بسم الله الرحمن الرحیم

یاشاسین بو ائلین مرد اوغوللاری!

گونلرین بیر گونو بابک قالاسینداکی ییغیناجاغین فیلمینه باخیردیم؛ اردبیل اوشاقلارینین گؤرتوروب و گتیردیگی فیلمه. دئییردیم گؤروم نه‌خبر!؟! دئییلن‌لرین هانکی‌سی دوز دور؛ او طرف دئیه‌ن یا بو طرف دئیه‌ن. باخدیغیم فیلملرین محتواسی بیر یانا آنجاق اوزوندن صداقت یاغیردی. اما فیلمین محتواسیندا هر ایکی طرفین سؤزلرینه صدق ائده‌ن منظره‌لر و لحظه‌لر گؤردوم. ائله‌سین گؤردوم کی نه آذربایجانی تانییاندیر و نه آنادیلینین حؤرمتین قانان، آنجاق چالیب اویناماق و اونا تای ایشلرینه یئر آختاریرمیش!. ائله‌سین گؤردوم آذربایجانین دردلرین دوشونوب لکن چالیب اویانایانلارا و اونلارا تای خاصیت‌سیز قوشون قارالتیسنا سئوینیب و گووه‌نیر؛ گومان ائدیر اونلاردان بونلارا یارـ یولداش چیخا بیلر. آما بو جمعین ایچینده اوغوللاردا گؤردوم کی شدتلی زورنا ـ بالابان سسی کی چوخو حاکمیت طرفینده‌ن یاییلیردی اونلاری اؤزونه مشغول ائتمه‌یییب. بو اوغوللار میللت‌لرینین ناله و سیزیلتیلارین هرزه سسلرین مقابلینده اونوتمامیشلار! بو سسلرین هامی‌سیندان گوجلو بیر پلاکارد گؤردوم بئله یازیلمیشدیر: «هانی بو ائلین مرد اوغوللاری!؟!» اؤز اؤزومه دئدیم ناگران اولما قارداشیم؛ بیزیک بو ائلین مرد اوغوللاری! چوخ زامانلاردان سونرا اردبیلین قاراباغ مسجیدینین حماسه‌سیندن سونرا «یاشیل موغان» قزئتینه بیر رجز یازمالیدیم نئیه کی قارداش یاخشی دئمیش«بیز ازیله ـ ازیله اوجالا بیله‌ریک؛ بیز دؤیه‌نلر آلچالاجاغلار!» رجزین عنوانینا بیر سؤز یازدیم کی قالاداکی یازی‌یا (پلاکاردا) جاواب وئرمیش اولا. یازدیم «بیزیک بو ائلین مرد اوغوللاری!» آمما بو گون او زامان‌کی آزادلیق یوخدور. نه قالایا پلاکارد آپارماق آسان‌دیر، نه‌ده قزئت‌لرده رجز یازماق. آللاهین سایتیندا بیزیم اوزوموزه باغلاییب‌لار آما اوره‌ییم دئییر بیزیم حرکتیمیز سرعت‌له انکشاف ائدیب. نئیه دؤرد ایل بوندان قاباق سایتلاری باغلامیردیلار!؟ نئیه قزئت‌لری بو گونکو تکین سیخینتی‌یا سالمیردیلار؟! بو نئیه‌لر بیر طرفدن و آذربایجانین ایگید اوغوللاری‌نین سئچگی کاندیدالارینا گتیردیگی فشارلار و اونلاری غیر فارس ملت‌لرین حاققیندا دانیشدیرماق کی او جمله‌دن دکتور معینی تبریزده ادب ائتمک، حجت‌الاسلام کروبی‌دن 15ـ نجی اصلین اجراسینین سؤزون آلماق و اونو بو باره‌ده جدی شکیلده دانیشدیرماق بونلاردا بیر طرفدن هامیسی اومودلار یارادیرلار. بو سیخینتی‌لارین چوخالماسی و بو سؤزلرین (15ـ نجی اصلین اجراسی) یالنیز آغیزا گتیریلیب دئییلمه‌سی بیزیم اوجالماغیمیزین یولوندا مهم علامت ساییلا بیله‌ر.

اما سون‌سؤزو یئنه‌ده اؤزوموز دئمه‌لی‌ییک، نئجه کی بو زامانا قدر فداکارانه مبارزه‌لریمیزده‌ن جاواب آلمیشیق گله‌جکده‌ده اوخ کیمی دوشمانلارین اوره‌یینه تاخیلمالی‌ییق. هر بیر حماسی ایش یالنیز بئش نفرین حضوری‌ایله‌ده گؤرولسه بومبا کیمی آچیلیب بونلارین یوخولارین پریشان ائده‌جک. بونلار بیزدن بئله قورخورلار کی سویون دامجیلتی سسینده‌ن گئجه‌نی صوبحه تک یاتانماییرلار دئییرلر بس کی بیزیم ایاقلاریمیزین سسی‌دیر نئیه کی بیلیرلر بیز یولداییق، بونلاری محاصره ائتمیشیک. داها بوگون دئیه‌نمیره‌م هانی بو ائلین مرد اوغوللاری نئیه کی مرد اوغوللار دکتر معین‌ین ایکی اوزلو سؤزلرینه جاواب وئره‌نده اؤزلرین گؤستردیلر. مرد اوغوللار بعضی ملت‌لرین خطا گئتدیگی یولدان اوزاق گزدیلر و معین‌کیمی‌لره و لاریجانی کیمی‌لره یوخ جاوابی وئردیلر. ایندی یالنیز آذربایجان اوغوللارینا بیر سؤز دئمک اولار: «یاشاسین بو ائلین مرد اوغوللاری»!

والسلام علیکم و رحمة‌الله

عبدالعزیز عظیمی قدیم

قوم شهری