Guney Azərbaycandan son xəbərlərı Azərbaycan bölməsinə hazırlayan Eluca Atalı

Keçən xəbərlərimizdən sizə artıq məlumdur ki, ittilaat məmurları Təbrizli gənc qadın, 20 yaşlı Nəsrin Rəzəvini oğurlayıblar.Bu hadisə onun həyat yoldaşı Oxtay Babayinin zindan ömrünün 295 -ci günündə baş verib. Oxtay bəy Güney Azərbaycandakı məlum may hadisələri zamanı tutulub və beynəlxalq amnistiya təşkilatlarının onun azadlığa buraxılması haqqında İran fars rejiminə muraciət etmələrinə baxmayraq, məsələ müsbət həll olunmamışdır.Əksinə onun arvadı Nəsrin Təbrizin Pərvaz məhəlləsində 8 mart qadınlar günü ilə bağlı bildiriş yayarkən oğurlanmışdır.Qeyd edək ki, dövlət təhlükəsizlik orqanları tərəfindən xəbərdarlıq almışdır ki, əgər ərin haqqında kənara məlumat və ya müsahibə verərsənsə bu sənin üçün də yaxşı nəticə verməyəcək.Bu da hədə - qorxunun nəticəsi.Gənc qadının oğurlanıb harda saxlanması haqqında nə yaxınlarının, nə də ittilaat məmurlarından başqa kimsənin bir xəbəri yoxdur.

APA Xəbər Agentliyinin verdiyi məlumata görə Sabir Rüstəmxanlının "Ömür kitabı" yaxın zamanlarda Təbrizdə nəşr olunacaq.Qeyd edək ki, bu kitab rus, ingilis,türk dillərində çap olunub və indi Təbrizdə kamil şəkildə aprel ayında çapdan çıxacaq.Bundan əvvəl onun "Göy tanrı" kitabı 2000 -ci ildə (350 səh.) türk dilində nəşr olunmuşdur.Burada türklərin köçməsi barədə bədii şəkildə hərtərəfli məlumat verilir.

Urmunuyuzun verdiyi məlumata görə Ana Dili Günü münasibəti ilə tutulanlardan bir neçəsi zindandan buraxilmışdır.Onlardan İsmayıl Cavadi haqqında artıq məlumat vermişdik və məlumatımızdan da bilirsiz ki, jurnalistdir, Kiyanuş Yusifi, Cəmşid və Hüseyn Hüseynikiya. Axırıncı qeyd etdiyimiz şəxslərin bilgisayar mağazalarıda var və bu dörd nəfər hərəsi 10 milyon tümən ödəməklə zəmanətlə azadlığa buraxılmışdırlar.Digər zindanda olan soydaşımız Hüşəng Nəqizadə, Ramin Muradzadə və İbrahim Əhmədi 20 milyon tümən ödəməklə, Əhməd Qureyşi və Əbülfəz Əlilu30 milyon tümənlik zəmanətlə müvəqqəti azadlığa buraxılmışdırlar.

Müvəqqəti azadlığa buraxılanlara isə xəbərdarlıq ediblər ki, kütləvi xəbər agentliklərinə zindandakı hadisələr haqqında məlumat vermək və ya bu haqda müsahibə vermək qəti qadağandır.

Xudayar Teymuri dekabr ayında keçirilən 21 Azəri Günündə tutulub və bir neçə gün zindanda saxlandıqdan sonra azadlığa buraxılıb.İndi isə azadlığa buraxılandan sonra Urmiyənin inqilab məhkımısinə çağırılıb.

Milli aktivlər Hadi Sərxoş və Sahibəli Xudabəxş 10 ay və 1 il müddətinə zindana məhkum olunublar.

Güney Azərbaycanın şərq vilayətinin İş və İşçilər İslami Şurasının sədri Kərim Sadıqzadə bildirib ki, zəhmətkeşləri unutmaq bu təbəqəyə böyük zülmdür.O artırıb ki, keçən ilin ərzində 71 faiz işçi 150 min tümən,6 faiz 180 min tümən və 23 faiz 150 - 180 min tümən arasında aylıq almışdırlar.Belə olduqda İş Nazirindən soruşmaq lazımdı ki, bu cür ayrı -seçkilik və çeşidli aylıqların olmasına səbəb nədir ?

Bir qədər qəribə alınsa da,lakin Sadıqzadəni düşündürən sual budur ki, bu qədər zülmün cavabını kim verəcək ? İşçilər çox ağır əməklə məşğul olur və bunun müqabilində haqları var ki, yaxşı yaşasınlar.Lakin çəkdikləri zəhmətə görə yox, cüzü maaşlarına görə ağır şəraitdə yaşayırlar.

Bu gün Güney Azərbaycanda fabriklər bağlanır, işçilər kütləvi şəkildə işdən azad edilir və ya da aylıqları aylarla verilmir.Bu da səbəb olur ki, fabrikdə, şəhərdə kütləvi etiraz aksiyaları keçirirlər. Bütün bunlara baxmayaraq, öz haqqını tələb edən zəhmətkeşlər İran fars rejiminin feodalizmdən qalmış ən gözəl mükafatı olan zindanla hədələnirlər.

Gərək fars rejimi unutmasın ki, heç bir zülm əbədi deyil.Çünki insanın gözü həmişə işıq axtarır.Bu da imkan vermir ki, o qaranlığa qapılıb qalsın.

Ərdəbil futbol heyətinin rəhbəri bildirib ki, dövlət və ayrı -ayrı şəxslər futbola maliyyə yardımı etmədiklərindən Ərdəbilin futbol komandası öz ağır günlarini yaşayır və bu da bais olub ki, onların göstəriciləri hədsiz dərəcədə aşağı düşüb.

Qeyd edək ki, bu gün Ərdəbildə pis vəziyyətdə olan təkcə futbol komandası deyil, işçilər aylarla maaşlarını ala bilmirlər, dilənçilərin sayı 47 faiz atrıb, sipd və narkomaniya baş alıb gedir və s.Bütün bunlara da İran fars rejimi maliyyə ayırmadığı bir zamanda, mədəni istirahət üçün olan futbolun davasın döymək bir qədər yersiz olur.Hələ bunlar nədir ki ? O, hətta bildirmişdi ki, Ərdəbildə qadın futbol komandasının həqiqi mənada yaranması vaxtıdır.Türk arkadaşlarımız demişkən, deyəsən bu kişi qafasını üşüdüb. Ya da başqa planetdən gəlib. Özü də 2006 may hadisələrindən,sentyabr olaylarından, 21 fevral Ana Dili Günü, 8 mart qadinlar günündən sonra, hansısa təsadüfdən bir başa Ərdəbilin mərkəzinə düşüb, qoltuqunda top və indi bu topu kiminsə qapısına vurmaq istəyir.

Əzizim,İranda əgər qadına başın açmağa imkan vermirlərsə, bəs qıçın çırmayıb top - top oynamağa imkan verəcəklər ?

Ermənistanın Xarici İşlər Naziri elan edib ki, martın axırında İrandan Ermənistana çəkilən qaz kəmərinin rəsmi açılışı olacaq.Qeyd edək ki, bu xəttin məxarici 120 milyon dollardır və 2004 - cü ilin noyabrında çəkilməyə başlanmışdır.Birinci mərhələdə Ermənistan 400 milyon kub metr İrandan qaz alacaq və bu rəqəm çox az bir zamanda 3, 2 milyard kub metrə qədər qalxacaq.İranla Ermənistan arasındakı müqaviləyə əsasən 20 ilin ərzində 36 milyard kub metr ən azı alcaq və bu rəqəm 47 milyard kub metrə qədər də qalxa bilər.

Ərdəbilin şimalında yerləşən və 100 mindən artıq əhalisi olan Gərminin fərmandarı bildirmişdir ki, burda içməli su çatmır və o bildirmişdir ki, əgər yetərincə büdcədən pul ayrılarsa, məsələ müsbət şəkildə həll olunar.

Qeyd edək ki, Güney Azərbaycanın qədim şəhər abidələrini yerlə - yeksan edib Ermənistan kimi bir işğalçı dövlət üçün qaz kəməri çəkilir, amma Azərbaycan türkləri öz qədim dədə - baba yurdlarında içməli su tapmırlar.

"TÜRK FORUMU GÜNEY AZƏRBAYCAN TÜRKÜNÜ UNUTDU"

Məmməd Rza Ağapur: "Məgər Güney Azərbaycan türk coğrafiyasından kənardır?"
Martın 9-da Bakıda keçirilən Azərbaycan və Türk diaspor təşkilatlarının I-ci Forumunda başlıca müzakirə mövzusu Ermənistanın Azərbaycan torpaqlarını işğalı və erməni lobbisinin qondarma "erməni soyqırımı" adı ilə dünyada Türkiyə əleyhinə apardığı kampaniyaya qarşı əks-təbliğat imkanları olub. Lakin, forumun gedişində Güney Azərbaycan Milli Azadlıq Hərəkatı, Güneydə soydaşlarımızın qarşılaşdığı çeşidli problemlər nədənsə yada salınmayıb.
Forumun iştirakçısı, İsveç Azərbaycan Federasiyonunun sədri
Məmməd Rza Ağapur "Türküstan qəzeti"nə açıqlamasında Güneyə olan bu münasibətin dözülməz olduğunu söylədi: "Biz istərdik ki, 35 milyonluq Azərbaycan türkü də bu foruma daxil olsun. Çox böyük bir tədbirdi, doğrudan şad olduq. Xəyallarımızda yaşatdığımız günləri gördük. Önəmli məsələlər dartışıldı. İki gündür bunun təsirindən çıxa bilməmişəm. Sadəcə bir məsələ var ki, sıxıldım. Bu da Güney Azərbaycan məsələsinə diqqətin ayrılmamasıdır. Mən İsveçdə Azərbaycan türkü olaraq qar, yağış altında Kərkük türklərinin, Kıbrıs türklərinin problemləri ilə bağlı aksiyalarda iştirak etmişəm. Bu problemləri Azərbaycan türkünün problemi bilmişəm. Bunlar bizim borcumuzdur. Amma təəssüf ki, bu forumda Güney Azərbaycan məsələsi müzakirəyə çıxarılmadı. Məgər Güney Azərbaycan türk coğrafiyasından kənardır? 35 milyonluq Güney Azərbaycan türkünün gözü bu foruma yönəlmişdi. Demirik ki, forum Güneyin istiqlalı ilə bağlı bir sənəd qəbul etsin. Amma Güney Azərbaycanda insan hüquqlarının müdafiəsi ilə bağlı bir qətnamə qəbul etmək olmazdımı? Hansını ki, bu gün Amerika dövlət qurumları, Avropa Parlamenti, dünya hüquq müdafiə təşkilatları edir. Güney Azərbaycanla bağlı bir qərarın verilməsini təklif edəcəkdim. Amma təəssüf ki, söz ala bilmədim. Bu gün 50 milyonluq Azərbaycan türk millətinin bütün problemləri ilə bağlı qərarlar alınmalıdır. Biz sözdə yox, əməldə birləşməliyik".
Məmməd Rza Ağapur yeri gəlmişkən, son zamanlar Güney Azərbaycanın bayrağı ətrafında gedən müzakirələrlə bağlı da fikrini söylədi: "Bütün millətimizə səslənirəm. Güney Azərbaycanda ikinci bir bayraq olmayacaq. Güney Azərbaycanda simvol ola bilər. Amma 50 milyonluq Azərbaycanın sadəcə bir bayrağı var, o da Məmməd Əmin Rəsulzadənin qaldırdığı üçrəngli bayraq. Bir millətin bir milli bayrağı ola bilər. Gələcəkdə Güneydə müstəqil dövlət olacaqsa, məcburuq bir bayrağımız olsun. Amma bir milli bayrağımız var. Azərbaycan bayrağı 50 milyonluq Azərbaycan türk millətinin canıdır, varıdır, qanıdır, namusudur. Bu bayrağa əyri baxan yalnız fars rejimi, rus imperiyası və erməni daşnakı ola bilər".

Mərənd şəhərinin giriş nöqtələrini mərəndlilər neçə illərdi ki, ölüm zonası adlandırırlar. Və bəzən də bir -birlərinə zarafatla deyirlər ."Əgər əzraili öz gözünlə görmək istəyirsənsə, get ora".Bu bir zarafatdır, amma bütün zarafatların kökünda həqiqətin mayası durur. Bu zarafatın yaranmasına səbəb hər il o yerdə saysız-hesabsız maşın qəzasının olması ilə bağlıdır. Qeyd edək ki, yerli əhali bununla bağlı əlaqədar təşkilatlara və müvafiq orqanlara müraciət etmələrinə baxmayaraq, yolla bağlı hələ ki, yaxşı nəticə əldə olunmamışdır.Beləki dünən, martın 13 -də aldığımız məlumata görə Mərəndin girəcəyində bir neçə maşının toqquşması nəticəsində 20 nəfərdən artıq adam ölmüş və onlarla adam ağır yaralanmışdır. Ölənlərin içərisində 2 nəfər Urmiyə Universitetinin qız tələbəsi,az yaşlı uşaq və bir neçə nəfər orta yaşlı vardır.

Hadisənin şahidi olanlar məlumat verirlər ki, ölənlər saatlarla yaralı halda yolun qırağında və xiyabanda qalmış, qanaxması ucbatından tələf olmuşdurlar.Amma İran dövlət televiziyası bu hadisə ilə əlaqədar bildirir ki, böyük yük maşınının nasazlığı ucbatından onun tormuzu tutmamış və sürətlə gələn bir neçə maşın ona dəyərək qəza baş vermişdir.Yalnız iki nəfər işıq idarəsinin işçisinin öldüyünü bildirirlər.

Aşkar şəkildə görünür ki, İran fars rejimi hadisəni təhrif edir. Buna da səbəb rejim yolların beynəlxalq səviyyədə təmirinə büdcə ayırmır və milləti çaşdırmaq üçün yalan xəbər yayır və bunula da öz günahını örbasdır edir.

Sonda hadisə yerindən çəkilmiş bir neçə şəkli sizin diqqətinizə çatdırırıq. Buyurun baxın.Urəkaçan olmasa da, lakin milli faciəmizə baxmaq millətin halını unutmamağa sövq edə bilər.