیشگی­لرینی دوزلتمک نئجه اولور؟

سورولار بیربیری آردینجا عاقلیمیزا گلدیکجه، یئنی سورولارلا داها قارشیلاشیریق. مثلا آمئریکا ایله ایش­بیرلیگی­نی رددئدن تورک­لره قارشی ایران گوونلیک قوت­لرینین بئله بیر سالدیریسی ایران تورک­لوگونو آمئریکانین قوجاغینا آتمایاجاق­می؟ آمئریکا، ایران تورک­لرینه ایش­بیرلیگی ایسته­میشدیر آنجاق بو ایش­بیرلیگی ایسته­گی رددئدیلمیشدیر. بونون اوزرینه آمئریکا، ایران­داکی باشقا میللت­لره ایش­بیرلیگی قراری وئرمیشدیر.

دؤولتیمیز، ایرانین بیرلیگینی دوشونورسه، تورک­لره دگیل آمئریکا ایله قرارلاشانلارا سالدیرماسی گره­کیر. آما تورک­لره سالدیریر. دئمک کی، ایران یؤنه­دیمینین، ایران بیرلیگی­نی ساوونماق کیمی بیر دردی یوخدور. چونکو بیلیرکی، آمئریکانین­دا ایرانی پارچالاماق کیمی بیر دردی یوخدور. آمئریکا ساده­جه بیر رژیم دگیشیک­لیغی ایستیر. اویسا ایران نفوسونون یاریدان چوغونو اولوشدوران تورک­لرین آیری ایستک­لری وار. اوسته­لیک کیمسه­یه دایانمادان، هیچ بیرایمپئریال گوج­له ایش­بیرلیگی گئتمه­دن.

دؤولت نه ائده­جک؟ کیمه چالیشاجاق؟